Bihainim Wankain Tingting Olsem Bilong Jehova na Jisas

1-2. Wanem ol samting i insait long pasin bilong laikim Jehova, na hau Jisas i soim olsem em i laikim Jehova long tingting olgeta bilong em?

“YU MAS laikim Jehova, God bilong yu. Yu mas laikim em long bel olgeta bilong yu, long laip olgeta bilong yu, long strong olgeta bilong yu, na long tingting olgeta bilong yu.” (Luk 10:27) Jisas i kamapim klia olsem dispela em i nambawan bikpela lo long Lo Bilong Moses. Yumi ken lukim olsem pasin bilong laikim Jehova i mas kirap insait long bel bilong yumi, dispela i makim ol laik bilong yumi, ol filings bilong yumi, na ol tingting bilong yumi. Na dispela i makim tu olsem yumi mas givim bel olgeta na strong olgeta bilong yumi long lotuim Jehova. Tasol pasin bilong laikim Jehova i makim tu olsem yumi mas laikim em long tingting olgeta bilong yumi, dispela i makim tu tingting yumi gat long ol samting. Tru, yumi no inap kliagut long olgeta tingting bilong Jehova. Tasol yumi ken kliagut moa long tingting bilong God taim yumi save gut moa long “tingting bilong Krais,” long wanem, tingting bilong Jisas i wankain long tingting bilong Papa bilong em.—1 Kor. 2:16 na stadi nout “we do have the mind of Christ” long Study Bible.

² Jisas i laikim Jehova wantaim tingting olgeta bilong em. Em i save long samting God i laik em i mas mekim na em i tingting strong long bihainim laik bilong God, maski em i mas karim bikpela pen na hevi long mekim olsem. Jisas i putim tingting olgeta long mekim laik bilong Papa bilong em na em i no larim wanpela samting i pulim nabaut tingting bilong em.

3. Aposel Pita i kisim wanem skul long Jisas, na em i kirapim ol wanbilip Kristen long mekim wanem? (1 Pita 4:1)

³ I gutpela tru olsem Pita na ol narapela aposel i lusim haptaim long stap na raun wantaim Jisas na ol i lain long tingting bilong Jisas. Taim Pita i raitim namba 1 pas bilong em, em i kirapim ol Kristen long holim wankain tingting olsem bilong Krais. (Ritim 1 Pita 4:1.) Long tok Grik bilong bipo, ol tok Pita i yusim long hia i makim olsem ol soldia i kisim ol wepen na ol i redi long pait. So sapos ol Kristen i holim wankain tingting olsem bilong Krais, i olsem ol i kisim wanpela strongpela wepen na ol i redi long pait bilong daunim ol laik nogut bilong bodi em sin i as bilong en na dispela graun em Satan i bosim.—2 Kor. 10:​3-5; Efe. 6:12.

4. Olsem wanem dispela atikol inap helpim yumi long bihainim edvais bilong Pita?

⁴ Yumi bai stori long tingting bilong Jisas na hau yumi ken bihainim tingting bilong em. Yumi bai stori long hau yumi ken (1) bihainim tingting bilong Jehova na dispela bai helpim yumi olgeta long holim wankain tingting tasol, (2) mekim pasin daun, na (3) bihainim gutpela tingting long rot bilong beten na askim Jehova long helpim yumi.

BIHAINIM WANKAIN TINGTING OLSEM BILONG JEHOVA

5. Hau na wanpela taim Pita i no bihainim wankain tingting olsem bilong Jehova?

⁵ Tingim wanpela taim Pita i no bihainim wankain tingting olsem bilong Jehova long ol samting. Jisas i bin tokim ol aposel bilong em olsem em bai go long Jerusalem na ol bai putim em long han bilong ol hetman bilong lotu long hap, na em bai karim pen na hevi na bihain ol bai kilim em i dai. (Mat. 16:21) Pita i save olsem Jisas em dispela promis Mesaia na em bai kisim bek ol manmeri bilong God, so ating em i hatwok long bilip olsem Jehova i no inap mekim wanpela samting na larim ol man i kilim Jisas i dai. (Mat. 16:16) So Pita i kisim Jisas i go long sait na tokim em olsem: “Bikpela, marimari long yu yet, dispela samting i no ken kamap long yu.” (Mat. 16:22) Pita i no bihainim wankain tingting olsem bilong Jehova long dispela samting, olsem na tingting bilong em i no wankain long tingting bilong Jisas.

