⁹ Taim Jehova i tokaut long strafe bai painim Satan, em i kamapim wanpela nupela rot bilong mekim wok bos bilong em, na long dispela rot em bai kamapim gutaim na ol samting bai i stap gut. God i tok long Satan olsem: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [“pikinini,” NW] bilong meri. Bai [em] i krungutim het bilong yu, na bai yu kaikaim lek bilong [em].” (Stat 3:15) Olsem na Jehova i tokaut olsem em i tingting pinis long givim strong long wanpela “pikinini” long bagarapim na pinisim Satan na lain bilong em, na kamapim klia olsem i stret God tasol i stap king bilong heven na graun.​—Song 2:​7-9; 110:​1, 2.

10. (a) Dispela “pikinini” em husat? Wanem dispela nupela rot bilong Jehova long mekim wok bos? (b) Pol i tok wanem long truim bilong namba wan tok profet?

¹⁰ Dispela “pikinini” em Jisas Krais na wanpela lain manmeri em ol bai wok king wantaim em. Olgeta bai wok bung wantaim long Kingdom Bilong God long han bilong Mesaia. (Daniel 7:​13, 14, 27; Matyu 19:28; Luk 12:32; 22:​28-​30) Tasol God i no kamapim klia ol dispela samting kwiktaim. Dispela namba wan tok profet i “stap hait” inap longtaim. (Rom 16:25) Inap planti handet yia, ol bilipman i wetim taim bilong dispela tok i “stap hait” bai kamap ples klia na truim bilong en bai kamapim long ples klia olsem i stret Jehova tasol i stap nambawan bos.​—Rom 8:​19-​21.

Samting i “Stap Hait” i Wok Long Kamap Ples Klia

11. Jehova i kamapim wanem samting long Abraham?

¹¹ Bihain isi isi Jehova i wok long kamapim sampela hap bilong “tok hait bilong kingdom bilong God.” (Mak 4:11) Wanpela bilong ol man em Jehova i kamapim dispela tok hait long em, em Abraham, em man Jehova i bin kolim olsem ‘pren bilong em.’ (Jems 2:23) Jehova i bin tok promis long Abraham olsem em bai ‘mekim ol lain tumbuna bilong em i kamap bikpela lain tru.’ Bihain, God i tok moa long Abraham olsem: “Sampela bai i kamap king” long lain bilong yu na “long rot bilong pikinini bilong yu olgeta lain bilong graun bai kisim blesing.”​—Stat 12:​2, 3; 17:6; 22:​17, 18; NW.

12. Bihain long Bikpela Tait, olsem wanem lain bilong Satan i kamap ples klia?

¹² I kam inap long taim bilong Abraham, ol man i bin traim pinis long bosim ol narapela. Olsem: Baibel i stori long tumbuna pikinini bilong Noa, em Nimrot, na i tok: “Nimrot i kamap namba wan man bilong graun long kamap strongpela hetman. Em i bikhet long Jehova na em i strongpela man bilong raunim ol animal.” (Stat 10:​8, 9; NW) Tru tumas, Satan i stiaim Nimrot na ol arapela hetman bilong graun long mekim wok bilong em. Ol dispela man na ol lain bilong ol i kamap lain bilong Satan.​—1 Jon 5:19.

13. Long rot bilong Jekop Jehova i tok profet long wanem samting?

¹³ Maski Satan i mekim ol samting na bai ol man i ken mekim wok bos, dispela i no pasim Jehova long mekim yet samting em i tingting pinis long mekim. Long rot bilong Jekop, em tumbuna pikinini bilong Abraham, Jehova i tok: “[Juda] i holim dispela stik i makim strong bilong king, na em bai i stap king oltaim. Em bai i holim dispela namba inap [Silo] em i kamap . . . na em bai i bosim olgeta lain manmeri.” (Stat 49:10) Dispela tok “Silo” i makim “Man Bilong Kisim Dispela Wok.” Olsem na dispela tok profet i kamapim klia olsem bai i gat wanpela man i kam na i stret em i kisim dispela “stik,” o em i holim namba bilong “bosim olgeta lain manmeri.” Dispela Man em i husat?

