Ol Yangpela Brata—Bihainim Pasin Bilong Mak na Timoti

1-2. Wanem ol samting inap pasim Mak na Timoti long mekim bikpela wok moa bilong helpim ol narapela?

OL YANGPELA brata, yupela i laik mekim bikpela wok moa long wok bilong Jehova na stap olsem gutpela helpim insait long kongrigesen bilong yupela? Mipela i bilip olsem yupela i laik mekim olsem. Mipela i amamas tru long lukim olsem planti yangpela brata i redi long mekim ol wok bilong helpim ol narapela! (Sng. 110:3) Tasol yu inap bungim sampela hatwok. Olsem wanem? Yu surik long mekim bikpela wok moa bilong Jehova bikos yu tingting planti long laip bilong yu bai olsem wanem long bihain? Yu bin tok nogat long mekim wanpela asainmen bikos yu pilim olsem yu no inap long mekim gut dispela asainmen? Sapos olsem, orait i no yu wanpela i gat kain tingting olsem, ol narapela tu i gat wankain tingting.

² Mak na Timoti i bin pilim wankain olsem. Tasol maski ol i no save long laip bilong ol bai olsem wanem long bihain o ol i pilim olsem ol i no gat inap save long mekim wanpela wok, ol i no larim dispela i pasim ol long mekim bikpela wok moa bilong Jehova. I luk olsem Mak i stap wantaim mama bilong em long wanpela naispela haus taim aposel Pol na Barnabas i invaitim em long go wantaim tupela long namba wan misineri raun bilong ol. (Apo. 12:​12, 13, 25) Tasol Mak i lusim haus bilong em na bai em i ken mekim bikpela wok moa bilong Jehova. Pastaim, em i muv i go stap long Antiok. Bihain, em i raun i go long ol ples i stap longwe wantaim Pol na Barnabas. (Apo. 13:​1-5) Olsem tasol, ating Timoti i stap yet wantaim papamama bilong em taim Pol i invaitim em long raun wantaim em long mekim wok autim tok. Long dispela taim, Timoti em i yangpela man na em i no gat bikpela ekspiriens, na dispela inap mekim na em i pilim olsem em i no inap long mekim gut dispela wok. (Skelim 1 Korin 16:​10, 11 na 1 Timoti 4:12.) Tasol em i mekim disisen long bihainim singaut bilong Pol na em i kisim planti blesing taim em i mekim olsem.—Apo. 16:​3-5.

3. (a) Hau na yumi save olsem Pol i amamas tru long Mak na Timoti? (2 Timoti 4:​6, 9, 11) (Lukim tu ol piksa.) (b) Yumi bai skelim wanem ol askim long dispela atikol?

³ Mak na Timoti i kisim planti ekspiriens na ol i lain long mekim ol bikpela wok taim ol i stap yangpela man yet. Pol i amamas tru long dispela tupela yangpela man, olsem na bihain taim em i luksave olsem klostu nau em bai dai, em i laik bai tupela i kam lukim em. (Ritim 2 Timoti 4:​6, 9, 11.) Mak na Timoti i gat wanem ol gutpela pasin we i mekim na Pol i laikim tupela? Hau ol yangpela brata i ken bihainim pasin bilong tupela? Na hau ol yangpela man i ken kisim helpim long ol edvais bilong Pol?

BIHAINIM PASIN BILONG MAK—REDI LONG MEKIM BIKPELA WOK MOA

4-5. Hau na Mak i soim olsem em i redi long mekim ol wok bilong helpim ol narapela?

⁴ Wanpela buk i tok pasin bilong mekim ol wok bilong helpim ol narapela i makim olsem yumi givim bel tru long helpim ol na oltaim yumi helpim ol, maski i gat hatwok long en. Mak i stap gutpela piksa long mekim olsem. Taim Pol i no laik kisim Mak i go wantaim ol long namba 2 misineri raun ol i mekim, ating Mak i bel hevi tru long dispela. (Apo. 15:​37, 38) Maski i olsem, dispela i no pasim Mak long mekim ol wok bilong helpim ol wanbilip Kristen bilong em.

