Olgeta Long Kongrigesen Inap Helpim Baibel Sumatin Long Winim Mak Bilong Kisim Baptais

1-2. Husat inap helpim wanpela Baibel sumatin long winim mak bilong kisim baptais?

WANPELA sista nem bilong em Amy husat i save stap long Fiji, em i tok: “Mi laikim ol samting mi wok long lainim long Baibel stadi bilong mi, mi save dispela em tok i tru. Tasol mi kirap long mekim ol senis na winim mak bilong kisim baptais taim mi stat long bung wantaim ol bratasista.” Ekspiriens bilong Amy i kamapim wanpela bikpela samting: Baibel sumatin inap winim mak bilong kisim baptais taim em i kisim helpim long ol narapela insait long kongrigesen.

² Wan wan pablisa inap mekim samting bilong helpim kongrigesen. (Efe. 4:16) Wanpela painia em nem bilong em Leilani, em i save stap long Vanuatu, em i tok: “I gat wanpela savetok olsem olgeta insait long wanpela viles inap mekim bikpela long wanpela pikinini. Mi ting dispela em i wankain long wok bilong kamapim disaipel; olgeta insait long kongrigesen inap helpim wanpela long kam insait long tok i tru.” Ol wanfamili, ol pren, na ol tisa inap mekim sampela samting long helpim wanpela pikinini long kamap bikpela. Ol i mekim olsem long rot bilong helpim dispela pikinini na lainim em long ol bikpela samting. Wankain olsem, ol pablisa inap edvaisim, strongim, na stap olsem gutpela eksampel long sumatin, taim ol i helpim em long winim mak bilong kisim baptais.—Prov. 15:22.

3. Yu lainim wanem samting long tok bilong Ana, Daniel, na Leilani?

³ Wai na wanpela pablisa husat i save mekim Baibel stadi i mas amamas long ol narapela pablisa i helpim sumatin bilong em? Ana em wanpela spesel painia long Moldova, em i tok: “Em hatwok long wanpela tasol long helpim Baibel sumatin long olgeta samting em i nidim taim em i wok long winim ol mak.” Daniel, wanpela spesel painia long seim kantri, em i tok: “Planti taim ol narapela pablisa i save mekim tok em sumatin i pilim tru long bel, em samting we mi no bin tingim.” Leilani i mekim narapela gutpela tok, em i tok: “Gutpela pasin na pasin laikim em sumatin i pilim inap helpim em long luksave long lain bilong Jehova.”—Jon 13:35.

4. Bai yumi skelim wanem samting long dispela atikol?

⁴ Ating yu inap tingting, ‘Hau na mi ken helpim wanpela Baibel stadi long winim mak sapos mi no Baibel tisa bilong em?’ Yumi ken skelim samting yumi ken mekim taim narapela i singautim yumi long sindaun long Baibel stadi bilong em na samting yumi ken mekim taim Baibel sumatin i wok long kam long ol miting. Na tu, yumi bai skelim hau ol elda i ken helpim ol Baibel sumatin long winim mak bilong kisim baptais.

TAIM YU SINDAUN LONG STADI BILONG NARAPELA

5. Yu save mekim wanem taim narapela i singautim yu long sindaun long Baibel stadi bilong em?

⁵ Long taim bilong Baibel stadi, em wok bilong Baibel tisa long helpim sumatin long kliagut long Tok Bilong God. Sapos tisa i singautim yu long go wantaim em, yu mas tingim yu yet olsem poroman bilong em. Wok bilong yu em bilong helpim em. (Ekl. 4:9, 10) Yu ken mekim wanem na bai gutpela samting i kamap long dispela taim bilong stadi?

6. Taim yu bai sindaun long wanpela Baibel stadi, olsem wanem yu ken bihainim stiatok long Provep 20:18?

⁶ Redim gut stadi. Pastaim, askim tisa long stori liklik long yu long dispela sumatin. (Ritim Provep 20:18.) Yu ken askim olsem: “Wanem bekgraun bilong Baibel sumatin? Yu bai stadi wantaim em long wanem topik? Wanem bikpela tok yu laik stori long en? I gat sampela samting we mi ken mekim o mi no ken mekim o mi ken tok o mi no ken tok long taim bilong stadi? Wanem samting inap strongim sumatin long winim ol mak?” Em i tru olsem, tisa i no inap tokim yu long ol pesenel samting bilong sumatin, tasol ol samting em i tokim yu long en inap helpim yu. Wanpela misineri nem bilong em Joy em i save mekim kain tok wantaim ol lain i poromanim em long Baibel stadi. Em i tok: “Taim mi stori gut wantaim poroman bilong mi, dispela i save helpim em long tingim sumatin na save long wanem ol tok em i ken mekim long dispela stadi.”

