Yu Ken Bilip Tru Olsem Jehova i Fogivim Yu

1-2. Ol sinman em ol i tanim bel i save pilim olsem wanem taim Jehova i fogivim ol? (Lukim tu piksa.)

KING Devit i save long bel hevi wanpela inap pilim taim bel i kotim em long ol sin em i mekim long bipo. (Sng. 40:12; 51:3; supaskripsen) Devit i bin mekim sampela bikpela rong long laip bilong em. Tasol em i soim olsem em i tanim bel tru na Jehova i fogivim em. (2 Sml. 12:13) Olsem na Devit i kliagut long amamas wanpela inap pilim taim Jehova i fogivim em.—Sng. 32:1.

² Olsem Devit, yumi tu inap amamas taim Jehova i marimari long yumi na fogivim yumi. Yumi kisim bel isi long save olsem Jehova i redi long fogivim ol sin bilong yumi—ol bikpela sin tu—sapos yumi tanim bel tru, tokaut long ol rong bilong yumi, na wok strong long no ken mekim dispela rong gen! (Prov. 28:13; Apo. 26:20; 1 Jon 1:9) Na yumi amamas tru long save olsem Jehova i save lusim olgeta ol rong bilong yumi na i olsem yumi no bin mekim ol dispela rong long bipo!—Ese. 33:16.

3-4. (a) Wanpela sista i pilim olsem wanem bihain long em i kisim baptais? (b) Yumi bai stori long wanem samting long dispela atikol?

³ Sampela taim, sampela inap pilim hatwok long bilip olsem Jehova i fogivim ol. Tingim stori bilong Jennifer, em papamama i mekim bikpela long em long tok i tru. Taim em i tineja, em i kirap insait long ol pasin nogut na em i haitim dispela long papamama bilong em. Planti yia bihain, em i kam bek long Jehova na bihain em i winim mak bilong kisim baptais. Em i tok: “Long bipo, mi save bungim mani kago, insait long pasin pamuk, dring spak, na mi meri bilong belhat nogut tru. Long tingting, mi save olsem sapos mi tanim bel na beten strong na askim Jehova long fogivim mi, orait ofa bilong Krais bai mekim mi kamap klin. Tasol long bel, mi hatwok tru long bilip olsem Jehova i fogivim mi.”

⁴ Olsem wanem? Sampela taim yu pilim hatwok long bilip olsem Jehova i fogivim yu long ol rong yu mekim long bipo? Jehova i laik bai yumi bilip tru olsem em i marimari long yumi wankain olsem Devit i bin bilip tru long dispela. Long dispela atikol, yumi bai stori long as na yumi mas bilip olsem Jehova i fogivim yumi na wanem ol samting inap helpim yumi long mekim olsem.

WAI NA YUMI MAS BILIP OLSEM JEHOVA I FOGIVIM YUMI?

5. Satan i laik bai yumi holim wanem tingting? Stori long wanpela eksampel.

⁵ Taim yumi bilip olsem Jehova i fogivim yumi, yumi inap sakim wanpela trap bilong Satan. Tingim olsem Satan bai mekim olgeta kain samting bilong pasim yumi long lotuim Jehova. Bilong mekim olsem, em inap kirapim yumi long holim kain tingting olsem Jehova i no inap long fogivim yumi bikos yumi mekim ol bikpela sin tru. Tingim stori bilong dispela man long Korin em ol i seperetim em long kongrigesen bikos em i mekim pasin pamuk. (1 Kor. 5:​1, 5, 13) Bihain taim em i tanim bel, Satan i laik bai ol wanbilip long kongrigesen i no ken fogivim em na welkamim em i kam bek long kongrigesen. Na tu, Satan i laik bai em i ting olsem God i no inap fogivim em. Em i laik bai dispela man i “bel hevi tru na dispela i daunim em olgeta” na em bai stop long lotuim Jehova. Satan i no senisim dispela kain pasin trik bilong em. Tasol “yumi save long ol trik bilong em.”—2 Kor. 2:​5-11.

