Askim Bilong Ol Rida

Ol pasin em Galesia 5:22, 23 i kolim, dispela tasol em “ol pasin holi spirit i kamapim”?

Ol dispela ves i kolim 9-pela pasin em ol Kristen i mas bihainim: “Ol pasin holi spirit i kamapim em olsem, pasin laikim, amamas, bel isi, i no les kwik, pasin helpim, gutpela pasin, bilip, pasin isi, na bosim bel.” Tasol yumi no ken ting olsem ol dispela gutpela pasin tasol em ol pasin we holi spirit inap helpim yumi long kisim.

Tingim tok aposel Pol i mekim long ol ves i stap paslain: “Ol pasin em laik nogut bilong bel i kamapim . . . em ol pasin olsem, pasin pamuk, pasin i no klin, pasin bikhet na i no sem, lotuim imis, olkain wok bilong ol spirit nogut, birua, tok pait, jeles, belhat tumas, kamapim kros, brukim lain, bihainim man, bel nogut, dring longlong, mekim pati i gat planti pairap, na olkain pasin olsem.” (Gal. 5:19-21) So Pol inap kolim ol narapela pasin tu olsem “ol pasin em laik nogut bilong bel i kamapim,” olsem i stap long Kolosi 3:5. Long wankain wei, bihain long em i kolim 9-pela gutpela pasin, em i tok: “I no gat wanpela lo i tambuim ol dispela kain pasin.” (BB) So Pol i no kolim olgeta gutpela pasin em holi spirit inap helpim yumi long kisim.

Yumi luksave long dispela taim yumi skelim ol pasin bilong holi spirit wantaim tok Pol i raitim long kongrigesen long Efesus: “Lait i save kamapim olgeta kain gutpela pasin na stretpela pasin na tok i tru.” (Efe. 5:8, 9) Yes, wantaim stretpela pasin na tok i tru, “gutpela pasin” tu em pasin we “lait i save kamapim,” na tu, “holi spirit i kamapim” dispela pasin.

Na tu, Pol i tokim Timoti long “wok long kisim stretpela pasin, pasin bilong givim bel tru long God, bilip, pasin laikim, pasin bilong sanap strong, na pasin isi”—6-pela gutpela pasin. (1 Tim. 6:11) Namel long ol dispela pasin, 3-pela tasol (bilip, pasin laikim, na pasin isi) em ol “pasin holi spirit i kamapim.” Tasol Timoti i nidim holi spirit long helpim em long kisim tu ol narapela pasin: stretpela pasin, pasin bilong givim bel tru long God, na pasin bilong sanap strong.—Skelim Kolosi 3:12; 2 Pita 1:5-7.

Olsem na Galesia 5:22, 23 i no kolim olgeta pasin em ol Kristen i mas kisim. Holi spirit inap helpim yumi long kisim 9-pela pasin em Pol i kolim olsem “ol pasin holi spirit i kamapim.” Tasol yumi mas kisim planti moa gutpela pasin bambai yumi inap kamap strong long bilip na “kisim nupela pasin em laik bilong God yet i as bilong en na i poroman wantaim stretpela pasin na pasin bilong stap gut long narapela.”—Efe. 4:24.