⁵ Mak i kisim narapela asainmen na em i go wantaim kasen brata bilong em Barnabas long narapela hap. Klostu 11-pela yia bihain, Mak em wanpela bilong ol brata i bin strongim Pol taim em i bin go kalabus long Rom long namba wan taim. (File. 23, 24) Tru tumas, Pol i amamas long helpim em i kisim, olsem na em i tok Mak “i stap olsem helpim bilong strongim [em].”—Kol. 4:​10, 11.

6. Mak i kisim wanem helpim taim em i bung wantaim ol Kristen i stap strong long bilip? (Lukim futnot.)

⁶ Mak i kisim gutpela helpim taim em i pas gut wantaim ol Kristen i stap strong long bilip. Bihain long em i stap inap sampela haptaim wantaim Pol long Rom, em i go long Babilon bilong mekim wok wantaim aposel Pita long dispela hap. Tupela i kamap ol gutpela pren tru, olsem na Pita i tok long em olsem: “Pikinini bilong mi, Mak.” (1 Pita 5:13) Taim tupela i wok wantaim, ating Pita i stori long Mak long planti samting i bin kamap long laip bilong Jisas na wok autim bilong em, na bihain Mak i raitim ol dispela stori long Gutnius bilong em.a

7. Olsem wanem wanpela yangpela brata em nem bilong em Seung-Woo i bihainim eksampel bilong Mak? (Lukim tu piksa.)

⁷ Mak i bisi tru long mekim wok bilong Jehova na em i pas gut wantaim ol brata i stap strong long bilip. Hau yu inap bihainim pasin bilong Mak? Ating yu putim mak long kamap kongrigesen sevan o elda, tasol yu no winim yet ol dispela mak. Sapos olsem, orait no ken les kwik na wok yet long painim ol rot bilong mekim wok bilong Jehova na helpim kongrigesen. Tingim eksampel bilong Seung-Woo, nau em i mekim wok elda. Taim em i yangpela man, em i save skelim em yet wantaim ol narapela yangpela brata. Sampela i kisim ol wok insait long kongrigesen paslain long em. Seung-Woo i bel hevi olsem ol i no makim em long mekim ol wok insait long kongrigesen, olsem na em i toktok wantaim ol elda long dispela samting. Wanpela elda i kirapim em long mekim ol wok bilong helpim ol narapela, maski sampela taim ol narapela i no luksave long ol gutpela wok em i mekim. Dispela edvais i kirapim Seung-Woo long redi long helpim ol lapun bratasista na ol narapela long kongrigesen long sait bilong trenspot long go long ol miting. Seung-Woo i tingting i go bek, na em i tok: “Nau mi save long wanem samting i insait long pasin bilong givim bel tru long mekim wok bilong helpim ol narapela. Mi kisim bikpela amamas tru taim mi mekim ol samting bilong helpim ol narapela.”

BIHAINIM PASIN BILONG TIMOTI—SOIM OLSEM YU TINGIM TRU OL NARAPELA

8. Wai na Pol i makim Timoti long raun wantaim em na autim gutnius? (Filipai 2:​19-22)

⁸ Pol i nidim ol man i gat strongpela bel long raun wantaim em long mekim wok autim tok taim em i go bek long ol taun we ol i bin mekim nogut long em. Pastaim em i makim Sailas, em wanpela Kristen i mekim wok bilong Jehova inap planti yia, long go wantaim em. (Apo. 15:​22, 40) Na bihain, Pol i makim tu Timoti long go wantaim em. Wai na Pol i laik bai Timoti i go wantaim em? Wanpela risen em olsem, Timoti i gat gutnem namel long ol wanbilip Kristen. (Apo. 16:​1, 2) Na tu, Timoti i save tingim tru ol narapela.—Ritim Filipai 2:​19-22.

