-
Ol Hevi I Mekim na Yumi Wetim Gutpela SamtingWastaua—2011 | Me 1
-
-
Ol Hevi I Mekim na Yumi Wetim Gutpela Samting
“Long taim bilong las de, taim nogut bai kamap na dispela bai givim hatwok long ol man.”—2 TIMOTI 3:1.
OLSEM WANEM? Yu harim pinis—o yu lukim pinis—wanpela bilong ol dispela hevi?
● Wanpela sik nogut i kilim i dai planti man.
● Bikpela hangre i kilim i dai planti handret man.
● Bikpela guria i kilim i dai planti tausen man na planti i no gat haus moa.
Long ol pes i kamap bihain long dispela, bai yu skelim ol bikpela bagarap ol dispela hevi i bin kamapim. Bai yu kisim save tu olsem Baibel i tok profet long ol dispela samting bai kamap long wanpela haptaim em Baibel i kolim “taim bilong las de.”a
Tasol wok bilong ol dispela atikol i no bilong strongim bilip bilong yu olsem nau yumi stap long taim nogut, nogat. Ating yu yet i lukim ol dispela hevi. Ol dispela atikol i bilong helpim yu long wetim gutpela samting bai kamap bihain. Ol bai soim olsem truim bilong dispela 6-pela tok profet i makim olsem klostu nau dispela “taim bilong las de” bai pinis. Ol dispela atikol bai stori long tingting bilong planti man long ol samting i wok long kamap, na i stori long as na yumi ken bilip olsem klostu nau gutpela samting bai kamap.
[Futnot]
a Bilong kisim save long as na God i larim ol dispela hevi i stap, lukim atikol “Bilong Wanem God i Larim Pasin Nogut na Pen na Hevi i Stap?” long pes 16 na 17 bilong dispela nius.
-
-
Tok Profet 1. Ol Bikpela GuriaWastaua—2011 | Me 1
-
-
Tok Profet 1. Ol Bikpela Guria
“Bai i gat ol bikpela guria.”—LUK 21:11.
● Winnie, em i gat wan na hap krismas, na ol i rausim em long ol hip pipia bilong ol haus i bagarap long bikpela guria i kamap long Haiti. Wanpela lain ripota bilong TV i bin harim liklik krai bilong em. Em i abrusim bagarap bilong guria, tasol papamama bilong em i dai.
WANEM SAMTING I WOK LONG KAMAP? Long Janueri 2010, bikpela guria, strong bilong en 7.0, i bin kamap long Haiti na kilim i dai winim 300,000 manmeri. Na tu, haus bilong 1.3 milion manmeri i bagarap na ol i no gat haus moa. Tru, dispela guria long Haiti i bin kamapim bikpela bagarap tru, tasol i gat planti guria moa i kamap. Long Epril 2009 i go inap long Epril 2010, i gat olsem 18 bikpela guria i bin kamap long olgeta hap bilong graun.
PLANTI MAN I GAT WANEM TINGTING? I no olsem i gat planti guria moa long nau; tasol long nau i gat ol nupela masin samting, olsem na yumi save long ol guria i wok long kamap long olgeta hap, winim long bipo.
YU TING DISPELA TINGTING I STRET? Tingim dispela samting: Baibel i no tokaut long hamas guria bai kamap long taim bilong las de. Tasol Baibel i tok long “ol bikpela guria” bai kamap long “narapela narapela hap,” na dispela i mekim na ol man bai luksave long dispela haptaim nau yumi stap long en.—Mak 13:8; Luk 21:11.
YU GAT WANEM TINGTING? Yu lukim ol bikpela guria olsem Baibel i tok profet long en?
Ol guria tasol i no makim olsem yumi stap long taim bilong las de, nogat. Tasol em wanpela bilong ol tok profet yumi lukim truim bilong en. Skelim namba tu samting.
[Bikpela Tok Long Pes 4]
“Mipela [ol saientis] i kolim olsem ol bikpela guria. Olgeta narapela manmeri i kolim olsem samting nogut tru.”—KEN HUDNUT, U.S. GEOLOGICAL SURVEY.