6. Hau na Jisas i soim olsem tingting bilong em i wankain olsem tingting bilong Jehova?

⁶ Tingting bilong Jisas i wankain olsem tingting bilong Papa bilong em long heven. Jisas i tokim Pita olsem: “Satan, yu go baksait long mi! Yu laik pasim rot bilong mi. Tingting bilong yu i no wankain olsem tingting bilong God, nogat, tingting bilong yu i wankain olsem tingting bilong ol man.” (Mat. 16:23) Ating Pita i gat gutpela astingting taim em i mekim dispela tok, tasol Jisas i sakim edvais bilong Pita. Yumi inap kisim skul long dispela. Em i no laik bilong Jehova olsem Jisas bai tingim laip bilong em yet na lukautim gut, nogat. Long dispela taim stret, Pita i lainim wanpela bikpela lesen olsem em i mas holim wankain tingting olsem tingting bilong God.

7. Bihain hau Pita i soim olsem em i laik bai tingting bilong em i wankain olsem tingting bilong Jehova? (Lukim piksa.)

⁷ Bihain, Pita i soim olsem em i laik bai tingting bilong em i wankain olsem tingting bilong Jehova. Taim i kamap pinis bilong ol man bilong ol arapela lain long kamap lain bilong God. Na God i salim Pita i go bilong autim tok long Kornilius, em fes man bilong arapela lain long kamap wanpela Kristen. Ol Juda i no save wok bung wantaim ol man bilong ol arapela lain, so yumi no kirap nogut olsem Pita i nidim sampela haptaim bilong redi long dispela nupela asainmen. Taim Pita i luksave long laik bilong God long dispela samting, em i senisim tingting em i holim pinis. Em as na em “i no sakim tok” taim God i salim em long mekim dispela wok. (Apo. 10:​28, 29) Em i autim tok long Kornilius na ol wanhaus bilong em na ol i kisim baptais.—Apo. 10:​21-23, 34, 35, 44-48.

8. Hau yumi ken soim olsem tingting bilong yumi i wankain olsem tingting bilong Jehova? (1 Pita 3:8 na futnot)

⁸ Sampela yia bihain, Pita i kirapim ol wanbilip Kristen long “i gat wanpela tingting.” (Ritim 1 Pita 3:8 na futnot.) Yumi lain bilong Jehova, olsem na yumi ken i gat wanpela tingting o stap wanbel wantaim long tingting taim yumi bihainim tingting bilong Jehova i stap long Baibel. Olsem, Jisas i kirapim ol disaipel bilong em long putim Kingdom i stap nambawan samting long laip bilong ol. (Mat. 6:33) Ating wanpela pablisa long kongrigesen bilong yu i bihainim dispela tok na em i laik insait long fultaim sevis. Yumi laik tok amamas long em, strongim em na sapotim em long winim dispela mak em i putim, na yumi no laik mekim ol tok bilong kirapim em long tingim laik bilong em yet pastaim.

MEKIM PASIN DAUN

9-10. Olsem wanem Jisas i soim olsem em i gat pasin daun tru?

⁹ Long nait paslain long ol man i kilim Jisas i dai, em i skulim Pita na ol narapela aposel long wanpela bikpela lesen long pasin daun. Paslain long bung, Jisas i salim Pita na Jon i go bilong redim ol samting bilong mekim laspela kaikai em bai kaikai wantaim ol paslain long em i dai. Taim ol i redim ol samting, ol i redim tu wanpela dis i gat wara na ol taul na bai ol i ken wasim lek bilong ol gest i kam long haus paslain long ol i kaikai. Tasol taim ol gest i kam kamap, husat bai mekim dispela wok i no gat nem bilong wasim lek bilong ol?

