Yumi Laikim Tru Jehova, Papa Bilong Yumi

1-2. (a) Bilong wanem Jehova i opim rot long yumi inap kamap famili bilong em? (b) Jehova i mekim wanem?

JEHOVA i bin invaitim yumi long kam lotuim em. Em gutpela blesing tru! Yumi bung wantaim ol manmeri husat i dediketim laip bilong ol long God na ol i bilip long ofa bilong Jisas long baim bek yumi. Yumi stap amamas. Long nau, laip bilong yumi i gat mining, na yumi amamas na wet long kisim laip oltaim—maski yumi bai kisim laip long heven o long Paradais long graun.

² Jehova i laikim tru yumi, olsem na em i mekim bikpela samting na bai yumi inap kamap famili bilong em. (Jon 3:16) “God i baim [yumi] long bikpela pe.” (1 Kor. 6:20) Jehova i salim Jisas i kam long dai na givim laip bilong em olsem pe bilong baim bek yumi, olsem na yumi inap pas gut wantaim em. God tasol em nambawan Man tru i winim olgeta narapela man long heven na long graun, na yumi gat gutpela blesing tru long kolim em olsem Papa bilong yumi. Olsem yumi skelim long atikol i kamap paslain, Jehova em nambawan gutpela Papa bilong yumi.

3. Yumi inap mekim wanem ol askim? (Lukim tu blok “Jehova i Luksave Long Mi?”)

³ Olsem wanpela man bilong raitim Baibel i bin mekim, yumi inap askim olsem: “Em i bin mekim gut tru long mi, olsem na bai mi bekim bek wanem samting long Jehova?” (Sng. 116:12) Tingim: Yumi no inap tru long bekim bek wanpela samting long Papa bilong yumi. Maski i olsem, bel i kirapim yumi long laikim em. Aposel Jon i tok: “Yumi mekim pasin laikim, long wanem, em i bin laikim yumi pastaim.” (1 Jon 4:19) Olsem wanem yumi inap soim Papa bilong yumi olsem yumi laikim em?

STAP KLOSTU LONG JEHOVA

4. Olsem Jems 4:8 i kamapim, wai na yumi mas wok strong long go klostu long Jehova?

⁴ Jehova i laik bai yumi go klostu long em na toktok wantaim em. (Ritim Jems 4:8.) Em i kirapim yumi long “holim strong pasin bilong beten,” na oltaim em i save putim yau long yumi. (Rom 12:12) I no gat wanpela samting i save mekim em i bisi tumas o pinisim strong bilong em. Yumi save putim yau long em taim yumi ritim Tok bilong em long Baibel na ol buk na nius we i helpim yumi long kliagut long tok bilong Baibel. Na tu, yumi harim tok bilong em taim yumi putim gut yau long ol tok i kamap long ol miting Kristen. Pasin bilong toktok gut i save helpim ol pikinini long pas gut wantaim papamama, na olsem tasol, pasin bilong toktok gut wantaim Jehova i helpim yumi long pas gut wantaim em.

5. Hau bai yumi inap mekim ol beten bilong yumi i kamap gutpela moa?

⁵ Tingim wei bilong yu long beten long God. Jehova i laik bai yumi beten long em na autim olgeta tingting i stap long bel bilong yumi. (Sng. 62:8) Yumi mas givim dispela askim long yumi yet: ‘Taim mi beten, mi save kamapim ol tingting tru i stap long bel bilong mi, o mi save kolim ol wankain tok planti taim?’ Ating yu laikim tru Jehova, na yu laik strongim pasin bilong yu long pas gut wantaim em. Sapos yu laik mekim olsem, orait oltaim yu mas toktok wantaim em. Tokim em long ol samting we yu no bin tokim ol narapela long en. Tokim em long ol samting i mekim yu amamas na ol samting i mekim yu tingting planti na bel hevi. Yu mas bilip tru olsem yu inap go long em long kisim helpim.

