STADI ATIKOL 26
SINGSING 123 Stap Daun Long God
Daunim Yu Yet Taim Yu No Kliagut Long Sampela Samting
“God i Gat Olgeta Strong, em i antap tru, na yumi no inap kliagut long em.”—JOP 37:23
SKUL YUMI BAI KISIM
Yumi no save long olgeta samting bai kamap bihain, tasol yumi ken sanap strong taim yumi putim tingting olgeta long ol samting yumi save pinis long en na trastim tru Jehova.
1. Jehova i wokim yumi olsem wanem, na bilong wanem?
JEHOVA i wokim yumi gut tru, na yumi inap wokim tingting, kisim save, kliagut long ol samting, na bihainim savetingting. Wai na em i wokim yumi olsem? Em i laik bai yumi “save gut long God” na mekim wok bilong em wantaim gutpela tingting.—Prov. 2:1-5; Rom 12:1.
2. (a) I gat wanem ol samting em yumi no inap kliagut long en? (Jop 37:23, 24) (Lukim tu piksa.) (b) Taim yumi daunim yumi yet na luksave long mak bilong yumi, olsem wanem dispela inap helpim yumi?
2 God i wokim yumi na yumi inap kisim save long planti samting, tasol i gat ol samting em yumi no inap kliagut long en. (Ritim Jop 37:23, 24.) Skelim stori bilong Jop. God i givim planti askim long Jop na dispela i kamapim klia olsem Jop i no save long planti samting. Dispela ekspiriens i bin helpim Jop long daunim em yet na senisim tingting bilong em. (Jop 42:3-6) Yumi tu i save kisim helpim taim yumi daunim yumi yet na luksave olsem i gat planti samting em yumi no save long en. Kain pasin daun olsem bai kirapim yumi long trastim Jehova olsem em bai kamapim klia ol samting em tru tru yumi mas save long en bilong wokim ol gutpela disisen.—Prov. 2:6.
Taim yumi tokaut olsem yumi no save long sampela samting, dispela inap helpim yumi wankain olsem i bin helpim Jop (Lukim paragraf 2)
3. Bai yumi stori long wanem samting long dispela atikol?
3 Long dispela atikol, yumi bai stori long sampela samting yumi no save long en na ol hatwok yumi inap bungim bikos long dispela. Yumi bai stori tu long risen na em i gutpela olsem yumi no save long sampela samting. Taim yumi stori long ol dispela poin, dispela bai strongim bilip bilong yumi long Jehova em “Man i gat olgeta save,” olsem em bai tokim yumi long ol samting em tru tru yumi mas save long en.—Jop 37:16.
YUMI NO SAVE LONG WANEM TAIM PINIS BAI KAMAP
4. Olsem Matyu 24:36 i kamapim, wanem wanpela samting em yumi no save long en?
4 Ritim Matyu 24:36. Yumi no save long wanem taim pinis bilong dispela haptaim bilong nau bai kamap. Taim Jisas i stap long graun, em i no save long “dispela de na dispela aua.”a Bihain em i tokim ol aposel bilong em olsem Jehova em Man Bilong Makim Taim, em i save long wanem taim stret ol samting bai kamap na “em samting bilong em yet long makim.” (Apo. 1:6, 7) Jehova i gat sediul long wanem taim stret pinis bilong dispela haptaim bilong nau bai kamap, tasol yumi no gat rot bilong save long wanem taim stret ol dispela samting bai kamap.
5. Yumi no save long wanem taim pinis bai kamap, na dispela inap mekim wanem long yumi?
5 Olsem Jisas i tok, yumi no save long hamas haptaim yumi mas wet inap long pinis i kamap. Dispela inap mekim na yumi inap les kwik o bel hevi, moa yet sapos yumi bin wetim de bilong Jehova inap longpela taim pinis. O yumi inap pilim hatwok long sanap strong na karim hevi taim ol wanfamili o ol narapela i tok bilas long yumi. (2 Pita 3:3, 4) Yumi inap pilim olsem sapos yumi save long wanem taim stret pinis bai kamap, ating em bai isi moa long yumi stap isi na wet, na tu, yumi no inap les kwik taim ol narapela i tok bilas long yumi.