6. Yumi ken mekim wanem sapos yumi pilim yet olsem Jehova i no fogivim yumi long ol rong yumi mekim long bipo?

⁶ Taim yumi bilip olsem Jehova i fogivim yumi, bel i no inap kotim yumi moa. Bel i save kotim yumi long taim yumi mekim sin. (Sng. 51:17) Dispela em i gutpela samting. Maus bilong bel bilong yumi inap kirapim yumi long mekim ol senis na mekim pasin i stret. (2 Kor. 7:​10, 11) Tasol sapos bel i wok yet long kotim yumi maski yumi tanim bel pinis long rong yumi mekim long bipo, dispela inap daunim yumi tru na mekim na yumi lusim pasin bilong lotuim Jehova. Taim yumi bilip olsem Jehova i fogivim yumi, orait bel i no inap kotim yumi moa. Long dispela rot, yumi bai lotuim Jehova wantaim klinpela maus bilong bel na mekim wantaim amamas, em samting Jehova i laik yumi mas mekim. (Kol. 1:​10, 11; 2 Tim. 1:3) Tasol yumi inap mekim wanem na bai yumi ken bilip tru olsem Jehova i fogivim yumi?

WANEM SAMTING I KEN HELPIM YUMI LONG BILIP TRU OLSEM JEHOVA I FOGIVIM YUMI?

7-8. (a) Jehova i mekim wanem ol tok long em yet taim em i toktok wantaim Moses? (b) Ol tok Jehova i mekim i helpim yumi long bilip tru long wanem samting? (Kisim Bek 34:​6, 7)

⁷ Tingim ol tok Jehova i mekim long em yet. Olsem, taim Moses i laik save gut moa long Jehova, tingim ol tok Jehova i mekim long Moses long Maunten Sainai.a (Ritim Kisim Bek 34:​6, 7.) Jehova i gat planti naispela pasin, tasol taim em i toktok wantaim Moses, em i tokim em olsem “em God i gat pasin marimari na pasin sori.” Yu ting Jehova, em God i gat pasin marimari na pasin sori, bai no inap fogivim ol wokman bilong em husat i tanim bel tru long ol sin bilong ol? Nogat tru, em i no inap mekim olsem! Sapos em i mekim olsem, orait dispela i makim olsem em i gat hatpela pasin na em i no gat pasin marimari, tasol yumi save olsem Jehova i no inap tru long mekim olsem.

⁸ Yumi ken bilipim tok Jehova i mekim long em yet olsem em i gat pasin marimari, long wanem, em i God bilong mekim pasin tru tasol. (Sng. 31:5) So yumi ken trastim ol tok bilong em. Sapos bel i wok yet long kotim yu long ol rong yu mekim long bipo, orait askim yu yet olsem: ‘Mi bilip tru olsem Jehova i gat pasin marimari na pasin sori na em bai fogivim olgeta sinman em ol i tanim bel? Sapos olsem, orait i stret long mi bilip tru olsem em i fogivim mi?’

9. Taim God i lusim ol sin bilong yumi, dispela i makim wanem samting? (Buk Song 32:5)

⁹ Tingim tingim long bel ol tok Jehova i kirapim ol man bilong raitim Baibel long mekim long pasin bilong Em long lusim rong. Olsem, lukim tok em man bilong raitim Baibel, em Devit, i bin mekim long pasin bilong Jehova long lusim rong. (Ritim Buk Song 32:5.) Devit i tok: “Yu lusim ol sin bilong mi.” Long tok Hibru, mining bilong dispela tok “lusim” inap makim “apim i go” o “tekewe” o “karim i go.” Taim Jehova i lusim ol sin bilong Devit, i olsem Em i apim ol sin bilong Devit na karim i go. Na nau Devit i kisim bel isi bikos em i no moa karim dispela hevi long bel i kotim em. (Sng. 32:​2-4) Wankain samting i ken kamap long yumi tu. Taim yumi tanim bel tru long ol sin yumi bin mekim, i no gat wok moa long bel i kotim yumi long ol sin em Jehova i apim na karim i go longwe pinis long yumi.

10-11. Dispela tok “redi long fogivim ol sin bilong mipela” i givim wanem skul long yumi long Jehova? (Buk Song 86:5)

