Yu Mas Hariap Long Kisim Baptais

1. Wanem sampela gutpela risen long yu ken kisim baptais?

OLSEM WANEM? Yu laikim God Jehova, em man husat i bin givim yu olgeta gutpela presen na em i givim laip long yu? Yu laik soim em olsem yu laikim em? Nambawan rot yu ken mekim olsem em long dediketim yu yet long em na kamapim klia dispela dediket bilong yu long rot bilong kisim baptais long wara. Taim yu mekim olsem, yu insait long famili bilong Jehova. Long dispela rot, Papa bilong yu na Pren bilong yu bai stiaim yu na lukautim yu bikos yu bilong em. (Sng. 73:24; Ais. 43:​1, 2) Na tu, dediket na baptais i opim rot long yu inap stap laip oltaim long bihain.—1 Pita 3:21.

2. Yumi bai stori long wanem samting long dispela atikol?

² Olsem wanem? I gat sampela samting i pasim yu long kisim baptais? Sapos olsem, i no yu wanpela tasol i pilim olsem. Planti milion manmeri paslain long yu i bin mekim ol senis long ol pasin na tingting bilong ol na bai ol i ken winim mak bilong kisim baptais. Long nau, ol i amamas na givim bel tru long mekim wok bilong Jehova. Yu ken kisim wanem skul long sampela em ol i bin kisim baptais long taim bilong ol aposel? Yumi ken stori long ol hatwok ol i bin bungim na wanem skul yumi ken kisim long eksampel bilong ol.

OL SAMARIA I KISIM BAPTAIS

3. Wanem ol samting inap pasim sampela Samaria long kisim baptais?

³ Lain Samaria long taim bilong Jisas, ol i bilong wanpela lotu lain em ol i stap klostu long taun Sekem bilong bipo na Samaria, long hap not bilong Judia. Paslain long ol Samaria i kisim baptais, ol i mas save gut moa long Tok Bilong God. Ol Samaria i bilip olsem God i as bilong fes 5-pela buk bilong Baibel—Buk Stat i go long Buk Lo—na ating Buk Josua tu. Tasol ol i bilip olsem Mesaia i mas i kam, olsem tok promis bilong God long Lo 18:​18, 19 i kamapim. (Jon 4:25) Bilong ol i ken kisim baptais, ol i mas bilip olsem Jisas em i dispela Mesaia em God i tok promis long en. “Planti Samaria” i mekim olsem. (Jon 4:39) Ating ol narapela i mas daunim pasin bilong bel nogut we i stap strong tru namel long ol Samaria na ol Juda.—Luk 9:​52-54.

4. Olsem Aposel 8:​5, 6, 14 i kamapim, sampela Samaria i mekim wanem taim Filip i autim tok long ol?

⁴ Wanem samting i helpim ol Samaria long kisim baptais? Taim Filip, dispela evanselis i autim tok “long ol long Krais,” sampela Samaria i “kisim tok bilong God.” (Ritim Aposel 8:​5, 6, 14.) Filip i bilong lain Juda, tasol ol i no sakim em. Ating ol i tingim ol ves long Pentatuk we i kamapim klia olsem God i save mekim wankain pasin long olgeta man. (Lo 10:​17-19) Ol i “putim gut yau long ol tok Filip i mekim” long Krais, na ol i luksave long evidens i soim klia olsem God i stap wantaim em. Na tu, Filip i wokim planti mirakel, na em i oraitim tu ol sikman na rausim ol spirit nogut long ol manmeri.—Apo. 8:7.

5. Yu inap kisim wanem skul long ol Samaria?

⁵ Ol dispela Samaria inap larim pasin bilong bel nogut o liklik save tasol ol i gat long Tok Bilong God i pasim ol long winim mak bilong kisim baptais. Tasol ol i no larim dispela i pasim ol. Ol Samaria i hariap long kisim baptais bihain long ol i bilip tru olsem Filip i skulim ol long tok i tru. Baibel i tok: “Taim Filip i autim gutnius bilong Kingdom Bilong God, na autim tok long nem bilong Jisas Krais, ol i bilip long ol tok em i autim na ol man na meri wantaim i kisim baptais.” (Apo. 8:12) Olsem wanem? Yu bilip olsem Tok Bilong God em i tok i tru na ol Witnes Bilong Jehova i daunim pasin bilong bel nogut na ol i wok strong long soim pasin laikim tru—em mak bilong ol Kristen tru? (Jon 13:35) Sapos olsem, orait mekim disisen hariap long kisim baptais na bilip tru olsem Jehova bai blesim yu.