[Picture Credit Line on page 4]
© William Daniels/Panos Pictures
-
-
Tok Profet 2. Ol Bikpela HangreWastaua—2011 | Me 1
-
-
Tok Profet 2. Ol Bikpela Hangre
“Bai i gat taim bilong ol bikpela hangre.”—MAK 13:8.
● Wanpela man i kam sindaun long Quaratadji, wanpela viles long Naija, bilong painim kaikai. Ol brata na susa na ol kasen bilong dispela man tu, ol i lusim ol liklik ples i stap longwe na ol i kam bilong painim kaikai. Tasol dispela man i slip wanpis long wanpela mat long graun. Bilong wanem em i stap wanpis? Sidi, em hetman bilong ples, i tok: “Em i no inap givim kaikai [long famili bilong em] na em i sem long dispela.”
WANEM SAMTING I WOK LONG KAMAP? Long olgeta hap bilong graun, klostu 1-pela long olgeta 7-pela 7-pela man i no gat inap kaikai long olgeta de. Long ol kantri long hap saut bilong Sahara long Afrika, dispela hevi i bikpela moa, 1-pela long olgeta 3-pela 3-pela man i stap hangre long olgeta taim. Bilong kliagut long dispela, tingim wanpela famili i gat papa, mama, na wanpela bebi. Sapos i gat kaikai inap long 2-pela tasol, orait husat bilong ol bai i stap hangre? Papa? mama? o bebi? Planti famili i mas mekim kain disisen olsem long olgeta de.
PLANTI MAN I GAT WANEM TINGTING? Graun i kamapim planti kaikai inap long olgeta man i ken kisim. Tasol ol man i mas tilim gut kaikai em graun i kamapim.
YU TING DISPELA TINGTING I STRET? Em i tru olsem ol fama inap kamapim na trenspotim planti kaikai, winim olgeta taim bipo. I gutpela sapos ol gavman i tilim gut ol kaikai bambai ol inap pinisim hangre. Inap planti yia ol i traim pinis long mekim olsem, tasol ol i no inap.
YU GAT WANEM TINGTING? Yu ting tok bilong Mak 13:8 i kamap tru? Maski ol man i bin wokim olkain masin samting, yu ting ol man long olgeta hap i sot yet long kaikai?
Planti taim ol bikpela guria na hangre i kamap paslain long wanpela hevi i stap olsem mak bilong las de.
[Bikpela Tok Long Pes 5]
“Winim 30 pesen bilong ol pikinini i dai long numonia, pekpek wara, na sampela narapela sik, ol inap i stap laip sapos ol i no sot tru long kaikai.”—ANN M. VENEMAN, BIPO EM DAIREKTA BILONG LAIN UN CHILDREN’S FUND
[Picture Credit Line on page 5]
© Paul Lowe/Panos Pictures
-
-
Tok Profet 3. Ol Bikpela SikWastaua—2011 | Me 1
-
-
Tok Profet 3. Ol Bikpela Sik
“Bai i gat ol bikpela sik.”—LUK 21:11.
● Bonzali, wanpela helt ofisa long wanpela kantri long Afrika we i gat woa long en, em i givim marasin samting bilong helpim ol man i wok long main long taun bilong em. Ol dispela man i wok long dai long sik Marburg.a Em i askim sampela ofisa long biktaun long helpim ol, tasol i no gat wanpela samting i kamap. Inap 4-pela mun bihain, ol i kisim helpim, tasol Bonzali i dai pinis. Em i kisim sik Marburg long ol dispela man taim em i bin traim long helpim ol.
WANEM SAMTING I WOK LONG KAMAP? Ol sik olsem numonia, pekpek wara, HIV/AIDS, TB, na malaria em sampela bilong ol sik nogut tru i save kilim i dai planti man. Long ol yia i go pinis, dispela 5-pela sik i bin kilim i dai 10.7 milion manmeri. Yumi ken tok olsem long yia olgeta, ol dispela sik i bin kilim i dai 1-pela man insait long olgeta 3-pela 3-pela seken.