‘Inap Silo i Kamap’

14. Jehova i wokim wanem kontrak wantaim Devit?

¹⁴ Namba wan man Jehova i bin makim long ol tumbuna bilong Juda long kamap king na bosim ol manmeri bilong em, em Devit, pikinini man bilong Jesi na wasman bilong ol sipsip.a (1 Samuel 16:​1-​13) Maski Devit i mekim sin na popaia, Jehova i orait long em, long wanem, em i stap gut long wok bos bilong Jehova. Taim Jehova i mekim kontrak wantaim Devit, Jehova i kamapim sampela save moa long tok profet em i bin mekim long Iden, em i tok: “Bai mi mekim wanpela pikinini man bilong yu i kamap king, na bai em i kamap strongpela king na bai mi no larim wanpela samting i daunim em.” Dispela i no makim tasol pikinini bilong Devit, em Solomon husat i bin kisim ples bilong papa bilong em, nogat, long wanem, kontrak i tok moa: “Bai mi mekim ol man long lain bilong em tasol i kamap king oltaim oltaim.” Dispela kontrak bilong Devit i kamapim klia olsem dispela “pikinini” bilong Kingdom em God i tok promis long en bai kamap long lain tumbuna pikinini bilong Devit.​—2 Samuel 7:​12, 13.

15. Bilong wanem yumi inap tok olsem kingdom bilong Juda i makim Kingdom Bilong God?

¹⁵ Kirap long Devit na i kam, i gat ol man i kamap king long lain bilong em, na ol hetpris i bin kapsaitim wel long het bilong ol bilong makim ol i kamap king. Olsem na yumi inap kolim ol dispela king olsem ol man God i makim, o mesaia. (1 Samuel 16:13; 2 Samuel 2:4; 5:3; 1 King 1:39) Ol i sindaun long sia king bilong Jehova na mekim wok olsem king bilong Jehova long Jerusalem. (2 Stori 9:8) Long dispela rot, kingdom bilong Juda i makim Kingdom Bilong God, em rot Jehova i mekim wok long en bilong mekim wok bos.

16. Ol man i kamap king long lain bilong Juda ol i mekim wanem?

¹⁶ Taim king na ol manmeri i daun long wok bos bilong Jehova, em i lukautim ol na mekim gut long ol. Long taim Solomon i stap king, ol man i stap bel isi na ol i gat gutpela sindaun tru. Dispela i stap olsem piksa bilong makim taim Kingdom Bilong God bai bosim graun na Satan i no stap moa bilong pulim ol man, na Jehova tasol bai stap King bilong heven na graun. (1 King 4:​20, 25) Tasol sori tru, planti king long lain bilong Devit i no bihainim tok bilong Jehova, na ol manmeri i lotuim ol god giaman na mekim pasin pamuk. Bihain Jehova i larim ol Babilon i kam na bagarapim dispela kingdom bilong ol Juda long 607 B.C.E. Dispela samting i mekim na i luk olsem Satan i win na em i daunim wok bos bilong Jehova.

17. Wanem samting i soim olsem Jehova i stap king yet maski wok king long lain bilong Devit i pundaun?

¹⁷ Wok king bilong lain bilong Devit i pundaun​—na kingdom bilong ol Israel long hap not tu i pundaun​—tasol dispela i no makim olsem Jehova i no mekim gut wok king bilong em, nogat. Dispela i kamapim klia olsem samting nogut i save kamap taim Satan i stiaim ol man na taim ol man i laik bihainim laik bilong ol yet. (Sindaun 16:25; Jeremaia 10:23) Bilong soim olsem em i stap yet olsem king, long rot bilong profet Esekiel, Jehova i tokaut olsem: “Yu mas rausim hat king na dispela laplap i raunim het bilong yu. . . . Bai mi bagarapim Jerusalem olgeta, long pasin ol man i no bin lukim bipo. Na bai ples i stap nating inap long taim wanpela man i kam. Mi bin makim dispela man na em bai i bosim Jerusalem, na mi bai givim taun long em.” (Esekiel 21:​26, 27) Ol dispela tok i kamapim klia olsem dispela “pikinini” em Man Jehova i “makim” bilong i stap king em i no kam yet.

18. Ensel Gebriel i tok wanem long Maria?

¹⁸ Orait nau yumi stori long ol samting i kamap long yia 2 B.C.E. God i salim ensel Gebriel i kam long Maria, em wanpela meri i no bin slip wantaim man, na em i stap long Nasaret, em wanpela taun bilong Galili i stap long hap not bilong Palestain. Ensel i tok: “Harim. Yu bai kisim bel na karim wanpela pikinini man. Na yu mas kolim nem bilong en Jisas. Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit. Em bai i stap king bilong ol lain bilong Jekop oltaim. Na wok king bilong en bai i no inap pinis.”​—Luk 1:​31-​33.

