Strongim Poroman Taim Yumi Autim Tok
1. Olsem wanem yumi inap bihainim tingting bilong aposel Pol taim yumi autim tok wantaim narapela?
1 Taim aposel Pol i stap wantaim ol wanbilip em i save tingim olsem, dispela i gutpela taim long ‘em i strongim ol na ol i strongim em.’ (Rom 1:12) Taim yu autim tok wantaim narapela pablisa, i gutpela long mekim ol tok bilong strongim na helpim em. Na tu, yu ken stori long ol samting i bin helpim yu long mekim gut wok bilong autim tok.
2. Yumi inap mekim wanem bilong strongim poroman bilong yumi long autim tok? Bilong wanem dispela i bikpela samting?
2 Strongim Poroman: Sampela pablisa i save pret taim ol i autim tok, na dispela i save kamap ples klia long pes na krai bilong nek. Yumi inap strongim bel bilong ol taim yumi mekim gutpela tok long ol. Wanem ol narapela rot yumi inap strongim poroman? Wanpela wasman raun i save stori long ol poroman bilong em long ol samting we i mekim na em i save pret. Na olsem wanem pasin bilong beten planti taim i bin helpim em long daunim pret. Narapela brata i stori long samting i save helpim em na em i no pret, em i tok: “Bilong kirapim tok, mi save smail. Sampela taim mi save beten long God i helpim mi long smail taim mi toktok wantaim man.” Olsem wanem? I gat wanpela samting i bin strongim yu na yu no pret long autim tok? Stori long poroman bilong yu long dispela samting.
3. Yumi inap stori long poroman long wanem ol samting na dispela bai helpim em long mekim gut wok autim tok?
3 Stori Long Ol Gutpela Rot Bilong Autim Tok: Olsem wanem? Yu inap tingim wanpela sotpela tok o askim, o wanpela samting i kamap long komiuniti, na dispela i gutpela bilong kirapim tok? Yu bin lukim gutpela samting i kamap taim yu senisim liklik wanpela tok long Wok Kingdom long pasin bilong toktok wantaim man? Orait stori long poroman bilong yu long dispela. (Snd. 27:17) Taim yupela i go bilong lukim gobek, stori long poroman bilong yu olsem yu laik kirapim Baibel stadi na yu ken stori tu long hau bai yu mekim. Bihain long stadi, stori long poroman long as na yu makim dispela poin, skripsa, na pasin yu bihainim bilong stori long samting em inap helpim sumatin.
4. Bilong wanem yumi laik helpim ol poroman bilong yumi long autim tok?
4 Ol Kristen long taim bilong ol aposel ol i save helpim ol wanbilip bilong ol, na tu, ol i luksave olsem em i bikpela samting long strongim narapela narapela. (Apo. 11:23; 15:32) Aposel Pol i trenim yangpela Timoti na bihain em i kirapim Timoti long skulim ol narapela long ol samting em i bin lainim. (2 Tim. 2:2) Taim yumi mekim gutpela pasin long wanbilip Kristen long taim bilong autim tok, dispela i givim bikpela amamas long ol na ol inap mekim gut wok autim tok, na tu, dispela i amamasim Papa bilong yumi long heven.—Hib. 13:15, 16.