Yu Gat Bilip?

Bilong amamasim Jehova, yumi mas i gat bilip. Tasol Baibel i tok: “Bilip i no samting olgeta man i gat.” (2 Tes. 3:2) Aposel Pol i mekim dispela tok taim em i stori long ol man i birua long em, em “ol man nogut, em ol man i save bagarapim ol arapela.” Tasol tok em i mekim long pasin bilong bilip, em i stret tu long ol narapela. Sampela manmeri i sakim ol evidens i stap ples klia we i soim olsem God em i Man Bilong Wokim olgeta samting. (Rom 1:20) Ol narapela inap tok olsem ol i bilip long God. Maski ol i bilip olsem God i stap, dispela kain pasin bilong bilip tasol i no inap amamasim Jehova.

Yumi mas bilip olsem Jehova i stap tru na em i “God i save givim gutpela pe” long ol man i gat strongpela bilip. (Hib. 11:6) Bilip em wanpela pasin holi spirit i kamapim. Olsem na bilong kisim holi spirit, yumi mas beten askim Jehova long en. (Luk 11:​9, 10, 13) Narapela bikpela samting yumi mas mekim bilong kisim holi spirit em long ritim Tok Bilong God. Na bihain yumi ken tingim ol tok yumi ritim na bihainim ol skul yumi kisim. Long dispela rot, holi spirit bilong Jehova bai helpim yumi long mekim ol samting i soim olsem yumi gat bilip na bai yumi ken amamasim em.