Helpim Baibel Sumatin Long Kirap Lotuim Jehova

1-2. (a) Wai na sampela Baibel sumatin i surik long wokim disisen long lotuim Jehova? (b) Yumi bai stori long wanem samting long dispela atikol?

YU BIN surik long wokim disisen long kamap wanpela Witnes Bilong Jehova? Ating yu pret olsem ol wanwok, ol pren, o ol wanfamili inap birua long yu. O ating yu pilim olsem yu no inap long bihainim gut ol lo bilong God. Sapos olsem, orait yu inap kliagut long hau ol Baibel sumatin i pilim, em ol sumatin i surik long mekim disisen long kirap lotuim Jehova.

² Jisas i luksave olsem kain pasin bilong pret inap pasim ol long kirap lotuim Jehova. (Mat. 13:​20-22) Tasol em i no givap long ol lain i surik long kamap ol disaipel bilong em. Em i soim ol disaipel hau ol i ken helpim kain lain olsem long (1) luksave long ol samting i pasim ol long kirap lotuim Jehova, (2) strongim pasin bilong ol long laikim Jehova, (3) putim Jehova i stap nambawan, na (4) helpim ol long winim ol hatwok. Hau yumi ken bihainim ol tok Jisas i mekim long ol disaipel bilong em taim yumi yusim buk Stap Amamas Oltaim! long helpim ol Baibel sumatin long mekim disisen long lotuim Jehova?

HELPIM SUMATIN LONG LUKSAVE LONG OL SAMTING I PASIM EM LONG LOTUIM JEHOVA

3. Ating wanem samting i pasim Nikodemus long kamap disaipel bilong Jisas?

³ Nikodemus em wanpela lida bilong ol Juda. Em i laik kamap disaipel bilong Jisas, tasol wanpela samting i pasim em long mekim olsem. Inap 6-pela mun bihain long Jisas i kirapim wok autim tok bilong em, Nikodemus i luksave olsem God i salim Jisas i kam. (Jon 3:​1, 2) Tasol Nikodemus i hait na bungim Jisas bikos em i “pret long ol Juda.” (Jon 7:13; 12:42) Ating em i ting olsem sapos em i kamap disaipel bilong Jisas, em bai lusim biknem, namba, na mani kago bilong em.a

4. Hau Jisas i helpim Nikodemus long kliagut long samting God i laik em i mas mekim?

⁴ Nikodemus i save gut long Lo, tasol em i nidim helpim long kliagut long samting Jehova i laik em i mas mekim. Jisas i helpim em olsem wanem? Jisas i lusim haptaim long toktok gut wantaim Nikodemus, na em i mekim olsem long nait. Jisas i tokim Nikodemus long samting em i mas mekim bilong kamap wanpela disaipel, olsem: Em i mas tanim bel long ol sin bilong em, kisim baptais long wara, na bilip long Pikinini Bilong God.—Jon 3:​5, 14-21.

5. Hau yumi ken helpim Baibel sumatin long luksave long samting i pasim em long kirap lotuim Jehova?

⁵ Wanpela Baibel sumatin inap kliagut long ol tok bilong Baibel, tasol ating em i nidim helpim long luksave long samting i pasim em long kirap lotuim Jehova. Ating wok mani o pasin birua bilong famili inap pasim em long winim ol mak bilong bilip em i putim. So lusim haptaim long helpim sumatin bilong yu. Yu ken invaitim em long dring kofi wantaim yu o raun wantaim yu long nambis o long pak samting. Long kain taim olsem, yutupela inap stori gut na em inap tokim yu long ol hevi em i karim. Kirapim sumatin long mekim ol senis em i mas mekim bilong soim olsem em i laikim Jehova, na i no bilong amamasim yu.

6. Hau yu ken helpim sumatin long strongim bel na bihainim ol tok em i lainim? (1 Korin 16:13)

⁶ Taim Baibel sumatin i bilip olsem Jehova bai helpim em long bihainim ol lo bilong Baibel, dispela bai strongim em long bihainim ol tok em i lainim. (Ritim 1 Korin 16:13.) Wok bilong yu i wankain olsem wok bilong tisa long skul. Tingim taim yu bin stap long skul, yu save laikim wanem kain tisa? Ating yu laikim tisa husat i no les kwik long yu na em i helpim yu long bilip olsem yu inap mekim ol samting em i lainim yu long en. Olsem tasol, wanpela gutpela tisa bilong Baibel i no save skulim tasol sumatin long ol samting God i laik yumi mas mekim, em i save strongim tu sumatin olsem Jehova inap helpim em long mekim ol senis em i gat wok long mekim. Hau yu inap mekim olsem?

