• Yu No Inap Save Wanem Kaikai Bai Kamap Gut!
    Wastaua—2008 | Julai 15

    • Umben

      15, 16. (a) Stori liklik long tok piksa bilong umben. (b) Umben i makim wanem samting? Planti man i kamap disaipel, tasol wanem samting i bikpela samting moa?

      15 Tru, planti man i kamap disaipel bilong Jisas Krais, tasol samting i bikpela samting moa, em ol i wanem kain disaipel. Jisas i stori long dispela samting bilong Kingdom taim em i mekim narapela tok piksa, em tok piksa bilong umben. Em i tok: “Kingdom bilong heven em i olsem wanpela umben ol i tromoi i go daun long raunwara, na i kisim ol kain kain pis.”​​—Mt. 13:47.

      16 Umben, em i makim wok autim tok bilong Kingdom, em i kisim ol kain kain pis. Jisas i tok moa: “Umben i pulap, orait ol i pulim i kam sua. Na ol i sindaun na bungim ol gutpela gutpela pis long sampela dis. Tasol ol pis nogut ol i tromoi. Long las de bilong dispela graun bai i olsem tasol. Ol ensel bai i kam na kisim ol man nogut i stap namel long ol stretpela man. Na ol bai i tromoi ol i go long bikpela paia. Long dispela paia ol bai i krai nogut na skrapim tit bilong ol.”​​—Mt. 13:​48-​50.

      17. Wok bilong tilim ol pis i go tupela lain, em tok piksa bilong umben i stori long en, em i kamap long wanem taim?

      17 Olsem wanem? Dispela wok bilong bungim ol gutpela pis na tromoi ol pis nogut, dispela i makim laspela kot bilong ol sipsip na meme em Jisas i tok bai kamap long taim em i kam bilong mekim kot? Nogat. (Mt. 25:​31-​33) Dispela laspela kot bai kamap taim Jisas i kam long taim bilong bikpela hevi tru. Tasol wok bilong tilim ol gutpela pis na ol pis nogut long tok piksa bilong umben, dispela wok i kamap long taim bilong “las de bilong dispela graun.”b Em dispela taim nau yumi stap long en​​—em pinis bilong en bai kamap long taim bilong bikpela hevi tru. Orait, dispela wok bilong tilim ol pis i wok long kamap olsem wanem long nau?

      18, 19. (a) Long nau i gat wanem wok bilong tilim ol man? (b) Ol man i gat gutpela bel ol i mas mekim wanem? (Lukim tu futnot long pes 21.)

      18 Long taim bilong yumi, planti milion manmeri i kain olsem pis ol i bin kam long kongrigesen bilong Jehova. Sampela i kam long Memorial, na sampela i kam long ol miting bilong yumi, na sampela i orait long stadi wantaim yumi long Baibel. Tasol olsem wanem? Olgeta i kamap Kristen tru? Tru, i olsem ol i “kam sua,” tasol Jisas i tok ol ensel bai bungim “ol gutpela pis” tasol long ol dis, em ol dis i makim ol kongrigesen Kristen. Ol pis nogut ol i tromoi, na bihain ol bai go long bikpela paia em i makim bagarap na pinis olgeta.

      19 Kain olsem ol pis nogut, planti man em bipo ol i bin stadi wantaim lain bilong Jehova long Baibel, ol i bin lusim stadi. Sampela, em papamama bilong ol i Kristen, i no gat wanpela taim ol i gat laik tru long kamap disaipel bilong Jisas. Ol i no laik pasim tok long bel long mekim wok bilong Jehova, o ating ol i bin mekim olsem inap liklik taim, tasol ol i no mekim moa.c (Ese. 33:​32, 33) Olsem na paslain long laspela de bilong kot, olgeta man i gat gutpela bel ol i mas larim ol ensel i kisim ol i kam long ol kongrigesen i kain olsem dis na stap long ples bilong i stap gut.

  • Yu No Inap Save Wanem Kaikai Bai Kamap Gut!
    Wastaua—2008 | Julai 15

    • b Maski Matyu 13:​39-​43 i stori long narapela samting bilong wok autim tok bilong Kingdom, taim bilong truim bilong en i wankain long taim bilong truim bilong tok piksa bilong umben, em long taim bilong “las de bilong dispela graun.” Wok bilong tilim ol man i kain olsem pis i go tupela lain, dispela wok i stap yet, wankain olsem wok bilong planim na kisim kaikai long gaden i stap yet nau long dispela taim.​​—Wastaua, Oktoba 15, 2000, pes 25-​26; Lotuim Dispela Wanpela God Tru, pes 178-​181, paragraf 8-​11.

      c Yu ting dispela i makim olsem man i no stadi moa o i no bung moa wantaim ol Witnes Bilong Jehova, ol ensel i bin tromoi em i go olsem wanpela pis nogut? Nogat! Sapos man i gat gutpela bel na i laik kam bek long Jehova, Jehova bai larim em i kam bek.​​—Mal. 3:7.