Yu Tingim Yet?

Yu bin ritim gut ol Wastaua bilong dispela yia? Orait, lukim sapos yu inap bekim ol dispela askim:

Yumi mas soim wanem pasin long ol lain em God i anointim?

Yumi amamas long pasin bilong ol long bilip; tasol yumi no laik givim biknem tumas long ol. Yumi mas abrusim pasin bilong laikim tumas ol na “mekim ol switpela tok” long ol. (Jut 16) Yumi no ken givim ol askim we inap semim ol long sait bilong ol samting ol i bilip na wet long en.—w20.01, p. 29.

Wanem samting inap helpim yu long save tru olsem Jehova i luksave long yu?

Baibel i tokaut olsem Jehova i save long yu paslain long mama i karim yu. Na em i save harim ol beten bilong yu. Em i save long tingting bilong yu na samting i stap long bel bilong yu, na pasin bilong yu inap mekim Jehova i amamas o bel hevi. (1 Sto. 28:9; Prov. 27:11) Em i bin kirapim yu long i go long em.—w20.02, p. 12.

Wanem sampela eksampel long taim bilong toktok na i no taim bilong toktok?

Yumi save amamas long tokim ol narapela long Jehova. Yumi mas toktok sapos yumi lukim olsem narapela i laik mekim rong. Ol elda i save givim tok kaunsel long ol narapela taim ol i luksave olsem i gat nid long ol i mas mekim olsem. Yumi no laik stori (o tokaut) long wok bilong yumi long wanpela kantri we gavman i putim tambu long en. Yumi no laik tokim ol narapela long sampela tok hait we i no stret long narapela i save long en.—w20.03, p. 20-21.

Olsem wanem ol grasopa em Joel sapta 2 i stori long en i no wankain long ol grasopa em Revelesen sapta 9 i stori long en?

Joel 2:20-29 i tok God bai rausim ol grasopa i go longwe tru na em i promis olsem em bai givim bek olgeta samting i bin lus taim ol grasopa i bin kamapim bikpela bagarap. Bihain long dispela, God i kapsaitim holi spirit bilong em. Dispela i kamap tru taim ami bilong Babilon i go pait na daunim lain Israel na ol samting i kamap bihain long en. Revelesen 9:1-11 i stori long ol lain em Jehova i anointim, ol i olsem ol grasopa long taim bilong yumi, ol i tokaut olsem God bai givim panismen long ol man nogut, dispela i mekim na ol man i stap long sait bilong Satan ol i tingting planti.—w20.04, p. 3-6.

Husat em king bilong not long nau?

Rasia na ol sapota bilong en. Ol i mekim nogut long ol manmeri bilong God, ol i tambuim wok bilong yumi long autim tok na ol i heitim tru ol Witnes. King bilong not na king bilong saut i wok yet long pait long narapela narapela.—w20.05, p. 13.

Ol pasin em Galesia 5:22, 23 i kolim, dispela tasol em “ol pasin holi spirit i kamapim”?

Nogat. Holi spirit i helpim yumi long kamapim sampela moa gutpela pasin, olsem stretpela pasin. (Efe. 5:8, 9)—w20.06, p. 17.

Wanem wanpela hevi inap kamap taim yu putim ol poto na ol vidio bilong yu yet long Intenet?

Ol poto na vidio yu putim long Intenet inap kirapim ol narapela long kisim tingting olsem yu gat pasin hambak, na yu no gat pasin daun.—w20.07, p. 6-7.

Ol Kristen inap kisim wanem skul long ol man i save gut long kisim pis?

Ol i save go long rait taim na long rait ples bilong painim ol pis. Ol i save gut long yusim rait tul. Na ol i save strongim bel na wok long kain kain taim na ples. Yumi ken mekim wankain long wok autim tok bilong yumi.—w20.09, p. 5.

Wanem sampela rot yumi inap helpim ol Baibel sumatin long strongim pasin bilong ol long laikim Jehova?

Yumi ken kirapim ol long ritim Baibel long olgeta de na tingim tingim long bel ol tok ol i ritim. Na yumi ken skulim ol long pasin bilong beten.—w20.11, p. 4.

Wanem lain i insait long dispela tok: “Long rot bilong Krais ol man bai kisim laip”?—1 Kor. 15:22.

Aposel Pol i no tok olsem olgeta man bai kirap bek. Tok bilong em i makim ol Kristen em God i anointim, em ol lain i “kamap holi na [ol] i pas wantaim Krais Jisas.” (1 Kor. 1:2; 15:18)—w20.12, p. 5-6.

Ol Kristen God i anointim em ol i senis wantu tasol “olsem man i blinkim ai, long taim laspela trampet i krai,” ol bai mekim wanem wok?—1 Kor. 15:51-53.

Ol bai mekim wok wantaim Krais long bosim ol manmeri wantaim stik ain. (Rev. 2:26, 27)—w20.12, p. 12-13.