Wai na Bung Bilong Kaikai Bilong Bikpela Em Ol Witnes Bilong Jehova i Save Mekim i No Wankain Long Ol Narapela Lotu?

Mipela i bihainim gut tok bilong Baibel long mekim bung bilong Kaikai Bilong Bikpela, em ol i kolim tu olsem Laspela Kaikai, na Memorial bilong tingim indai bilong Jisas. (1 Korin 11:20) Tasol Baibel i no as bilong planti bilip na ol pasin em ol narapela lotu i save bihainim bilong mekim dispela bung.

Wanem as bilong mekim bung bilong Kaikai Bilong Bikpela?

As na yumi save mekim bung bilong Kaikai Bilong Bikpela em bilong tingim Jisas, na bilong soim tenkyu bilong yumi long sakrifais em i bin givim bilong helpim yumi. (Matyu 20:28; 1 Korin 11:24) Sampela man i ting olsem taim ol i kaikai bret na dring wain long bung bilong Kaikai Bilong Bikpela, God bai fogivim ol sin bilong ol, tasol Baibel i no tok olsem. Baibel i tok olsem God inap fogivim ol sin bilong yumi taim yumi bilip long Jisas, na i no long rot bilong bihainim wanpela kain pasin bilong lotu.​—Rom 3:25; 1 Jon 2:1, 2.

Hamas taim yumi ken mekim dispela bung?

Jisas i tokim ol disaipel bilong em long mekim bung bilong Kaikai Bilong Bikpela, tasol em i no kolim hamas taim stret ol i mas mekim. (Luk 22:19) Sampela i ting ol i mas mekim dispela bung long olgeta mun, na ol narapela i save mekim long olgeta wik, o long olgeta de, o mekim sampela taim insait long wanpela de, o sampela i ting man i ken mekim planti taim sapos em i ting i stret long mekim. Tasol i gat sampela samting em yumi mas skelim.

Jisas i kamapim bung bilong Kaikai Bilong Bikpela long det bilong Pasova bilong ol Juda, na bihain long dispela seim de yet em i dai. (Matyu 26:1, 2) Wai na dispela det i bikpela samting? Baibel i tok piksa long sakrifais bilong Jisas i olsem sipsip bilong Pasova. (1 Korin 5:7, 8) Ol i save mekim Pasova wanpela taim long olgeta yia. (Kisim Bek 12:1-6; Wok Pris 23:5) Olsem tasol ol Kristen bilong pastaima i save mekim Memorial bilong tingim indai bilong Jisas wanpela taim long olgeta yia, na ol Witnes Bilong Jehova i bihainim dispela wankain pasin em Baibel i as bilong en.

Det na taim

Pasin Jisas i mekim bilong kamapim dispela bung i helpim yumi long save hamas taim, na tu, det na taim bilong mekim Memorial. Jisas i kamapim dispela bung bihain long taim san i go daun long Nisan 14, 33 C.E., i stret long kalenda bilong Baibel. (Matyu 26:18-20, 26) Mipela i bihainim yet pasin bilong ol Kristen bilong pastaim na mekim Memorial long dispela det long olgeta yia.b

Tru Nisan 14, 33 C.E. em i bin kamap long wanpela Fraide, tasol dispela det inap kamap long kamap long narapela narapela de bilong wik long olgeta yia. Mipela i bihainim wankain pasin ol i bin bihainim long taim bilong Jisas bilong skelim wanem taim det bilong Nisan 14 bai kamap long olgeta wan wan yia, na mipela i no bihainim pasin ol i bihainim long kalenda bilong ol Juda long nau bilong skelim wanem taim dispela det bai kamap.c

Bret na wain

Bilong kirapim dispela nupela bung, Jisas i yusim bret i no gat yis na retpela wain em hap bilong ol samting ol i bin yusim long kaikai bilong Pasova. (Matyu 26:26-28) Mipela i bihainim pasin bilong Jisas na mipela i yusim bret i no gat yis na ol narapela samting long en na retpela wain, i no wara bilong greip o wain ol i bin miksim wantaim ol narapela samting o ol spais.