¹⁰ Jisas i no surik long mekim dispela wok, na em i soim pasin daun tru. Ol aposel i kirap nogut tru long samting Jisas i mekim bikos em wok ol wokboi nating i save mekim. Jisas i rausim saket bilong em, pasim taul long weist bilong em, na em i kapsaitim wara i go insait long dis na em i stat long wasim lek bilong ol. (Jon 13:​4, 5) Ating em i lusim bikpela haptaim long wasim lek bilong olgeta 12-pela aposel bilong em, na lek bilong Judas tu, em man husat bai putim em long han bilong ol birua. Maski i olsem, long pasin daun Jisas i pinisim gut dispela wok em i mekim. Na bihain Jisas i tokim ol olsem: “Yupela i kliagut long samting mi mekim long yupela? Yupela i kolim mi, ‘Tisa,’ na ‘Bikpela,’ na i stret yupela i kolim mi olsem, long wanem, mi Tisa na Bikpela bilong yupela. Mi Bikpela na Tisa na mi wasim lek bilong yupela, olsem na yupela tu i mas wasim lek bilong ol arapela.”—Jon 13:​12-14.

11. Hau Pita i soim olsem em i lain long mekim pasin daun? (1 Pita 5:5) (Lukim tu piksa.)

¹¹ Pita i lain long mekim pasin daun long rot bilong pasin daun Jisas i bin mekim. Bihain long Jisas i go bek long heven, Pita i wokim mirakel na em i oraitim wanpela man em mama i bin karim em lek nogut. (Apo. 1:​8, 9; 3:​2, 6-8) Bikpela lain manmeri tru i lukim dispela mirakel na ol i kam long Pita. (Apo. 3:11) Yu ting Pita i kisim biknem long dispela mirakel em i wokim bikos em i kam long bekgraun we ol man i ting biknem na namba i bikpela samting tru? Nogat, long pasin daun Pita i stiaim biknem i go long Jehova na Jisas we i stret long ol i kisim, na em i tok: “Long rot bilong nem bilong [Jisas], na long bilip bilong mitupela long dispela nem, dispela man em yupela i lukim na save long em, em i kisim strong.” (Apo. 3:​12-16) Ol tok Pita i kolim long pas em i raitim long ol Kristen olsem ol i mas kisim pasin daun, dispela inap kirapim yumi long tingim pasin Jisas i bin mekim taim em i pasim taul long weist bilong em na wasim lek bilong ol aposel bilong em.—Ritim 1 Pita 5:5.

12. Olsem wanem yumi ken bihainim pasin bilong Pita na wok yet long mekim pasin daun?

¹² Yumi ken bihainim pasin bilong Pita long mekim pasin daun. Tingim olsem man i gat pasin daun tru tru, em i no soim dispela pasin long rot bilong toktok bilong em tasol, nogat. Dispela tok Pita i yusim em ol i tanim olsem “pasin daun” i makim pasin daun yumi soim long tingting yumi gat long yumi yet na long ol narapela tu. Yumi mekim wok bilong helpim ol narapela bikos yumi laikim Jehova na ol narapela, na i no bikos yumi laik bai ol narapela i litimapim nem bilong yumi. Yumi soim olsem yumi gat pasin daun tru sapos yumi amamas long mekim wok bilong Jehova na mekim ol wok bilong helpim ol bratasista bilong yumi, maski ol narapela i luksave long ol wok yumi mekim o nogat.—Mat. 6:​1-4.