6. Wai na em i gutpela olsem yumi no save long wanem taim pinis bai kamap?
6 Taim Jehova i no tokaut long wanem taim pinis bai kamap, em i givim rot long yumi long mekim wok bilong em bikos long pasin bilong yumi long laikim em na trastim em. Yumi laik mekim wok bilong Jehova inap oltaim oltaim, na i no bilong mekim olsem i go inap long pinis i kamap na em tasol, nogat. Yumi no laik putim tingting olgeta long wanem taim “de bilong Jehova” bai kamap, nogat, yumi laik putim tingting olgeta long ol samting bai kamap bihain long dispela de. Taim yumi mekim olsem, yumi bai wok yet long givim bel olgeta long lotuim God na wok strong long amamasim em.—2 Pita 3:11, 12.
7. Yumi save long wanem samting?
7 I gutpela long yumi putim tingting olgeta long ol samting yumi save long en—olsem las de i bin kirap long 1914. Jehova i kamapim planti tok profet bilong Baibel i makim stret dispela yia, na tu, em i stori long ol samting bai kamap long graun kirap long dispela taim na i kam. Em as na yumi save tru olsem “bikpela de bilong Jehova i kam klostu pinis.” (Sef. 1:14) Yumi save tu long wok Jehova i laik yumi mas mekim, em long autim “gutnius bilong Kingdom” long planti manmeri moa. (Mat. 24:14) Yumi autim dispela gutnius long winim 240 kantri na winim 1,000 tokples. Yumi no gat wok long save long “dispela de na dispela aua” bilong givim bel olgeta long mekim dispela bikpela wok.
YUMI NO SAVE LONG HAU JEHOVA BAI HELPIM YUMI
8. Dispela tok “ol wok bilong God tru” i makim wanem samting? (Eklisiastis 11:5)
8 Oltaim yumi no inap save long “ol wok bilong God tru.” (Ritim Eklisiastis 11:5.) Dispela tok i makim ol samting Jehova i mekim i kamap o larim i kamap bilong inapim laik bilong em. Yumi no inap save long risen na Jehova i larim wanpela samting i kamap o wanem samting stret em bai mekim bilong helpim yumi. (Sng. 37:5) Yumi no inap kliagut long kain save olsem, wankain olsem yumi no inap kliagut long hau bebi i save kamap insait long bel bilong mama, em samting ol saientis tu i hatwok long kliagut long en.
9. Yumi no save long hau Jehova bai helpim yumi, na dispela inap mekim na yumi gat wanem ol tingting?
9 Yumi no save long hau Jehova bai mekim ol samting bilong helpim yumi, na dispela inap mekim na yumi surik long mekim ol disisen. Yumi inap surik long lusim sampela samting bilong mekim bikpela wok moa bilong autim tok, olsem holim liklik samting tasol o muv i go long hap i sot long ol pablisa bilong Kingdom. O yumi inap pilim olsem God i no orait moa long yumi sapos yumi no winim ol mak yumi putim long mekim wok bilong Em, o sapos yumi no lukim gutpela samting i kamap long wok autim tok bilong yumi o yumi bungim ol hevi taim yumi wok long wanpela projek bilong oganaisesen.
10. Yumi no save long ol samting Jehova bai mekim, na dispela inap helpim yumi long kisim wanem gutpela pasin?
10 Yumi no save long ol samting Jehova bai mekim na dispela inap helpim yumi long kisim gutpela pasin olsem pasin daun. Yumi luksave olsem ol tingting na pasin bilong Jehova i antap moa winim bilong yumi. (Ais. 55:8, 9) Na tu, yumi lain long trastim tru Jehova na wet long em i helpim yumi. Taim yumi lukim gutpela samting i kamap long wok autim tok bilong yumi o long tiokratik projek yumi mekim, i stret yumi preisim Jehova long dispela. (Sng. 127:1; 1 Kor. 3:7) Sapos ol samting i no kamap olsem yumi ting long en, orait yumi mas tingim olsem Jehova i save long olgeta samting. (Ais. 26:12) Yumi ken mekim ol wok em yumi gat wok long mekim na oltaim bilip olsem Jehova bai helpim yumi. Yumi bilip tru olsem Jehova bai givim daireksen yumi nidim, maski em i no inap mekim long rot bilong wanpela mirakel olsem em i bin mekim long bipo.—Apo. 16:6-10.
