Ol Weding Em Ol i Stret Long Ai Bilong God na Ol Man

“Wanpela man i marit long taun Kana . . . Ol i bin singautim tu Jisas wantaim ol disaipel bilong en, na ol tu i kam i stap long dispela marit.”​​—JON 2:​1, 2.

1. Stori bilong Jisas long Kana i kamapim wanem samting?

JISAS, mama bilong em, na sampela disaipel bilong em ol i bin save long bikpela amamas wanpela weding i ken kamapim long lain bilong God. Krais i mekim na wanpela kaikai bilong marit i kamap gutpela tru. Em i wokim namba wan mirakel bilong em, na dispela i mekim na bung i kamap gutpela moa. (Jon 2:​1-11) Ating yu go pinis long weding bilong sampela Kristen em ol i laik amamas wantaim bilong mekim wok bilong Jehova olsem marit. O yu amamas long yu yet bai i gat weding o yu bai helpim wanpela pren long weding bilong em i kamap gutpela. Wanem samting inap mekim na wanpela weding i ken kamap gutpela?

2. Baibel i kamapim wanem save long ol weding?

² Ol Kristen i kisim save olsem ol tok bilong Baibel i gutpela long helpim man na meri i laik marit. (2 Timoti 3:​16, 17) Tru, Baibel i no kamapim stret olgeta samting ol man i mas mekim long wanpela weding Kristen. Dispela i olsem, long wanem, long ol narapela narapela ples na narapela narapela haptaim i gat kain kain kastam, na tu, ol lo bilong gavman long dispela samting i narapela narapela kain. Olsem: Long taim bilong ol Israel bilong bipo i no gat wanpela bung bilong marit. Long de bilong marit, man i laik marit i bringim nupela meri i kam long haus bilong em yet o long haus bilong papa bilong em. (Stat 24:67; Aisaia 61:10; Matyu 1:24) Em i mekim dispela samting long ai bilong olgeta man na dispela i makim olsem tupela i marit, na i no gat bung bilong marit olsem planti marit long nau i save mekim.

3. Jisas i mekim wanem samting long wanpela bung long Kana?

³ Long ai bilong ol Israel dispela i olsem ol i marit. Bihain ol inap mekim wanpela kaikai bilong marit, olsem Jon 2:1 i stori long en. Planti Baibel i tanim dispela ves olsem: “I gat wanpela marit long Kana.” Tasol long tok ples ol i raitim Baibel long en long bipo dispela tok i makim olsem “kaikai bilong marit.”a (Matyu 22:​2-10; 25:10; Luk 14:8) Stori i kamapim klia olsem Jisas i bin stap long kaikai bilong wanpela marit Juda, na em i bin mekim wanpela samting bambai bung i kamap gutpela. Tasol bikpela samting em olsem: Ol samting ol man i mekim long marit long dispela taim i narapela kain long ol samting ol man i save mekim long nau.

4. Sampela Kristen i save marit olsem wanem? Bilong wanem ol i mekim olsem?

⁴ Long nau long planti kantri, ol Kristen i laik marit ol i mas inapim sampela lo bilong gavman. Taim ol i inapim ol dispela lo, ol inap marit long kain kain rot em gavman i orait long en. Ol inap mekim olsem long wanpela liklik bung long ai bilong wanpela jas o bikman bilong gavman o wanpela elda bilong kongrigesen em gavman i givim namba long ol long wokim marit. Sampela i save marit olsem, na ol i askim sampela famili o pren Kristen long stap olsem witnes na sainim setifiket o bilong ol i ken amamas wantaim ol long dispela bikpela de bilong ol. (Jeremaia 33:11; Jon 3:29) Na sampela Kristen i no laik mekim bikpela kaikai bilong marit, long wanem, dispela i givim bikpela wok long ol long stretim ol samting na i gat bikpela pe bilong en. Ol i stretim rot long mekim liklik kaikai tasol wantaim sampela gutpela pren. Maski yumi gat wanem tingting long dispela samting, yumi mas save olsem sampela narapela strongpela Kristen i gat narapela tingting long en.​​—Rom 14:​3, 4.

5. Bilong wanem planti Kristen taim ol i marit ol i laikim wanpela tok bilong marit? Dispela tok bai kamapim wanem samting?

⁵ Planti Kristen taim ol i marit ol i laikim wanpela tok bilong marit em Baibel i as bilong en.b Ol i luksave olsem Jehova em i as bilong marit na long Baibel em i kamapim ol gutpela tok bilong helpim marit i ken kamap gutpela na amamas. (Stat 2:​22-24; Mak 10:​6-9; Efesus 5:​22-33) Na planti i laik ol pren Kristen na famili i ken amamas wantaim ol long dispela bikpela de. Tasol yumi mas ting olsem wanem long ol lo bilong gavman, na ol samting ol marit i mas mekim, na ol kastam bilong ples? Dispela stadi bai stori long ol samting i wok long kamap long ol narapela narapela ples. Ating sampela samting i narapela kain long ol samting yu save long en o ol manmeri long hap bilong yu i save mekim. Tasol yu ken lukim sampela stiatok o sampela samting i bikpela samting long ol wokman bilong God.

Stretpela Marit i Mas Bihainim Ol Lo Bilong Gavman

6, 7. Bilong wanem yumi mas save long ol lo bilong gavman long marit? Olsem wanem yumi inap kamapim dispela?

⁶ Tru, Jehova i as bilong marit, tasol ol gavman bilong graun i bosim sampela wok bilong ol manmeri i laik marit. I stret ol i mekim olsem. Jisas i tok: “Samting bilong Sisar, em yupela i mas givim long Sisar. Na samting bilong God, em yupela i mas givim long God.” (Mak 12:17) Na aposel Pol i tok: “Olgeta man i mas i stap aninit long ol gavman. Yumi save, i no gat wanpela gavman i kamap nating. Nogat. Olgeta wok bilong gavman i kamap long han bilong God tasol. Na olgeta gavman i stap, God yet i putim ol na ol i stap.”​​—Rom 13:1; Taitus 3:1.

⁷ Long planti kantri gavman i makim husat inap long marit. Olsem na sapos tupela Kristen i fri long marit olsem Baibel i makim, ol i save bihainim gut ol lo long hap bilong ol, olsem: Kisim wanpela pepa bilong marit, yusim wanpela man em gavman i givim namba long em long wokim marit, na rejistaim marit taim ol i marit pinis. Taim Sisar Ogastus i putim lo olsem ol i mas “kisim nem,” Maria na Josep i bihainim dispela lo, na ol i go long Betlehem bilong “gavman i ken kisim nem bilong ol.”​​—Luk 2:​1-5.