HELPIM SUMATIN LONG LAIKIM TRU JEHOVA

7. Hau Jisas i helpim ol lain i putim yau long em long strongim pasin bilong ol long laikim Jehova?

⁷ Jisas i save olsem pasin bilong laikim God bai kirapim ol disaipel bilong em long bihainim ol samting ol i lainim. Planti taim em i skulim ol long ol samting we bai helpim ol long strongim pasin bilong ol long laikim Papa bilong ol long heven. Olsem, em i tok Jehova i olsem wanpela man husat i save givim ol gutpela samting long ol pikinini bilong em. (Mat. 7:​9-11) Ating sampela man husat i putim yau long Jisas, ol i no gat kain gutpela papa olsem. Piksaim long tingting samting ol i pilim taim Jisas i mekim tok piksa long papa i gat pasin sori i welkamim bek pikinini bilong em husat i bin bikhet na bihainim pasin i no stret. Jisas i helpim ol long luksave olsem Jehova i save sori tru long ol pikinini bilong em long graun.—Luk 15:​20-24.

8. Olsem wanem yu ken helpim Baibel sumatin long laikim tru Jehova?

⁸ Yu tu i ken helpim Baibel sumatin long laikim tru Jehova taim yu skulim em long ol pasin bilong God. Long olgeta taim yupela i stadi, helpim em long kliagut olsem ol samting em i lainim i soim olsem Jehova i laikim em. Taim yutupela i stori long pe bilong baim bek man, kamapim klia hau dispela i helpim em. (Rom 5:8; 1 Jon 4:10) Taim sumatin i luksave olsem Jehova i laikim em, dispela inap kirapim em long laikim Jehova.—Gal. 2:20.

9. Wanem samting i helpim Michael long senisim pasin bilong em?

⁹ Tingim stori bilong Michael long Indonesia. Em i kamap bikpela insait long tok i tru, tasol em i no bin kisim baptais. Taim em i gat 18 krismas, em i go long narapela kantri long wok olsem wanpela trak draiva. Bihain em i marit, tasol em i lusim famili bilong em na go long narapela kantri bilong wok mani. Long dispela haptaim, meri na pikinini meri bilong em i kirap stadi long Baibel na ol i mekim ol senis. Bihain long mama bilong em i dai, Michael i kam bek long ples bilong lukautim papa bilong em na em tu i kirap stadi long Baibel. Taim Michael i skelim dispela seksen “Mekim Wok Painimaut” long lesen 27 bilong buk Stap Amamas Oltaim! em i pilim tru long bel ol tok em i lainim. Taim Michael i tingim hau Jehova i pilim taim em i lukim Jisas i karim pen na hevi, em i aiwara. Em i tenkyu tru long pe bilong baim bek man, na dispela i kirapim em long senisim ol pasin bilong em na kisim baptais.

HELPIM SUMATIN LONG PUTIM JEHOVA I STAP NAMBAWAN

10. Hau Jisas i helpim ol disaipel long pastaim long putim Jehova i stap nambawan? (Luk 5:​5-11) (Lukim tu piksa.)

¹⁰ Ol disaipel long pastaim i luksave hariap olsem Jisas em i dispela promis Mesaia, tasol ol i nidim helpim long putim wok autim tok i go pas long ol narapela samting. Pita na Andru i stap olsem ol disaipel bilong Jisas inap sampela haptaim pinis taim Jisas i singautim ol long mekim olsem fultaim. (Mat. 4:​18, 19) Ol i gat gutpela wok bisnis bilong kisim pis, na Jems na Jon i wok wantaim ol. (Mak 1:​16-20) Taim Pita na Andru i “lusim umben bilong ol,” ating ol i wokim plen pinis long hau ol bai lukautim famili bilong ol taim ol i bihainim Jisas. Wanem samting i helpim ol long putim wok bilong Kingdom i go pas long wok bisnis bilong ol? Stori bilong Luk i soim klia olsem wanpela mirakel Jisas i wokim i strongim bilip bilong ol olsem oltaim Jehova bai lukautim ol long ol samting ol i nidim.—Ritim Luk 5:​5-11.

11. Hau yumi ken yusim ekspiriens bilong yumi yet long strongim bilip bilong sumatin?

¹¹ Yumi no inap wokim ol mirakel olsem Jisas i bin mekim, tasol yumi inap tokim sumatin long ol ekspiriens bilong yumi yet bilong soim em olsem Jehova i save lukautim ol man i putim Em i stap nambawan. Olsem, yu inap tingim hau Jehova i bin helpim yu taim yu kirap long go long ol miting? Ating yu toktok wantaim bos long risen na yu no inap wok ovataim moa sapos dispela i pasim yu long go long miting. Taim yu tokim sumatin long ekspiriens bilong yu, stori long hau bilip bilong yu i kamap strong moa taim yu lukim olsem Jehova i sapotim disisen yu mekim long putim wok lotu bilong em i stap nambawan samting long laip bilong yu.

