Disasta Rilif Long 2023—“Mipela i Lukim Pasin Laikim Bilong Jehova”

Baibel i tok profet olsem “wanpela kantri bai pait long narapela kantri” na bai i gat ol disasta i kamap long haptaim bilong “pinis bilong dispela taim.” (Matyu 24:3, 7) Yumi lukim truim bilong dispela tok profet i kamap tru long sevis yia bilong 2023.a Maski i gat ol woa na ol netrol disasta long klostu 100 kantri, ol Witnes Bilong Jehova i bihainim pasin laikim bilong Jehova na ol i helpim ol narapela. Hau ol i mekim olsem?

Insait long sevis yia bilong 2023, winim 200 netrol disasta o ol disasta ol man yet i kamapim i putim hevi long ol bratasista bilong yumi. Ol koporesen em ol Witnes Bilong Jehova i save yusim, ol i tromoi winim 10 milion dolab bilong mani ol i kisim long ol donesen ol manmeri i givim bilong sapotim wok i kamap long olgeta hap bilong graun long mekim disasta rilif wok. Na tu, ol i yusim mani ol bratasista yet i givim bilong helpim ol narapela long hap ol i stap long en. Skelim hau ol i yusim ol donesen yu givim bilong helpim ol bratasista i bungim hevi bilong tupela disasta i bin kamap.

“Tru Tru Pasin Laikim i Stap”

Planti taim sampela hap bilong Naijiria i bungim hevi bilong tait wara. Tasol ol tait wara i bin kamap long Oktoba 2022 em i nogut moa winim ol narapela tait wara i bin kamap long dispela kantri insait long tenpela yia. Moa long 676,000 hekta bilong ol hap graun em ol i wokim fam long en i bin bagarap, na winim 2 milion manmeri i mas lusim haus bilong ol. Kwiktaim brens long Naijiria i makim ol Disasta Rilif Komiti long helpim ol bratasista na long helpim ol long stap strong long bilip.

Dispela i Mekim Wanem Long Ol Bratasista Bilong Yumi

• 7,505 pablisa i mas lusim ol haus bilong ol

• 860 haus i bagarap o i bagarap olgeta

• 90 Haus Kingdom na wanpela Haus Kibung em tait wara i bin kisim

Hau Ol i Yusim Donesen Ol i Kisim

Ol i bin yusim winim 250,000 dola long mekim disasta rilif wok, dispela i makim tu:

• Ol kaikai samting kain olsem rais, ol bin, na ol nudol

• Ol samting bilong haus olsem ol matres na ol moskito net

• Wok bilong stretim o sanapim gen ol haus i bagarap

Hau ol brata bilong yumi i skelim na yusim gut ol donesen ol i kisim? Wanpela rot ol i mekim olsem em long skelim gut olgeta wan wan bilding bilong luksave sapos i gat wok bilong stretim o nogat. Sapos ol i mas rausim wanpela bilding na wokim nupela, orait ol i yusim simpol disain i stret long ples ol i stap long en.

Ol bratasista i tenkyu tru taim ol i kisim helpim. Wanpela sista i tok: “Dispela tait wara i senisim laip bilong mipela bikos olgeta fam bilong mipela i bin bagarap na mipela i no gat haus moa. Mipela i kisim bel isi taim ol bratasista i kam long dispela de we hevi i bin kamap na ol i helpim mipela na givim ples slip long mipela. Mipela i kisim bikpela helpim taim mipela i kisim kaikai samting i kam long brens ofis. Mipela i kirap nogut tru taim mipela i lukim olsem tok i stap long Jon 13:34, 35 i kamap tru long laip bilong mipela. . . . Tru tru pasin laikim i stap. Long bel olgeta, mi na olgeta long famili i tok bikpela tenkyu long ol brata i givim helpim long mipela long taim stret.”