Sampela lotu i save yusim bret i gat yis long en, tasol planti taim Baibel i save tok piksa long yis bilong makim sin. (Luk 12:1; 1 Korin 5:6-8; Galesia 5:7-9) Olsem na bret i no gat yis na ol narapela samting long en i stret bilong makim bodi bilong Krais we i no gat sin long en. (1 Pita 2:22) Sampela lotu i skulim ol man long dispela tingting kranki olsem man i dring alkohol em i mekim sin, olsem na ol i no save yusim wain, ol i save yusim wara bilong greip.​—1 Timoti 5:23.

Bret na wain i piksa tasol, i no bodi na blut tru

Bret na wain ol i save yusim long Memorial i piksa tasol na ol i makim blut na bodi bilong Krais. I no olsem mirakel i kamap na bret na wain i senis o i miks wantaim blut tru na bodi tru bilong Jisas olsem sampela i ting, nogat. Skelim ol tok bilong Baibel i as na mipela i tok olsem.

• Sapos Jisas i tokim ol disaipel bilong em long dringim blut bilong em, i olsem em i tokim ol long brukim lo bilong God we i tambuim pasin bilong kaikai blut. (Stat 9:4; Aposel 15:28, 29) Tasol nogat, Jisas i no inap tokim ol narapela long brukim lo bilong God long blut, em samting i holi.​—Jon 8:28, 29.

• Sapos ol aposel i bin dringim blut bilong Jisas, Jisas i no inap tok olsem blut bilong em “bai kapsait,” dispela i makim olsem em i no bin givim yet sakrifais bilong em.​—Matyu 26:28.

• Jisas i givim sakrifais bilong em “wanpela taim tasol.” (Hibru 9:25, 26) Tasol sapos bret na wain i senis na kamap blut na bodi tru bilong Jisas long taim bilong bung bilong Kaikai Bilong Bikpela, orait ol man i kisim bret na wain i olsem ol i sakrifaisim Krais planti taim.

• Jisas i tok: “Yupela i mas mekim olsem yet bilong tingim mi,” em i no tok “mekim sakrifais long mi.”​—1 Korin 11:24.

Ol man i bilip olsem bret na wain i save senis na kamap blut tru bilong Jisas, ol i kisim dispela bilip long tok i stap long sampela ves bilong sampela Baibel. Olsem, planti Baibel i tanim tok Jisas i mekim long wain olsem: “Dispela em i blut bilong mi. (Matyu 26:28) Tasol ol inap tanim dispela tok bilong Jisas tu olsem: “Dispela i makim blut bilong mi.”d Olsem Jisas i save mekim planti taim, long dispela ves tu Jisas i skulim ol disaipel bilong em long rot bilong tok piksa.​—Matyu 13:34, 35.

Husat i ken kisim bret na wain?

Taim mipela Witnes Bilong Jehova i mekim bung bilong Kaikai Bilong Bikpela, i gat liklik lain tasol i save kaikai bret na dring wain. Wai na i olsem?

Blut bilong Jisas i kapsait i kamapim “nupela kontrak” na i senisim kontrak i stap namel long Jehova God na lain Israel bilong bipo. (Hibru 8:10-13) Lain i insait long dispela nupela kontrak i save kaikai bret na dring wain long Memorial. Tasol i no olgeta Kristen i insait long dispela kontrak, nogat. “Ol man God i bin singautim ol,” ol tasol i insait long en. (Hibru 9:15; Luk 22:20) Dispela lain bai mekim wok king wantaim Krais long heven, na Baibel i tok namba bilong ol em 144,000 manmeri tasol.​—Luk 22:28-30; Revelesen 5:9, 10; 14:1, 3.

“Liklik lain sipsip” bai mekim wok king wantaim Krais, tasol planti bilong yumi bilong “bikpela lain manmeri” bai i stap oltaim long graun. (Luk 12:32; Revelesen 7:9, 10) Yumi lain bai kisim laip long graun i no inap kaikai bret na dring wain long taim bilong bung bilong Memorial, tasol yumi insait long en bilong soim tenkyu bilong yumi long sakrifais Jisas i bin givim bilong helpim yumi.​—1 Jon 2:2.