Bihainim Gutpela Piksa Bilong Ol Profet—Hosea
1. Yu inap givim wanem askim long yu yet?
1 ‘Mi redi long daunim wanem ol laik bilong mi bambai mi inap mekim wok bilong Jehova?’ Ating yu bin givim dispela askim long yu yet taim yu tingim tingim long bel ol gutpela pasin na pasin marimari bilong God. (Sng. 103:2-4; 116:12) Profet Hosea i redi long mekim ol samting Jehova i tokim em long mekim, maski em i mas daunim sampela laik bilong em yet. Olsem wanem yumi inap bihainim pasin bilong Hosea?
2. Olsem wanem Hosea i stap olsem gutpela eksampel long pasin bilong autim tok?
2 Autim Tok Long Taim Bilong Hevi: Hosea i givim dispela tok long 10-pela lain bilong Israel, em klostu ol i lusim pasin bilong lotu tru long God. King Jeroboam Namba 2 i mekim pasin nogut long ai bilong Jehova taim em i kirapim gen pasin bilong lotuim bulmakau gol wankain olsem Jeroboam Namba 1 i bin mekim. (2 Kin. 14:23, 24) Ol king i kamap bihain i wok yet long sakim lotu i tru i go inap long taim 10-pela lain bilong Israel i bagarap long 740 B.C.E. Maski ol man i lotuim ol giaman god, Hosea i stap gut na mekim wok profet inap olsem 59 yia. Olsem wanem? Yumi wok yet long autim tok maski ol man i les long harim o ol i birua long yumi?—2 Tim. 4:2.
3. Olsem wanem samting Hosea i mekim i kamapim pasin marimari bilong Jehova?
3 Tingim Pasin Marimari Bilong Jehova: Jehova i tokim Hosea long maritim “wanpela meri” na dispela “meri bai i go mekim pasin pamuk.” (Hos. 1:2) Meri bilong em, Gomer, i bin karim wanpela pikinini man bilong Hosea, bihain em i karim 2-pela pikinini long rot bilong pasin pamuk. Pasin bilong Hosea long lusim rong bilong meri bilong em i kamapim bikpela pasin marimari Jehova i mekim long ol bikhetlain Israel. (Hos. 3:1; Rom 9:22-26) Olsem wanem? Yumi redi long daunim sampela laik bilong yumi na bai yumi inap tokaut long pasin marimari bilong Jehova long olgeta kain man?—1 Kor. 9:19-23.
4. Wanem sampela samting yumi inap lusim bilong mekim wok bilong Jehova?
4 Sampela wokman bilong Jehova i bin lusim ol gutpela wok i gat bikpela pe na bai ol inap givim bikpela hap taim moa long autim tok. Sampela i stap singel na sampela i no laik kamapim pikinini na bai ol inap mekim wok bilong Kingdom. Taim yumi tingim stori bilong Hosea, yumi inap kisim kain tingting olsem, ‘Mi no inap mekim samting Hosea i bin mekim.’ Taim yumi pilim moa yet bikpela pasin helpim bilong Jehova na larim holi spirit bilong em i strongim yumi, orait Em inap yusim yumi long mekim ol wok yumi no bin ting yumi inap long mekim, wankain olsem Hosea.—Mat. 19:26; Fili. 2:13.