OL KANTRI NA OL MANMERI
Visitim Kambodia
OL VILES i trip antap long wara, ol manmeri i bisi long maket, ol strit i pulap long ol motobaik i karim kain kain samting, olsem ol frits samting i go inap long ol kakaruk—em sampela samting yu bai lukim long Kambodia.
Ol manmeri bilong Kambodia i gat nem olsem ol man bilong mekim pasin pren na ol i save pas gut wantaim. Ol i save kolim narapela narapela olsem brata, susa, anti, ankol, bubu meri, o bubu man, maski ol i bungim man long namba wan taim!
Sampela man bilong Kambodia i stap long ol hausbot, na sampela i stap long ol haus i gat ol longpela pos, o ol haus i stap long ol pletfom i trip antap long wara. I gat sampela skul, klinik, maket na petrol stesin i trip antap long wara
Planti man long Kambodia i save laikim dragon prut
Rais em i nambawan kaikai bilong ol Kambodia. Taim ol i redim kaikai planti taim ol i save kukim 3-pela o 4-pela narapela narapela kain kaikai, planti taim i gat sup tu. Pis em feiveret kaikai bilong ol. Long taim bilong kaikai, planti taim ol i sevim kaikai i swit, na pait, na i gat sol long en.
Inap 2,000 yia i go pinis, taim ol man bilong raun na ol bisnisman bilong India i go long Saina, ol i raun long ol nambis ples bilong Kambodia na senisim silk na ol metal wantaim kari samting, diwai i gat gutpela smel, tit bilong elefan, na gol. Bihain, ol manmeri bilong Kambodia i kisim sampela pasin bilong ol India na Saina, olsem na lotu Hindu na lotu Buda i go bikpela. Long nau, winim 90 pesen bilong populesen bilong Kambodia i bilong lotu Buda.
Ol Witnes Bilong Jehova i save autim tok bilong Baibel long Kambodia. Ol i bin helpim planti manmeri long rot bilong buk Tru Tru Baibel i Tok Wanem? Dispela buk i stap long 250 tokples samting, na tu, long tokples Kambodia.
Winim 1,500 manmeri long Kambodia i stadi long Baibel wantaim ol Witnes Bilong Jehova na ol i kisim bekim bilong ol kain askim olsem, “Ol man i dai pinis ol i stap we?” na “Wanem laik bilong God long dispela graun?”
Buk Tru Tru Baibel i Tok Wanem? em ol Witnes Bilong Jehova i wokim, i stap long tokples Kambodia (lukim long piksa).