Wai na Ol Witnes Bilong Jehova i Senisim Sampela Bilip Bilong Ol?
Oltaim mipela i larim Baibel i stap olsem as bilong bilip bilong mipela, so mipela i save mekim senis long bilip bilong mipela long taim ol tok bilong Skripsa i kamap klia.a
Ol dispela kain senis i stret wantaim stiatok bilong Baibel long Provep 4:18: “Rot bilong stretpela man i olsem lait long moningtaim i wok long kamap strong na i go bikpela moa long belo.” Wankain olsem taim san i kam antap na i soim klia olgeta samting, God i save kamapim klia tok bilong en isi isi long taim em i makim. (1 Pita 1:10-12) Olsem Baibel i tok profet, em i hariapim dispela taim long “taim bilong pinis.”—Daniel 12:4.
Ol dispela senis i no ken mekim na yumi kirap nogut o tingting planti, nogat. Ol man long bipo i lotuim God tu i bin popaia long ol bilip na ol samting God i laik ol i mas mekim na ol i mekim senis long tingting ol i holim.
Moses i makim em yet olsem man bilong kisim bek lain Israel 40 yia paslain long taim God i makim.—Aposel 7:23-25, 30, 35.
Ol aposel i no kliagut long tok profet long dai na kirap bek bilong Mesaia.—Aisaia 53:8-12; Matyu 16:21-23.
Sampela Kristen long taim bilong ol aposel i no gat stretpela save long “de bilong Jehova.”—2 Tesalonaika 2:1, 2.
Bihain God i stretim tingting kranki bilong ol, na yumi beten olsem em bai mekim olsem yet long yumi.—Jems 1:5.
a Mipela i no save haitim ol dispela senis bilong bilip bilong mipela long Baibel. Tasol mipela i save raitim na pablisim. Olsem, lukim “Beliefs Clarified” long referens long ol pablikesen bilong mipela long intenet.