Ol narapela long komiuniti i luksave long rilif wok bilong yumi. Wanpela bikman long komiuniti long Sabagreia, Bayelsa State, i kamapim tingting bilong em na i tok: “I gat planti oganaisesen o misin i stap long graun olgeta, tasol ol Witnes Bilong Jehova tasol inap mekim dispela kain samting. . . . Oganaisesen bilong [yupela] i winim tru olgeta oganaisesen long graun.”

“Mipela i Lukim Pasin Laikim Bilong Jehova”

Long Februeri 2023, winim 400 bikpela paia i kamapim bikpela bagarap long Sili. Moa long 430,000 hekta bilong ol hap graun wantaim sampela bikpela risos bilong Sili i bagarap olgeta. Klostu olsem 8,000 manmeri i mas lusim haus bilong ol. Bihain tasol long disasta i kamap, brens ofis i stretim rot bilong givim helpim long ol bratasista.

Dispela i Mekim Wanem Long Ol Bratasista Bilong Yumi

• 222 pablisa i mas lusim ol haus bilong ol

• 20 haus i bagarap

Hau Ol i Yusim Donesen Ol i Kisim

Ol i yusim winim 200,000 dola long disasta rilif wok, dispela i makim tu:

• Kaikai na wara

• Fiul, ol samting bilong klinim ples, na ol marasin

• Wok bilong sanapim gen ol haus i bagarap

Taim olgeta samting bilong wanpela famili i bagarap olsem haus na bisnis bilong ol, ol i kirap nogut. Dispela i mekim na famili i no gat wok mani. Sampela de bihain long dispela hevi i kamap, dispela famili i bel hevi nogut tru long lukim ples em pastaim haus bilong ol i sanap long en, nau i no gat wanpela samting i stap. Tasol taim wok bilong sanapim gen haus bilong ol i kirap, isi isi ol i daunim pasin bilong tingting planti. Taim ol i lukim pasin laikim bilong ol volantia, dispela i helpim ol long karim dispela hevi. Dispela famili i pilim tru helpim ol i kisim, na dispela i kirapim ol long wok wantaim ol volantia long helpim wok bilong sanapim gen haus bilong narapela brata.

Planti bratasista bilong yumi i pilim tru long bel helpim ol i kisim long dispela rilif wok. Wanpela brata i tok: “Jehova i stretim rot long Disasta Rilif Komiti i stap bilong helpim yumi, na dispela em i wanpela gutpela blesing yumi kisim. De bihain long disasta i kamap, ol i stap pinis long dispela hap we hevi i kamap na ol i givim kaikai na wara samting long ol bratasista. Taim yumi ritim stori long wok bilong disasta rilif i kamap long ol narapela hap bilong graun, dispela i save strongim yumi. Tasol taim em i kamap long yu yet, dispela em narapela kain tru. Yu amamas moa long ol gutpela wok bilong oganaisesen; hau ol brata i bihainim ol gutpela pasin bilong Jehova; na hau ol i tingim tru yumi long ol samting yumi nidim long sait bilong skin, bilip, na bel na tingting. Mipela i lukim pasin laikim bilong Jehova i stap ples klia.”

Pinis bilong dispela haptaim nogut i kam klostu nau, olsem na yumi bai lukim planti moa disasta i kamap. (Luk 21:10, 11) Maski i olsem, long rot bilong kongrigesen Kristen, yumi lukim tu olsem gutpela King bilong yumi, Krais Jisas, i stap wantaim yumi “olgeta de i go inap long pinis bilong dispela taim.” (Matyu 28:20) Ol gutpela donesen yu givim long rot bilong donate.jw.org na ol narapela rot bilong sapotim wok i kamap long olgeta hap bilong graun, na tu, bikpela taim na strong yu lusim long mekim wok, olgeta dispela i soim olsem yu sapotim dispela Kingdom na gutpela King bilong en. Mipela i tenkyu long gutpela pasin yupela i wok yet long mekim.