19. Taim bilong wanem samting i kamap klostu nau?

¹⁹ Nau taim i kamap bilong kamapim klia dispela tok i “stap hait.” Klostu nau nambawan “pikinini” long lain bilong meri, em God i bin tok promis long em, em bai kamap. (Galesia 4:4; 1 Timoti 3:16) Satan bai kaikaim lek bilong em. Tasol dispela “pikinini” bai krungutim het bilong Satan, na em bai bagarapim na pinisim Satan na lain bilong em olgeta. Na tu, em bai autim tok olsem long rot bilong Kingdom Bilong God, em bai stretim bek olgeta samting Satan i bin bagarapim na em bai kamapim klia olsem i stret Jehova tasol i stap bos. (Hibru 2:14; 1 Jon 3:8)

Yu Save Stap Gut Long Wok Bos Bilong Jehova?

“Yupela i mas tokim ol lain manmeri olsem, ‘Bikpela i stap king.’ ”​—SONG 96:10.

1, 2. (a) Wanem bikpela samting i kamap long Oktoba long yia 29 C.E.? (b) Dispela samting i kamap i makim olsem Jisas i mas mekim wanem?

LONG Oktoba long yia 29 C.E., wanpela bikpela samting tru i kamap, samting olsem i no bin kamap bipo long graun. Jon, man bilong raitim Gutnius i stori long taim Jisas i baptais pinis na i kam antap long wara, olsem: “Mi lukim pinis Holi Spirit i lusim heven na i kam daun olsem wanpela bilong ol dispela pisin ol i kolim balus, na em i go i stap antap long em. Mi yet mi no bin save long em. Tasol God i bin salim mi na mi kam bilong baptaisim ol manmeri long wara, bipo em i bin tokim mi olsem, ‘Taim yu lukim Holi Spirit i kam daun na i stap long wanpela man, orait em dispela man tasol i kam bilong baptaisim ol manmeri long Holi Spirit.’ ” Dispela em wanpela samting em olgeta fopela man bilong raitim Gutnius i stori long en.​—Matyu 3:​16, 17; Mak 1:​9-​11; Luk 3:​21, 22; Jon 1:​32-​34.

² Taim holi spirit i kam daun long Jisas, dispela i kamapim klia olsem em i dispela Man God i Makim, olsem Mesaia o Krais. (Jon 1:33) Em nau, dispela “pikinini” God i tok promis long salim i kam, em i kamap pinis! Man i sanap long ai bilong Jon Bilong Baptais em dispela man Satan bai kaikaim lek bilong em, na dispela man yet bai krungutim het bilong Satan em nambawan birua bilong Jehova na wok bos bilong Em. (Stat 3:​15, NW) Taim em i kisim baptais pinis, Jisas i save olsem kirap long dispela taim na i go em i mas mekim olgeta wok Jehova i laik bai em i mekim bilong kamapim klia olsem i stret Jehova i stap nambawan bos, na em i mas kamapim klia tu ol samting Kingdom bai mekim.

3. Jisas i mekim wanem bilong redi long mekim wok bilong em long i stap gut long wok bos bilong Jehova?

³ Bilong redi long mekim dispela wok, “Holi Spirit i pulap long Jisas, na Jisas i lusim wara Jordan na i go bek. Na Holi Spirit i kisim em i go long ples i no gat man.” (Luk 4:1; Mak 1:12) Jisas i stap 40 de long dispela ples na em i gat taim bilong tingim tingim long bel dispela tok em Satan i bin sutim long wok bos bilong Jehova, na em i mas tingim tu wok em i mas mekim bilong i stap gut long wok bos bilong Jehova. Olgeta manmeri long heven na long graun i insait long dispela bikpela tok. Olsem na yumi mas skelim pasin bilong Jisas long i stap gut long God na luksave long samting yumi mas mekim bilong soim olsem yumi tu i laik i stap gut long wok bos bilong Jehova.​—Jop 1:​6-​12; 2:​2-6.