PLANTI MAN I GAT WANEM TINGTING? Namba bilong ol manmeri i wok long go planti tru, olsem na i gat planti sik, winim long bipo. I gat planti man moa i ken kisim sik.
YU TING DISPELA TINGTING I STRET? I gat planti manmeri moa long olgeta hap. Tasol tu, save bilong ol man long painimaut, kontrolim, na stretim sik, dispela i go bikpela moa. Olsem na ating i stret yumi ken ting ol sik i no ken bagarapim tumas ol man. Tasol planti man moa i dai long ol sik.
YU GAT WANEM TINGTING? Yu ting olkain sik nogut i save bagarapim ol man olsem Baibel i bin tok profet long en?
Ol bikpela guria, hangre, na sik i save bagarapim planti milion manmeri. Na planti milion manmeri moa i save kisim bagarap long han bilong ol narapela man—planti bilong ol dispela man i kisim bagarap long han bilong ol man i gat wok long lukautim ol. Tingim samting Baibel i tok profet long em bai kamap.
[Futnot]
a Vairas i kamapim sik Marburg i wankain liklik olsem vairas bilong sik Ebola.
[Bikpela Tok Long Pes 6]
“Em nogut sapos wanpela laion samting i bagarapim yu, tasol sapos binatang bilong sik i bagarapim yu em samting i nogut moa, na yumi lukim dispela long olgeta taim.”—DOKTA MICHAEL OSTERHOLM.
[Picture Credit Line on page 6]
© William Daniels/Panos Pictures
-
-
Tok Profet 4. No Gat Pasin LaikimWastaua—2011 | Me 1
-
-
Tok Profet 4. No Gat Pasin Laikim
“Ol bai i no gat pasin bilong laikim ol wanfamili.”—2 TIMOTI 3:1-3.
● Chris i sindaun long North Wales, na em i wok wantaim wanpela lain i save helpim ol manmeri i kisim bagarap insait long famili. Chris i tok: “Mi tingim yet wanpela meri i kam, pes bilong em i solap tru na mi no luksave long em. Na sampela narapela meri i kisim bikpela bagarap long bel na tingting, na ol i save sem tru na daunim het tasol.”
WANEM SAMTING I WOK LONG KAMAP? Long wanpela kantri long Afrika, ol man i bin mekim pasin sem long 1-pela bilong olgeta 3-pela 3-pela meri taim ol meri i liklik yet. Wanpela wok painimaut long dispela kantri i soim olsem winim 30 pesen bilong ol man i ting i orait long paitim meri bilong ol. Tasol i no ol meri tasol i kisim bagarap long han bilong ol man, nogat. Olsem: Long Kanada, klostu 3-pela long olgeta 10-pela 10-pela man, meri bilong ol i bin paitim ol o mekim nogut long ol.
PLANTI MAN I GAT WANEM TINGTING? Pasin bilong kros pait i bin stap insait long famili long bipo yet na i kam inap long nau. Tasol long nau ol manmeri i tokaut moa long dispela hevi, winim long bipo.
YU TING DISPELA TINGTING I STRET? Long nau, ol man i save tokaut moa long ol pasin bilong kros pait insait long famili. Tasol olsem wanem? Dispela i daunim hevi bilong kros pait insait long famili? Nogat, i no olsem. Pasin bilong i no laikim ol wanfamili i go bikpela moa.
YU GAT WANEM TINGTING? Yu ting tok bilong 2 Timoti 3:1-3 i wok long kamap tru long nau? Planti man long nau i no gat pasin bilong laikim wanfamili, em samting i mas kirap long bel na i no hatwok long mekim.
Ol samting i kamap long graun long nau i insait long namba 5 tok profet yu lukim truim bilong en long nau. Skelim tok Baibel i mekim long dispela samting.
[Bikpela Tok Long Pes 7]
“Pasin bilong kros pait insait long famili em wanpela hevi planti man i no save ripotim. Planti taim man i save paitim meri inap 35 taim samting na nau meri i kamapim long polis.”—MAUSMERI BILONG LAIN WALES DOMESTIC ABUSE HELPLINE.