9. Hau Timoti i soim olsem em i tingim tru ol wanbilip Kristen?

⁹ Kirap long taim Timoti i mekim wok autim tok wantaim Pol, em i soim olsem em i tingim tru ol narapela winim em yet. Em risen na Pol i no tingting planti taim em i lusim Timoti long Beria bilong em i ken strongim ol nupela disaipel long hap. (Apo. 17:​13, 14) Yumi ken save olsem Timoti i kisim gutpela skul long eksampel bilong Sailas, em tu i bin stap bek long Beria long dispela taim. Tasol bihain Pol i salim Timoti i go long Tesalonaika bilong strongim ol Kristen long dispela taun. (1 Tes. 3:2) Insait long 15 yia bihain, Timoti i lain long “krai wantaim ol man i krai,” em i soim olsem em i pilim ol hevi bilong ol man i karim pen na hevi. (Rom 12:15; 2 Tim. 1:4) Hau ol yangpela brata Kristen inap bihainim pasin bilong Timoti?

10. Hau na wanpela brata nem bilong em Woo Jae i lain long soim olsem em i tingim tru ol narapela?

¹⁰ Wanpela brata nem bilong em Woo Jae i lain long soim olsem em i tingim tru ol narapela. Taim Woo Jae i yangpela man, em i save pilim hatwok long toktok wantaim ol bratasista i gat bikpela krismas. So em i save gritim ol long Haus Kingdom, tasol em i no lusim haptaim long stori wantaim ol. Wanpela elda i tokim Woo Jae long traim long kirapim toktok wantaim ol wanbilip long rot bilong tokim ol long ol samting em i laikim long ol. Na dispela elda i kirapim em tu long tingim samting em brata o sista em i stori wantaim i save amamas long en. Woo Jae i mekim olsem taim em i toktok wantaim ol narapela. Long nau, Woo Jae i mekim wok elda, na em i tok: “Nau mi pilim isi moa long toktok gut wantaim ol manmeri bilong narapela narapela krismas. Mi amamas long save olsem mi kliagut moa long ol samting em ol narapela i tingting planti long en. Na dispela i opim rot long mi inap givim helpim long ol wanbilip Kristen.”

11. Hau ol yangpela brata inap kisim pasin bilong tingim tru ol narapela insait long kongrigesen? (Lukim tu piksa.)

¹¹ Yupela ol yangpela brata tu i ken lain long soim pasin bilong tingim tru ol narapela. Long taim bilong ol miting, toktok wantaim ol manmeri em ol i gat narapela narapela krismas na bekgraun. Askim ol sapos ol i stap orait, na putim gut yau taim ol i toktok. Long dispela rot, yu inap luksave long hau yu ken helpim ol. Ating yu painimaut olsem tupela lapun marit long kongrigesen bilong yu i nidim helpim long hau ol i ken yusim JW Library^® ap. O ating yu luksave olsem ol i no pasim tok long wok wantaim ol narapela long autim tok. Yu ting yu inap givim helpim long ol lain em ol i no save gut long yusim ol smatfon na teblet samting, o stretim rot long wok wantaim ol long autim tok? Taim yu go pas long givim helpim long ol narapela, yu bai stap gutpela eksampel em ol narapela i ken bihainim.

OL EDVAIS BILONG POL I KEN HELPIM YU

12. Hau ol yangpela brata inap kisim skul long ol edvais Pol i givim long Timoti?

¹² Pol i givim gutpela edvais long Timoti bilong helpim em long stap amamas na givim bel olgeta long mekim wok bilong God. (1 Tim. 1:18; 2 Tim. 4:5) Yupela ol yangpela brata tu i ken kisim skul long ol edvais bilong Pol. Hau yu ken mekim olsem? Taim yu ritim tupela pas em Pol i raitim i go long Timoti, tingim olsem ol dispela tok i go long yu tu, na lukim wanem ol tok kaunsel yu ken bihainim long laip bilong yu. Yumi ken stori long sampela eksampel.