6. Olsem wanem eksampel bilong Ruben inap helpim yu?

⁶ Ruben, em i bilong Jemani na famili bilong em ol i Witnes. Tasol taim em i liklik, em i gat tupela tingting olsem Jehova i stap tru o nogat. Wanem samting i helpim em long daunim tupela tingting em i holim? Em i luksave olsem em i sot long save, olsem na em i wokim disisen long kisim sampela save moa. Em i tok: “Long pesenel stadi bilong mi, mi laik painimaut wanem samting i tru na wanem samting i no tru. Mi stadi long topik bilong evolusen planti taim.” Em i ritim buk Is There a Creator Who Cares About You? Dispela pablikesen i helpim tru Ruben. Em i tingting olsem: ‘Man! Jehova i stap tru.’ Na taim Ruben i go visitim wol hetkota, em i pilim tru pasin wanbel i stap namel long bikpela lain brata bilong yumi i stap long olgeta hap bilong graun. Taim Ruben i go bek long Jemani, em i kisim baptais taim em i gat 17 krismas. Sapos yu holim tupela tingting long ol save yu kisim, orait mekim wok painimaut long ol pablikesen bilong yumi. Taim yu kisim “stretpela save,” yu inap daunim pasin bilong holim tupela tingting. (Efe. 4:​13, 14) Na taim yu harim ol ekspiriens long pasin laikim na pasin wanbel i stap namel long lain bilong Jehova long ol narapela hap bilong graun na lukim dispela pasin insait long kongrigesen bilong yu yet, dispela bai strongim pasin laikim bilong yu long bikpela lain brata bilong yumi i stap long olgeta hap bilong graun.

SOL BILONG TARSUS I KISIM BAPTAIS

7. Sol i mas stretim wanem tingting kranki em i holim?

⁷ Tingim eksampel bilong Sol bilong Tarsus. Em i kisim bikpela skul long Lo bilong Juda na em i wok long kamap wanpela man i gat biknem namel long ol Juda. (Gal. 1:​13, 14; Fili. 3:5) Long dispela taim, planti Juda i tingim ol Kristen olsem ol i apostet. Sol i belhat nogut tru na em i save mekim nogut tru long ol Kristen. Em i holim tingting kranki olsem em i mekim laik bilong God. (Apo. 8:3; 9:​1, 2; 26:​9-11) Bilong Sol i ken bilip long Jisas na kisim baptais na kamap wanpela Kristen, em yet i mas redi long ol man i mekim nogut long em.

8. (a) Wanem samting i helpim Sol long kisim baptais? (b) Olsem Aposel 22:​12-16 i kamapim, Ananaias i helpim Sol olsem wanem? (Lukim tu piksa.)

⁸ Wanem samting i helpim Sol long kisim baptais? Sol i kamap aipas taim Bikpela Jisas—husat i kisim glori pinis—i kamap long em. (Apo. 9:​3-9) Inap 3-pela de, em i tambu long kaikai na em i tingim tingim long bel samting i bin kamap long em. Yes, Sol i bilip tru olsem Jisas em i dispela Mesaia na ol disaipel bilong Jisas ol i bihainim lotu i tru. Ating Sol i bel hevi nogut tru olsem em i bin givim tok orait long ol man i kilim i dai Stiven! (Apo. 22:20) Long pinis bilong namba 3 de, wanpela disaipel nem bilong em Ananaias, em i go lukim Sol na em i oraitim ai bilong em, na em i kirapim Sol long hariap long kisim baptais. (Ritim Aposel 22:​12-16.) Long pasin daun, Sol i bihainim tok bilong Ananaias na em i kamap wanpela Kristen.—Apo. 9:​17, 18.

9. Yu inap kisim wanem skul long Sol?

⁹ Yumi inap kisim gutpela skul long Sol. Em inap larim pasin antap o pasin bilong pret long ol man i pasim em long kisim baptais. Tasol em i no larim ol dispela samting i pasim em. Long pasin daun, Sol i daunim em yet na redi long mekim ol senis long laip bilong em na bai em i ken kamap wanpela disaipel bilong Krais. (Apo. 26:​14, 19) Sol i redi long kamap wanpela Kristen maski em i save olsem ol man bai mekim nogut long em. (Apo. 9:​15, 16; 20:​22, 23) Bihain long em i kisim baptais, em i wok yet long trastim Jehova long helpim em long sanap strong na karim kain kain hevi i painim em. (2 Kor. 4:​7-10) Taim yu kisim baptais na kamap wanpela Witnes Bilong Jehova, ol samting inap traim bilip bilong yu o yu inap bungim ol hevi, tasol yu bai gat helpim. Yu ken bilip tru olsem God na Krais bai wok yet long helpim yu.—Fili. 4:13.

