Bihainim Gutpela Piksa Bilong Ol Profet—Joel
1. Olsem wanem yumi inap bihainim pasin daun bilong profet Joel taim yumi autim tok?
1 Profet Joel em i husat? Em i tok, em i “pikinini bilong Petuel.” (Jol. 1:1) Dispela profet i gat pasin daun i autim strong tok bilong Jehova, em i no stori long wok bilong em yet olsem man bilong autim tok. Olsem tasol, taim yumi autim tok yumi stiaim tingting bilong ol man i go long Jehova na Baibel, na yumi no litimapim nem bilong yumi yet. (1 Kor. 9:16; 2 Kor. 3:5) Na tu, dispela tok yumi autim long ol man em i strongim yumi. Wanem ol samting long tok profet bilong Joel inap strongim yumi long mekim wok bilong God na wetim gutpela samting long bihain?
2. De bilong Jehova i kam klostu tru na dispela i kirapim yumi long mekim wanem?
2 ‘Klostu Bai De Bilong Bikpela i Kamap.’ (Jol. 1:15): Joel i bin raitim dispela tok inap planti tausen yia i go pinis, tasol nau yumi stap long taim bilong laspela truim bilong en bai kamap. Ol pasin bilong graun i wok long i go nogut moa na ol man long teritori i les na tok bilas taim yumi autim tok, dispela i kamapim klia olsem las de bilong ol pasin nogut bilong nau i kamap pinis. (2 Tim. 3:1-5; 2 Pita 3:3, 4) Taim yumi tingim olsem pinis i kam klostu, i gat as tru na yumi putim wok autim tok i stap nambawan samting long laip bilong yumi.—2 Pita 3:11, 12
3. Wai na wok autim tok i bikpela samting moa taim yumi go klostu long taim bilong bikpela hevi tru?
3 ‘Bikpela Bai Lukautim Ol Manmeri Bilong En.’ (Jol. 3:16): Guria em dispela ves i stori long en inap makim tasol taim bilong bikpela hevi tru, em taim strafe bilong Jehova bai painim dispela graun. Yumi belgut bikos yumi save Jehova bai kisim bek ol gutpela wokman bilong em long dispela taim. (Rev. 7:9, 14) Taim yumi autim tok na lukim hau Jehova i lukautim na strongim yumi, yumi kisim strongpela bilip na pasin bilong sanap strong na dispela bai helpim yumi long taim bilong bikpela hevi tru.
4. Bilong wanem yumi inap amamas na wetim de bilong Jehova i kamap?
4 Sampela i tok Joel i save autim tok long ol samting nogut tasol, tasol tok bilong em i strongim lain bilong God long wetim God i kisim bek ol. (Jol. 2:32) Taim yumi wetim dispela de i kamap, yumi mas bilip na wok strong long autim gutnius bilong Kingdom Bilong God na bihainim tok bilong Joel 2:23: “Yupela i mas amamas long ol samting mi God, Bikpela bilong yupela.”