Bihainim Gutpela Piksa Bilong Ol Profet—Maika
1. Ating Maika i bin tingim tingim wanem askim? Bilong wanem wok autim tok bilong em i no lus nating?
1 ‘Wanem taim bai pasin nogut bilong nau i pinis?’ Ating profet Maika i bin tingim tingim wankain askim taim em i autim tok long kot bilong Jehova bai painim lain Israel na Juda. Maski i olsem, wok autim tok bilong em i no lus nating. Long 740 B.C.E., taim Maika i stap laip yet, truim bilong ol tok profet bilong Jehova long samting bai painim ol Samaria i kamap tru. (Mai. 1:6, 7) Bihain, Jerusalem i bagarap long 607 B.C.E. (Mai. 3:12) Olsem wanem yumi inap bihainim pasin bilong Maika taim yumi wetim de bilong kot bilong Jehova long nau?
2. Olsem wanem yumi inap soim olsem yumi no les kwik taim yumi wetim de bilong Jehova? Bilong wanem yumi mekim olsem?
2 No Ken Les Kwik: Maika i tok: “Mi yet mi bilip long Bikpela. Bai em i harim prea bilong mi, na mi wetim em i kam helpim mi na bai mi stap gut.” (Mai. 7:7) Maika i no stap nating tasol na wetim dispela de i kamap, nogat. Em i bisi long mekim wok olsem profet bilong Jehova. Taim yumi wok long wetim de bilong Jehova, yumi mas “wokabaut long pasin i holi na bihainim pasin bilong givim bel tru long God.” (2 Pita 3:11, 12) Pasin bilong Jehova long i no les kwik i opim rot na long dispela haptaim i stap yet, ol man inap tanim bel na lusim pasin nogut bilong ol. (2 Pita 3:9) Olsem na yumi mas tingim tok bilong Baibel long bihainim pasin bilong ol profet long i no les kwik.—Jems 5:10.
3. Bilong wanem yumi mas askim Jehova long givim holi spirit long yumi?
3 Wet Long Jehova i Strongim Yumi: Wok Maika i mekim i gat hatwok bilong en, tasol em i bin wet long Jehova i givim strong long em long mekim dispela wok. (Mai. 3:8) Olsem na i stret Baibel i tokim yumi long wetim God i givim strong long yumi. God i save givim strong long ol man i no gat strong na bai ol i ken inapim ol wok bilong em. (Sng. 84:5, 7; Ais. 40:28-31) Olsem wanem? Yu save pilim olsem taim yu mekim wok bilong God? Yu save beten oltaim long Jehova i helpim yu long rot bilong holi spirit?—Luk 11:13.
4. Pasin bilong Maika i givim wanem gutpela skul long yumi long nau?
4 Long laip olgeta bilong Maika, em i putim wok bilong God i stap nambawan samting. Em i tingting strong long stap gut maski em i stap namel long manmeri i mekim ol pasin nogut. Olsem tasol, long olgeta de i gat ol samting i save traim pasin bilong yumi long stap gut long God. Olsem na yumi mas tingting strong long ‘wokabaut long nem bilong Jehova, em God bilong yumi, inap oltaim oltaim.’—Mai. 4:5, NW.