-
-
Tok Profet 5. Bagarapim GraunWastaua—2011 | Me 1
-
-
Tok Profet 5. Bagarapim Graun
“[God bai] bagarapim ol man i wok long bagarapim graun.”—REVELESEN 11:18.
● Mista Pirri i wok long kisim wara bilong diwai pam long Kpor, Naijiria. Bisnis bilong em i bagarap, long wanem, planti oil tru i bin kapsait long hap bilong wara Niger. Em i tok: “Oil i kilim ol pis, bagarapim skin bilong mipela, na bagarapim ol wara. Mi no gat rot moa bilong lukautim famili.”
WANEM SAMTING I WOK LONG KAMAP? Sampela saveman i tok, inap 6.5 milion ton pipia i save go insait long ol solwara long olgeta yia. Inap 50 pesen bilong ol dispela pipia em ol plastik na em bai drip long solwara inap planti handret yia paslain long em i bagarap. Ol man i save bagarapim na pinisim hariap tru ol samting bilong graun. Ol wok painimaut i soim olsem wan na hap yia i mas lus bambai graun yet i ken stretim bek ol samting bilong en em ol man i yusim insait long wanpela yia. Niuspepa Sydney Morning Herald bilong Australia, i tok: “Sapos namba bilong ol manmeri i wok long go antap olsem long nau na ol i yusim ol samting bilong graun olsem ol i save mekim long nau, orait long yia 2035 bai yumi nidim tupela graun bilong olgeta manmeri i ken stap laip.”
PLANTI MAN I GAT WANEM TINGTING? Ol manmeri i gat save long mekim ol samting. Yumi inap stretim bek ol dispela hevi na lukautim graun.
YU TING DISPELA TINGTING I STRET? Planti manmeri na planti lain i bin tokaut long ol samting bilong lukautim graun. Tasol ol manmeri long olgeta hap i wok yet long bagarapim graun.
YU GAT WANEM TINGTING? Yu ting God i mas mekim wanpela samting bambai ol man i no ken bagarapim graun—olsem em i bin tok promis long mekim?
Nau yumi stori pinis long 5-pela samting em Baibel i tok profet long en; tasol Baibel i tok profet tu long sampela gutpela samting bai kamap long las de. Tingim wanpela samting long namba 6 tok profet.
[Bikpela Tok Long Pes 8]
“Mi pilim olsem bipo mi gat wanpela gutpela ples paradais, tasol nau oil i bagarapim tru dispela ples.”—ERIN TAMBER, MAN I SINDAUN LONG GULF COAST, AMERIKA, I STORI OLSEM LONG BAGARAP BILONG OIL I KAPSAIT LONG 2010 LONG GULF OF MEXICO.
[Blok Long Pes 8]
Yu Ting God i Gat Asua?
Baibel i tok profet long ol pasin nogut yumi lukim long nau, olsem na yu ting dispela i makim olsem God i gat asua long ol dispela samting? Yu ting em i mekim na yumi karim pen na hevi? Yu inap kisim gutpela bekim bilong ol dispela askim long sapta 11 bilong buk Tru Tru Baibel i Tok Wanem?, em ol Witnes Bilong Jehova i wokim.
[Picture Credit Line on page 8]
U.S. Coast Guard photo
-
-
Tok Profet 6. Autim Tok Long Olgeta hapWastaua—2011 | Me 1
-
-
Tok Profet 6. Autim Tok Long Olgeta hap
“Ol bai autim dispela gutnius bilong Kingdom long olgeta hap bilong graun.”—MATYU 24:14.
● Vaiatea i sindaun long wanpela liklik ailan Pasifik long lain ailan bilong Tuamotu. Ol ailan Tuamotu i gat olsem 80 liklik ailan na i karamapim inap 802,900 skwe kilomita, tasol maski em bikpela hap olsem, i gat 16,000 manmeri tasol i sindaun long ol dispela ailan. Ol Witnes Bilong Jehova i bin autim tok long Vaiatea na ol neiba bilong em. Bilong wanem ol i mekim olsem? Long wanem, ol Witnes i laik autim gutnius bilong Kingdom long olgeta manmeri—maski ol i sindaun long wanem wanem hap.