Satan i Sutim Tok Long Wok Bos Bilong Jehova

4. Satan i mekim wanem na dispela i kamapim klia bikpela tok long husat i mas i stap bos?

⁴ Satan i bin lukim olgeta samting nau yumi stori long en. Wantu, em i kam pait long nambawan “pikinini” bilong “meri” bilong God. (Stat 3:​15, NW) Tripela taim Satan i traim Jisas. Em i tokim Jisas long mekim samting bai helpim em yet, na em i no ken mekim ol samting Papa bilong em i laik bai em i mekim. Namba 3 traim i kamapim klia dispela tok long husat i mas i stap bos. Satan i soim Jisas “olgeta strongpela kantri bilong dispela graun wantaim ol gutpela samting bilong ol” na em i tokim Jisas: “Sapos yu brukim skru na lotu long mi, orait bai mi givim yu dispela olgeta samting.” Jisas i save olsem Satan i bosim “olgeta strongpela kantri bilong graun,” olsem na Jisas i kamapim klia tingting bilong em long husat tru i mas i stap bos, na em i tok: “Satan, yu klia. Buk bilong God i tok, ‘Yu mas aninit long God, Bikpela bilong yu. Na yu mas lotu long em wanpela tasol.’ ”​—Matyu 4:​8-​10.

5. Jisas i gat wanem bikpela wok long mekim?

⁵ Pasin Jisas i bihainim long taim em i stap long graun i kamapim klia olsem pasin bilong i stap gut long wok bos bilong Jehova em i bikpela samting long em. Jisas i save olsem em i mas i stap gut long Jehova i go inap long taim em i dai long han bilong Satan​—olsem tok profet i makim, snek bai kaikaim lek bilong “pikinini” bilong meri​—bilong kamapim klia olsem i stret God tasol i stap nambawan bos. (Matyu 16:21; 17:12) Em i gat wok tu long kamapim klia olsem long rot bilong Kingdom Bilong God tasol bai Jehova i daunim Satan na kamapim gutaim na bel isi long graun. (Matyu 6:​9, 10) Jisas i mekim wanem bilong inapim dispela wok?

“Kingdom Bilong God Em i Kam Klostu Pinis”

6. Olsem wanem Jisas i kamapim klia olsem God bai mekim wok long Kingdom bilong em bilong “bagarapim na rausim wok bilong Satan”?

⁶ Bilong kirapim dispela wok, “Jisas i kam kamap long distrik Galili na i wok long autim gutnius bilong God. Em i tok olsem, ‘Taim God i makim em i kamap pinis, na Kingdom bilong God em i kam klostu pinis.’ ” (Mak 1:​14, 15) Em i tok: “Mi mas autim gutnius bilong kingdom bilong God long ol arapela taun tu. God i salim mi na mi kam bilong mekim dispela wok.” (Luk 4:​18-​21, 43) Jisas i go long olgeta hap na “em i wok long autim gutnius bilong kingdom bilong God long ol manmeri.” (Luk 8:1) Na tu, Jisas i mekim planti mirakel​—givim kaikai long bikpela lain manmeri, bosim win na ren samting, oraitim ol sikman, na kirapim bek ol man i dai pinis. Long rot bilong ol dispela mirakel, Jisas i kamapim klia olsem God inap pinisim olgeta samting nogut i bin kamap long rot bilong pasin bikhet i bin kamap long Iden na em bai “bagarapim na rausim wok bilong Satan.”​—1 Jon 3:8.

7. Jisas i tokim ol disaipel long mekim wanem? Wanem samting i kamap long wok bilong ol?

⁷ Bilong autim gutnius bilong Kingdom long olgeta hap, Jisas i bungim wanpela lain na skulim ol long mekim dispela wok. Pastaim, em i singautim 12-pela aposel bilong em i kam na “salim ol i go bilong autim tok bilong kingdom bilong God.” (Luk 9:​1, 2) Bihain, em i salim 70 narapela disaipel long autim dispela tok: “Kingdom bilong God i kam klostu pinis long yupela.” (Luk 10:​1, 8, 9) Taim ol disaipel i kam bek na tokim Jisas long ol gutpela samting i kamap long dispela wok bilong autim tok bilong Kingdom, em i tokim ol: “Mi lukim Satan i lusim heven na i pundaun olsem lait bilong klaut i pairap.”​—Luk 10:​17, 18.