6. Yumi mas mekim wanem na bai yumi inap stap klostu long Papa bilong yumi long heven?

⁶ Sapos yumi laik i stap klostu long Papa bilong yumi, orait yumi mas i gat pasin bilong tok tenkyu. Yumi wanbel long man bilong raitim song husat i tok: “Jehova, God bilong mi, yu bin mekim planti samting. I no gat wanpela i olsem yu; yu bin mekim planti gutpela wok, na tingting bilong yu long ol samting yu laik mekim long mipela, i moa moa yet. Sapos mi autim long ol arapela na tokim ol long en, man! Ol i planti tumas na mi no inap kaunim”! (Sng. 40:5) Yumi pilim amamas, na bel i kirapim yumi long soim amamas bilong yumi long Jehova long rot bilong ol tok na pasin yumi mekim. Dispela i mekim na yumi stap narapela kain long planti manmeri long nau. Long nau, ol manmeri i no soim tenkyu bilong ol long olgeta samting God i mekim bilong helpim ol. Wanpela mak i soim klia olsem yumi stap long “taim bilong las de” em olsem, ol manmeri i no gat pasin bilong tok tenkyu. (2 Tim. 3:1, 2) Yumi no ken bihainim dispela pasin!

7. Jehova i laik bai yumi mas mekim wanem? Bilong wanem?

⁷ Ol papamama i laik bai ol pikinini i stap olsem ol pren, na ol i no ken tok pait. Olsem tasol, Jehova i laik bai olgeta pikinini bilong em i stap gut wantaim narapela narapela. Pasin laikim namel long yumi i soim klia olsem yumi ol Kristen tru. (Jon 13:35) Yumi wanbel wantaim man bilong raitim song husat i tok: “Lukim! Em i gutpela tru long ol brata i sindaun gut wantaim na i stap wanbel!” (Sng. 133:1) Taim yumi laikim ol brata na sista bilong yumi, yumi soim klia long Jehova olsem yumi laikim em. (1 Jon 4:20) Yumi amamas tru long stap insait long famili em ol i “mekim pasin helpim long narapela narapela, na sori tru long ol”!—Efe. 4:32.

SOIM PASIN LAIKIM TAIM YU BIHAINIM TOK

8. Olsem 1 Jon 5:3 i kamapim, wanem nambawan risen bilong yumi long bihainim tok bilong Jehova?

⁸ Jehova i laik bai ol pikinini i bihainim tok bilong papamama, na em i laik bai yumi bihainim tok bilong em. (Efe. 6:1) I stret long yumi bihainim tok bilong em bikos em Man i bin wokim yumi, lukautim laip bilong yumi, na em i gat gutpela tingting moa winim olgeta narapela papamama. Tasol nambawan risen bilong yumi long bihainim tok bilong Jehova em olsem: Yumi laikim em tru. (Ritim 1 Jon 5:3.) I gat planti samting i mekim na i stret long yumi bihainim tok bilong Jehova, tasol em i no fosim yumi long bihainim tok. Jehova i givim naispela presen long yumi—yumi stap fri long mekim disisen—olsem na em i amamas sapos pasin laikim i kirapim yumi long bihainim tok bilong em.

9-10. Wai na em i bikpela samting long yumi mas save long ol lo bilong God na bihainim?

⁹ Papamama i laik bai ol pikinini i stap seif. Olsem na ol i save putim ol lo we inap lukautim ol pikinini. Taim ol pikinini i bihainim ol dispela lo, ol i soim olsem ol i trastim na rispektim papamama. Olsem na em i bikpela samting long yumi mas save gut long ol lo bilong Papa bilong yumi na bihainim ol dispela lo. Taim yumi mekim olsem, yumi soim Jehova olsem yumi laikim na rispektim em, na tu, yumi lukautim yumi yet. (Ais. 48:17, 18) Taim ol man i sakim Jehova na ol lo bilong em, ol i save kamapim hevi long ol yet.—Gal. 6:7, 8.

¹⁰ Taim yumi bihainim ol pasin em Jehova i orait long en, dispela i lukautim yumi na yumi no mekim wanpela samting bilong bagarapim bodi na tingting bilong yumi, o nogutim yumi long sait bilong bilip. Jehova i save long ol samting i gutpela bilong helpim yumi. Wanpela meri, nem bilong em Aurora, em i stap long Amerika, na em i tok: “Mi save olsem taim mi bihainim tok bilong Jehova, oltaim dispela bai helpim tru laip bilong mi.” Ating yumi olgeta i pilim olsem. Olsem wanem long yu? Taim yu bihainim tok bilong Jehova, dispela i bin helpim yu olsem wanem?

11. Beten i helpim yumi olsem wanem?

¹¹ Pasin bilong beten i helpim yumi long bihainim tok long gutpela taim na long taim bilong hevi. Sampela taim yumi bai pilim hatwok long bihainim tok bilong Jehova, tasol oltaim yumi mas daunim laik bilong yumi long mekim rong. Man bilong raitim song i askim God long helpim em: “Yu mas kirapim laik bilong mi long bihainim tok bilong yu.” (Sng. 51:12) Wanpela painia sista, nem bilong em Denise, em i tok, “Sapos mi pilim hatwok long bihainim wanpela lo bilong Jehova, mi save beten askim em long strongim mi long bihainim stretpela pasin.” Yumi ken bilip tru olsem oltaim Jehova bai helpim yumi taim yumi mekim kain beten olsem.—Luk 11:9-13.