12. (a) Wai na yumi mas invaitim ol narapela pablisa long Baibel stadi bilong yumi? (b) Hau yu ken yusim ol vidio long skulim gut ol sumatin bilong yu? Stori long wanpela eksampel.

¹² Narapela rot sumatin inap kisim helpim em long harim ol narapela Kristen i stori long ol senis ol i mekim long putim Jehova i stap nambawan. So invaitim ol wanbilip em ol i gat kain kain bekgraun long go wantaim yu long mekim Baibel stadi. Askim ol long stori long hau ol i kisim tok i tru na ol samting ol i mekim bilong putim Jehova i stap nambawan long laip bilong ol. Na tu, lusim haptaim wantaim sumatin long lukim ol vidio long hap “Mekim Wok Painimaut” o “Kisim Sampela Save Moa” long buk Stap Amamas Oltaim! Olsem, taim yupela i stadi long lesen 37, yu ken stori long ol bikpela tok bilong vidio “Jehova Bai Lukautim Yumi Long Samting Yumi Nidim.”

HELPIM SUMATIN LONG WINIM OL HATWOK

13. Hau na Jisas i redim ol disaipel bilong em long bungim pasin birua?

¹³ Planti taim Jisas i tokim ol disaipel bilong em olsem ol narapela man olsem ol wanblut bilong ol bai birua long ol. (Mat. 5:11; 10:​22, 36) Klostu long taim Jisas i pinisim wok autim tok bilong em, em i givim tok lukaut long ol disaipel bilong em olsem ol man inap kilim ol i dai. (Mat. 24:9; Jon 15:20; 16:2) Em i kirapim ol long was gut taim ol i autim tok. Em i tok ol i no ken tok pait wantaim ol man i birua long ol na ol i mas bihainim savepasin bambai ol i ken autim tok yet.

14. Hau yumi ken redim sumatin long karim hevi bilong pasin birua? (2 Timoti 3:12)

¹⁴ Yumi ken redim sumatin long karim hevi bilong pasin birua taim yumi stori long em long ol tok em ol wanwok, ol pren, na ol wanfamili inap mekim long em. (Ritim 2 Timoti 3:12.) Sampela wanwok inap tok bilas long em bikos em i kirap long bihainim ol tok bilong Baibel. Ol narapela na ol wanfamili tu inap sutim tok long em long ol bilip bilong Baibel em i holim. Taim yumi hariap long redim ol sumatin bilong yumi long lain long karim hevi bilong pasin birua, ol bai save long tok na pasin ol i mas mekim taim dispela hevi i kamap.

15. Wanem samting inap helpim Baibel sumatin taim famili i birua long em?

¹⁵ Sapos ol wanfamili bilong sumatin i birua long em, helpim em long tingim risen na ol i mekim olsem. Ating ol i ting olsem ol Witnes Bilong Jehova i paulim em o giamanim em o ating ol i no laikim ol Witnes. Ol wanfamili bilong Jisas tu i bin mekim kain pasin long em. (Mak 3:21; Jon 7:5) Skulim sumatin long no ken les kwik na bihainim gutpela tingting taim em i toktok wantaim ol wanfamili na ol narapela.

16. Hau yumi inap helpim Baibel sumatin long bihainim gutpela tingting taim em i autim bilip bilong em?

¹⁶ Taim wanpela wanfamili i laik save moa long tok bilong Baibel, sumatin i ken bihainim savetingting na em i no ken stori long olgeta samting long wankain taim. Nogut wanfamili bilong em i pilim olsem em planti samting tumas long lainim na em bai surik long toktok wantaim em long narapela taim. Kirapim sumatin long mekim ol sotpela tok taim em i autim bilip bilong em, na bai rot i op long em inap stori gen wantaim wanfamili long narapela taim. (Kol. 4:6) Ating em i ken invaitim ol wanfamili long lukim jw.org. Dispela bai opim rot long ol inap kisim save moa long ol Witnes Bilong Jehova long wanem taim i stret long ol.

17. Hau yu ken trenim sumatin long ol tok em i ken mekim long ol man i gat tingting kranki long ol Witnes Bilong Jehova? (Lukim tu piksa.)

