Hevi Long Wok Politik i Truim Tok Profet Bilong Baibel

Long nau ol manmeri i gat narapela narapela tingting long ol samting bilong wok politik. Ol i no wanbel long ol lo we i mekim sampela samting long laip bilong ol long olgeta wan wan de, na ol i kamapim narapela narapela tingting ol i gat long wok politik long strongpela pasin. Insait long gavman, planti taim ol lain bilong kamapim ol lo na ol narapela ofisa i gat narapela narapela tingting na ol i no redi long bihainim tingting bilong ol narapela. Taim i no gat pasin wanbel dispela i save kamapim hevi insait long wok politik we inap mekim na gavman i no mekim gut wok.

Hevi i kamap insait long wok politik bilong Amerika na Briten (long bipo planti man i kolim olsem Yunaitet Kingdom) i bikpela samting. Wai? Bikos Baibel i tok profet olsem hevi bai kamap namel long dispela tupela kantri—long dispela taim stret gavman long heven em God i kamapim bai senisim tru olgeta samting long i stap bilong ol man long graun.

Hevi i kamap long wok politik “long taim bilong las de”

Baibel i kamapim wanpela narakain tok profet long buk Daniel. Long dispela tok profet, God i kamapim klia “wanem samting bai kamap long taim bilong las de,” long taim em i mekim dispela tok em i makim samting bai kamap long bihain, na dispela bai senisim tru i stap bilong ol manmeri.​—Daniel 2:28.

Dispela tok profet bilong Baibel em wanpela driman God i givim long king bilong Babilon. Long dispela driman, king i lukim traipela imis ol i wokim long narapela narapela metal. Bihain, profet Daniel i kamapim klia olsem kirap long het bilong imis na i go daun long tupela fut, i makim olsem insait long planti yia ol gavman bai kamap strong na ol bai pundaun gen.a Bihain wanpela ston bai paitim na bagarapim dispela imis olgeta, dispela ston i makim kingdom o gavman em God i kamapim.​—Daniel 2:36-45.

Olsem tok profet i makim, Kingdom Bilong God bai senisim olgeta gavman bilong ol man. Em dispela Kingdom tasol Jisas i skulim ol disaipel bilong em long beten long en, na i tok: “Kingdom bilong yu i mas i kam.”​—Matyu 6:10.

Tasol wanem hap bilong tok profet long Baibel i stori long hevi bai kamap insait long wok politik? Tingim olsem ol i wokim tupela fut bilong imis long “hap ain na hap graun.” (Daniel 2:33) Dispela i no wankain long ol narapela hap bilong imis em ol i wokim long ol strongpela metal, dispela i makim olsem wanpela gavman bai kamap na em i no wankain olsem ol narapela. Hau? Tok profet bilong Daniel i kamapim klia dispela:

Olsem tok profet i makim, strongpela gavman em tupela fut bilong imis i makim bai bungim hevi long sait bilong wok politik. Strong bilong en bai pinis, ol manmeri bilong em yet bai mekim na em i no gat strong moa.

Ol tok profet bilong Daniel i kamap tru long nau

Tupela fut bilong imis i makim gavman i gat bikpela strong long nau, em wok bung namel long gavman bilong Amerika na Briten. Hau na ol samting i kamap long taim bilong yumi i kamapim klia dispela?

Tupela fut bilong imis ol i wokim long “hap ain na hap graun,” i bung wantaim tasol em i nogat strong. (Daniel 2:42) Long nau, Amerika na Briten i no gat strong moa bikos ol manmeri bilong ol yet i no wok bung wantaim. Olsem, 2-pela kantri wantaim i bungim hevi em ol manmeri bilong ol yet i kamapim. Na tu, ol manmeri i protes long ol raits bilong ol. Planti taim ol man ol i makim bilong i go pas long ol i no save wanbel long planti samting. Bikos ol manmeri i no stap wanbel, sampela taim tupela gavman wantaim i no inap long mekim ol samting ol yet i laik kamapim.

Skelim sampela moa mining bilong tok profet bilong Daniel na hau ol i kamap tru long nau:

Tok Profet: “Dispela kingdom bai bruk, tasol sampela strong bilong ain bai stap long en.”​—Daniel 2:41.

Mining: Maski Amerika na Briten i gat hevi long wok politik insait long kantri bilong ol yet, lain ami bilong ol i gat bikpela strong. Em risen na ol inap mekim ol samting bilong soim wok bos bilong ol, wantaim strong olsem bilong ain.

Truim bilong en

Long 2023, Amerika na Yunaitet Kingdom i bung wantaim na tromoi bikpela mani long baim ol samting bilong pait winim mani em narapela 12-pela kantri i tromoi.​—Stockholm International Peace Research Institute.