7. Olsem poroman, wai na yu mas redim stadi?

⁷ Sapos wanpela i singautim yu long sindaun long stadi, em bai gutpela sapos yu redim gut hap yupela bai stadi long en. (Esr. 7:10) Daniel, em brata yumi bin stori long en, em i tok: “Mi save amamas taim poroman bilong mi i redim gut stadi. Long dispela rot, em inap mekim ol gutpela tok long taim bilong stadi.” Na tu, sumatin bai luksave olsem yutupela i redim gut stadi, na dispela bai stap olsem gutpela eksampel long em. Maski yu no inap redim gut olgeta hap bilong stadi, yu ken lusim sampela haptaim long tingim gut ol bikpela tok.

8. Hau na yu inap mekim gutpela beten long taim bilong Baibel stadi?

⁸ Beten em bikpela samting long taim bilong stadi, so paslain long stadi tingim gut ol tok yu bai mekim sapos Baibel tisa i askim yu long beten. Long dispela rot yu inap kamapim ol gutpela tok long beten. (Sng. 141:2) Hanae, husat i save stap long Japan, em i tingim yet ol beten em wanpela sista husat i save poromanim Baibel tisa bilong em i bin mekim. Em i tok: “Mi inap pilim gutpela pasin pren bilong em wantaim Jehova, na mi laik kamap olsem em. Na tu, mi pilim olsem em i laikim mi taim em i kolim nem bilong mi long beten.”

9. Olsem Jems 1:19 i kamapim, yu ken mekim wanem long stap olsem gutpela helpim taim yu poromanim wanpela long Baibel stadi?

⁹ Helpim tisa long taim bilong stadi. Omamuyovbi, em wanpela spesel painia long Naijiria, em i tok: “Gutpela poroman i save bihainim gut ol tok long paragraf long taim bilong stadi. Em i save kamapim ol gutpela tok, tasol em i no save toktok planti, em i save olsem em wok bilong tisa long go pas.” Olsem wanem yu ken save long wanem taim i stret long toktok na wanem ol tok yu ken mekim long taim bilong stadi? (Prov. 25:11) Putim gut yau taim tisa na sumatin i toktok. (Ritim Jems 1:19.) Long dispela rot, yu bai save long wanem taim i stret long toktok. Em tru olsem yu mas skelim gut ol samting. Olsem, yu no laik toktok planti, o katim tok bilong tisa, o kamapim narapela topik. Tasol taim yu mekim liklik komen, wanpela tok piksa, o givim askim, yu inap kamapim klia bikpela poin bilong tok. Sampela taim, bai yu pilim olsem yu no gat planti tok long mekim long taim bilong stadi. Tasol taim yu tok amamas long sumatin na soim olsem yu tingim em, dispela inap mekim planti samting long helpim em long winim mak.

10. Olsem wanem ekspiriens bilong yu inap helpim wanpela Baibel sumatin?

¹⁰ Stori long ekspiriens bilong yu. Sapos i stret long mekim, yu ken stori liklik long sumatin long hau yu bin kisim save long tok i tru, hau yu winim wanpela hevi, o hau yu lukim Jehova i helpim yu long laip bilong yu. (Sng. 78:4, 7) Ating ekspiriens bilong yu em samting sumatin i nid long harim. Dispela inap strongim bilip bilong em o kirapim em long wok yet long winim mak bilong kisim baptais. Na em inap helpim em long hau em yet inap winim wanpela hevi em i karim. (1 Pita 5:9) Gabriel, husat i save stap long Brasil na nau em i mekim wok olsem wanpela painia, em i stori long hau em i kisim helpim taim em i stadi long Baibel. Em i tok: “Taim mi harim ekspiriens bilong ol brata, mi kisim save olsem Jehova i lukim olgeta hevi yumi karim. Na sapos ol inap winim ol dispela hevi, mi tu inap.”

TAIM BAIBEL SUMATIN I KAM LONG OL MITING

11-12. Wai na yumi mas amamas long welkamim Baibel sumatin i kam long ol miting?