8. Ol marit i mas stap wantaim i go inap long wanem taim? Wanem pasin bilong ol Witnes Bilong Jehova i kamapim dispela?

⁸ Sapos tupela Kristen i marit long rot i stret long gavman na ol man, tupela i stap marit long ai bilong God na ol i no ken brukim. Olsem na ol Witnes Bilong Jehova i no save mekim bung bilong marit planti taim, na ol i no save mekim gen tok promis bilong marit, olsem taim ol i marit inap 25 o 50 yia. (Matyu 5:37) (Sampela lotu i no save orait long marit ol man i mekim long gavman, ol i tok man na meri i no marit stret sapos i no gat wanpela pris o pasto i wokim marit bilong ol o tokaut olsem tupela i man na meri i marit.) Long planti kantri gavman i save givim namba long wanpela elda bilong ol Witnes Bilong Jehova na em i ken wokim marit. Sapos ol inap mekim olsem, ating elda i laik maritim ol long taim em i mekim wanpela tok bilong marit long Haus Kingdom. Em i ples bilong lotu tru long God na gutpela ples bilong mekim wanpela tok long marit, em God Jehova i as bilong en.

9. (a) Sapos tupela Kristen i marit long gavman, ol inap mekim wanem? (b) Olsem wanem ol elda bai insait long ol samting bilong weding?

⁹ Long sampela kantri, lo i makim olsem man na meri i mas marit long wanpela ofis bilong gavman, o long ai bilong wanpela wokman bilong gavman i gat namba long wokim marit. Planti Kristen em ol i marit long dispela rot, bihain ol i gat wanpela tok bilong marit long Haus Kingdom long dispela de yet o long de bihain. (Ol i no laik planti de i lus namel long marit long gavman na long tok bilong Baibel, long wanem, ol i marit pinis long ai bilong God na ol man, na long ai bilong kongrigesen Kristen tu.) Sapos tupela Kristen i marit long gavman ol i laikim wanpela tok long wanpela Haus Kingdom, paslain long dispela ol i mas kisim tok orait long ol elda i insait long Kongrigesen Sevis Komiti. Ol elda bai kisim save olsem man na meri i laik marit ol i gat gutnem, na ol bai kisim save tu olsem taim bilong tok bilong marit i no ken kamap long taim bilong ol miting o long taim bilong sampela narapela program i kamap long Haus Kingdom. (1 Korin 14:​33, 40) Ol bai toktok tu long olgeta samting tupela i laik mekim bilong redim Haus Kingdom bilong wokim weding na makim olsem ol bai mekim wanpela toksave long weding o nogat.

10. Sapos ol i mas marit long gavman, dispela bai mekim wanem long tok bilong marit?

¹⁰ Elda husat bai mekim tok bilong marit bai wok strong long mekim tok long pasin ol man i ken pilim tru long bel, na strongim ol long ol samting bilong spirit, na i soim rispek. Sapos tupela i bin marit pastaim long gavman, em bai kamapim olsem tupela i marit pinis olsem lo bilong gavman i makim. Sapos ol i no mekim tok promis bilong marit long taim ol i marit long gavman, ating tupela i laik mekim olsem long taim bilong tok.c Sapos tupela i mekim pinis tok promis taim ol i marit long gavman na ol i laik mekim gen tok promis long ai bilong Jehova na kongrigesen, ol bai mekim long pasin i kamapim olsem ol i bin mekim pinis dispela tok promis, na “God i pasim [ol] pinis.”​​—Matyu 19:6; 22:21.

11. Long sampela hap, man na meri i marit olsem wanem? Dispela bai mekim wanem long tok bilong marit?

¹¹ Long sampela ples, lo i no makim olsem man na meri i mas marit long wanpela bung we ol i sainim pepa na mekim tok promis, o long ai bilong wanpela man em gavman i givim namba bilong wokim marit. Ol i marit taim ol i bringim wanpela pepa bilong rejistaim marit em ol i sainim pinis long wanpela wokman bilong gavman. Bihain stret long dispela, ol i rejistaim setifiket bilong marit. Long dispela rot ol man i tingim tupela olsem man na meri marit, na dispela de em i de bilong marit bilong ol. Olsem yumi tok pinis, bihain long rejistaim marit tupela nupela marit i ken askim wanpela strongpela brata long mekim wanpela tok bilong Baibel long Haus Kingdom. Brata bai tokaut long ol manmeri i stap long harim tok olsem tupela i marit pinis long rot bilong rejistaim marit. Sapos ol i laik mekim tok promis bilong marit ol bai mekim olsem yumi stori pinis long paragraf 10 na sta daunbilo long en. Ol manmeri i kam long Haus Kingdom ol bai amamas wantaim tupela nupela marit na ol bai kisim ol gutpela tok long Baibel.​​—Solomon 3:​11.

Marit Long Kastam na Gavman

12. Marit long kastam i wanem kain marit? Taim tupela Kristen i marit pinis long kastam, gutpela ol i mekim wanem samting?

¹² Long sampela kantri, man na meri i marit long kastam (o, ples). Yumi no tok long kain marit we man na meri i stap nating wantaim, o tupela i stap wantaim olsem marit, tasol ol i no marit stret long lo bilong gavman.d Yumi toktok long marit i stret long kastam o ples na ol man i tingim olsem tupela i marit stret. Planti taim long kain marit olsem ol i save baim meri, na long dispela rot tupela i marit stret long lo bilong gavman na Baibel. Gavman i orait long kain marit olsem na ol man i no inap brukim. Bihain long dispela, ol inap rejistaim dispela marit bilong kastam, na taim ol i mekim olsem ol bai kisim wanpela setifiket. Sapos ol i rejistaim marit long gavman, dispela inap lukautim tupela o lukautim meri taim man i dai, o lukautim ol pikinini i kamap bihain. Kongrigesen i laik kirapim olgeta manmeri i marit long kastam long rejistaim marit kwiktaim. Aninit long Lo Bilong Moses, ol i bin rejistaim ol marit na ol nupela pikinini.​​—Matyu 1:​1-​16.

13. Bihain long marit long kastam, sapos i gat wanpela tok bilong marit ol i ken tingim wanem samting?

¹³ Taim man na meri i wokim marit long kastam, long dispela taim ol i kamap man na meri marit. Olsem yumi tok pinis, tupela Kristen i marit olsem ol i ken stretim rot bilong mekim wanpela tok bilong marit, na tok promis bilong marit, long Haus Kingdom. Sapos ol i mekim olsem, brata i mekim tok bai tokaut olsem tupela i marit pinis olsem lo bilong gavman i makim. Ol bai mekim wanpela tok tasol. Yumi ken tok, ol i marit pinis long kastam (ples) i stret long gavman, na mekim wanpela tok tasol bilong Baibel. I gutpela long ol i wokim marit na tok bilong marit insait long liklik haptaim, olsem long wanpela de, long wanem, long ai bilong ol manmeri dispela bai givim biknem long marit Kristen.

