Matyu 11:​28-​30.

Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i ken pulim ol samting. Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo. Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.”

‘Plang i Isi Long Karim na Samting Mi Givim i No Hevi’

Long ol ves bilong Baibel yumi wok long skelim, Jisas i tok: “Yupela kisim save long mi.” Taim yumi kisim save long Jisas, yumi kamap disaipel bilong em, na yumi karim plang bilong em taim yumi dediket long God na kisim baptais. (Matyu 28:​19, 20) Pasin bilong go oltaim long ol miting em i bikpela samting tru bilong i stap yet olsem wanpela disaipel bilong Jisas. Bilong wanem? Long wanem, long rot bilong ol miting Kristen yumi save kisim skul long Jisas, ol tok bilong em, na pasin bilong em long skulim ol man.

Wanem dispela samting Krais i laik bai yumi karim? Em samting em yet i karim​—em dispela gutpela wok tru long mekim laik bilong God. (Jon 4:34; 15:8) Yumi mas taitim bun bilong bihainim ol lo bilong God, tasol dispela samting i no hevi tumas long karim. Ating em i hevi long karim sapos yumi traim long karim long strong bilong yumi yet. Tasol sapos yumi beten na askim long kisim holi spirit bilong God na yumi wok long kisim ol gutpela tok bilong Baibel i kamap long ol miting, bai yumi kisim “bikpela strong” i kam long God. (2 Korin 4:7) Taim yumi redim ol miting na insait long en, pasin bilong yumi long laikim tru Jehova i kamap strong moa. Na taim pasin laikim i kirapim yumi long mekim olsem, ol lo bilong God “i no givim hevi long yumi.”​—1 Jon 5:3.

Ol manmeri i save karim hevi bilong painim mani long baim kaikai samting, hevi bilong sik, na sampela narapela hevi bilong ol yet. Tasol bilong karim na winim ol dispela hevi, yumi no tingim olsem savetingting bilong ol man tasol inap helpim yumi, nogat. Ol miting bilong kongrigesen i helpim yumi long yumi “no ken tingting planti,” long wanem, Jehova i save givim yumi ol samting yumi mas kisim na em i save helpim yumi long karim ol hevi. (Matyu 6:​25-​33) Tru tumas, ol miting Kristen i kamapim klia pasin bilong God long laikim tru yumi.

‘Mi Mekim Pasin Isi na Daunim Mi Yet’

Em pasin bilong Jisas long go long haus lotu we ol i save skelim na toktok long Tok Bilong God. Long wanpela taim olsem, Jisas i kisim Buk Aisaia na i ritim olsem: “Spirit bilong Bikpela i kam i stap long mi, long wanem, Bikpela yet i kapsaitim wel long het bilong mi bilong makim mi bilong i go bringim gutpela tok bilong en long ol rabisman. Na em i salim mi i kam long tokaut long ol man i stap long kalabus long ol i ken lusim kalabus na i go fri, na long tokaut long ol man i aipas long ol i ken lukluk gen. Em i salim mi i kam long pinisim hevi bilong ol man, ol arapela i wok long daunim na mekim nogut long ol. Na em i salim mi long tokaut olsem, taim i kamap pinis bilong Bikpela i laik mekim gut long ol manmeri bilong en.” (Luk 4:​16, 18, 19) Man! Em gutpela samting tru long harim Jisas i kamapim mining bilong dispela tok, taim em i tokaut olsem: “Dispela tok bilong buk bilong God yupela i harim pinis, nau tasol em i kamap tru”!​—Luk 4:21.

Jisas, em “Namba Wan Wasman” i gat pasin isi, na long ol samting bilong spirit em i save lukautim yet ol man i bihainim em. (1 Pita 5:​1-4) Em i stiaim “wokboi i gat gutpela tingting” na ol i makim ol man bilong mekim wok wasman insait long ol kongrigesen bilong ol Witnes Bilong Jehova long olgeta hap bilong graun. (Matyu 24:​45-​47; Taitus 1:​5-9) Ol dispela man ‘i stap wasman bilong ol sipsip bilong God’ na ol i mekim pasin isi long ol na ol i stap olsem gutpela piksa long pasin bilong go oltaim long ol miting. Yu ken soim olsem yu tenkyu long ol dispela man i olsem “presen” long rot bilong go long ol miting, na yu ken strongim ol narapela taim yu stap long ol miting na insait long en.​—Aposel 15:​30-​33; 20:28; Efesus 4:​8, 11, 12.

“Bai Yupela i Kisim Malolo”

Taim yu go long ol miting Kristen, yu ken mekim wanem na bai ol dispela miting i givim nupela strong long yu? Wanpela rot bilong mekim olsem em long bihainim tok bilong Jisas olsem: “Yupela i mas lukaut gut bai yupela i harim gut tok.” (Luk 8:18) Ol man i gat laik tru long lainim ol samting, ol i putim gut yau long tok bilong Jisas. Ol i askim em long kamapim gut insait bilong ol tok piksa bilong em, na long dispela rot ol i kisim gutpela save tru.​—Matyu 13:​10-​16.

Yu ken bihainim pasin bilong ol dispela man i gat laik tru long harim ol tok bilong God long rot bilong putim gut yau long ol tok i kamap long ol miting. (Matyu 5:​3, 6) Bilong helpim yu na bai tingting bilong yu i no ken wokabaut, tingim tingim gut ol tok brata i kamapim. Yu ken tingting long kain askim olsem: ‘Olsem wanem mi inap bihainim dispela tok long i stap bilong mi? Olsem wanem mi inap yusim dispela tok bilong helpim ol narapela? Mi inap kamapim insait bilong dispela tok olsem wanem?’ Na tu, lukim ol skripsa brata i kolim bilong sapotim ol bikpela tok bilong em. Taim yu wok long putim gut yau, ol tok bilong miting bai i wok long givim tru nupela strong long yu.

Bihain long ol miting, toktok wantaim ol narapela long ol tok i bin kamap. Toktok long olsem wanem yu inap mekim wok long ol tok i bin kamap. Ol gutpela tok yumi mekim bilong strongim narapela i save mekim ol miting i kamap samting bilong givim nupela strong.