10. Olsem wanem eksampel bilong Anna inap helpim yu?

¹⁰ Anna i kamap bikpela long Isten Yurop. Bihain long mama bilong em i kisim baptais, papa bilong Anna i orait long em i stadi long Baibel taim em i gat 9-pela krismas. Tasol dispela i kamapim hevi namel long ol wanblut bilong Anna, em olgeta i save stap wantaim famili bilong Anna. Ol wanblut bilong em i tingim olsem em i semim nem bilong famili taim em i lusim lotu bilong famili bilong em. Taim Anna i gat 12-pela krismas, em i askim papa bilong em sapos i orait long em i kisim baptais. Papa bilong em i laik save sapos dispela em disisen bilong em yet o narapela i subim em long mekim olsem. Anna i tok: “Mi laikim Jehova.” Papa bilong em i orait long em i kisim baptais. Bihain long Anna i kisim baptais, ol wanblut bilong em i wok yet long tok bilas long em na mekim pasin i no stret long em. Wanpela wanblut bilong em i tokim em olsem: “Laip bilong yu bai gutpela moa sapos yu insait long olgeta kain pasin nogut na yu smok, na yu no stap olsem wanpela Witnes Bilong Jehova.” Anna i mekim wanem? Em i tok: “Jehova i helpim mi long sanap strong, na mama na papa bilong mi i sapotim mi tru.” Anna i save raitim long notbuk bilong em ol taim we em i pilim olsem Jehova i helpim em. Sampela taim em i save lukim gen dispela notbuk bilong em na bai em i no lusim tingting long hau Jehova i bin helpim em. Sapos yu pret olsem ol man bai birua long yu, tingim olsem Jehova bai helpim yu tu.—Hib. 13:6.

KORNILIUS I KISIM BAPTAIS

11. Wanem samting inap pasim Kornilius long kisim baptais?

¹¹ Baibel i stori tu long eksampel bilong Kornilius. Em i wanpela “senturien,” em wanpela komanda bilong 100 soldia bilong ami bilong Rom. (Apo. 10:​1, ftn.) Olsem na ating em i gat namba long ples em i stap long en na insait long lain ami. Em i save “marimari long ol rabisman na helpim ol.” (Apo. 10:2) Jehova i salim aposel Pita i go bilong autim gutnius long em. Yu ting namba Kornilius i holim i pasim em long hariap long kisim baptais?

12. Wanem samting i helpim Kornilius long kisim baptais?

¹² Wanem samting i helpim Kornilius long kisim baptais? Baibel i tok: “Em wantaim ol wanhaus bilong em ol i save pret long God.” Na oltaim Kornilius i save beten strong long God. (Apo. 10:2) Taim Pita i autim gutnius long Kornilius, em wantaim famili bilong em ol i bilip long Krais na wantu ol i kisim baptais. (Apo. 10:​47, 48) Kornilius i redi long mekim ol senis em i mas mekim na bai em wantaim famili bilong em inap lotuim Jehova.—Jos. 24:15; Apo. 10:​24, 33.

13. Yu inap kisim wanem skul long Kornilius?

¹³ Olsem Sol, Kornilius inap larim bikpela namba em i holim i pasim em long kamap wanpela Kristen. Tasol em i no larim dispela i pasim em. Olsem wanem? Yu mas mekim sampela bikpela senis long laip bilong yu long bihainim tok i tru? Sapos olsem, Jehova bai stap olsem Helpim bilong yu. Em bai blesim yu taim yu wok strong long bihainim ol stiatok bilong Baibel long mekim wok bilong em.

14. Olsem wanem eksampel bilong wanpela brata long Japan i helpim yu?

¹⁴ Wanpela brata long Japan i bin mekim senis long wok mani bilong em na bai em i ken winim mak bilong kisim baptais. Em i helpim bilong het tisa bilong wanpela bikpela skul we i save lainim ol manmeri long mekim arensmen bilong ol plaua. Taim het tisa i no inap long go long ol fiuneral, planti taim dispela brata i save makim maus bilong em na i go long ol dispela fiuneral we ol i save bihainim kastam bilong ol Buda long en. Tasol taim em i kisim save long tok i tru long samting i painim ol man i dai pinis, em i save olsem em i no inap kisim baptais sapos em i insait yet long kastam bilong ol Buda. Em i wokim disisen olsem em i no inap insait long kastam bilong ol Buda. (2 Kor. 6:​15, 16) So em i toktok wantaim het tisa long dispela samting. Wanem samting i kamap? Em i holim yet wok mani bilong em na em i no gat wok long insait moa long kastam bilong ol Buda. Em i kisim baptais wanpela yia bihain long em i kirap stadi long Baibel.a Sapos yu mas mekim senis long wok mani bilong yu na bai yu ken amamasim God, yu ken save olsem em bai givim yu ol samting em yu na famili bilong yu i nidim.—Sng. 127:2; Mat. 6:33.