YUPELA I MAS “BIHAINIM GUTPELA TINGTING”

13. Wanem insait bilong dispela tok “bihainim gutpela tingting”?

¹³ Wanem insait bilong dispela tok “bihainim gutpela tingting”? (1 Pita 4:7) Wanpela Kristen husat i bihainim gutpela tingting, em i save mekim ol gutpela disisen we i stret wantaim tingting bilong Jehova. Kain Kristen olsem i save olsem pasin bilong em long pas gut wantaim Jehova i bikpela samting moa winim ol narapela samting long laip bilong em. Em i holim stretpela tingting long em yet, na em i save olsem em i no gat olgeta save long ol samting. Na em i soim olsem em i bilip olsem Jehova bai helpim em long rot bilong daunim em yet na beten oltaim long Em.a

14. Wanpela taim, olsem wanem Pita i soim olsem em i no bilip long Jehova long helpim em?

¹⁴ Long laspela nait paslain long Jisas i dai, em i givim tok lukaut long ol disaipel bilong em olsem: “Samting i kamap long mi long dispela nait bai mekim yupela olgeta i pundaun.” Tasol Pita i hambak na bekim tok olsem: “Maski olgeta arapela i pundaun long samting i kamap long yu, bai mi no inap tru long pundaun!” Long dispela nait yet Jisas i tokim ol disaipel bilong em olsem: “Yupela i mas was i stap na beten oltaim.” (Mat. 26:​31, 33, 41) Sapos Pita i bihainim dispela edvais Jisas i bin givim, ating em bai strongim bel na tokaut olsem em i pren bilong Jisas. Tasol sori tru, Pita i tokaut olsem em i no save long Bikman bilong em na em i bel hevi tru long dispela samting em i mekim.—Mat. 26:​69-75.

15. Olsem wanem Jisas i holimpas yet gutpela tingting bilong em long laspela nait bilong em long graun?

¹⁵ Jisas i bilip tru olsem Jehova bai helpim em. Maski Jisas i gutpela olgeta, em i beten planti taim. Dispela i strongim bel bilong em long mekim samting Jehova i laik em i mas mekim. (Mat. 26:​39, 42, 44; Jon 18:​4, 5) Tru tumas, Pita i no inap lusim tingting long pasin bilong Jisas long beten planti taim long Jehova long laspela nait bilong em.

16. Olsem wanem Pita i soim olsem em i kisim pasin bilong bihainim gutpela tingting? (1 Pita 4:7)

¹⁶ Bihain Pita i kisim pasin bilong beten na askim Jehova long helpim em. Jisas husat i kirap bek pinis, em i tokim Pita na ol arapela aposel olsem ol bai kisim holi spirit bilong helpim ol long inapim wok bilong ol long autim tok. Tasol Jisas i tokim ol long wet long Jerusalem inap long dispela samting i kamap. (Luk 24:49; Apo. 1:​4, 5) Pita i mekim wanem taim em i wet i stap? Pita na ol wanbilip Kristen “i wok long beten i stap.” (Apo. 1:​13, 14) Bihain, taim Pita i raitim namba wan pas i go long ol wanbilip Kristen bilong em, em i kirapim ol long bihainim gutpela tingting na beten askim Jehova long helpim ol. (Ritim 1 Pita 4:7.) Pita i kisim pasin bilong beten askim Jehova long helpim em na em i stap olsem strongpela pos insait long kongrigesen.—Gal. 2:9.

17. Maski yumi gat wanem save o skil, yumi mas wok yet long mekim wanem? (Lukim tu piksa.)

¹⁷ Bilong bihainim gutpela tingting, oltaim yumi mas beten long Jehova. Maski yumi gat wanem save o skil, yumi luksave olsem em i bikpela samting long yumi mas wok yet long beten long Jehova. Olsem na taim yumi laik mekim ol bikpela disisen, yumi mas beten long Jehova bilong stiaim yumi, na yumi mas bilip tru olsem em i save long gutpela rot bilong helpim yumi.

18. Olsem wanem yumi ken stretim tingting bilong yumi na bai i stret wantaim tingting bilong Jehova?

¹⁸ Yumi amamas tru olsem Jehova i wokim yumi na bai yumi inap bihainim ol pasin bilong em. (Stt. 1:26) Em tru olsem yumi no inap bihainim gut olgeta pasin bilong Jehova. (Ais. 55:9) Tasol olsem Pita, yumi ken senisim tingting bilong yumi na bai i stret wantaim tingting bilong Jehova. Yumi ken mekim olsem long rot bilong wok yet long bihainim tingting bilong God, mekim pasin daun, na bihainim gutpela tingting.