11. Yumi save long wanem samting na dispela i ken helpim yumi?
11 I gutpela long yumi tingim olsem oltaim Jehova i save mekim pasin laikim, stretpela pasin, na bihainim savetingting. Yumi save olsem em i tingim tru ol wok bilong em yumi mekim na ol wok yumi mekim bilong helpim ol bratasista. Na yumi save olsem oltaim Jehova i save givim gutpela pe long ol man i stap gut long em.—Hib. 11:6.
YUMI NO SAVE LONG WANEM SAMTING BAI KAMAP TUMORA
12. Olsem Jems 4:13, 14 i kamapim, yumi no save long wanem samting?
12 Ritim Jems 4:13, 14. Wanpela bikpela tok i tru em olsem yumi no save long wanem samting bai kamap long laip bilong yumi tumora. Long dispela haptaim bilong yumi, “taim nogut na ol samting we man i no ting inap kamap, i save painim olgeta” man. (Ekl. 9:11) Em as na yumi no save ol plen bilong yumi bai kamap gut o nogat, na yumi no save bai yumi stap laip yet bilong karimaut ol plen bilong yumi inap long ol i pinis, o nogat.
13. Yumi no save long ol samting bai kamap bihain, na dispela inap mekim wanem long yumi?
13 Yumi no save long wanem samting bai kamap bihain na sampela taim dispela i givim hatwok long yumi. Wai na yumi tok olsem? Bikos yumi inap wari long ol samting bai kamap, na dispela inap pinisim amamas bilong yumi. Ol hevi na ol samting yumi no ting long en i save kamap na dispela i save mekim yumi krai sori na bel hevi. Na taim samting yumi ekspektim i no kamap, yumi save wari na bel hevi.—Prov. 13:12.
14. Yumi mas mekim wanem samting bilong stap amamas tru? (Lukim tu ol piksa.)
14 Taim yumi sanap strong na karim ol hevi, yumi pruvim olsem maski wanem samting i kamap, yumi mekim wok bilong Papa bilong yumi long heven bikos yumi laikim em, na i no bikos yumi tingim yumi yet tasol. Ol stori bilong Baibel i kamapim klia olsem yumi no ken ekspektim Jehova long banisim yumi long olgeta kain hevi na yumi no ken ting em i makim pinis ol samting bai kamap long laip bilong yumi. Em i save olsem yumi no gat nid long save long ol samting bai kamap bihain bilong mekim yumi stap amamas tru, nogat. Yumi bai stap amamas taim yumi larim em i stiaim yumi na yumi bihainim tok bilong em. (Jer. 10:23) Taim yumi larim em i stiaim yumi long ol disisen yumi mekim, i olsem yumi tok: “Sapos em laik bilong Jehova, orait bai yumi stap laip na mekim ol samting yumi tingting long mekim.”—Jems 4:15.
Taim yumi larim Jehova i stiaim yumi na yumi bihainim tok bilong em, dispela i lukautim yumi (Lukim paragraf 14-15)b
15. Wanem samting bai kamap long bihain?
15 Long olgeta wan wan de, yumi no save long wanem samting bai kamap, tasol yumi save olsem Jehova i promis long givim laip oltaim long yumi long bihain, em laip oltaim long heven o long graun. Yumi save olsem em i no save tok giaman na i no gat wanpela samting bai pasim em long truim ol tok promis bilong em. (Tai. 1:2) Em wanpela tasol i save “tokaut long dispela samting bai pinis olsem wanem, na long bipo yet [em i] save tokaut long ol samting i no kamap yet.” Dispela tok em i tru long ol samting i bin kamap bipo, na em bai tru long ol samting bai kamap bihain. (Ais. 46:10) Yumi save tru olsem i no gat wanpela samting bai pasim Jehova long laikim yumi. (Rom 8:35-39) Em bai givim yumi savetingting, mekim gut bel bilong yumi, na strongim yumi long karim wanem ol hevi i kamap long laip bilong yumi. Yumi ken save tru olsem Jehova bai helpim na blesim yumi.—Jer. 17:7, 8.
YUMI NO INAP KLIAGUT LONG HAU JEHOVA I SAVE GUT LONG YUMI
16. Olsem Buk Song 139:1-6 i kamapim, yumi no inap kliagut long wanem save Jehova i gat long yumi?
16 Ritim Buk Song 139:1-6. Krieta bilong yumi i save long hau em i wokim yumi na wanem ol samting i stiaim bel na tingting bilong yumi. Oltaim em i save tingim yumi. Jehova i save long ol tok yumi mekim na poin yumi laik kamapim, na em i save tu long ol pasin yumi mekim na risen na yumi mekim olsem. Olsem King Devit i tok, oltaim Jehova i sambai long yumi na em i redi long helpim yumi. Em i gutpela samting tru long save olsem bikpela King bilong yunives, na Man Bilong Wokim heven na graun na God i Gat Olgeta Strong, em i save tingim tru yumi ol man! Devit i tok: “Yu save gut tru long mi na dispela i winim tru tingting bilong mi.”—Sng. 139:6.