WANEM SAMTING I WOK LONG KAMAP? Tok bilong Kingdom i go long olgeta hap bilong graun. Long 2010, ol Witnes Bilong Jehova i lusim 1.6 bilion aua bilong autim gutnius long 236 kantri. Dispela i olsem olgeta wan wan Witnes i lusim 30 minit long autim tok long olgeta wan wan de. Insait long 10-pela yia i go pinis, ol i bin wokim na tilim olsem 20 bilion buk na nius bilong Baibel.
PLANTI MAN I GAT WANEM TINGTING? Inap planti tausen yia ol man i bin autim tok bilong Baibel.
YU TING DISPELA TINGTING I STRET? Tru, planti i bin autim sampela tok bilong Baibel. Tasol planti i bin mekim olsem inap liklik haptaim na long sampela hap tasol. Ol Witnes Bilong Jehova i stretim gut ol samting na autim tok long planti milion manmeri long olgeta hap bilong graun. Ol Witnes i wok strong long autim tok, maski sampela strongpela oganaisesen bilong graun i bin birua tru long ol.a (Mak 13:13) Na tu, ol Witnes Bilong Jehova i no kisim pe long mekim wok autim tok. Tasol ol i redi long givim taim bilong ol yet, na ol i tilim ol buk na nius i no gat pe. Ol man i save givim mani long laik bilong ol yet bilong helpim wok bilong ol.
YU GAT WANEM TINGTING? Yu ting ol i autim “gutnius bilong Kingdom” long olgeta hap bilong graun? Truim bilong dispela tok profet i makim olsem klostu nau gutpela samting bai kamap?
[Futnot]
a Bilong kisim sampela save moa, lukim dispela 3-pela vidio “Faithful Under Trials,” “Purple Triangles,” na “Jehovah’s Witnesses Stand Firm Against Nazi Assault,” em ol Witnes Bilong Jehova i tilim long ol man.
[Bikpela Tok Long Pes 9]
“I go inap long taim Jehova yet i makim, mipela bai givim bel olgeta na painim kain kain rot long autim gutnius bilong Kingdom long olgeta manmeri.”—2010 YEARBOOK OF JEHOVAH’S WITNESSES.
-
-
Gutaim Tru Klostu Nau Bai Kamap!Wastaua—2011 | Me 1
-
-
Gutaim Tru Klostu Nau Bai Kamap!
“I no longtaim na bai ol man nogut i lus olgeta. . . . Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”—SONG 37:10, 11.
YU LAIK lukim truim bilong dispela tok profet? Ating yu laik lukim, a? I gat as tru na yu ken bilip olsem dispela tok profet klostu nau bai kamap tru.
Ol atikol i kamap paslain long dispela i stori long sampela tok profet bilong Baibel i kamapim klia olsem yumi stap long “taim bilong las de.” (2 Timoti 3:1-5) God i kirapim ol man bilong raitim Baibel long tok profet long ol dispela samting bai kamap bambai yumi ken bilip na wetim gutpela samting bai kamap bihain. (Rom 15:4) Truim bilong ol dispela tok profet i makim olsem klostu ol hevi bilong nau bai pinis.
Wanem samting bai kamap bihain long taim bilong las de? Kingdom Bilong God bai bosim olgeta manmeri. (Matyu 6:9) Tingim tok Baibel i mekim long ol gutpela samting bai kamap long graun long dispela taim:
● Bai i no gat moa hangre. “Planti rais na wit samting i ken kamap long ol gaden bilong ol manmeri.”—Song 72:16.
● Bai i no gat moa sik. ‘I no gat man bai i tok olsem, “Mi gat sik.”’—Aisaia 33:24.
● Graun bai kamap gutpela gen. “Ples wesan nating wantaim ples drai bai ol i amamas tru, long wanem, ol naispela plaua bai i kamap na karamapim ol dispela hap.”—Aisaia 35:1.
Dispela em sampela gutpela tok profet bilong Baibel klostu nau bai kamap tru. I gutpela yu askim ol Witnes Bilong Jehova long soim yu long as na ol i bilip strong olsem klostu nau gutaim tru bai kamap.
-