¹⁰ Ritim Buk Song 86:5. Long dispela ves, Devit i tok Jehova i save “redi long fogivim ol sin bilong mipela.” Wanpela Baibel referens i stori long dispela na em i tok long Jehova olsem: “Em i save fogivim ol rong bilong yumi, dispela em pasin bilong em.” Wai na Jehova i gat pasin bilong lusim rong? Neks hap bilong ves i tok: “Olgeta man i save singaut long yu, yu save soim gutpela pasin laikim bilong yu long ol moa moa yet.” Olsem yumi lainim long atikol i go pinis, gutpela pasin laikim i kirapim Jehova long pas gut wantaim ol gutpela wokman bilong em na em bai no inap tru long lusim ol. Gutpela pasin laikim bilong Jehova i kirapim em long “redi long fogivim” olgeta sinman i tanim bel. (Ais. 55:​7, ftn.) Sapos yu pilim hatwok long bilip olsem God i fogivim yu, orait yu ken askim yu yet olsem: ‘Mi bilip tru olsem Jehova em i God bilong lusim ol rong, olsem em i save redi long fogivim olgeta sinman em ol i tanim bel na askim em long marimari long ol? Sapos olsem, orait i stret long mi bilip olsem em i fogivim mi pinis taim mi beten na askim em long marimari long mi?’

¹¹ Yumi ken kisim bel isi long save olsem Jehova i kliagut tru olsem yumi das tasol na yumi no gutpela olgeta. (Sng. 139:​1, 2) Yumi inap luksave long dispela long narapela song Devit i bin raitim, na dispela inap helpim tu yumi long bilip olsem Jehova i fogivim yumi.

JEHOVA I SAVE TINGIM YUMI OLSEM WANEM?

12-13. (a) Olsem Buk Song 103:14 i kamapim, Jehova i tingim yumi olsem wanem? (b) Dispela i kirapim em long mekim wanem?

¹² Ritim Buk Song 103:14. Devit i tok Jehova i save “tingim yumi i olsem das tasol.” Ol dispela tok Devit i mekim i soim klia wanpela risen na Jehova i save redi long fogivim ol wokman bilong em husat i tanim bel: Em i save olsem yumi gat sin. Bilong kliagut moa long dispela, yumi ken skelim gut ol tok Devit i bin mekim.

¹³ Devit i tok Jehova “i save gut tru long olsem wanem em i bin wokim yumi.” Jehova i bin “kisim graun” na wokim Adam, so em i save olsem ol man i gutpela olgeta, ol i mas mekim sampela samting bilong stap laip, olsem ol i mas kaikai, slip, na pulim win. (Stt. 2:7) Tasol taim Adam na Iv i mekim sin, dispela tok “yumi i olsem das tasol” i no makim tasol ol samting yumi mas mekim bilong i stap laip, nogat. Em i makim tu ol pasin kranki yumi gat bikos long sin yumi kisim long Adam na Iv. Jehova i save olsem yumi gat sin na i no dispela tasol, olsem tok bilong Devit i kamapim, em i “tingim” tu dispela samting. Long tok Hibru, dispela tok “tingim” long hia inap makim olsem samting em wanpela i tingim na dispela i kirapim em long mekim sampela samting long helpim ol narapela. So mining bilong tok bilong Devit i olsem: Jehova i save olsem sampela taim yumi bai mekim ol rong, tasol em bai marimari long yumi na fogivim yumi sapos yumi tanim bel tru long ol rong yumi mekim.—Sng. 78:​38, 39.

14. (a) Devit i stori olsem wanem long pasin bilong Jehova long lusim rong? (Buk Song 103:12) (b) Yumi kisim wanem skul long pasin bilong Jehova long lusim olgeta ol rong bilong Devit? (Lukim blok “Hau Jehova i Save Fogivim Yumi na Lusim Tingting.”)

¹⁴ Olsem wanem Jehova i save lusim olgeta ol rong bilong yumi? (Ritim Buk Song 103:12.) Devit i tok taim Jehova i fogivim yumi, Em i save rausim ol sin bilong yumi i go longwe tru wankain olsem “hap bilong sankamap [long hap is] i stap longwe tru long hap bilong san i go daun [long hap wes].” Hap bilong is i stap longwe tru long hap bilong wes; dispela tupela poin i no save bung wantaim. Dispela i givim wanem skul long yumi long ol sin bilong yumi em Jehova i fogivim? Wanpela buk i stori long dispela olsem: “Taim God i rausim ol sin bilong yumi i go longwe tru, i olsem smel bilong en, mak bilong en, na memori bilong en i pinis olgeta.” Tingim dispela, wanpela smel inap kirapim wanpela long tingim gen ol samting i stap long memori bilong em. Tasol taim Jehova i fogivim yumi, i olsem i no gat wanpela mak bilong en o smel bilong en i stap yet na i kirapim Jehova long tingim gen dispela sin na kotim yumi long en.—Ese. 18:​21, 22; Apo. 3:19.

