Gutpela Lo Tru Em Wanem Samting?

Bekim bilong Baibel

Dispela hap tok “Gutpela Lo Tru” i no kamap long Baibel. Tasol planti manmeri i yusim dispela hap tok bilong makim pasin em Jisas i skulim ol manmeri long bihainim. Taim Jisas i mekim Bikpela Tok Long Maunten, em i tok: “Olgeta samting yupela i laik bai ol man i mekim long yupela, yupela i mas mekim long ol.” (Matyu 7:12; Luk 6:31) Na tu, ol man i kolim dispela Gutpela Lo Tru olsem: “Pasin yu laik bai ol narapela i mekim long yu, yu mas mekim long ol.”​—Encyclopedia of Philosophy.

• Wanem mining bilong Gutpela Lo Tru?

• Wai na Gutpela Lo Tru inap helpim yumi?

• Yu Ting Gutpela Lo Tru i makim tasol pasin bilong givim samting na kisim samting?

• Hau bai yu inap bihainim Gutpela Lo Tru?

Wanem mining bilong Gutpela Lo Tru?

Gutpela Lo Tru i kirapim yumi long mekim pasin long ol narapela olsem yumi laik bai ol i mekim long yumi. Olsem, planti manmeri i save amamas taim ol narapela i soim pasin rispek, gutpela pasin, na pasin laikim long ol. Olsem na i stret, yumi tu i mas “mekim wankain pasin long ol” narapela.​—Luk 6:31.

Wai na Gutpela Lo Tru inap helpim yumi?

Gutpela Lo Tru inap helpimg yumi long olgeta samting. Olsem, dispela lo inap . . .

• Strongim marit.​—Efesus 5:28, 33.

• Stiaim papamama long mekim bikpela long pikinini.​—Efesus 6:4.

• Strongim pasin pren namel long ol pren, ol neiba, na ol wanwok.​—Provep 3:27, 28; Kolosi 3:13.

Planti hap bilong Olpela Testamen i strongim Gutpela Lo Tru. Dispela pasin Jisas i tok long en “em i as bilong Lo [fes 5-pela buk bilong Baibel] na tok bilong ol Profet [ol buk i stori long ol tok profet].” (Matyu 7:12) Dispela i makim olsem Gutpela Lo Tru i as bilong ol pasin we Olpela Testmen i tok long man i mas bihainim: laikim ol narapela.​—Rom 13:8-10.

Yu ting Gutpela Lo Tru i makim tasol pasin bilong givim samting na kisim samting?

Nogat. Moa yet, Gutpela Lo Tru i makim pasin blong givim. Taim Jisas i kolim Gutpela Lo Tru, tok bilong em i makim pasin man i mas mekim long ol narapela, na tu, ol birua bilong em. (Luk 6:27-31, 35) Olsem na Gutpela Lo Tru i kirapim ol manmeri long mekim gutpela pasin long olgeta kain man.

Hau bai yu inap bihainim Gutpela Lo Tru?

1. 1. Luksave. Luksave long samting i painim ol narapela. Olsem, ating yu lukim wanpela i hatwok long karim ol samting em i baim long stua, yu harim olsem wanpela i go long haus sik, o yu luksave olsem wanwok i stap bel hevi. Taim yu ‘tingim laik bilong ol arapela,’ rot bai op long yu inap mekim gutpela tok long ol narapela o helpim ol narapela.​—Filipai 2:4.

2. 2. Pilim hevi bilong narapela. Tingim olsem yu bai laik long narapela i mas mekim wanem long yu sapos dispela hevi i kamap long em i kamap long yu. Yu bai pilim olsem wanem sapos wankain hevi i kamap long yu? (Rom 12:15) Taim yu mekim ol samting bilong kliagut long filings bilong ol narapela, dispela inap kirapim yu long helpim ol.

3. 3. Redi long mekim senis. Oltaim tingim olsem yumi olgeta i no wankain. Samting ol narapela i laik bai ol man i mekim long ol, bai i no wankain long samting yu bai laik long ol man i mekim long yu. So, maski i gat planti samting yu ken mekim, mekim tasol samting we ol bai amamas tru long en.​—1 Korin 10:24.