14. Kristen inap mekim wanem sapos marit long kastam na marit long gavman tupela wantaim i stret?

¹⁴ Long sampela kantri we gavman i orait long marit long kastam, i gat rot tu long marit long gavman. Planti taim ol i wokim marit long gavman long ai bilong wanpela wokman bilong gavman i gat namba long wokim marit, na planti taim ol i mekim tok promis bilong marit na sainim wanpela pepa bilong rejistaim marit. Sampela Kristen i laikim marit long gavman, na i no marit long kastam. I no gat wanpela lo i tok ol i mas mekim tupela wantaim; tupela marit wantaim i stret long ai bilong gavman. Ol samting yumi toktok pinis long paragraf 9 na 10 long ol samting bilong tok bilong marit na tok promis bilong marit i stret tu long dispela kain marit. Bikpela samting i olsem, marit bilong tupela i mas stret long ai bilong God na ol man.​​—Luk 20:25; 1 Pita 2:​13, 14.

Holimpas Stretpela Pasin Insait Long Marit

15, 16. Olsem wanem ona em i bikpela samting long marit?

¹⁵ Taim wanpela hevi i kamap long marit bilong king bilong Persia, wanpela hetman, nem bilong em Memukan, em i givim wanpela tok em inap long kamapim gutpela samting​—olsem “olgeta meri bai i harim gut tok [“givim ona,” NW] bilong man bilong ol.” (Esta 1:20) I no gat wanpela king i mas givim dispela tok long ol Kristen i marit; ol meri i gat laik long givim ona long man bilong ol. Na ol man marit i laik mekim gutpela pasin na litimapim nem bilong meri bilong ol. (Sindaun 31:​11, 30; 1 Pita 3:7) Ol marit i no ken mekim tasol gutpela pasin long poroman bilong ol bihain long ol i marit inap planti yia, nogat. Ol i mas mekim olsem kirap long taim ol i marit nupela, olsem kirap long de bilong marit.

¹⁶ Man na meri​—olsem man na meri marit​—i no tupela tasol i mas soim ona long de bilong marit. Sapos wanpela elda Kristen bai mekim tok bilong marit, dispela tok tu i mas givim ona olsem soim rispek. Em i mas mekim tok i go long tupela i laik marit. Bilong givim rispek long ol, brata i no inap kamapim ol tok pilai na ol toktok nating planti man i save mekim. Em i no ken kamapim ol tok i stori long ol samting em i bin lukim long tupela na dispela bai mekim na tupela na ol man i harim tok ol bai sem. Em bai mekim gutpela tok i strongim ol, na kamapim klia olsem Jehova i As bilong marit na Em i gat ol gutpela tok bilong helpim marit. Tru tumas, gutpela tok bilong elda bai mekim na marit bai givim ona long God Jehova.

17. Bilong wanem ol marit Kristen i mas bihainim lo bilong gavman?

¹⁷ Ating yu luksave olsem dispela stadi i kamapim planti tok long ol lo bilong marit long gavman. Ating sampela samting i no stret long hap bilong yu. Tasol yumi olgeta i mas save olsem em i bikpela samting long ol Witnes Bilong Jehova i wokim ol marit i soim rispek long ol lo bilong ples, em ol lo bilong gavman. (Luk 20:25) Aposel Pol i tokim yumi: “Wanem samting yupela i mas givim long gavman, orait yupela givim long ol. Yupela i mas givim ol kain kain takis long man bilong kisim takis. . . . Na sapos man i stap bikman, orait yupela i mas givim biknem long em.” (Rom 13:7) Yes, kirap long de bilong marit, i stret long ol Kristen i givim ona long samting God i bin putim bilong ol man i bihainim long nau.

18. Yumi mas tingim wanem samting moa long marit? Yumi inap painim we ol tok long dispela samting?

¹⁸ Bihain long planti weding ol i save mekim wanpela bung bilong marit​—olsem kaikai bilong marit. Tingim, Jisas i bin stap long wanpela kaikai olsem. Sapos i gat wanpela bung olsem, olsem wanem ol tok bilong Baibel i ken helpim yumi long mekim ol samting i givim ona long God na i mekim gut nem bilong tupela nupela marit na kongrigesen Kristen? Stadi i kamap bihain long dispela bai toktok long dispela samting.e

[Ol Futnot]

Yu Inap Tingim?

• Long samting bilong marit, bilong wanem yumi mas tingim ol lo bilong gavman na ol samting bilong spirit?

• Sapos tupela Kristen i marit long gavman, liklik taim bihain ol inap mekim wanem samting?

• Bilong wanem ol i save mekim ol tok bilong marit long Haus Kingdom?

[Piksa long pes 18]

Long wanpela marit long Israel long bipo, man i bringim nupela meri i kam long haus bilong em o long haus bilong papa

[Piksa long pes 21]

Sapos ol i laik, tupela Kristen i ken stretim rot na taim ol i marit pinis long kastam, wanpela tok bilong marit i ken kamap long Haus Kingdom

Kamapim Bilip Bilong Yu Long Pasin Yu Mekim

“Sapos bilip i stap nating, na em i no kamapim gutpela pasin long laip bilong man i bilip, orait dispela bilip em i samting nating.”​​—JEMS 2:​17.

1. Bilong wanem ol Kristen bilong pastaim i tingim bilip na ol pasin bilong ol tu?

OL Kristen bilong pastaim i bin kamapim bilip bilong ol long pasin ol i bin mekim. Disaipel Jems i bin kirapim olgeta Kristen olsem: “Tok yupela i kisim, em yupela i mas bihainim. Yupela i no ken harim nating tasol. Nogat.” Na em i tok moa: “Bodi i no gat spirit i stap long en, em i dai pinis. Olsem tasol, sapos man i bilip nating na bilip bilong en i no kamapim gutpela pasin tu, orait bilip bilong dispela man i olsem em i dai pinis.” (Jems 1:22; 2:26) Inap olsem 35 yia bihain long em i mekim dispela tok, planti Kristen i kamapim yet bilip bilong ol long ol pasin ol i mekim. Tasol sori tru, sampela i no mekim olsem. Jisas i tok amamas long kongrigesen long Smerna; tasol long planti manmeri long kongrigesen long Sardis em i tok: “Mi save pinis long olgeta pasin yu save mekim. Ol i save tok long yu olsem, ‘Dispela sios i gat laip tru.’ Tasol nogat, yu dai pinis.”​​—KTH 2:​8-11; 3:1.

