-
Planti Man i Hatwok Long Laikim GodWastaua—2013 | Novemba 1
-
-
FRAN PES STORI | OL TOK GIAMAN OLSEM GOD I NO GAT PASIN LAIKIM
Planti Man i Hatwok Long Laikim God
“‘Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu.’ Dispela em namba 1 lo na i winim ol arapela lo.”—Jisas Krais, 33 C.E.a
Sampela man i hatwok long laikim God. Ol i ting God i stap longwe tru, na em i man nogut. Skelim tok sampela i mekim:
“Mi beten long God i ken helpim mi, tasol long wankain taim mi pilim olsem em i stap longwe tru. Mi ting God em wanpela samting nating i no gat filings.”—Marco, Itali.
“Maski mi gat laik tru long mekim wok bilong God, mi pilim olsem em i stap longwe tru. Mi ting God i gat hatpela pasin na em i save givim strafe tasol long yumi. Mi no ting em i gat pasin bilong tingim na sori long ol man.”—Rosa, Guatemala.
“Taim mi liklik, mi bilip olsem God i save painim ol rong bilong yumi na em i redi long strafim yumi long ol dispela rong. Bihain, mi ting em i stap longwe tru long yumi. God i olsem wanpela praim minista husat i save stretim hevi bilong ol manmeri bilong em, tasol em i no tingting tru long helpim ol.”—Raymonde, Kanada.
Yu ting wanem? God i no gat pasin laikim? Ol Kristen i bin mekim dispela askim inap planti handret yia. Namel long yia 500 i go inap 1500 samting, planti lain bilong lotu Kristendom i no save beten long God i Gat Olgeta Strong. Bilong wanem? Long wanem, ol man i pret nogut tru long God. Saveman Will Durant i tok: “Olsem wanem wanpela sinman nating inap beten long wanpela God i gat ol pasin nogut na em i stap longwe tru?”
Hau na ol man i kisim tingting olsem “God i gat ol pasin nogut na em i stap longwe tru”? Tru tru Baibel i tok wanem long God? Sapos yu kisim stretpela save long God, yu ting dispela inap helpim yu long laikim em?
-
-
Tok Giaman Olsem God i No Gat NemWastaua—2013 | Novemba 1
-
-
FRAN PES STORI | OL TOK GIAMAN OLSEM GOD I NO GAT PASIN LAIKIM
Tok Giaman Olsem God i No Gat Nem
TINGTING PLANTI MAN I GAT
“Mipela i no kamap yet long wanpela tingting olsem God i gat nem bilong em yet o nogat, na sapos em i gat nem, orait wanem dispela nem.”—Profesa David Cunningham, Theological Studies.
TOK I TRU BILONG BAIBEL
God i tok: “Mi Jehova. Dispela em nem bilong mi.” (Aisaia 42:8, NW) Jehova em nem Hibru, mining bilong en “Em i Mekim i Kamap.”—Stat 2:4, NW, futnot.
Jehova i laik yumi yusim nem bilong em. Baibel i tok: “Kolim nem bilong Bikpela. . . . Tokaut long olgeta lain manmeri long ol bikpela wok em i bin mekim, na tokim ol long em i gat biknem.”—Aisaia 12:4.
Jisas i bin yusim nem bilong God. Long beten, Jisas i tokim Jehova: “Mi bin kamapim nem bilong yu long ol [ol disaipel bilong Jisas] na mi bai kamapim moa yet.” Bilong wanem Jisas i kamapim nem bilong God long ol disaipel bilong em? Em i tok moa: “Bai ol i ken kamapim pasin bilong laikim ol arapela olsem yu [God] bin laikim mi, na bai mi ken pas wantaim ol.”—Jon 17:26.
AS NA EM I BIKPELA SAMTING
Walter Lowrie, em wanpela tisa bilong lotu, i tok: “Man i no save long nem bilong God em i no save long God i husat tru na wanem ol pasin bilong em, na em i no inap laikim God sapos em i ting God em wanpela strong tasol.”
Haitim nem bilong God o putim ol biknem long ples bilong en i olsem ol i katim na rausim dispela nem long Baibel
Victor, em man bilong go long lotu long olgeta wik, tasol em i pilim olsem em i no save gut long God. Em i tok: “Bihain mi kisim save olsem nem bilong God em Jehova, na i kain olsem nau em i fes taim em yet i tokaut long mi long em i husat tru. Mi pilim olsem nau mi bungim Man em mi bin harim planti stori bilong em. Mi tingim em olsem wanpela Man i stap tru na mi kisim pasin bilong pas gut wantaim em.”
Na Jehova i save go klostu long ol man husat i yusim nem bilong em. Long ol manmeri husat i save “tingting long em [“nem bilong em,” NW] oltaim,” God i tok promis long ol olsem: “Bai mi marimari long ol olsem wanpela papa i save marimari long pikinini i mekim wok bilong papa.” (Malakai 3:16, 17) Na tu, God i save givim gutpela pe long ol man i singaut long nem bilong em. Baibel i tok: “Olgeta manmeri i singaut long nem bilong Jehova, em bai kisim bek ol.”—Rom 10:13.
