Bihainim Gutpela Piksa Bilong Ol Profet—Habakuk
1. Bilong wanem yumi inap mekim wankain askim olsem profet Habakuk i bin mekim?
1 Pasin nogut i kamap bikpela moa, olsem na yumi inap pilim wankain olsem Habakuk. Em i askim Jehova: “Mi lukim planti hevi i kamap long ol manmeri. Bilong wanem yu larim ol dispela hevi i kamap? Olsem wanem na yu lukim ol dispela samting nogut i kamap long ol manmeri na yu no mekim wanpela samting?” (Hab. 1:3; 2 Tim. 3:1, 13) Taim yumi tingim tingim tok bilong Habakuk na pasin bilong em long i stap gut long God, dispela inap strongim yumi long wetim de bilong Jehova long mekim kot.—2 Pita 3:7.
2. Long nau, hau bai yumi inap soim olsem yumi stap gut long God?
2 Stap Gut na Kisim Laip: Habakuk i no larim ol hevi i daunim em, nogat. Em i was i stap na sanap strong long bilip. (Hab. 2:1) Jehova i tokim Habakuk olsem tok bilong Em bai kamap tru long taim stret, na “ol man i bihainim tru pasin bilong God, ol i stretpela man na ol bai i stap laip.” (Hab. 2:2-4) Olsem wanem dispela tok inap strongim ol Kristen i stap klostu tru long taim bilong pinis? Ol i no save long wanem taim stret pinis bai kamap, tasol ol i bilip tru olsem pinis bai kamap. Bilip i kirapim yumi long was i stap na putim wok autim tok i stap namba 1 samting long laip.—Hib. 10:38, 39.
3. Wai na yumi mas amamas yet long mekim wok bilong Jehova?
3 Amamas Long Jehova: Taim Gok Bilong Magok i birua long yumi, dispela bai traim bilip bilong yumi. (Ese. 38:2, 10-12) Long taim bilong pait, bikpela hevi i save painim olgeta man, na hevi i save painim tu ol man i winim pait. Ol i sot long kaikai, na ol i no gat moa haus, na sindaun bilong ol i bagarap. Yumi bai mekim wanem taim ol hevi i painim yumi? Habakuk i save olsem hevi bai painim em, olsem na em i mekim strongpela disisen long amamas yet long mekim wok bilong Jehova. (Hab. 3:16-19) Taim yumi “amamas” long Jehova, dispela bai helpim yumi long sanap strong taim ol hevi i painim yumi.—Neh. 8:10; Hib. 12:2.
4. Yumi mekim wanem gutpela wok long nau em yumi bai mekim tu long bihain?
4 Taim ol manmeri i abrusim bagarap long de bilong Jehova, ol bai wok yet long kisim save long God. (Hab. 2:14) Ol manmeri i kirap bek, ol tu bai kisim save long Jehova. Long nau, oltaim yumi mas painim rot long skulim ol man long Jehova na ol gutpela samting em i mekim!—Sng. 34:1; 71:17.