2. Ol Kristen i mas askim ol yet long wanem samting long bilip bilong ol?

² Olsem na Jisas i strongim ol manmeri long Sardis​—na olgeta manmeri i ritim ol dispela tok long bihain​—long ol i mas laikim tok i tru bilong ol Kristen olsem ol i bin laikim long pastaim, na holimpas pasin bilong ol long i stap pren wantaim God. (KTH 3:​2, 3) Yumi olgeta i ken askim yumi yet olsem: ‘Olsem wanem long ol pasin bilong mi? Ol pasin bilong mi i kamapim klia olsem mi mekim olgeta samting mi inap long mekim bilong kamapim bilip bilong mi, na mi mekim olsem long olgeta samting, i no long ol samting bilong autim tok na ol miting bilong kongrigesen tasol?’ (Luk 16:10) Yumi inap stori long planti samting long laip bilong yumi, tasol nau yumi laik stori long wanpela samting tasol: ol bung bilong amamas, na ol bung ol i save mekim planti taim bihain long ol weding Kristen.

Ol Liklik Bung Bilong Amamas

3. Baibel i tok wanem long ol bung bilong amamas?

³ Planti bilong yumi i amamas long ol i singautim yumi long wanpela bung bilong ol Kristen i amamas. Jehova em i God bilong “pasin tru bilong amamas,” na em i laik ol wokman bilong em i amamas. (1 Timoti 1:11) Em i tokim Solomon long raitim tok long Baibel, olsem: “Mi ting i gutpela sapos yumi bihainim pasin bilong amamas. I no gat arapela gutpela rot bilong yumi bihainim. Olsem na yumi mas kaikai na dring na amamas long ol samting. Tru, wok bilong yumi i hat tumas, tasol yumi ken bihainim pasin bilong amamas long olgeta de God i larim yumi i stap long graun.” (Saveman 3:​1, 4, 13; 8:15) Yumi ken kisim dispela amamas long taim yumi sindaun wantaim famili long kaikai o long sampela narapela liklik bung bilong amamas bilong ol man i lotu tru long God.​​—Jop 1:​4, 5, 18; Luk 10:​38-42; 14:​12-14.

4. Man i laik wokim wanpela bung i mas tingim wanem samting?

⁴ Sapos yu wokim wanpela bung olsem, na yu bosim dispela bung, maski yu singautim tasol sampela wanbilip i kam long wanpela kaikai na stori wantaim ol, yu mas tingim gut ol samting yu laik mekim. (Rom 12:13) Yu laik mekim na yupela i “bihainim stret ol gutpela pasin,” na larim “gutpela tingting na save i kam long God” i stiaim yupela. (1 Korin 14:40; Jems 3:​17) Aposel Pol i tok: “Sapos yupela i kaikai na dring o yupela i mekim narapela samting, yupela i mas mekim dispela olgeta samting bilong givim biknem long God. . . . Yupela i no ken mekim olkain pasin inap long mekim ol [narapela] i pundaun long sin.” (1 Korin 10:​31, 32) Wanem sampela samting yu mas was gut long en? Sapos yu tingim ol dispela samting pastaim, dispela bai helpim yu na ol manmeri yu singautim long mekim ol pasin i kamapim bilip bilong yu.​​—Rom 12:2.

Em Wanem Kain Bung?

5. Bilong wanem papa bilong bung i mas tingting gut long em bai putim alkohol na musik o nogat?

⁵ Planti papa bilong bung i mas tingting olsem ol bai putim ol dring alkohol o nogat. I no olsem i mas i gat alkohol bilong mekim bung i kamap gutpela. Tingim olsem Jisas i bin givim kaikai long wanpela bikpela lain manmeri i kam long em​—em i mekim sampela bret na pis i kamap planti. Stori i no kamapim olsem em i wokim mirakel na mekim wain, tasol yumi save em inap long mekim. (Matyu 14:​14-21) Sapos yu tingting long putim alkohol long bung bilong yu, skelim gut hamas yu putim, na stretim rot bilong putim ol dring olsem kodial bilong ol man i laikim dispela kain dring. (1 Timoti 3:​2, 3, 8; 5:23; 1 Pita 4:3) No ken subim wanpela man long kisim samting em inap kaikaim em “olsem wanpela snek nogut.” (Sindaun 23:​29-32) Olsem wanem long musik na singsing? Sapos long bung bilong yu i gat musik, yu mas skelim gut ol singsing, na tingim pairap na ol tok bilong musik. (Kolosi 3:8; Jems 1:21) Planti Kristen i kisim save olsem pasin bilong pilaim ol Kingdom Melodies o singim ol dispela singsing wantaim i mekim na bung i save kamap gutpela. (Efesus 5:​19, 20) Na long olgeta taim sekim volium bilong musik, nogut em i pasim ol man long toktok gut wantaim o distebim ol neiba.​​—Matyu 7:​12.

6. Long ol samting bilong toktok na ol narapela samting i kamap long bung, olsem wanem papa bilong bung i ken soim olsem bilip bilong em i strong?

⁶ Long ol bung bilong amamas ol Kristen inap toktok long kain kain samting, ritim sampela stori long maus, o kamapim sampela gutpela ekspiriens. Sapos ol i kirap toktok long sampela samting nogut, long gutpela pasin papa bilong bung i ken senisim toktok. Na em i mas was gut, nogut wanpela man o meri tasol i save toktok. Sapos em i lukim olsem dispela pasin i wok long kamap, em i ken kirapim ol narapela tu long toktok, olsem kirapim ol yangpela long toktok o kamapim wanpela tok i save kirapim ol narapela tu long toktok. Ol yangpela na ol lapun bai amamas long ol dispela kain toktok i kamap long bung. Sapos yu papa bilong bung, na yu stiaim gut ol samting, olgeta man i stap long dispela bung bai lukim “gutpela pasin” bilong yu. (Filipai 4:5) Ol bai lukim olsem bilip bilong yu i strong na i stiaim olgeta samting yu mekim long laip bilong yu.

Marit na Ol Kaikai Bilong Marit

7. Bilong wanem yumi mas tingim gut ol samting yumi mekim long taim bilong ol weding na ol bung i save kamap long dispela taim?

⁷ Wanpela gutpela taim bilong amamas em long ol weding Kristen. Ol wokman bilong God long pastaim, na Jisas na ol disaipel bilong em tu, ol i amamas long go long ol kain bung olsem. (Stat 29:​21, 22; Jon 2:​1, 2) Tasol long nau, ol samting i kamapim klia olsem i gat wok long stretim gut ol samting bilong ol bung bilong amamas long taim bilong weding bambai ol dispela bung i kamapim pasin bilong gutpela tingting Kristen. Ol bung bilong amamas long taim bilong ol weding em samting i save kamap long laip bilong yumi, na em i givim rot long wanpela Kristen long kamapim olsem em i gat strongpela bilip.

8, 9. Olsem wanem ol samting i save kamap long planti weding i soim olsem tok yumi ritim long 1 Jon 2:​16, 17 i tru?

