Bihainim Gutpela Piksa Bilong Ol Profet—Nahum
1. Yumi kisim wanem skul long Buk Nahum?
1 Ol pipia samting bilong taun Ninive bilong bipo i bagarap i stap i kamapim klia ol samting em Nahum i bin tok profet long en, olsem Jehova i belhat na mekim save long ol birua bilong em, na maski ol i strongpela birua tru, ol i no inap long abrusim belhat bilong em. (Nah. 1:2, 6) Taim yumi skelim gut tok profet bilong Nahum, dispela i givim sampela skul long yumi long wok autim tok bilong yumi.
2. Olsem wanem yumi inap mekim ol tok i strongim man?
2 Em i Mekim Gut Bel na Yumi Wet Long Gutpela Samting Bai Kamap Bihain: Sapos yu ritim Buk Nahum antap antap tasol, bai yu ting olsem em i stori tasol long ol strongpela tokaut long bagarap bai painim ol Ninive, em biktaun bilong Asiria bilong bipo. (Nah. 1:1; 3:7) Tasol dispela tokaut em i olsem wanpela gutpela nius long lain bilong Jehova. Nahum—mining bilong en, “Man Bilong Mekim Gut Bel Bilong Ol Man,”—i strongim ol Juda olsem klostu nau strongpela birua bilong ol bai i no stap moa! Nahum i tok moa olsem Jehova em i strongpela ‘ples hait bilong ol long taim bilong hevi.’ (Nah. 1:7) Taim yumi autim tok, yumi tu i autim gutnius na strongim ol narapela long kam na kisim ples hait aninit long Jehova.—Nah. 1:15.
3. Olsem wanem yumi inap bihainim pasin bilong Nahum long yusim ol eksampel na ol tok piksa?
3 Em i Yusim Ol Eksampel na Ol Tok Piksa: Jehova i kirapim Nahum long stori long ol samting i bin kamap long pinis bilong taun Ninive, na skelim wantaim Tebes (No-amon) em biktaun bilong Isip, em ol Asiria i bin pait na bagarapim. (Nah. 3:8-10) Taim yumi tokim ol man long pinis bilong pasin nogut bilong dispela taim nau, yumi ken kamapim ol tok profet bilong Baibel i kamapim klia olsem Jehova i save truim olgeta tok promis bilong em. Olsem, taim ol Babilon na Midia i go pait long biktaun Ninive long 632 B.C.E., bikpela ren i pundaun na i mekim wara Taigris i solap i go antap, olsem na strongpela banis bilong taun i pundaun. Wantu ol i kisim ol Ninive olsem ol kalabus, olsem Jehova i tok profet pinis long en.—Nah. 1:8; 2:6.
4. Taim yumi autim tok, olsem wanem bai tok bilong yumi i klia na man inap kisimgut?
4 Tok i Klia na Man Inap Kisimgut: Stail bilong Nahum long raitim stori, em i yusim ol tok we i kolim stret ol samting na kamapim ol gutpela tok piksa. Tok bilong em i klia. (Nah. 1:14; 3:1) Olsem tasol, taim yumi autim tok ol tok yumi yusim o kolim i mas klia na man inap kisimgut. (1 Kor. 14:9) Long namba 1 taim yu bungim man, tokim em long as na yu go lukim em. Taim yu stadi wantaim Baibel sumatin, helpim ol long kisim pasin bilong bilip long Jehova na Tok bilong em na long pilim tru olsem dispela tok i stret long ol.—Rom 10:14.
5. Wanem gutpela tok profet i stap long Buk Nahum i strongim yumi?
5 Bilip bilong Nahum olsem olgeta tok promis bilong Jehova i save kamap tru, dispela i stap ples klia tru long buk em i bin raitim, em Buk Nahum. Taim yumi wok long i go klostu long pinis bilong dispela pasin nogut Satan i bosim, bel bilong yumi i stap isi taim yumi tingim dispela tok promis bilong God: “I no gat wanpela man inap bikhet long em tupela taim. Nogat tru.”—Nah. 1:9.