FPG/The Image Bank via Getty Images
WAS I STAP!
Ol Politisen i Givim Tok Lukaut Olsem Armagedon Bai Kamap—Baibel i Tok Wanem?
Long moning bilong Mande, Oktoba 10, 2022, ol Rasia i tromoi ol misail i go daun long ol siti long Yukren bikos 2-pela de paslain, bikpela pairap i bin kamap na i bagarapim wanpela bikpela bris i konektim Kraimia na Rasia. Dispela ol samting i kamap bihain liklik long sampela politisen i bin givim tok lukaut olsem klostu nau Armagedon inap kamap.
“Stat long taim bilong [Presiden bilong Amerika John F.] Kennedy na Cuban Missile Crisis i kam inap long nau, mipela i no bin ting Armagedon bai kamap. . . . Tasol nau mi ting Armagedon bai kamap sapos ol kantri i stat long yusim ol nuklia wepen long pait.”—Presiden bilong Amerika Joe Biden, Oktoba 6, 2022.
“Mi wanbel olsem klostu nau Armagedon bai kamap, olgeta manmeri long graun bai bungim taim nogut.”—Presiden bilong Yukren Volodymyr Zelensky, i mekim dispela tok taim ol i askim em long wanem samting bai kamap taim ol kantri i yusim ol nuklia wepen, BBC News, Oktoba 8, 2022.
Sapos ol kantri i stat long yusim ol nuklia wepen long pait, yu ting dispela bai bringim yumi i go long Armagedon? Baibel i tok wanem?
Sapos ol kantri i yusim ol nuklia wepen, yu ting dispela bai kamapim Armagedon?
Nogat. Dispela tok “Armagedon” i stap wanpela taim tasol long Baibel, em long Revelesen 16:16. Dispela tok i no makim pait i kamap namel long ol kantri, nogat. Em i makim pait i kamap namel long God na “ol king bilong olgeta hap graun.” (Revelesen 16:14) God bai yusim pait bilong Armagedon long pinisim wok bos bilong ol man long graun.—Daniel 2:44.
Bilong kisim sampela save moa long Armagedon bai mekim wanem long ol manmeri long graun, ritim dispela atikol What Is the Battle of Armageddon?
Yu ting dispela graun na ol manmeri i stap long en bai bagarap long rot bilong nuklia woa?
Nogat. Maski ol lida bilong graun inap yusim ol nuklia wepen long bihain long mekim pait, God bai no inap larim dispela graun i bagarap. Baibel i tok:
“Graun i save stap oltaim oltaim.”—Eklisiastis 1:4.
“Ol stretpela man bai kisim graun olgeta, na ol bai stap oltaim long en.”—Buk Song 37:29.
Tasol ol tok profet bilong Baibel na ol samting i kamap long nau i soim olsem klostu nau bikpela senis bai kamap long graun. (Matyu 24:3-7; 2 Timoti 3:1-5) Kisim save long tok Baibel i mekim long samting bai kamap bihain long rot bilong mekim dispela fri Baibel kos.