OL KORIN I KISIM BAPTAIS

15. Wanem ol samting inap pasim ol Korin long kisim baptais?

¹⁵ Taun Korin bilong bipo i gat nem long laikim tumas mani kago na orait long olgeta kain pasin i no klin. Planti manmeri i stap long dispela hap, ol i save mekim kain kain pasin nogut em God i no orait long en. I klia tru olsem kain ol pasin inap mekim na wanpela i pilim hatwok tru long bilip long gutnius. Tasol taim aposel Pol i go long dispela taun na autim gutnius long Krais long ol, “planti manmeri bilong Korin, ol i harim tok na bilipim na ol i kisim baptais.” (Apo. 18:​7-11) Bihain, Bikpela Jisas Krais i kamap long Pol long wanpela visen na em i tok: “Mi gat planti manmeri i stap long dispela taun.” Olsem na Pol i wok yet long autim tok long dispela hap long 1 na hap yia.

16. Wanem samting i helpim sampela long Korin long daunim ol samting inap pasim ol long kisim baptais? (2 Korin 10:​4, 5)

¹⁶ Wanem samting i helpim ol Korin long kisim baptais? (Ritim 2 Korin 10:​4, 5.) Tok Bilong God na holi spirit bilong em i helpim ol long mekim ol bikpela senis long laip bilong ol. (Hib. 4:12) Ol manmeri long Korin em ol i bilip long gutnius long Krais, ol i lusim ol pasin olsem pasin bilong dring spak, stil, na man i slip wantaim man.—1 Kor. 6:​9-11.b

17. Yu inap kisim wanem skul long ol Korin?

¹⁷ Sampela long Korin i mas daunim ol pasin we i pas strong tru long bel bilong ol, tasol ol i no kisim tingting olsem dispela bai pasim ol long kamap ol Kristen, nogat. Ol i givim bel tru long mekim ol senis na bai ol inap wokabaut long dispela liklik rot i go long laip oltaim. (Mat. 7:​13, 14) Olsem wanem? Yu wok strong long daunim wanpela pasin nogut o pasin i no stret na bai yu inap kisim baptais? No ken givap long mekim olsem! Beten strong na askim Jehova long givim yu holi spirit bilong em bilong helpim yu long sakim laik bilong mekim pasin i no stret.

18. Olsem wanem eksampel bilong Monika inap helpim yu?

¹⁸ Monika, em i bilong Jojia na em i wok strong long daunim pasin bilong mekim ol tok doti na harim ol musik na lukim ol piksa i no stret na bai em i ken winim mak bilong kisim baptais. Em i tok: “Taim mi tineja, mi kisim strong long pasin bilong beten. Jehova i save olsem mi laik mekim samting i stret, na oltaim em i wok long helpim mi na stiaim mi.” Monika i kisim baptais taim em i gat 16 krismas. Olsem wanem? I gat sampela pasin em yu mas daunim na bai yu ken lotuim Jehova long pasin em i orait long en? Wok yet long beten na askim em long givim yu strong na bai yu ken mekim ol senis. Jehova i save redi long givim holi spirit bilong em long yumi.—Jon 3:34.

BILIP BILONG YU INAP MUVIM OL MAUNTEN

19. Wanem samting inap helpim yu long daunim ol hatwok i olsem ol maunten? (Lukim tu piksa.)

¹⁹ Yu ken save tru olsem Jehova i laikim yu na em i laik bai yu stap insait long famili bilong em. Dispela tok em i tru maski yu bungim wanem ol hatwok we i pasim yu long kisim baptais. Jisas i mekim dispela tok long sampela disaipel bilong em olsem: “Sapos bilip bilong yupela i kain olsem sais bilong sid mastet, orait bai yupela i tokim dispela maunten, ‘Kirap na go long hap,’ na bai em i kirap na i go. Na bai yupela inap mekim olgeta samting.” (Mat. 17:20) Ol manmeri i stap long dispela taim na harim dispela tok, ol i bin stap wantaim Jisas inap sampela yia, so bilip bilong ol i wok yet long kamap strong. Tasol Jisas i strongim ol na em i tok sapos bilip bilong ol i kamap strong, Jehova bai helpim ol long daunim ol hatwok i olsem ol maunten. Na Jehova bai helpim yu tu long mekim olsem!

20. Olsem wanem eksampel bilong ol Kristen long taim bilong ol aposel na ol Kristen em yumi stori long ol long dispela atikol i strongim yu?

²⁰ Sapos yu luksave long sampela samting we i pasim yu long kisim baptais, orait mekim samting hariap long rausim ol dispela samting. Kisim helpim na strong long eksampel bilong ol Kristen long taim bilong ol aposel na long taim bilong yumi. Eksampel bilong ol i ken strongim yu na kirapim yu long dediket long Jehova na kisim baptais. Em nambawan gutpela disisen tru yu inap mekim!