-
-
Tok Giaman Olsem i Hatwok Long Save Gut Long GodWastaua—2013 | Novemba 1
-
-
FRAN PES STORI | OL TOK GIAMAN OLSEM GOD I NO GAT PASIN LAIKIM
Tok Giaman Olsem i Hatwok Long Save Gut Long God
TINGTING PLANTI MAN I GAT
“Tripela bikpela lotu Kristen em Misin Katolik, Isten Otodoks, na Protestan ol i bilip olsem i gat wanpela God insait long tripela Man: God Papa, God Pikinini, na God Holi Spirit. Long ol bilip Kristen, dispela tok i no makim olsem i gat tripela god, tasol dispela tripela man ol i wanpela god.”—The New Encyclopædia Britannica.
TOK I TRU BILONG BAIBEL
I no gat wanpela taim Jisas, em Pikinini Bilong God, i bin tok olsem em yet i God wankain olsem Papa bilong em. Tasol em i tok: “Mi go long Papa, long wanem, Papa i winim mi.” (Jon 14:28) Na tu, em i bin tokim wanpela disaipel bilong em olsem: “Mi bai go antap long Papa bilong mi na Papa bilong yupela na God bilong mi na God bilong yupela.”—Jon 20:17.
Holi spirit i no wanpela man. Baibel i tok ‘holi spirit i pulap long ol’ Kristen bilong pastaim, na Jehova i tok: “Bai mi kapsaitim spirit bilong mi long olgeta kain man.” (Aposel 2:1-4, 17) Holi spirit em i no wanpela hap bilong God Triwan, nogat. Em i strong bilong God.
AS NA EM I BIKPELA SAMTING
Ol saveman bilong Misin Katolik, em Karl Rahner na Herbert Vorgrimler, i tok God Triwan “em wanpela samting ol man i no inap kliagut long en sapos ol i no kamapim insait bilong en, na maski sapos ol i kamapim insait bilong dispela bilip, ol man i no inap kliagut olgeta long en.” Yu ting yu inap laikim wanpela man em yu hatwok long save long em o kliagut long ol pasin bilong em? Olsem tasol, dispela bilip giaman bilong God Triwan i pasim rot bilong ol man long save long God na laikim em.
Marco, em atikol paslain long dispela i stori long em, i tok bilip bilong God Triwan i pasim em long save gut long God. Em i tok: “Mi ting God i haitim em yet long mi na dispela i mekim mi pilim olsem em i stap longwe tru, na i hatwok long save gut long em, na go klostu long em.” Tasol God “i no save mekim ol samting i paul nabaut.” (1 Korin 14:33) Em i no haitim em yet long yumi. God i laik bai yumi save long em. Jisas i tok: “Mipela i save lotu long samting mipela i save long en.”—Jon 4:22.
Marco i tok: “Taim mi kisim save olsem God i no hap bilong wanpela God Triwan, dispela i helpim mi long kamap pren bilong em.” Sapos yumi tingim Jehova olsem wanpela Man tru na em i no wanpela Man em yumi hatwok long save long em, em bai isi moa long yumi laikim em. Baibel i tok: “Man i no mekim pasin laikim em i no kisim save long God, long wanem, God em i pasin laikim.”—1 Jon 4:8.
-
-
Tok Giaman Olsem God Em i Man NogutWastaua—2013 | Novemba 1
-
-
FRAN PES STORI | OL TOK GIAMAN OLSEM GOD I NO GAT PASIN LAIKIM
Tok Giaman Olsem God Em i Man Nogut
TINGTING PLANTI MAN I GAT
“Taim ol man i gat sin ol i dai, wantu tasol spirit bilong ol i save go daun long hel, na ol bai kisim strafe bilong hel, olsem ‘paia bilong i stap oltaim oltaim.’” (Buk Catechism of the Catholic Church) Sampela hetman bilong lotu i tok, ol man i stap long hel i stap wanpis na i stap longwe tru long God.
TOK I TRU BILONG BAIBEL
“Taim mipela i dai, mipela i save pinis olgeta.” (Jop 14:10) Ol man i dai pinis “ol i no inap save long wanpela samting.” (Saveman 9:4, 5) Sapos man i dai em i no save long wanpela samting, orait olsem wanem em inap pilim pen long “paia bilong stap oltaim oltaim” o pilim hevi bilong i stap longwe tru long God inap oltaim?
Long Baibel, tok Hibru na tok Grik em ol i tanim olsem “hel” i makim ples bilong ol man i dai pinis. Olsem, taim Jop i kisim wanpela sik i givim bikpela pen long em, em i beten olsem: “I gutpela sapos yu haitim mi long ples bilong ol man i dai pinis [“long hel,” Douay-Rheims Version].” (Jop 14:13, 14) Jop i laik malolo long matmat, i no long wanpela ples we em bai kisim pen oltaim o we em bai stap longwe tru long God, nogat.