13. Yu ken mekim wanem na bai yu inap pas gut wantaim Jehova?

¹³ “Trenim yu yet long kamapim pasin bilong givim bel tru long God, dispela i ken stap olsem mak yu laik winim.” (1 Tim. 4:7b) Pasin bilong givim bel tru long God i makim wanem? Dispela i makim olsem yu pas gut wantaim Jehova na yu laik tru long mekim ol samting bilong amamasim em. Yumi no bon wantaim pasin bilong givim bel tru long God, so yumi mas wok hat long kisim dispela pasin. Hau yumi ken mekim olsem? Dispela tok “trenim yu yet” long tok Grik, planti taim ol i yusim bilong stori long ol man bilong ran long resis em ol i givim bel tru long mekim trening bilong redim ol yet long ran long resis. Ol dispela man i no ken larim ol narapela samting i pulim nabaut tingting bilong ol, ol i mas putim tingting olgeta long winim resis. Yumi tu i mas bosim gut bel na tingting na bai yumi ken kisim ol pasin we inap helpim yumi long pas gut moa wantaim Jehova.

14. Yumi mas putim wanem mak taim yumi ritim Baibel? Stori long dispela.

¹⁴ Taim yu kisim pasin bilong ritim Baibel long olgeta de, yu mas tingim olsem mak yu laik winim em long pas gut moa wantaim Jehova. Olsem, yu inap kisim wanem skul long toktok i kamap namel long Jisas na wanpela yangpela maniman i gat namba? (Mak 10:​17-22) Dispela yangpela man i bilip olsem Jisas em i Mesaia, tasol em i no gat inap bilip long kamap disaipel bilong Jisas. Maski i olsem, Jisas “i laikim em.” Olsem wanem? Yu pilim tru pasin bilong Jisas long toktok gut wantaim dispela yangpela man? I klia tru olsem Jisas i laik em i mekim gutpela disisen. Na tu, Jisas i kamapim klia tru pasin bilong Jehova long laikim dispela man. (Jon 14:9) Taim yu tingim dispela stori na sindaun bilong yu yet, askim yu yet olsem, ‘Mi mas mekim wanem bilong pas gut moa wantaim Jehova na mekim bikpela wok moa bilong helpim ol narapela?’

15. Wai na em i bikpela samting long ol yangpela brata i stap gutpela eksampel long ol narapela? Stori long dispela. (1 Timoti 4:​12, 13)

¹⁵ “Yu mas i stap olsem gutpela eksampel long ol bilipman.” (Ritim 1 Timoti 4:​12, 13.) Pol i kirapim Timoti long lain long rit gut na kamap gutpela tisa, na tu, em i kirapim em long kisim ol pasin olsem pasin laikim, bilip, na pasin i klin. Bilong wanem? Long wanem, pasin man i mekim i winim ol tok em i mekim. Tingim olsem ol i makim yu long mekim wanpela tok long miting i stori long hau yumi ken givim bel moa yet long autim tok. Yu bai pilim isi moa long mekim dispela tok sapos yu yet i save givim bel tru long mekim wok autim tok. Gutpela eksampel bilong yu yet bai strongim ol tok yu mekim.—1 Tim. 3:13.

16. (a) Long wanem 5-pela rot ol yangpela Kristen i ken stap olsem gutpela eksampel? (b) Hau ol yangpela brata i ken stap gutpela eksampel long ‘pasin bilong toktok’?

