WAS I STAP!

Lotu na Woa Long Yukren—Baibel i Tok Wanem?

Skelim pasin em ol bikman bilong lotu i mekim na woa long Yukren:

“Hetman bilong Lotu Otodoks Bilong Rasia em Patriak Kirill i no mekim wanpela tok long pasin Rasia i mekim bilong kirapim pait. . . . Lotu bilong em i wok long spredim ol stori giaman long Yukren na Putin i yusim ol dispela stori bilong strongim sait bilong em olsem i stret em i mekim dispela pait.”—EUobserver, Mas 7, 2022.
“Patriak Kirill . . . i strongim tru sait bilong Rasia olsem i stret ol i pait long Yukren, long wanem, dispela pait em wanpela wok bilong stopim ol man long mekim sin.”—AP News, Mas 8, 2022.
“Hetman bilong Lotu Otodoks Bilong Yukren, em Metropolitan Epiphanius I bilong Kyiv, long Mande, em i blesim ol manmeri bilong em long ‘go pait long ol birua em ol Rasia’ . . . [Em] i tok tu olsem taim yupela i kilim i dai ol soldia bilong Rasia em yupela i no mekim sin.”—Jerusalem Post, Mas 16, 2022.
“Mipela [lain Ukrainian Council of Churches and Religious Organizations (UCCRO)] i sapotim Ami Bilong Yukren na olgeta lain husat i sapotim mipela, mipela blesim ami bilong Yukren long pait long ol birua, na mipela i beten long ol.”—UCCROa Statement, Februeri 24, 2022.

Yu ting wanem? Yu ting i stret ol lotu em ol i tok ol i bihainim Jisas Krais i kirapim ol lotu lain bilong ol long go pait long woa? Baibel i tok wanem?

Histori bilong lotu na woa

Histori i soim olsem lotu i save tok orait long ol man i go long pait long woa, i gutpela long go pait long woa, na em i bikpela samting long ol i mas go pait long woa, na long wankain taim, ol i giaman long soim olsem ol i lain bilong kamapim bel isi. Inap planti yia, ol Witnes Bilong Jehova i bin tokaut olsem ol kain lotu em ol lain bilong tupela maus. Skelim sampela eksampel em ol pablikesen bilong mipela i stori long en.

“The Crusades—A ‘Tragic Illusion’” i soim hau Misin Katolik Bilong Rom i bin tok ol i mekim wok bilong God na Krais na ol i kilim i dai planti manmeri tru.
“The Catholic Church in Africa” i stori long hau ol lotu i no mekim wanpela samting bilong stopim ol pait insait long traib, na tu, ol i no stopim ol man taim ol i kilim i dai planti tausen manmeri.
Ol atikol “Is Religion to Blame?,” “Religion’s Role in Man’s Wars,” na “Religion Takes Sides” i stori long hau ol bikman bilong Lotu Katolik, Lotu Otodoks, na Lotu Protestan i bin sapotim tupela sait bilong planti woa.

Yu ting i stret ol lotu Kristen i sapotim woa?

Tok Jisas i skulim ol man long en: “Yu mas laikim ol arapela man olsem yu laikim yu yet.” (Matyu 22:39) “Yupela i mas laikim yet ol birua bilong yupela.”—Matyu 5:44-47.

Skelim: Yu ting i stret wanpela lotu i tok ol i bihainim tok bilong Jisas long laikim ol narapela na long wankain taim ol i kirapim ol lotu lain bilong ol long kilim i dai ol narapela long woa? Bilong kisim bekim bilong dispela askim, ritim ol atikol “True Christians and War” na “Is It Possible to Love One’s Enemies?”

Tok Jisas i skulim ol man long en: “Kingdom bilong mi i no bilong dispela graun. Sapos Kingdom bilong mi i bilong dispela graun, orait ol wokman bilong mi bai pait na bai ol man i no ken putim mi long han bilong ol.” (Jon 18:36) “Ol man i yusim bainat, ol bai dai long rot bilong bainat.”—Matyu 26:47-52.

Skelim: Ol Kristen i no bin pait bilong lukautim Jisas, so yu ting i stret long ol i pait long nau long ol narapela samting? Ritim atikol “Yu Ting Woa i Stret Wantaim Pasin Kristen?” bilong lukim hau ol Kristen long pastaim i bin bihainim gut eksampel bilong Jisas na ol tok Jisas i skulim ol man long en.

Wanem samting bai painim ol lotu i sapotim woa?

Baibel i skulim yumi olsem God i save sakim ol lotu i tok ol i bihainim Jisas, tasol ol i no bihainim ol tok em i skulim ol man long en.—Matyu 7:21-23; Taitus 1:16.

Buk Revelesen i kamapim klia olsem God i tingim ol dispela lotu olsem ol i gat asua long dai bilong “olgeta manmeri em ol birua i bin kilim ol i dai long graun.” (Revelesen 18:21, 24) Bilong kisim save long as na Baibel i tok olsem, ritim atikol “What Is Babylon the Great?”
Jisas i tok olsem olgeta lotu em God i sakim, God bai bagarapim ol long ol pasin nogut ol i bin mekim, wankain olsem diwai nogut i save kamapim kaikai nogut, “ol bai katim na tromoi i go long paia.” (Matyu 7:15-20) Ritim atikol “Pinis Bilong Lotu Giaman i Kam Klostu Tru!” bilong kisim save long hau dispela samting bai kamap.

Ol Witnes Bilong Jehova i No Wankain Olsem Ol Narapela Lotu

Long Rasia na Yukren, wankain olsem long ol narapela hap bilong graun, ol Witnes Bilong Jehova i save bihainim tok bilong Jisas long no ken insait long ol wok politik na ol woa bilong dispela graun. Bikos long dispela, mipela i no insait o sapotim dispela woa na ol narapela woa. Mipela i tingting strong long bihainim ol bilip em Baibel i as bilong en, na long dispela as gavman i bin kalabusim sampela Witnes. (Jon 15:19, 20; 2 Timoti 3:12) Olsem, gavman bilong Rasia i bin putim planti Witnes long kalabus na mekim nogut tru long sampela. Gavman i kisim tu ol ples bilong mipela long mekim lotu. Bilong kisim sampela save moa, go long www.jw-russia.org.

Lukim dispela 4-minit vidio Jehovah’s Witnesses in Irkutsk Remain Faithful Despite Brutal Home Raids long lukim hau gavman i bin kalabusim ol Witnes Bilong Jehova long Rasia bikos long bilip bilong ol.
Ol Witnes Bilong Jehova i no save insait long woa. Lukim vidio Firm Under Opposition long lukim hau ol i no bin insait long woa long taim bilong Natsi Jemani na olpela Soviet Yunion, maski ol i bin mekim nogut tru long ol na kalabusim ol.

Plis visitim websait bilong mipela long kisim sampela save moa long ol bilip bilong mipela, na tu, ol tok promis em Baibel i mekim long gutpela taim bai kamap bihain we i no gat woa. (Aisaia 2:4; Jeremaia 29:11) Mipela laik askim yu long kontektim mipela long kisim sampela save moa.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Lain UCCRO, o Ukrainian Council of Churches and Religious Organizations, i gat 15 lotu i insait long en, em Lotu Otodoks, Lotu Katolik Bilong Grik na Rom, Lotu Protestan, na ol lotu Evanjelikal, na tu, Lotu Juda na Lotu Muslim.