¹¹ Bilong Baibel sumatin long winim mak bilong kisim baptais, olgeta taim em i mas kam long ol miting bilong kongrigesen na kisim helpim. (Hib. 10:24, 25) Pastaim, tisa bai invaitim sumatin long kam long fes miting bilong em. Taim sumatin i kam, yumi olgeta i ken kirapim em long wok yet long kam long Haus Kingdom. Hau yumi inap mekim olsem?

¹² Amamas long welkamim sumatin. (Rom 15:7) Sapos sumatin i pilim olsem ol narapela i welkamim em long ol miting, em bai amamas long wok yet long kam long Haus Kingdom. No ken semim sumatin, gritim em na kisim em i go bungim ol narapela. No ken ting olsem ol narapela i gritim em pinis; ating tisa bilong em bai kam leit liklik o em i gat ol narapela wok. Putim gut yau long tok sumatin i mekim, na soim olsem yu tingim em. Gutpela pasin bilong yu inap mekim wanem long em? Tingim ekspiriens bilong Dmitrii, em i baptais sampela yia i go pinis na nau em i mekim wok olsem kongrigesen sevan. Em i stori long fes miting bilong em olsem: “Wanpela brata i lukim olsem mi pret liklik taim mi sanap ausait long Haus Kingdom na em i kisim mi i go insait. Planti i kam gritim mi. Mi kirap nogut. Mi laikim tru na mi wis olsem long olgeta de long wik mipela i gat ol miting. Mi pilim wanpela kain filing we mi no bin pilim bipo.”

13. Pasin bilong yu inap mekim wanem long Baibel sumatin?

¹³ Stap gutpela eksampel. Pasin bilong yu inap helpim Baibel sumatin long bilip olsem em i painim pinis tok i tru. (Mat. 5:16) Vitalii, em wanpela painia long Moldova, em i tok: “Mi kisim save long ol narapela insait long kongrigesen, long sindaun bilong ol, tingting na pasin bilong ol. Dispela i helpim mi long bilip tru olsem ol Witnes bilong Jehova i wokabaut wantaim God.”

14. Hau eksampel bilong yu inap helpim wanpela long winim mak?

¹⁴ Bilong winim mak bilong kisim baptais, sumatin i mas bihainim ol samting em i lainim. Dispela em i no isi. Taim sumatin i lukim gutpela samting i kamap long pasin bilong yu long bihainim ol stiatok bilong Baibel, dispela inap kirapim em long bihainim pasin bilong yu. (1 Kor. 11:1) Tingim ekspiriens bilong Hanae, em yumi stori long em pastaim. Em i tok: “Ol bratasista i stap gutpela eksampel long ol samting mi wok long lainim. Mi lukim hau mi inap strongim ol narapela na fogivim ol, na hau mi inap soim pasin laikim. Ol i save mekim ol gutpela tok long ol narapela. Mi laik bihainim pasin bilong ol.”

15. Olsem Provep 27:17 i kamapim, wai na yumi laik stap gutpela pren bilong Baibel sumatin i wok long kam long ol miting?

¹⁵ Stap gutpela pren bilong sumatin. Taim sumatin i wok long kam long ol miting, soim olsem yu tingim em. (Fili. 2:4) Yu ken toktok wantaim em. Tasol no ken askim long ol pesenel samting, yu ken tok amamas long em long ol senis em i mekim, na askim em long Baibel stadi bilong em, famili bilong em, na wok bilong em. Dispela kain toktok inap helpim em long kamap pren bilong yu. Taim yu kamap pren bilong sumatin, yu helpim em long winim mak bilong kisim baptais. (Ritim Provep 27:17.) Hanae em nau em i mekim wok olsem wanpela painia oltaim. Em i stori long festaim em i bin go long ol miting, em i tok: “Taim mi kisim ol pren long kongrigesen, mi luk fowed long go long ol miting, na maski mi taiet mi go long ol miting. Mi amamas long bung wantaim ol nupela pren bilong mi, na dispela i helpim mi long lusim ol pren we ol i no gat wankain bilip olsem mi. Mi laik i go klostu moa long Jehova na ol bratasista. Olsem na mi kisim baptais.”

