Askim Bilong Ol Rida

Paslain stret long Jisas i dai, wai na em i kolim tok bilong Devit i stap long Buk Song 22:1?

▪ Long ol laspela tok Jisas i mekim paslain long em i dai, em i kolim tok bilong Matyu 27:46, em i tok: “God bilong mi, God bilong mi, bilong wanem yu lusim mi?” Taim Jisas i mekim dispela tok, em i truim tok bilong Devit i stap long Buk Song 22:1. (Mak 15:34) I no stret long yumi ting olsem Jisas i kolim dispela tok bikos em i bel hevi o em i sot long bilip. Jisas i kliagut long risen na em i mas i dai, na em i redi long mekim olsem. (Mat. 16:21; 20:28) Em i save tu olsem long taim bilong em long i dai, Jehova i no inap ‘banisim em.’ (Jop 1:10) So Jehova i no banisim Jisas na bai Jisas i ken pruvim olsem em i stap gut long God i go inap long em i dai.—Mak 14:35, 36.

So wai na Jisas i kolim ol tok bilong dispela song? Yumi no inap strong long wanpela tingting, tasol yumi ken skelim sampela risen na em i mekim dispela tok.a

Taim Jisas i mekim dispela tok, yu ting Jisas i laik tok olsem Jehova i no inap pasim em long dai? Jisas i mas givim pe bilong baim bek man, olsem na Jehova i no ken helpim em. Em i stap olsem man bilong graun na bai “em i ken kisim ples bilong olgeta manmeri na i dai.”—Hib. 2:9.

Taim Jisas i kolim sampela tok bilong dispela song, yu ting em i laik kirapim ol narapela long tingim olgeta tok bilong dispela song? Long dispela taim, ol Juda i save holim long tingting ol tok bilong ol song. Taim ol i harim wanpela ves bilong wanpela song, dispela bai kirapim ol long tingim ol narapela ves bilong dispela song. Sapos Jisas i gat dispela tingting, orait em i helpim ol disaipel bilong em long tingim ol tok profet i stap long dispela song we i stori long ol samting bai kamap long dai bilong em. (Sng. 22:7, 8, 15, 16, 18, 24) Na tu, laspela hap bilong dispela song i preisim Jehova olsem King bilong olgeta hap bilong dispela graun.—Sng. 22:27-31.

Taim Jisas i kolim ol dispela tok Devit i mekim, yu ting Jisas i laik tok olsem em i no gat asua? Paslain long Jisas i dai, ol i kotim em olsem em i tok bilas long God. (Mat. 26:65, 66) Sanhedrin i hariap long bung long biknait na mekim kot na ol i no bihainim stret ol lo bilong kot. (Mat. 26:59; Mak 14:56-59) Taim Jisas i mekim dispela askim, em i laik tok olsem em i no mekim wanpela rong na i no stret long ol i kilim em i dai.

Yu ting Jisas i laik kirapim ol narapela long ting olsem Devit, em man i bin raitim dispela song, i karim hevi bikos Jehova i no orait long em? Askim bilong Devit i no makim olsem em i sot long bilip. Bihain long em i mekim dispela askim, em i mekim ol tok i soim olsem em i bilip long strong bilong Jehova long kisim bek man, na Jehova i wok yet long blesim em. (Sng. 22:23, 24, 27) Olsem tasol, maski Jisas em “Pikinini Bilong Devit” i karim pen na hangamap long diwai pos, dispela i no makim olsem Jehova i no orait moa long Jisas.—Mat. 21:9.

Yu ting Jisas i bel hevi olsem Jehova i no banisim em bambai em i ken stap gut long God i go inap long em i dai? Em i no laik bilong Jehova olsem Pikinini bilong em i mas karim pen na hevi na i dai. Dispela samting i mas kamap bikos long pasin bikhet bilong namba wan man na meri. Jisas i no mekim wanpela rong, tasol em i mas karim pen na dai bambai em i ken bekim tok Satan i sutim long God na bilong givim pe bilong baim bek samting Adam i bin lusim. (Mak 8:31; 1 Pita 2:21-24) Em festaim long laip bilong Jisas olsem Jehova i no banisim em bambai dispela samting i ken kamap.

Yu ting Jisas i laik helpim ol disaipel bilong em long tingim risen na Jehova i larim em i dai long kain pasin olsem?b Jisas i save olsem sapos em i dai olsem wanpela raskol man long diwai pos, dispela inap pundaunim planti. (1 Kor. 1:23) Sapos ol disaipel bilong em i save long risen na em i dai, ol inap kliagut long samting dispela inap mekim long ol. (Gal. 3:13, 14) Na ol bai tingim em olsem Seivia bilong ol na i no wanpela raskol man.

Maski yumi no save long risen stret na Jisas i kolim ol dispela tok, em i save olsem ol samting i kamap long em i bilong inapim laik bilong Jehova. Bihain stret long Jisas i kolim tok bilong dispela song, em i tok: “Em pinis nau!” (Jon 19:30; Luk 22:37) Yes, dispela liklik haptaim Jehova i no banisim Jisas i opim rot long Jisas i inapim ol samting em i kam long dispela graun long mekim. Na tu, dispela i opim rot long Jisas i inapim olgeta tok profet i stori long em “long Lo Bilong Moses na long ol rait bilong ol Profet na ol Song.”—Luk 24:44.