15. Yumi ken mekim wanem sapos bel i wok yet long kotim yumi long ol rong yumi mekim long bipo?

¹⁵ Olsem wanem ol tok Devit i mekim long Buk Song 103 i ken helpim yumi long bilip olsem Jehova i fogivim yumi? Sapos bel i kotim yumi yet long ol rong yumi mekim long bipo, orait yumi ken askim yumi yet olsem: ‘Mi lusim tingting long samting Jehova i save tingim? Mi lusim tingting olsem em i save olsem mi gat sin na em i redi long fogivim mi sapos mi tanim bel long ol rong mi bin mekim? Mi wok yet long tingim samting em Jehova i lusim tingting pinis long en? Mi wok long tingim yet ol sin bilong mi em i fogivim pinis na em i no inap kotim mi long en?’ Jehova i no save tingim ol rong yumi mekim long bipo. Na yumi tu i mas mekim olsem. (Sng. 130:3) Taim yumi bilip olsem Jehova i fogivim yumi, yumi bai fogivim yumi yet long ol sin yumi mekim long bipo na lukluk i go het long ol samting bai kamap long bihain.

16. Wanem samting inap kamap sapos bel i wok yet long kotim yumi long ol rong yumi mekim long bipo? Stori long tok piksa. (Lukim tu piksa.)

¹⁶ Tingim dispela tok piksa. Sapos bel i wok yet long kotim yumi long ol rong yumi mekim long bipo, orait dispela i wankain long man i draivim kar i go fowed, tasol em i wok long lukluk long mira i soim ol samting long baksait. Sampela taim i gutpela long sekim dispela mira na bai yu lukim ol hevi we inap kamap long baksait. Tasol bilong yu ken draiv i go fowed na abrusim bagarap, yu mas lukluk long rot i stap long fran. Olsem tasol, sampela taim i gutpela long tingim ol rong yumi mekim long bipo, long wanem, ol inap givim gutpela skul long yumi na strongim tingting bilong yumi long no ken mekim gen ol dispela rong. Tasol sapos oltaim yumi tingim ol dispela rong, orait maus bilong bel bai wok yet long kotim yumi na dispela bai pasim yumi long givim bel olgeta long lotuim Jehova. Mobeta yumi putim tingting long ol samting bai kamap long bihain. Long nau, yumi wok long bihainim rot i go long laip oltaim long nupela taim God bai kamapim, long dispela taim yumi “no inap tingim gen” ol memori nogut.—Ais. 65:17; Prov. 4:25.

WOK YET LONG BILIP OLSEM JEHOVA I LAIKIM YU NA FOGIVIM YU

17. Wai na yumi mas wok yet long bilip olsem Jehova i laikim yumi na fogivim yumi?

¹⁷ Yumi mas wok yet long bilip tru olsem Jehova i laikim yumi na fogivim yumi. (1 Jon 3:19) Bilong wanem? Long wanem, Satan bai wok strong yet long mekim yumi ting olsem Jehova i no inap laikim yumi na fogivim yumi long ol rong yumi mekim long bipo. Em i gat wanpela tingting tasol, em long pasim yumi long lotuim Jehova. Satan bai wok strong tru long mekim olsem bikos em i save olsem em i gat sotpela taim tasol i stap yet. (Rev. 12:12) Olsem na yumi mas wok strong long sakim Satan na stap gut long Jehova!

18. Yu inap mekim wanem na bai yu ken bilip tru olsem Jehova i laikim yu na em i fogivim yu?

¹⁸ Bilong strongim bilip bilong yu olsem Jehova i laikim yu, yu ken bihainim ol tok em yumi stori pinis long en long atikol i go pinis. Bilong strongim bilip bilong yu olsem Jehova i fogivim yu, tingim ol tok Jehova i mekim long em yet. Tingim tingim long bel ol tok em i kirapim ol man bilong raitim Baibel long mekim long pasin bilong em long lusim rong. No ken lusim tingting olsem em i save olsem yumi ol sinman na em bai marimari long yumi. Na tingim tu olsem taim em i fogivim yumi, em i save lusim olgeta ol rong bilong yumi na em i no inap tingim gen. Taim yu mekim olsem, yu bai holim wankain tingting em Devit i gat long pasin marimari bilong Jehova, na yu bai tok, “Tenkyu Jehova long ‘lusim ol sin bilong mi’!”—Sng. 32:5.