8. Ol samting Jisas i mekim long i stap bilong em i kamapim klia wanem samting?

⁸ Jisas i givim bel tru long autim tok bilong Kingdom long olgeta taim. Em i autim tok long san na nait, na em i no gat planti samting bilong skin. “Ol weldok i gat hul long graun, na ol pisin i gat haus bilong ol. Tasol Pikinini Bilong Man em i no gat ples bilong slip.” (Luk 9:58; Mak 6:31; Jon 4:​31-​34) Paslain liklik long indai bilong em, Jisas i tokim Pailat olsem: “Mama i karim mi na mi kam long dispela graun bilong mekim wanpela wok tasol, em bilong autim tok tru.” (Jon 18:37) Tru, ol samting Jisas i bin mekim taim em i stap long graun i soim olsem em i gutpela tisa tru, na man bilong wokim ol mirakel, na man i givim em yet bilong kisim bek ol man. Tasol nambawan samting em i kam long graun bilong mekim em laik bilong Jehova na long kamapim klia olsem long rot bilong Kingdom, God bai kamapim laik bilong em.​—Jon 14:6.

“Em i Pinis Nau!”

9. Olsem wanem Satan i kaikaim lek bilong “pikinini” bilong meri bilong God?

⁹ Satan i no amamas long olgeta samting Jisas i mekim bilong helpim Kingdom. Planti taim long rot bilong “lain” bilong em long graun​—lain politik na lain bilong lotu​—Satan i traim long kilim i dai “pikinini” bilong meri bilong God. Kirap long taim mama i karim em na i go inap long taim em i dai, Satan na lain bilong em i traim kain kain rot bilong kilim em i dai. Long 33 C.E., em taim bilong ol i putim Pikinini bilong man long han bilong Birua bilong God na em bai i kaikaim lek bilong em. (Matyu 20:​18, 19; Luk 18:​31-​33) Stori bilong ol Gutnius i kamapim klia olsem wanem Satan i stiaim ol man​—Judas Iskariot, ol hetpris, ol saveman bilong lo, ol Farisi, na ol Rom​—long sutim tok long Jisas na kilim em i dai long pos diwai.​—Aposel 2:​22, 23.

10. Indai bilong Jisas long pos diwai i inapim wanem bikpela samting?

¹⁰ Yu gat wanem tingting taim yu tingim Jisas i hangamap i stap long pos diwai na em i kisim bikpela pen na i dai? Ating yu tingim ofa bilong baim bek ol man Jisas i givim bilong helpim ol sinman. (Matyu 20:28; Jon 15:13) O ating yu pilim tru bikpela pasin laikim Jehova i soim taim em i givim dispela ofa. (Jon 3:16) O ating yu gat wankain tingting olsem dispela soldia bilong Rom, em i tok: “Tru tumas, dispela man em i Pikinini Bilong God.” (Matyu 27:54) Sapos yumi gat kain tingting olsem em i gutpela. Tasol tingim laspela tok Jisas i mekim taim em i hangamap i stap long pos diwai, em i tok: “Em i pinis nau.” (Jon 19:30) Wanem samting i pinis? Laip bilong Jisas na indai bilong em i inapim planti samting, tasol bikpela as na Jisas i kam long graun em long kamapim klia olsem i stret Jehova tasol i stap bos. Na olsem tok profet i makim, Jisas em dispela “pikinini” bilong meri, olsem na em bai kisim bikpela pen na hevi long han bilong Satan na bai em i ken stretim bek nem bilong Jehova. (Aisaia 53:​3-7) Em ol bikpela wok tru, tasol Jisas i mekim olgeta dispela wok. Em nau, em i pinisim wok bilong em!

11. Jisas bai mekim wanem bilong truim olgeta samting bilong tok profet i bin kamap long Iden?

¹¹ Jisas i stap gut long Jehova, olsem na Jehova i kirapim em bek olsem “spirit bilong givim laip long man,” na i no olsem man. (1 Korin 15:45; 1 Pita 3:18) Tok promis bilong Jehova long Pikinini bilong em husat i kisim biknem pinis i olsem: “Yu sindaun long han sut bilong mi inap mi putim ol birua bilong yu i stap aninit long yu.” (Song 110:1) “Ol birua” em dispela nambawan birua Satan, na olgeta i insait long “lain” bilong em. Olsem King bilong Kingdom Bilong Jehova, Jisas Krais bai i go pas long bagarapim na pinisim olgeta bikhet lain long heven na long graun. (KTH 12:​7-9; 19:​11-​16; 20:​1-3, 10) Long dispela taim olgeta samting bilong tok profet bilong Stat 3:15 bai kamap tru, na beten Jisas i skulim ol disaipel long en, dispela tu bai kamap tru. Long dispela beten Jisas i tok: “Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.”​—Matyu 6:10; Filipai 2:​8-​11.