⁸ Planti manmeri em ol i no save long ol stiatok bilong God na ol i no tingim, ol i ting ol kaikai bilong weding i taim bilong kaikai na dring planti tumas. Long wanpela nius long Yurop, wanpela nupela meri marit i tok long weding bilong em olsem bilong wanpela “kwin,” olsem: ‘Mipela i sindaun long wanpela karis em 4-pela hos i pulim na 12-pela karis em ol hos i pulim i bihainim mipela na wanpela karis we ol man i pilai musik i sindaun long en. Bihain mipela i gat gutpela kaikai tru na gutpela musik; em i narapela kain tru. Ol samting i kamap olsem mi laikim, na long dispela de mi olsem wanpela kwin.’

⁹ Tru ol samting i save kamap long ol weding i no wankain long olgeta kantri, tasol dispela tingting i kamapim ol samting olsem aposel Jon i tok: “Olgeta pasin bilong ol man bilong graun, em pasin bilong bel kirap na aigris na bikhet, ol dispela pasin i no kam long Papa. Nogat. Ol i pasin bilong graun tasol.” Olsem wanem? Yu ting tupela strongpela marit Kristen bai laikim wanpela weding kain olsem bilong wanpela “kwin”? Nogat, a? Ol samting ol i mekim long weding bilong ol i mas kamapim olsem ol i tingim tok olsem “man i bihainim tok bilong God, em bai i stap oltaim.”​​—1 Jon 2:​16, 17.

10. (a) Bilong weding i ken kamap gutpela, bilong wanem ol i mas stretim gut ol samting? (b) Ol i mas tingim wanem samting taim ol i singautim ol man?

¹⁰ Ol man na meri i laik marit ol i mas bihainim gutpela tingting, na Baibel inap helpim ol. Tru, de bilong marit i bikpela samting, tasol ol i save olsem dispela de em i kirap tasol long laip bilong tupela marit Kristen em ol inap i stap oltaim oltaim. I no olsem ol i mas mekim wanpela bikpela kaikai bilong marit. Sapos ol i laik mekim wanpela bung, ol i mas tingim mani ol i mas tromoi long mekim dispela bung na wanem kain bung ol bai mekim. (Luk 14:28) Long laip bilong ol olsem marit Kristen, Baibel i makim man i stap het. (1 Korin 11:3; Efesus 5:​22, 23) Olsem na man i laik marit i mas bosim ol samting bilong kaikai bilong marit. Tru, em bai toktok gut wantaim meri em bai maritim long husat ol i laik singautim i kam long kaikai bilong marit, o husat ol inap long singautim. Ating ol bai i no inap singautim olgeta pren na famili i kam, olsem na bai ol i singautim sampela tasol i kam. Tupela i mas save olsem sapos ol i no inap singautim sampela wanbilip Kristen, ol dispela Kristen bai tingim gut dispela samting na i no kros long ol.​​—Saveman 7:9.

“Man i Bosim Kaikai”

11. “Man i bosim kaikai” bai mekim wanem wok long weding?

¹¹ Sapos tupela marit i laik singautim sampela long kam long kaikai bilong marit bilong ol, ol i ken mekim wanem bambai dispela bung i kamap gutpela? Inap planti yia nau, ol Witnes Bilong Jehova i luksave olsem em i savetingting long bihainim samting Baibel i toktok long en long dispela marit Jisas i bin go long en long Kana. I gat wanpela “man i bosim kaikai,” olsem wanpela strongpela wanbilip. (Jon 2:​9, 10) Long wankain rot, wanpela man i laik marit i gat savetingting em bai makim wanpela strongpela brata Kristen long mekim dispela bikpela wok. Man i bosim kaikai bai kisim save long ol laik bilong man i marit, na paslain long bung na long taim bilong bung em bai mekim ol samting man i marit i laikim.

12. Man i marit nupela i mas tingim wanem samting sapos em i putim alkohol?

¹² Olsem yumi stori pinis long paragraf 5, sampela nupela marit i no putim alkohol taim ol i mekim kaikai bilong marit, nogut sampela bai dring tumas na dispela i bagarapim amamas bilong gutpela kaikai. (Rom 13:13; 1 Korin 5:11) Sapos ol i putim alkohol, man i marit nupela i mas was gut long ol i putim alkohol long skel tasol. Long kaikai bilong marit em Jisas i bin stap long en long Kana i gat wain, na em i givim gutpela wain long ol. Man i bosim kaikai i tok: “Olgeta man i save tilim gutpela wain pastaim. Na taim ol man i dring planti pinis, orait ol i save tilim wain i nogut liklik. Tasol yu, yu bin pasim gutpela wain, na nau tasol yu kisim i kam.” (Jon 2:10) Yumi ken save olsem Jisas i no givim wain na dispela i mekim na sampela i spak, long wanem, long ai bilong em dispela i no stret. (Luk 12:​45, 46) Taim man i bosim kaikai i kamapim olsem em i kirap nogut long gutpela wain, em i tokaut olsem em i bin lukim pinis long sampela kaikai bilong marit sampela man i spak. (Aposel 2:15; 1 Tesalonaika 5:7) Olsem na man i marit nupela na strongpela Kristen em i makim bilong bosim kaikai, tupela wantaim i mas was gut bambai olgeta manmeri i bihainim tok olsem: “Yupela i no ken dring planti na spak. Nogat. Dispela kain pasin i save bagarapim yupela.”​​—Efesus 5:18; Sindaun 20:1; Hosea 4:11.

13. Tupela i laik marit i mas tingim wanem samting sapos ol i laik bai i gat musik long kaikai bilong marit bilong ol? Bilong wanem ol i mas tingim dispela samting?

¹³ Olsem long ol narapela bung, sapos i gat musik, ol i mas tingim gut volium bilong musik bambai ol man i ken toktok gut wantaim. Wanpela elda Kristen i tok: “Taim bung bilong marit i go i go, na ol man i wok long toktok, sampela taim volium bilong musik i go bikpela. Pastaim musik i krai liklik tasol na bihain volium bilong musik i go bikpela na ol man i no inap toktok gut wantaim. Kaikai bilong marit i givim rot long bung na amamas wantaim. Tasol sapos pasin bilong pilai musik i pairap strong na i nogutim dispela gutpela taim bilong amamas, bai yumi bel hevi long dispela, a?” Long dispela samting tu man i marit nupela na man i bosim kaikai ol i mas skelim gut ol samting. Ol i no ken larim ol man i pilai musik​—em ol man ol i haiarim o sampela narapela man i pilai​—long ol i bosim volium bilong musik na wanem kain musik ol i pilai. Aposel Pol i tok: “Long toktok bilong yupela na long wok bilong yupela na long olgeta samting yupela i mekim, yupela i mas mekim long nem bilong Bikpela Jisas.” (Kolosi 3:17) Olsem wanem? Taim ol man i kam long kaikai bilong marit i go bek long haus bilong ol, ol bai tingim olsem musik i kamapim olsem tupela nupela marit i mekim olgeta samting long nem bilong Jisas? I gutpela sapos ol i tingim olsem.