HELPIM OL NARAPELA LONG LAIKIM PAPA BILONG YUMI

12. Olsem Efesus 5:1 i kamapim, yumi mas mekim wanem?

¹² Ritim Efesus 5:1. God “i laikim [yumi] tumas na [yumi] stap olsem ol pikinini bilong em,” olsem na yumi wok strong tru long bihainim ol pasin bilong em. Yumi bihainim ol pasin bilong em taim yumi soim pasin laikim, gutpela pasin, na fogivim ol narapela. Planti manmeri i no save long God, olsem na taim ol i lukim ol gutpela pasin bilong yumi, dispela inap kirapim ol long kisim sampela save moa long em. (1 Pita 2:12) Ol papamama Kristen i mas tingim ol pasin bilong Jehova na dispela i mas stiaim pasin ol i mekim long ol pikinini. Taim ol i mekim olsem, dispela inap kirapim ol pikinini tu long kisim pasin bilong pas gut wantaim gutpela Papa bilong yumi.

13. Yumi mas putim tingting i go long wanem samting?

¹³ Liklik pikinini i save amamas tru long papa bilong em, na em i save amamas long stori long ol narapela long papa bilong em. Yumi tu i amamas tru long Papa bilong yumi, Jehova, na yumi laik bai ol narapela tu i save long em. Yumi pilim wankain olsem King Devit, em i tok: “Oltaim mi bai preisim Jehova.” (Sng. 34:2) Tasol olsem wanem sapos yumi gat pasin bilong sem? Olsem wanem yumi inap kisim pasin bilong strongim bel? Yumi inap strongim bel taim yumi putim tingting i go long amamas yumi inap givim long Jehova, na bikpela helpim ol narapela inap kisim taim ol i save long em. Jehova bai strongim bel bilong yumi. Em i bin helpim ol Kristen long taim bilong ol aposel, na em bai helpim yumi tu.—1 Tes. 2:2.

14. Wai na em i bikpela samting long yumi mas insait long wok bilong kamapim ol disaipel?

¹⁴ Jehova i no save mekim wansait pasin, na em i save amamas taim yumi soim pasin laikim long ol narapela maski ol i bilong kain kain ples na sindaun. (Apo. 10:34, 35) Wanpela gutpela rot bilong soim pasin laikim long ol narapela em long autim gutnius long ol. (Mat. 28:19, 20) Hau bai dispela wok i helpim ol? Taim ol i putim yau long yumi, ol inap mekim laip bilong ol i kamap gutpela moa long nau na ol inap kisim laip oltaim long bihain.—1 Tim. 4:16.

LAIKIM PAPA BILONG YUMI NA STAP AMAMAS

15-16. Wanem ol samting i mekim na yumi ken i stap amamas?

¹⁵ Jehova em Papa i gat pasin laikim, olsem na em i laik bai famili bilong em i stap amamas. (Ais. 65:14) I gat planti samting i mekim na yumi inap i stap amamas long nau maski hevi i painim yumi. Yumi bilip tru olsem Papa bilong yumi long heven i laikim tru yumi. Yumi gat stretpela save long Tok Bilong God, long Baibel. (Jer. 15:16) Yumi stap wanfamili wantaim ol manmeri husat i laikim Jehova, laikim tru ol stretpela lo bilong em, na laikim narapela narapela.—Sng. 106:4, 5.

¹⁶ Yumi ken i stap amamas yet bikos yumi bilip tru olsem laip bilong yumi bai kamap gutpela moa long bihain. Yumi save olsem klostu nau Jehova bai rausim olgeta pasin nogut, na taim Kingdom bilong em i bosim yumi, Paradais bai kamap gen long graun. Na tu, yumi bilip tru olsem olgeta manmeri husat i dai pinis, ol bai kisim laip gen na bungim ol wanfamili na ol pren. (Jon 5:28, 29) Bikpela amamas tru bai kamap long dispela taim! Bikpela samting moa em olsem, yumi bilip tru olsem klostu nau olgeta lain long heven na long graun bai givim ona na biknem long Papa bilong yumi, na lotuim em.