¹⁷ Yu ken yusim siris “Ol Askim Planti Man i Gat” long jw.org long helpim sumatin long redim ol sotpela bekim bilong ol askim em ol wanfamili o ol wanwok i kamapim. (2 Tim. 2:​24, 25) Long pinis bilong olgeta lesen, mekim riviu long seksen “Sampela Man i Tok” long buk Stap Amamas Oltaim! Kirapim sumatin long prektisim ol tok em bai mekim taim em i bekim tok na em i ken mekim long toktok bilong em yet. No ken surik long givim em sampela edvais long hau em i ken givim gutpela bekim. Kain pasin bilong prektis bai helpim em long sanap strong na sambai long bilip bilong em.

18. Hau yu ken strongim sumatin long kamapim bilip bilong em taim em i autim tok? (Matyu 10:27)

¹⁸ Jisas i kirapim ol disaipel bilong em long autim gutnius long ol manmeri. (Ritim Matyu 10:27.) Taim sumatin i kirap hariap long autim bilip bilong em, kwiktaim em bai lain long wet long Jehova i helpim em. Hau yu ken helpim sumatin long putim dispela mak? Taim toksave i kamap long kongrigesen olsem bai gat spesel kempein, kirapim sumatin long tingim ol mak em inap winim bilong kamap pablisa. Stori long wai sampela i bin pilim isi moa long autim tok long taim bilong ol kempein. Em inap putim mak tu long insait long skul i save kamap long miting namel long wik. Taim em i wok strong long winim dispela mak, em bai lain gut long hau em i ken autim bilip bilong em.

SOIM OLSEM YU BILIP LONG SUMATIN BILONG YU

19. Hau Jisas i soim olsem em i bilip long ol disaipel bilong em, na hau yumi ken bihainim pasin bilong em?

¹⁹ Paslain long Jisas i go long heven, em i tokim ol disaipel olsem ol bai bung gen wantaim em. Ol i no kliagut olsem tok bilong em i makim olsem ol tu bai go long heven. Tasol Jisas i tingim pasin bilong ol long stap gut long em, na i no pasin bilong ol long holim tupela tingting. (Jon 14:​1-5, 8) Em i save olsem ol i nidim sampela haptaim moa long kliagut long ol samting, olsem bilip bilong i go long heven. (Jon 16:12) Yumi tu i ken soim olsem yumi bilip long sumatin bilong yumi olsem em i laik amamasim Jehova.

20. Olsem wanem wanpela sista long Malawi i soim olsem em i bilip long sumatin bilong em?

²⁰ Yumi ken bilip yet olsem sumatin bilong yumi i laik mekim samting i stret. Olsem, tingim stori bilong Chifundo em wanpela sista long Malawi. Em i yusim buk Stap Amamas Oltaim! long mekim Baibel stadi wantaim Alinafe, em wanpela yangpela meri bilong lotu Katolik. Taim ol i pinisim lesen 14, Chifundo i askim Alinafe long tingting em i gat long pasin bilong yusim imis long lotu. Alinafe i bel hevi wantaim na i tok: “Em disisen bilong wan wan yet long mekim!” Chifundo i tingting planti olsem nogut Alinafe bai stop long stadi. Tasol em i no les kwik na em i stadi yet wantaim Alinafe, na em i bilip olsem sampela haptaim bihain em bai kliagut long dispela tok. Sampela mun bihain, Chifundo i givim askim bilong lesen 34 olsem: “Taim yu wok long stadi long Baibel na kisim save long God tru, Jehova, dispela i helpim yu olsem wanem?” Chifundo i tok: “Alinafe i kolim planti naispela poin, wanpela em olsem ol Witnes i no save mekim ol pasin em Baibel i no orait long en.” Bihain liklik, Alinafe i no yusim moa ol imis long lotu na em i winim mak na kisim baptais.

21. Hau yumi ken strongim laik bilong sumatin long wokim disisen long kirap lotuim Jehova?

²¹ Jehova yet i save “mekim kaikai i gro,” tasol yumi tu i gat wok long helpim ol Baibel sumatin long winim ol mak bilong bilip. (1 Kor. 3:7) Yumi skulim sumatin long ol samting God i laik em i mas mekim. Na yumi helpim em tu long kisim pasin bilong laikim tru Jehova. Na tu, yumi kirapim em long soim olsem em i laikim Jehova long rot bilong putim Em i stap nambawan. Na yumi skulim em long hau em inap bilip na wet long Jehova i helpim long taim bilong hevi. Taim yumi soim olsem yumi bilip long em, yumi strongim em olsem em tu i ken bihainim ol lo bilong Jehova na wokim disisen long kirap lotuim Em.