¹⁶ Olsem 1 Timoti 4:12 i stori long en, Pol i stori long 5-pela rot em ol yangpela brata i ken stap gutpela eksampel long ol narapela. Yu ken mekim stadi projek bilong yu yet na tingim olsem wanem yu ken bihainim ol dispela 5-pela rot. Tingim olsem yu laik stap gutpela eksampel long “pasin bilong yu long toktok.” Tingim ol rot yu ken yusim pasin bilong yu long toktok long strongim ol narapela. Sapos yu stap yet long haus wantaim papamama, orait yu ting yu inap tok tenkyu planti taim moa long ol long ol samting ol i mekim bilong helpim yu? Taim miting i pinis, yu ting yu inap tokim wanpela husat i bin mekim tok o insait long hap bilong miting olsem yu amamas long tok bilong em? Na tu, yu ken traim long bekim tok long tok bilong yu yet long taim bilong miting. Taim yu wok hat long stap gutpela eksampel long pasin bilong yu long toktok, dispela bai soim olsem yu wok long kamap strong moa long bilip.—1 Tim. 4:15.

17. Wanem samting bai helpim ol yangpela brata long winim ol mak bilong bilip ol i putim? (2 Timoti 2:22)

¹⁷ “Ranawe long ol laik i save kamap long bel bilong ol yangpela. Wok strong long bihainim stretpela pasin.” (Ritim 2 Timoti 2:22.) Pol i kirapim Timoti long daunim ol laik we inap pulim tingting bilong em i go longwe long ol mak bilong bilip em i laik winim na bagarapim pasin pren bilong em wantaim Jehova. Na ating yu luksave tu olsem sampela samting yu mekim bilong rileks na kisim amamas we i no gat rong long mekim, ol inap pulim bikpela haptaim bilong yu na yu no gat inap taim long mekim ol samting bilong strongim bilip bilong yu. Olsem, tingim hamas taim yu lusim long pilai spots, o yusim Intenet, o pilaim ol vidio gem. Yu ting yu inap yusim sampela bilong ol dispela haptaim long mekim ol wok lotu na helpim ol narapela? Olsem, yu ken redi long helpim wok bilong lukautim Haus Kingdom bilong yu o insait long kat witnesing. Taim yu mekim ol kain wok olsem, yu bai kisim ol nupela pren na ol bai helpim yu long putim na winim ol mak bilong bilip.

KISIM OL BLESING TAIM YU HELPIM OL NARAPELA

18. Wai na yumi ken tok Mak na Timoti i yusim gut laip bilong ol na ol i amamas tru?

¹⁸ Mak na Timoti i lusim planti samting na bai ol i ken mekim wok bilong helpim gut ol narapela, na long dispela rot ol i yusim gut laip bilong ol na ol i stap amamas tru. (Apo. 20:35) Mak i go long ol ples i stap longwe tru na bai em i ken helpim ol wanbilip Kristen bilong em. Na tu, em i raitim wanpela gutpela stori long laip na wok autim tok bilong Jisas. Timoti i helpim Pol long kamapim ol nupela kongrigesen na long strongim ol wanbilip Kristen. Tru tumas, Jehova i amamas tru long pasin bilong Mak na Timoti long daunim laik bilong ol yet na givim bel tru long mekim wok bilong em.

19. Wai na ol yangpela brata i mas bihainim edvais Pol i givim long Timoti, na wanem gutpela samting bai kamap long dispela?

¹⁹ Pasin laikim em Pol i gat long Timoti i stap ples klia long ol tok em i raitim long ol pas em i salim long Timoti. Ol dispela pas i kamapim klia tu olsem Jehova i laikim tru yupela ol yangpela brata. Na em i laik bai yupela i amamas taim yupela i mekim wok bilong em. So wok strong long bihainim edvais bilong Pol, na kisim pasin bilong i gat laik long mekim ol wok bilong helpim ol narapela. Taim yu mekim olsem, yu bai stap amamas tru long nau na yu bai “holim strong dispela laip em i laip tru” em yu bai kisim long bihain.—1 Tim. 6:​18, 19.