17. Wai na sampela taim yumi inap hatwok long tingim olsem Jehova i save gut tru long yumi?
17 Ating famili bekgraun bilong yumi, kalsa bilong yumi, o ol bilip yumi bin holim long bipo inap mekim na yumi hatwok long tingim Jehova olsem wanpela Papa i gat pasin laikim na i save tingim tru yumi. O yumi inap pilim olsem ol popaia yumi bin mekim long bipo i nogut tru long ai bilong Jehova na em i no laik save long yumi, na em i stap longwe long yumi. Sampela taim Devit i bin pilim olsem tu. (Sng. 38:18, 21) O ating wanpela man i gat gutpela bel na em i laik senisim laip stail bilong em na bihainim ol stretpela lo bilong God, em inap ting olsem: ‘Sapos God i save gut tru long mi, orait wai na em i laik mi mas senisim laip stail em mi save laikim tru?’
18. Taim yumi save olsem Jehova i save gut moa long yumi, olsem wanem dispela inap helpim yumi? (Lukim tu ol piksa.)
18 Yumi ken lain olsem Jehova i save gut moa long yumi winim save yumi gat long yumi yet, na em i lukim ol gutpela samting long yumi em yumi yet i no inap lukim. Maski em i lukim ol pasin kranki bilong yumi na kliagut long wai yumi pilim o mekim samting long wei yumi mekim, em i wok yet long laikim yumi. (Rom 7:15) Taim yumi pilim tru pasin bilong Jehova long lukim ol gutpela pasin bilong yumi, dispela inap strongim yumi long stap gut yet long em na amamas long mekim wok bilong em.
Jehova i strongim yumi long wetim nupela taim em i promis long kamapim bihain na long dispela rot em i helpim yumi long karim wanem ol hevi i painim yumi long nau (Lukim paragraf 18-19)c
19. Yumi save long wanem samting long Jehova?
19 Yumi save olsem Jehova em i pasin laikim. Na yumi no gat tupela tingting long dispela. (1 Jon 4:8) Yumi save olsem ol stretpela lo bilong em i kamapim klia pasin bilong em long laikim yumi na oltaim em i laik bai ol gutpela samting tasol i ken painim yumi. Yumi save olsem Jehova i laik yumi kisim laip oltaim. Em i givim pe bilong baim bek man bilong opim rot na bai yumi ken kisim dispela laip. Pe bilong baim bek man i ken mekim gut bel bilong yumi olsem maski yumi no gutpela olgeta, yumi ken mekim wok bilong God long pasin em i orait long en. (Rom 7:24, 25) Na yumi save olsem “God i winim tru bel bilong yumi na em i save long olgeta samting.” (1 Jon 3:19, 20) Jehova i save long olgeta samting long yumi, na em i bilip long yumi olsem yumi inap mekim gut wok bilong em.
20. Wanem samting bai helpim yumi long abrusim pasin bilong tingting planti?
20 Jehova i no pasim yumi long kisim save long ol samting em tru tru yumi mas save long en. Taim yumi daunim yumi yet na holim stretpela tingting, yumi bai abrusim pasin bilong tingting planti long ol samting em yumi no gat wok long save long en na yumi bai putim tingting olgeta long ol bikpela samting. Taim yumi mekim olsem, yumi soim olsem yumi trastim tru Jehova, em “Man i gat olgeta save.” (Jop 36:4) Maski yumi no inap kliagut long olgeta samting long nau, yumi luk fowed long taim we yumi bai stap laip oltaim na yumi bai kisim planti save moa long Nambawan God bilong yumi.—Ekl. 3:11.
SINGSING 104 Holi Spirit Presen Bilong God
b STORI BILONG OL PIKSA: Wanpela papa na pikinini man bilong em i redim imejensi beg bilong ol bilong redi long taim nogut.
c STORI BILONG PIKSA: Wanpela brata i wok long karim ol hevi i luk fowed long amamas em bai kisim long nupela taim.