14. Ol Kristen i mas amamas long tingim wanem samting long kaikai bilong marit?

¹⁴ Tru tumas, sapos ol nupela marit i stretim gut ol samting long kaikai bilong marit, ol man bai amamas long tingim dispela. Adam na Edyta, em ol i marit inap 30 yia, ol i stori long wanpela kaikai bilong marit olsem: “Yu inap pilim olsem pasin Kristen i stap. I gat ol singsing i litimapim nem bilong Jehova na sampela narapela gutpela amamas. Ol danis na musik i no bikpela samting. Bung i gutpela na i strongim mipela, na olgeta samting i stret wantaim ol stiatok bilong Baibel.” Tru tumas, man na meri i marit nupela inap mekim planti samting bilong kamapim bilip bilong ol long pasin ol i mekim.

Ol Presen Bilong Marit

15. Yumi ken bihainim wanem tok bilong Baibel long ol samting bilong ol presen bilong marit?

¹⁵ Long planti kantri ol pren na famili i save givim ol presen long man na meri i laik marit. Sapos yu mekim olsem, yu mas tingim wanem samting? Tingim tok bilong aposel Jon long “pasin bilong hambak long mani kago.” Em i tok long dispela pasin olsem em i no samting bilong ol Kristen i kamapim bilip bilong ol long pasin ol i mekim, em i tok dispela pasin i bilong ‘dispela graun i wok long pinis.’ (1 Jon 2:​16, 17, NW) Sapos yumi tingim dispela tok bilong Jon em God i kirapim em long raitim, yu ting i gutpela olsem long ai bilong olgeta manmeri ol nupela marit i kolim nem bilong ol wan wan man i bin givim presen? Ol Kristen long Masedonia na Akaia i bin givim ol samting bilong helpim ol brata long Jerusalem, tasol stori i no kamapim olsem ol i bin kolim nem bilong ol dispela Kristen i bin helpim ol. (Rom 15:26) Planti Kristen em ol i givim presen long ol nupela marit ol i no laik ol narapela i save long ol i givim wanem presen. Long dispela samting i gutpela yu tingim tok bilong Jisas long Matyu 6:​1-4.

16. Long ol samting bilong presen bilong marit, olsem wanem ol nupela marit i ken abrusim pasin bilong bagarapim bel bilong ol narapela?

¹⁶ Sapos ol i kolim nem bilong ol manmeri i bin givim presen, dispela inap “kirapim narapela long resis wantaim narapela,” long husat i givim presen i gutpela moa o i gat bikpela pe moa. Olsem na ol nupela marit Kristen em ol i gat gutpela tingting ol i no kolim nem bilong ol manmeri i givim presen long ol. Sapos ol i kolim nem bilong ol manmeri i givim presen long ol, dispela inap semim ol narapela em ating ol i sot long mani bilong baim presen. (Galesia 5:​26, NW; 6:10) Tru, i no gat rong long meri na man i marit nupela i save long husat i bin givim presen long ol. Ating ol i ken kisim save long dispela long rot bilong wanpela kat i stap long presen, tasol ol i no kolim nem bilong en long ai bilong olgeta manmeri. Taim yumi baim, givim, o kisim wanpela presen bilong marit, yumi olgeta i gat rot long kamapim long ples klia olsem bilip bilong yumi i stiaim ol samting yumi mekim.a

17. Ol Kristen i mas putim wanem mak long bilip na pasin bilong ol?

¹⁷ Bilong kamapim bilip bilong yumi, yumi mas mekim stretpela pasin, go long ol miting Kristen, na insait long wok autim tok. Tasol i no dispela samting tasol. Yumi olgeta i mas i gat strongpela bilip na dispela bilip i mas stiaim olgeta samting yumi mekim. Yes, olgeta pasin bilong yumi, na tu ol samting yumi stori pinis long en, i mas “stret olgeta” long ai bilong God.​​—KTH 3:2.

18. Olsem wanem tok bilong Jon 13:17 i stret long ol weding Kristen na ol bung bilong amamas?

¹⁸ Jisas i makim gutpela pasin ol gutpela aposel bilong em i ken bihainim taim em i mekim pasin daun tru na wasim lek bilong ol, na bihain em i tok: “Nau yupela i save pinis long as tingting bilong dispela pasin mi mekim, na sapos yupela i bihainim gut, orait yupela i ken amamas.” (Jon 13:​4-17) Long hap yumi stap long nau, ating i no pasin bilong ol man long wasim lek bilong narapela man, olsem long wanpela man i kam long haus bilong yumi. Tasol olsem yumi stori long dispela stadi, i gat sampela narapela samting long i stap bilong yumi we yumi ken kamapim bilip bilong yumi long rot bilong ol gutpela pasin yumi mekim, na long ol bung bilong amamas na weding Kristen tu. Yumi ken mekim olsem taim yumi laik marit o ol i singautim yumi long kam long wanpela weding o wanpela kaikai i kamap bihain long en we ol Kristen i amamas long bung na kamapim bilip bilong ol long pasin ol i mekim.

[Futnot]

Bai Yu Bekim Olsem Wanem?

Olsem wanem yu inap kamapim bilip bilong yu

• taim yu stretim rot long wanpela bung bilong amamas?

• taim yu stretim ol samting bilong wanpela weding o kaikai bilong marit?

• taim yu givim o kisim wanpela presen bilong marit?

[Piksa long pes 24]

Maski yu singautim sampela manmeri tasol, larim “gutpela tingting na save i kam long God” i stiaim yu

Mekim De Bilong Yu Long Marit i Kamap Gutpela

GORDON i bin marit klostu 60 yia, na em i tok: “De bilong mi long marit em i wanpela bikpela de long laip bilong mi na i givim bikpela amamas long mi.” Wanem samting i mekim na de bilong marit o weding de i bikpela samting long ol Kristen tru? Em wanpela de we ol i mekim tok promis long man o meri ol i laikim tru​—em poroman marit bilong ol na God Jehova. (Matyu 22:37; Efesus 5:​22-​29) Yes, ol lain i laik marit ol i laik bai de bilong ol long marit i kamap gutpela na i givim biknem long Man em i As bilong marit.​​—Stat 2:​18-​24; Matyu 19:​5, 6.

