Askim Bilong Ol Rida

Yu ting tok bilong Pol long 1 Korin 15:29 i makim olsem sampela Kristen long pastaim i bin kisim baptais bilong helpim ol man i dai pinis?

Nogat. I no gat wanpela tok long Baibel o long ol buk bilong histori i sapotim dispela tingting.

Long planti Baibel, hau ol man i trensletim dispela ves i kirapim sampela man long ting olsem long taim bilong ol Kristen long pastaim, ol man i bin kisim baptais bilong helpim ol man i dai pinis. Wanpela eksampel em: “Sapos i no gat kirap bek, ol man i kisim baptais bilong helpim ol man i dai pinis, ol bai mekim wanem?”—New International Version.

Skelim tok bilong 2-pela saveman bilong Baibel. Saveman Dr. Gregory Lockwood i tok i no gat evidens long Baibel na long ol buk bilong histori i soim olsem ol man i bin kisim baptais bilong helpim ol man i dai pinis. Narapela saveman em Profesa Gordon D. Fee, em i wanbel long dispela tok. Em i tok: “I no gat eksampel long Baibel o long ol buk bilong histori bilong soim olsem ol man i bin mekim kain baptais olsem. N[upela] T[estamen] i no stori liklik long kain baptais olsem, na i no gat evidens i soim olsem ol Kristen long pastaim na ol lotu i bin kamap bihain long taim ol aposel i dai, ol i bin mekim kain baptais olsem.”

Baibel i tok ol disaipel bilong Jisas i mas “kamapim ol disaipel long olgeta lain man, na baptaisim ol” na “skulim ol long bihainim olgeta samting” em i bin tokim ol long mekim. (Mat. 28:19, 20) Paslain long man i kisim baptais na kamap wanpela disaipel, em i mas kisim save long Jehova na Jisas, bilip long tupela, na bihainim tok bilong tupela. Man i dai pinis na em i slip long matmat, em i no inap mekim ol dispela samting; na tu, Kristen i stap laip i no inap mekim ol dispela samting bilong helpim wanpela husat i dai pinis.—Ekl. 9:5, 10; Jon 4:1; 1 Kor. 1:14-16.

So tok bilong Pol i makim wanem samting?

Sampela manmeri long Korin i tok ol man i dai pinis i no inap kirap bek. (1 Kor. 15:12) Pol i helpim ol long luksave olsem dispela tingting ol i holim i no stret. Em i tok, “long olgeta de dai i laik painim mi.” Em i stap laip yet taim em i mekim dispela tok. Tok bilong Pol i makim olsem maski em i bungim ol hevi we em inap lusim laip bilong em, em i bilip tru olsem em bai kirap bek na kisim laip long heven, wankain olsem Jisas i bin kirap bek na kisim laip long heven.—1 Kor. 15:30-32, 42-44.

God i bin anointim ol Kristen long Korin, tasol bilong kisim laip long heven, ol i mas save olsem ol bai karim pen na hevi na dai na bihain ol bai kirap bek. Taim ol i ‘baptais na pas wantaim Krais Jisas,’ dispela i makim tu olsem ol i ‘baptais na pas wantaim em long dai bilong em.’ (Rom 6:3) Olsem Jisas, ol tu i mas karim ol pen na hevi na dai na bai ol inap kirap bek na kisim laip long heven.

Winim 2-pela yia bihain long Jisas i kisim baptais long wara, em i tokim tupela aposel bilong em olsem: “Dispela baptais mi wok long kisim, yutupela tu bai kisim.” (Mak 10:38, 39) Jisas i no baptais long wara long dispela taim, nogat. Tok bilong Jisas i makim olsem pasin bilong em long i stap gut long God bai kirapim ol man long kilim em i dai. Pol i tok ol Kristen em God i bin anointim, ol bai “karim pen na hevi wantaim Krais, [na ol] bai kisim glori wantaim em tu.” (Rom 8:16, 17; 2 Kor. 4:17) So ol tu i mas dai na bai ol inap kirap bek na kisim laip long heven.

Olsem na yumi ken tok, stretpela trenslesen bilong dispela tok bilong Pol em olsem: “Sapos i no gat kirap bek bilong ol man i dai pinis, orait olsem wanem long ol man i kisim baptais bilong i dai? Sapos i no gat kirap bek, orait wai na ol i kisim kain baptais olsem?”