16. Olsem wanem ol tok bilong Buk Qo·heʹleth, olsem Saveman, i stret wantaim ol tok bilong Jisas?

¹⁶ Long Matyu 12:​42, Krais Jisas i tok em i “winim tru Solomon.” Solomon i makim Jisas, orait olsem wanem long ol tok bilong em long Buk Qo·heʹleth? Ol dispela tok i stret wantaim ol tok bilong Jisas? Planti tok i wankain! Olsem: Jisas i stori long bikpela wok God i mekim na em i tok: “Papa bilong mi em i save wok oltaim i kam inap long nau. Na mi tu mi save wok.” (Jo. 5:17) Solomon tu i stori long ol wok bilong God, em i tok: “Mi lukim olgeta samting God i bin mekim na mi save, yumi no inap painimaut as bilong ol dispela samting i kamap long graun. Maski yumi taitim bun na yumi hatwok long painimaut, yumi no inap. Na maski sapos ol saveman i tok ol i save pinis long as bilong ol dispela samting, tok bilong ol i no tru. Ol i no inap save long en.”​—⁠Sav. 8:⁠17.

17. I gat wanem ol narapela tok bilong Jisas na Solomon i wankain?

¹⁷ Jisas wantaim Solomon i laik kirapim ol manmeri i lotu tru long God long bung wantaim. (Mt. 18:20; Sav. 4:​9-12; 5:⁠1) Tok bilong Jisas long pasin bilong “dispela graun i laik pinis” na taim bilong ‘ol man bilong ol arapela lain,’ dispela i stret wantaim tok bilong Solomon, em i tok: “Olgeta samting i kamap long dispela graun, i save kamap long taim bilong em yet.”​—⁠Mt. 24:3; Lu. 21:24; Sav. 3:⁠1.

18. Jisas na ol disaipel i mekim wanem tok lukaut i wankain olsem Solomon i bin mekim?

¹⁸ Na Jisas wantaim ol disaipel i mekim tok lukaut wankain olsem Solomon long pasin bilong laikim tumas mani. Solomon i tok, gutpela tingting na save i winim mani, long wanem, em inap helpim yumi long “stap gut olgeta.” Jisas i tok, “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” (Sav. 7:12; Mt. 6:​33, Nupela Testamen na Ol Sam)

19. Yumi ken bung wantaim na lotuim Jehova long nau na wetim wanem gutpela samting?

¹⁹ Kingdom bilong Jisas Krais, em Pikinini Bilong God em i bin kamap man long graun na i kamap long lain bilong saveman King Solomon, em bai kamapim nupela pasin long graun. (KTH 21:​1-5) Wok king bilong Solomon em i piksa bilong Kingdom bilong God, na ol manmeri bilong nau i wetim Kingdom bilong God i stap long han bilong Jisas Krais ol i mas tingim gut ol tok Solomon i raitim bilong stiaim lain bilong em. Taim Kingdom i bosim graun, ol manmeri i stap aninit long en bai ol i bihainim ol gutpela lo bilong stiaim tingting olsem saveman i kamapim, na bai ol i amamas oltaim long gutpela laip God i givim long ol. Nau em i taim bilong bung na lotuim Jehova bambai yumi ken pilim tru amamas bai yumi kisim aninit long Kingdom bilong em.​—⁠Sav. 3:​12, 13; 12:​13, 14.