Jehova i Lukautim Ol Long Taim Nogut

16, 17. (a) Long yia 539 B.C.E., ol Juda i mas mekim wanem bilong abrusim bagarap taim Babilon i pundaun? (b) Long nau, ating “ol haus” i makim wanem samting? Ol i save helpim yumi olsem wanem?

¹⁶ Long olgeta taim Jehova i mas lukautim ol wokman bilong em bambai ol birua i no ken bagarapim ol. Tasol liklik taim nau na em bai mekim save long dispela graun bilong Satan​—⁠em laspela taim Em i mas mekim olsem​—⁠na long dispela taim em i mas helpim moa yet ol manmeri i lotuim em, winim ol narapela taim bipo. (1 Jon 5:19) Jehova i givim tok lukaut long yumi long dispela taim nogut na em i tok: “Yupela ol manmeri bilong mi, yupela go insait long ol haus bilong yupela na pasim ol dua. Yupela i mas hait i stap liklik taim tasol inap belhat bilong Bikpela i pinis.

Aisaia 26:​20,

Dispela tok lukaut i soim ol Juda long olsem wanem ol inap abrusim bagarap taim Babilon i pundaun long yia 539 B.C.E. Ol man i putim gut yau long dispela tok, bai ol i stap insait long haus bilong ol long dispela taim, na bai ol i no ken kisim bagarap long han bilong ol soldia i bin daunim Babilon na ol i wokabaut long ol rot.

¹⁷ Nau long dispela taim, yumi ken ting “ol haus” long dispela tok profet i makim planti tausen kongrigesen bilong lain bilong Jehova i stap long olgeta hap. Long nau tu ol dispela kongrigesen em ples ol Kristen i ken i go painim ples hait long en na stap gut namel long ol brata bilong ol, na i gat ol elda bilong lukautim ol long pasin sori. (Aisaia 32:​1, 2; Hibru 10:​24, 25) Dispela i tru moa yet long nau, long wanem, liklik taim na pasin bilong dispela graun bai pinis, na ol man i laik abrusim bagarap long dispela taim ol i mas bihainim tok bilong Jehova.​​—⁠Sefanaia 2:⁠3.