AS NA EM I BIKPELA SAMTING
Sapos God em i man nogut, bai yumi hatwok long go klostu long em. Rocío, husat i stap long Meksiko, i tok: “Taim mi liklik yet, mi lain long bilip bilong helpaia. Mi pret nogut tru na mi no ting God i gat wanpela gutpela pasin. Mi ting em i man bilong belhat na em i no save sori long ol man.”
Ol tok Baibel i mekim long kot bilong God na long wanem samting i painim ol man i dai pinis, dispela i senisim tingting Rocío i gat long God. Em i tok: “Mi pilim olsem mi stap fri—i kain olsem mi bin karim wanpela samting i hevi tru na nau wanpela i tekewe dispela samting long mi. Mi kirap long bilip olsem God i laik bai yumi stap gut, em i laikim yumi, na mi inap laikim em. Em i olsem wanpela papa i holim han bilong ol pikinini bilong em na i laik bai gutpela samting tasol i ken painim ol.”—Aisaia 41:13.
Planti i bihainim pasin olsem ol i daun long God, long wanem, ol i pret long helpaia, tasol God i no laik bai kain pret olsem i kirapim yu long mekim wok bilong em, nogat. Jisas i tok: “Yu mas laikim Jehova, God bilong yu.” (Mak 12:29, 30) Long nau, taim yumi save olsem God i no man nogut, yumi inap bilip tu long ol wok jas bilong em long bihain. Olsem pren bilong Jop, Elihu, yumi inap tru long tok: “God I Gat Olgeta Strong i no inap mekim pasin nogut. Nogat tru.”—Jop 34:10.
-
-
Tok i Tru Inap Mekim Yu Kamap FriWastaua—2013 | Novemba 1
-
-
FRAN PES STORI | OL TOK GIAMAN OLSEM GOD I NO GAT PASIN LAIKIM
Tok i Tru Inap Mekim Yu Kamap Fri
Wanpela taim long Jerusalem, Jisas i stori long Papa bilong em, Jehova, na i kamapim klia ol pasin giaman bilong ol hetman bilong lotu long taim bilong em. (Jon 8:12-30) Tok Jisas i mekim long dispela taim i ken skulim yumi long olsem wanem yumi ken skelim sampela bilip ol man i gat long God long nau. Jisas i tok: “Sapos yupela i holimpas tok bilong mi, orait yupela i disaipel tru bilong mi, na yupela bai save long tok i tru, na tok i tru bai mekim yupela i kamap fri.”—Jon 8:31, 32.
“Holimpas tok bilong mi.” Dispela tok bilong Jisas i makim pasin yumi mas bihainim bilong skelim sapos tok ol lotu i skulim man long en em “tok i tru” o nogat. Taim yu harim wanpela tok long God, askim yu yet, ‘Dispela tok i stret wantaim tok bilong Jisas na ol tok bilong Baibel?’ Bihainim pasin bilong ol manmeri husat i harim tok bilong aposel Pol na ol i “skelim gut ol Rait Holi long olgeta de bai ol i ken save olsem tok ol i harim em i tru o nogat.”—Aposel 17:11.
Marco, Rosa, na Raymonde, em tok bilong ol i stap long ol atikol paslain long dispela, ol i skelim gut ol bilip bilong ol long rot bilong stadi long Baibel wantaim ol Witnes Bilong Jehova. Ol i lainim wanem samting?
Marco: “Man bilong skulim mipela long Baibel i yusim Baibel bilong bekim olgeta askim bilong mi na meri bilong mi. Mipela i kirap laikim tru Jehova, na tu, mitupela i pas gut wantaim olsem marit!”
Rosa: “Pastaim, mi ting Baibel em wanpela buk i kamapim tingting bilong ol man long God em i wanem kain man tru. Tasol isi isi, Baibel i bekim ol askim bilong mi. Nau, mi tingim Jehova olsem wanpela man i stap tru. Em Man mi ken trastim.”
Raymonde: “Mi beten long God i ken helpim mi long kisim save long em. I no longtaim, mi na man bilong mi i kirap stadi long Baibel. Nau, mipela i kisim stretpela save long Jehova! Mipela i amamas tru long kisim save long em i wanem kain God tru.”
Baibel i kamapim long ples klia ol tok giaman ol man i mekim long God, na tu, em i kamapim tok i tru long ol gutpela pasin bilong God. Baibel tasol inap helpim yumi long “save long ol samting God i bin amamas long givim long yumi.” (1 Korin 2:12) I gutpela yu yet i kisim save long olsem wanem Baibel inap bekim ol bikpela askim long God, ol samting em i tingting pinis long mekim, na ol samting bai painim yumi long bihain. Kisim bekim bilong sampela bilong ol dispela askim aninit long het tok “Bible Teachings > Bible Questions Answered” long www.jw.org. Yu inap askim long wanpela i ken stadi Baibel wantaim yu long rot bilong dispela Web-sait o askim wanpela Witnes Bilong Jehova. Mipela i bilip olsem taim yu mekim olsem, yu bai pilim olsem i isi long yu laikim God, winim tingting yu bin gat bipo.
-