Beten Inap Helpim Yu

Pamela i tok: “Long taim mi wok long kisim marasin bilong sik kensa, mi save pret nogut tru. Tasol taim mi beten long Jehova God, mi save pilim bel i stap isi na mi inap tingting klia. Mi wok yet long kisim bikpela pen bilong dispela sik, tasol beten i helpim mi long holim stretpela tingting. Taim ol man i askim mi sapos mi orait, mi save tok, ‘Mi no orait, tasol mi amamas!’”

Em tru, yumi no ken wet inap long wanpela bikpela hevi i laik bagarapim laip bilong yumi i kamap na nau yumi beten, nogat. Yumi olgeta i save bungim kain kain hevi, bikpela na liklik, na planti taim yumi pilim olsem yumi nidim helpim bilong karim ol dispela hevi. Yu ting beten inap helpim yumi?

Baibel i tok: “Olgeta hevi yu karim, yu mas putim long han bilong Jehova, na em bai strongim yu. Em i no inap larim stretpela man i pundaun.” (Buk Song 55:22) Man, em gutpela tok tru i mekim isi bel bilong yumi! So beten inap helpim yumi olsem wanem? Taim yu beten long God long stretpela rot, em bai givim yu samting yu nidim bilong karim ol hevi.—Lukim blok “Samting Beten Inap Mekim Long Yu.”