Ol Witnes Bilong Jehova i Bilip Olsem Kriesen i Kamap Long Sikspela De i Gat 24 Aua?

Nogat. Ol Witnes Bilong Jehova i bilip olsem God i krietim olgeta samting. Tasol mipela i no wanbel long dispela bilip olsem God i krietim olgeta samting insait long sikspela de i gat 24 aua. Bilong wanem? Bikos sampela tok bilong dispela bilip i pait wantaim tok bilong Baibel. Skelim dispela 2-pela eksampel:

1. Longpela bilong sikspela de bilong kriesen. Sampela man i tok God i wokim olgeta samting insait long sikspela de we wan wan de i gat 24 aua. Tasol long Baibel, dispela tok “de” inap makim longpela haptaim.​—​Stat 2:4; Buk Song 90:4.

2. Hamas yia graun i bin stap. Sampela man i tok graun i bin stap inap sampela tausen yia. Tasol Baibel i tok graun na yunives i bin stap paslain long dispela 6-pela de we God i bin krietim olgeta samting. (Stat 1:1) Long dispela risen, ol Witnes Bilong Jehova i wanbel long gutpela wok painimaut bilong saiens we i soim olsem dispela graun i bin stap inap planti bilion yia.

Ol Witnes Bilong Jehova i bilip long kriesen, na wanbel tu long tok bilong saiens. Mipela i bilip olsem tok bilong saiens i stret wantaim tok bilong Baibel.