Man i laik marit i ken mekim wanem na bai de bilong marit i ken kamap gutpela? Meri i laik marit i ken mekim wanem bilong givim biknem long man bilong em na Jehova? Olsem wanem ol lain i kam long bung bilong marit i ken mekim dispela de i kamap gutpela? Pasin bilong skelim sampela stiatok bilong Baibel bai helpim yumi long bekim ol dispela askim, na taim yumi bihainim ol dispela stiatok, dispela bai daunim ol hevi inap kamap na i tekewe amamas bilong dispela spesel de.

Wok Bilong Husat?

Long planti kantri, wanpela Witnes Bilong Jehova i gat namba long wokim marit. Long ol kantri we wanpela majistret bilong gavman i mas wokim marit na bai i stret wantaim lo bilong gavman, long kain ples olsem ating tupela i laik marit bai i gat laik long harim tok bilong marit em Baibel i as bilong en. Dispela tok bai kirapim man i laik marit long tingim wok God i givim em olsem het bilong famili. (1 Korin 11:3) Olsem na em wok bilong man i laik marit long makim wanem ol samting bai kamap long bung bilong marit. Ol i mas stretim ol samting bilong de bilong marit sampela mun paslain long dispela de i kamap. Bilong wanem hevi inap kamap long dispela?

Wanpela as em ating ol wanblut bilong man o meri i laik marit i bosim tumas ol samting bilong de bilong marit. Rodolfo, husat i bin wokim planti marit, em i tok: “Sampela taim man i laik marit i save kisim bikpela hevi long ol famili bilong em, na moa yet sapos ol i helpim em long baim ol samting bilong kaikai bilong marit. Ating ol i strong long wanem ol samting i mas kamap long taim bilong tok bilong marit na long kaikai bilong marit. Dispela inap daunim wok em Baibel i tok long man i marit i mas mekim long dispela de bilong marit.”

Max, em i bin mekim ol tok bilong marit winim 35 yia, em i tok: “Mi lukim olsem ol meri i laik marit i save go pas long makim wanem samting i mas kamap long weding na kaikai bilong marit, na man i laik marit i no save toktok tumas.” David, em tu i bin wokim planti marit, em i tok: “Ating ol man i laik marit i no lain long go pas long mekim ol samting, na ol i no insait tumas long wok bilong redim ol samting bilong weding.” Olsem wanem man i laik marit i ken mekim gut wok bilong em?

Toktok Gut Wantaim

Bilong man i laik marit i ken mekim gut wok bilong em long redim ol samting bilong de bilong marit, em i mas toktok gut wantaim ol narapela. Baibel i tok: “Sapos yu laik mekim sampela wok, orait pastaim yu mas kisim tingting long planti arapela man, . . . Sapos yu no mekim olsem, bai yu hatwok nating.” (Sindaun 15:22) Bai i no gat planti hevi sapos man i laik marit i toktok gut wantaim meri em i laik maritim, na famili bilong tupela, na ol arapela husat inap givim sampela gutpela tok bilong Baibel long em.

Tru tumas, em i bikpela samting long man na meri i laik marit i toktok wantaim long ol samting ol i laik mekim. Bilong wanem? Tingim tok bilong Ivan na meri bilong em, Delwyn, em tupela i bin marit inap planti yia nau, tasol ol i bilong narapela narapela kantri. Ivan i tingim bek taim ol i bin redim ol samting bilong weding, na em i tok: “Mi save long wanem kain weding mi laikim, olgeta pren bilong mi bai kam long kaikai bilong marit, bai i gat weding kek, na meri mi laik maritim bai werim wanpela waitpela weding dres. Tasol Delwyn i laikim wanpela weding i no gat planti bilaspasin long en, na em i no laikim weding kek. Na em i no tingting long werim wanpela weding dres.”

Olsem wanem tupela i stretim ol dispela samting na kamap wanbel? Tupela i toktok gut wantaim long gutpela pasin. (Sindaun 12:18) Ivan i tok: “Mitupela i skelim ol stori bilong Baibel i stap long ol Wastaua i stori long ol weding, kain olsem i stap long Wastaua bilong Janueri 1, 1985.a Dispela Wastaua i bin helpim mipela long kisim tingting bilong God long de bilong marit. Mitupela i bilong narapela narapela hap, olsem na mipela i redi long lusim sampela laik bilong mipela yet bambai mipela inap wanbel long ol samting.”

Aret na Penny i bihainim wankain pasin. Aret i stori long weding de bilong tupela, olsem: “Mitupela Penny i gat narapela narapela laik long ol samting i mas kamap long weding de bilong mitupela, olsem na mitupela i toktok gut wantaim na wanbel long wanem ol samting bai kamap. Mipela i beten long Jehova i ken blesim dispela de. Na tu, mi toktok wantaim papamama bilong mipela na sampela arapela marit long kongrigesen long givim mi sampela gutpela tingting. Tok bilong ol i helpim mi tru. Dispela i mekim na weding bilong mipela i kamap gutpela tru.”

Bihainim Stretpela Pasin Long Klos na Bilas

I stret man na meri i laik marit i laik bilas gut long de bilong ol long marit. (Song 45:​8-​15) Ating ol bai lusim taim, strong, na mani long baim ol klos i stret long werim. Wanem ol stiatok bilong Baibel inap helpim ol long makim ol klos i stret na i luk nais?

Tingim wanem kain klos meri i laik marit i save werim long de bilong marit. Tru, olgeta wan wan i gat laik bilong ol yet long bilas, na stail bilong bilas bilong wan wan kantri i narapela narapela, tasol tok bilong Baibel i stret long olgeta hap. Ol meri i mas “putim ol gutpela klos samting, inap tasol long ol.” Olgeta meri Kristen i mas bihainim dispela tok long olgeta taim na long de bilong marit tu. Bilong de bilong marit i ken kamap gutpela, dispela i no makim olsem man na meri i mas pasim “ol klos i dia tumas, nogat.” (1 Timoti 2:9; 1 Pita 3:​3, 4) Gutpela samting i save kamap long pasin bilong bihainim dispela tok!

David, em pastaim yumi stori long em, i tok: “Planti lain i laik marit i save bihainim ol stiatok bilong Baibel, na i stret yumi tok amamas long ol. Tasol sampela taim ol meri i laik marit na ol meri i save sanap wantaim ol long taim bilong marit, ol i save werim dres i no stret, ol dres i kam daun tumas long bros na i no karamapim gut skin.” Long taim wanpela elda Kristen i bung wantaim man na meri i laik marit, em i save toktok wantaim tupela na helpim ol long kisim tingting bilong God long de bilong marit. Olsem wanem em i save mekim olsem? Em i save askim ol sapos klos ol i laik werim bai i stret long werim long taim bilong ol miting Kristen. Tru, stail bilong bilas ol i pasim long taim bilong marit bai i narapela kain long klos ol i save werim long ol miting. Ating klos ol i werim long de bilong marit em stail bilong ples bilong ol, tasol ol i mas werim klos i stret wantaim lo Kristen. Maski ol man bilong graun i ting olsem lo bilong Baibel i pasim man tumas, ol trupela Kristen bai i no larim pasin bilong dispela graun i pulim ol.​​—Rom 12:2; 1 Pita 4:4.