“Wok bung namel long ami bilong Yunaitet Kingdom na Amerika . . . i kamap strong winim pasin pren namel long tupela kantri.  . . na ol i yusim ol nupela teknoloji na save.  . .Yumi wok wantaim, yumi sapotim narapela, yumi pait wantaim.”​—Strategic Command, U.K. Ministry of Defence, Epril 2024.

Tok profet: “Olsem ol tou bilong tupela fut em hap ain na hap graun, dispela kingdom bai i gat strong long wanpela samting na long narapela samting, em bai malumalum.”​—Daniel 2:42.

Mining: Maski Amerika na Briten i gat strongpela ami, ol i no inap mekim olgeta samting ol i laik mekim bikos long rot ol i bihainim long mekim wok olsem gavman demokratik. Taim planti manmeri i no givim tok orait, sampela taim ol dispela gavman i hatwok long mekim ol wok em ol i plen long mekim.

Truim bilong en

“Sampela saveman bilong wok politik i tok gavman bilong Amerika [Yunaitet Stets] i no wok bung wantaim, olsem na i hatwok long em i mekim ol samting em i tingting long mekim long ol narapela hap bilong graun, kirap long sait bilong lukautim kantri na i go inap long wok bisnis.”​—“The Wall Street Journal.”

“Ol hevi i kamap long wok politik i go bikpela na dispela i mekim ol man i insait long wok politik i tingting planti, olsem na ol i no inap long mekim ol senis bilong helpim ol manmeri.”​—Institute for Government.

Tok profet: “Ol (kingdom) bai miks wantaim ol man nating, tasol ol i no inap pas wantaim.”​—Daniel 2:43, futnot.

Mining: Ol man nating inap kamapim tingting long ol samting i kamap long gavman bilong ol, tasol ol samting i kamap i no inapim laik bilong ol wokman na lain i votim ol.

Truim bilong en

“Long nau, planti manmeri long Amerika i gat tingting kranki long wok politik na ol lain ol i makim long mekim wok insait long gavman.”​—Pew Research Center.

“Pasin bilong ol manmeri long trastim gavman na ol man i insait long wok politik, na pasin bilong ol long bilip long wei gavman i mekim wok i no wankain insait long winim 50 yia i go pinis.”​—“National Centre for Social Research.”

Tok profet bilong Daniel long bihain

Olsem tok profet bilong Daniel, Gavman Amerika-Briten bai i gat bikpela strong na bosim ol narapela long taim Kingdom Bilong God i senisim olgeta wok gavman bilong ol man.​—Daniel 2:44.

Tok profet long Baibel i stori long wankain samting long buk Revelesen, i soim olsem “ol king bilong olgeta hap graun” bai bung na kam pait long Jehovab God long pait bilong Amagedon, em “pait [bilong] dispela bikpela de bilong God i Gat Olgeta Strong.” (Revelesen 16:14, 16; 19:19-21) Long dispela pait, Jehova bai bagarapim olgeta wok gavman bilong ol man, na long dispela rot em bai rausim olgeta strongpela gavman em tok profet bilong Daniel long imis i stori long en.

Bilong kisim sampela save moa lukim atikol “Pait Bilong Armagedon Em Wanem Samting?”

Kisim helpim long tok profet bilong Daniel long hevi i kamap long wok politik

Tok profet bilong Baibel i kamapim stret hevi i kamap long wok politik long Amerika na Briten, na taim yu kisim save long en dispela bai helpim yu long holim stretpela tingting long ol samting i kamap long nau.

• Yu bai kliagut long wai na Jisas i laik bai ol disaipel bilong em i no ken insait long ol wok politik bilong dispela graun. (Jon 17:16) Na yu bai kliagut long risen na Jisas, em man God i makim long mekim wok bos long Kingdom bilong em, em i tok: “Kingdom bilong mi i no bilong dispela graun.”​—Jon 18:36.

• Yu bai amamas olsem taim bilong Kingdom Bilong God long mekim samting i kam klostu, na tu ol blesing em God i promis olsem dispela wok bos bai kamapim long ol man bai kamap tru.​—Revelesen 21:3, 4.

• Yu ken bilip tru long ol samting bai kamap bihain, kisim bel isi olsem ol hevi ol kantri i kamapim bai i no inap bagarapim graun bilong yumi.​—Buk Song 37:11, 29.

Tok profet bilong Daniel i soim olsem Gavman Amerika-Briten, em tupela fut bilong imis i makim, bai stap olsem laspela gavman bilong bosim ol man long olgeta hap bilong graun. Gavman bai kamap bihain em bai stap long heven na mekim stretpela wok bos—Kingdom Bilong God!

Bilong kisim sampela save moa long samting Kingdom Bilong God bai mekim long ol man, lukim vidio Kingdom Bilong God Em i Wanem Samting?