16. Yu ken mekim wanem samting moa bilong helpim Baibel sumatin long pilim olsem em hap bilong kongrigesen?

¹⁶ Taim sumatin i wok long winim mak na mekim ol senis, helpim em long pilim olsem em hap bilong kongrigesen. Yu ken mekim olsem long rot bilong mekim gutpela pasin. (Hib. 13:2) Denis, em i save stap long Moldova, em i tingim bek taim em i bin stap olsem wanpela Baibel sumatin, em i tok: “Planti taim ol brata i invaitim mi na meri bilong mi long bung wantaim ol. Mipela i harim stori long hau ol i lukim Jehova i helpim ol. Dispela i strongim mipela. Dispela ol bung i helpim mipela long bilip olsem mipela i laik mekim wok bilong Jehova na gutpela laip i wetim mipela long bihain.” Taim Baibel sumatin i winim mak bilong kamap wanpela pablisa, yu ken invaitim em long go wantaim yu long wok autim tok. Diego, wanpela pablisa long Brasil, em i tok: “Planti brata i invaitim mi long go autim tok wantaim ol. Dispela em gutpela rot long save gut moa long ol. Taim mi mekim olsem, mi lainim planti samting, na mi pilim olsem mi go klostu moa long Jehova na Jisas.”

HAU OL ELDA I KEN HELPIM

17. Hau ol elda i ken helpim ol Baibel sumatin?

¹⁷ Lusim sampela haptaim wantaim ol Baibel sumatin. Ol elda, gutpela pasin bilong yupela long tingim ol sumatin inap helpim ol long winim mak bilong kisim baptais. Yupela i ken toktok wantaim ol Baibel sumatin long taim bilong miting. Ol bai luksave olsem yupela i tingim ol taim yupela i tingim nem bilong ol, moa yet long taim ol i stat long bekim tok. Olsem wanem? Yu ken stretim gut sediul bilong yu so yu ken bihainim wanpela pablisa taim em i go lukim Baibel stadi bilong em? Yu ken mekim bikpela samting long helpim Baibel sumatin. Wanpela painia nem bilong em Jackie, em i save stap long Naijiria, em i tok: “Planti sumatin i save kirap nogut taim ol i kisim save olsem brata husat i bihainim mi i go long stadi em i wanpela elda. Wanpela Baibel sumatin i tok: ‘Pasto bilong mi i no inap mekim olsem. Em i save go visitim ol maniman em ol i save givim mani long em!’” Nau dispela sumatin i save kam long ol miting.

18. Olsem wanem ol elda i ken inapim wok bilong ol olsem i stap long Aposel 20:28?

¹⁸ Trenim na strongim ol Baibel tisa. Ol elda, yupela i gat bikpela wok long helpim ol pablisa long kamap gutpela moa long wok autim tok bilong ol, na tu, long pasin bilong ol long mekim Baibel stadi. (Ritim Aposel 20:28.) Sapos wanpela i sem long mekim Baibel stadi long taim yu stap, orait askim em long yu ken mekim dispela stadi. Jackie, em yumi bin stori long en, em i tok: “Planti taim ol elda i save askim mi long ol Baibel sumatin bilong mi. Taim mi bungim sampela hatwok long mekim Baibel stadi, ol i save givim gutpela edvais.” Ol elda inap mekim bikpela samting long strongim na helpim ol Baibel tisa long wok strong yet. (1 Tes. 5:11) Jackie i tok: “Mi save amamas taim ol elda i strongim mi na tokim mi olsem ol i amamas long hatwok bilong mi. Kain tok olsem i save givim nupela strong long mi, olsem yu dring kol wara long wanpela de we san i hot. Gutpela tok bilong ol i save mekim mi bilip na amamas olsem mi inap mekim gut wok bilong lukautim Baibel stadi.”—Prov. 25:25.

19. Yumi olgeta inap kisim wanem amamas?

¹⁹ Maski long nau, yumi yet i no gat wanpela Baibel stadi, yumi ken helpim wanpela long kamap strong long bilip. Yumi no laik kisim wok bilong Baibel tisa, tasol pasin bilong yumi long redi gut na mekim ol komen inap helpim tisa long taim bilong stadi. Yumi ken kamap gutpela pren bilong ol sumatin taim ol i kam long Haus Kingdom, na yumi ken stap gutpela eksampel long ol. Na ol elda inap strongim ol Baibel sumatin na ol tisa long rot bilong lusim sampela haptaim long trenim na tok amamas long ol. Tru tumas, yumi bai kisim bikpela amamas taim yumi save olsem yumi bin mekim sampela samting long helpim wanpela long laikim na mekim wok bilong Papa bilong yumi, Jehova.