Penny i tok: “Bilas na kaikai samting i no bikpela samting tumas long mitupela. Bikpela samting long mitupela Aret, em tok bilong Baibel i kamap long marit bilong mitupela. Em i nambawan bikpela samting bilong dispela de. Ol gutpela samting mi tingim long dispela de, em i no klos mi werim o kaikai mi kisim, nogat, mi tingim ol lain i bung wantaim mi long dispela de na amamas mi kisim long maritim man mi laikim tumas.” Tupela Kristen i laik marit i mas tingim ol dispela samting taim ol i wok long redim ol samting bilong marit.

Haus Kingdom​—Gutpela Ples Bilong Marit

Planti Kristen i laik bai marit bilong ol i kamap long Haus Kingdom sapos i gat Haus Kingdom. Bilong wanem ol i laik mekim olsem? Wanpela man na meri i laik marit i tok: “Mitupela i save olsem marit em i samting holi long ai bilong Jehova. Mitupela i marit long Haus Kingdom​—em ples mipela i save lotu​—na dispela i helpim mitupela long save olsem kirap long dispela taim na i go Jehova i mas i stap insait long marit bilong mitupela. Narapela gutpela samting tu i kamap taim mipela i marit long Haus Kingdom na i no long narapela hap, em ol wanblut husat i no wanbilip bilong mipela ol inap luksave olsem lotu bilong Jehova em i bikpela samting long mipela.”

Sapos ol elda i tok orait long wokim marit long Haus Kingdom, orait ol lain i laik marit i mas toksave pastaim long ol elda long ol samting ol i laik mekim long Haus Kingdom. Wanpela rot man na meri i laik marit inap soim olsem ol i rispek long ol lain ol i singautim i kam long marit, em tupela i mas kam long taim stret ol i makim bilong marit. Na ol i laik bai olgeta samting i kamap long gutpela pasin.b (1 Korin 14:40) Ol i no laik bihainim ol narakain bilaspasin i kamapim pasin bilong dispela graun.​​—1 Jon 2:​15, 16.

Ol lain i go long bung bilong marit ol tu inap soim olsem ol i gat wankain tingting olsem bilong Jehova long marit. Olsem, ol i no ken ting olsem bung bilong marit ol i go long en i mas winim ol narapela, kain olsem i gat resis long weding bilong husat i win. Ol strongpela Kristen i luksave olsem em i bikpela samting long go na harim tok bilong marit em Baibel i as bilong en long Haus Kingdom, winim bung bilong kaikai bilong marit inap kamap bihain long en. Sapos sampela samting i kamap o Kristen i no gat taim bilong i go long tupela bung wantaim, orait i gutpela moa em i go long Haus Kingdom. Wanpela elda nem bilong em William i tok: “Sapos ol lain tupela i singautim i kam long marit bilong ol i no kam harim tok bilong marit tasol ol i go long kaikai bilong marit, dispela i soim olsem ol i no tingim dispela bung i samting holi. Maski sapos ol i no singautim yumi i go long kaikai bilong marit, yumi inap soim olsem yumi amamas long tupela taim yumi go na harim tok bilong marit i kamap long Haus Kingdom, na dispela i gutpela rot bilong autim tok long ol wanblut i no wanbilip.”

Amamas i Stap Yet Bihain Long De Bilong Marit

Ol kampani i wokim bikpela bisnis long ol samting bilong marit. Wanpela ripot i tok, mani ol lain long Amerika i save tromoi bilong wokim weding, em inap olsem “K60,000 samting, em olsem 50 pesen bilong mani em wanpela famili long Amerika i save kisim long wok mani insait long wanpela yia.” Ol bisnis i kamapim kain kain samting, na dispela i mekim na planti nupela marit na ol famili bilong ol i kisim bikpela dinau bilong baim ol samting bilong de bilong marit, na inap planti yia ol i mas traim long bekim dispela dinau. Yu ting dispela em i gutpela rot long bihainim taim wanpela i laik marit? Ol lain i no save long ol stiatok bilong Baibel ating ol bai bihainim kain pasin olsem, tasol ol Kristen tru i no save mekim olsem!

Planti Kristen i no save wokim bikpela bung bilong marit. Ol i no singautim planti man tumas na ol i tingim hamas mani ol inap tromoi. Ol i tingim moa laik na tingting bilong Jehova long bung bilong marit. Long dispela rot ol i mekim gut wok long taim na mani bilong ol olsem i stret wantaim dediket bilong ol long God. (Matyu 6:​33) Tingim Lloyd na Alexandra, ol i marit 17 yia i go pinis na ol i bin mekim fultaim sevis insait long ol dispela yia. Lloyd i tok: “Ating sampela i ting olsem bung bilong marit bilong mipela i no gat planti kain kain samting long en, tasol mitupela Alexandra i amamas tru long en. Mipela i pilim olsem weding de bilong mipela i no ken putim hevi bilong mani long mipela, nogat, mipela i laik bai dispela de em de bilong amamas long rot Jehova i putim bilong givim amamas long tupela man na meri.”

Alexandra i tok: “Mi bin mekim wok painia paslain long mipela i marit, na mi no laik lusim dispela gutpela wok na bai weding bilong mi i gat planti kain kain samting long en, nogat. De bilong mipela long marit em i wanpela spesel de tru long mipela. Tasol em i kirap tasol bilong laip bilong mitupela long i stap wantaim. Mipela i abrusim pasin bilong tingim tumas de bilong marit, na mipela i askim Jehova long stiaim marit bilong mipela. Dispela i mekim na Jehova i blesim mipela.”c

Yes, de bilong yu long marit em i wanpela bikpela de. Tingting na ol samting yutupela i mekim long dispela de bai makim ol samting yutupela bai mekim bihain long marit bilong yupela. Olsem na larim Jehova i stiaim yutupela. (Sindaun 3:​5, 6) Tingim ol samting Jehova i ting i bikpela samting long de bilong marit. Helpim narapela narapela long mekim wok God i bin makim bilong yutupela. Long dispela rot as bilong marit bilong yutupela bai strong, na long rot bilong blesing Jehova i givim, yutupela bai stap amamas i go longpela taim bihain long de bilong marit.​​—Sindaun 18:22.

[Ol Futnot]

[Piksa long pes 29]

Tupela i mas toktok gut wantaim long pasin rispek taim ol i redim ol samting bilong marit

[Piksa long pes 31]

Tingim ol samting Jehova i ting i bikpela samting long de bilong marit