Yu Save Bilip Strong Long God?

“Yupela i mas wok pastaim long painim kingdom bilong God.”—MATYU 6:33, Nupela Testamen na Ol Sam.

1, 2. Wanpela yangpela man i bin mekim wanem long wok mani bilong em? Bilong wanem em i mekim olsem?

WANPELA yangpela man i gat laik long mekim sampela wok moa insait long kongrigesen bilong em. Tasol wok mani i pasim em long go oltaim long ol miting. Em i mekim wanem bilong stretim dispela samting? Em i lusim sampela samting long sindaun bilong em, lusim wok mani bilong em, na bihain em i painim wanpela wok i no pasim em long mekim ol wok Kristen bilong em. Long nau em i no save kisim bikpela pe olsem bipo, tasol em i save lukautim yet famili bilong em, na em inap helpim gut kongrigesen.

² Yu save long as na dispela yangpela man i bin mekim olsem? Yu ting yu inap mekim wankain samting sapos yu gat wankain hevi olsem em? Planti Kristen i bin mekim olsem, na dispela i kamapim klia olsem ol i bilip long tok promis bilong Jisas, em i tok: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.” (Matyu 6:33, Nupela Testamen na Ol Sam) Ol i bilip strong olsem Jehova bai lukautim ol, na i no ol wok samting bilong dispela graun.—Sindaun 3:23, 25.

3. Bilong wanem sampela inap tingting olsem nau i gutpela long painim Kingdom pastaim o nogat?

³ Long nau yumi stap long taim bilong planti hevi, olsem na sampela inap tingting: Dispela yangpela man i bihainim gutpela tingting o nogat? Long nau, winim olgeta taim bipo, sampela lain i stap rabis nogut tru, tasol sampela i gat gutpela sindaun tru. Planti manmeri long ol kantri i stap rabis ol bai amamas tru long painim rot bilong mekim sindaun bilong ol i kamap gutpela liklik. Tasol planti long ol kantri i gat planti mani samting ol i hatwok long holim strong gutpela sindaun bilong ol, long wanem, sampela taim strong bilong mani i go daun o ol i mas senisim wok mani bilong ol, na ol bos i strong long ol i mas mekim bikpela wok moa o wok ovataim. Tru tumas, wok bilong painim mani bilong lukautim famili i gat ol hevi bilong en, so sampela inap tingting: ‘Long nau i gutpela taim long painim Kingdom pastaim o nogat?’ Bilong helpim yu long painim bekim bilong dispela askim, tingim ol man Jisas i bin givim dispela tok long ol.

“Yupela i No Ken Tingting Planti”

4, 5. Jisas i mekim wanem tok piksa bilong soim olsem i stret lain bilong God i no ken tingting planti tumas long ol samting bilong wan wan de?

⁴ Jisas i stap long Galili na i toktok long bikpela lain manmeri i kam long planti hap. (Matyu 4:25) Ating klostu olgeta dispela man i stap rabis, tasol Jisas i tokim ol long ol i no ken tingting pastaim long kisim planti mani kago—ol i mas tingting long bungim ol samting i gat bikpela pe moa, em ol gutpela samting bilong spirit. (Matyu 6:19-21, 24) Em i tok: “Yupela i no ken tingting planti long laip bilong yupela na tok, ‘Bai yumi kaikai wanem samting? Bai yumi dring wanem samting?’ Na yupela i no ken tingting planti long bodi bilong yupela na tok, ‘Bai yumi pasim wanem laplap?’ Ating laip em i winim kaikai, na bodi em i winim ol laplap samting.”—Matyu 6:25.

⁵ Ating planti man i harim tok bilong Jisas ol inap ting i no gutpela long bihainim dispela tok. Ol i save olsem sapos ol i no wok strong, famili bilong ol bai kisim hevi. Tasol Jisas i tokim ol long tingim ol pisin. Ol pisin i mas painim kaikai long olgeta wan wan de, tasol Jehova i save lukautim ol. Na Jisas i tok Jehova i save lukautim ol plaua, ol i naispela tru, winim ol gutpela bilas bilong Solomon. Orait sapos Jehova i lukautim ol pisin na plaua, em bai lukautim yumi moa yet, a? (Matyu 6:26-30) Olsem Jisas i tok, laip na bodi bilong yumi i bikpela samting moa, winim kaikai yumi save baim bilong strongim bodi, na winim klos yumi save kisim bilong karamapim bodi. Sapos yumi lusim olgeta strong bilong yumi long kisim kaikai na klos, na yumi no gat strong moa long mekim wok bilong Jehova, i olsem laip bilong yumi i no gat as bilong en.—Saveman 12:13.

Stretpela Tingting

6. (a) Ol Kristen i gat wanem wok? (b) Ol Kristen i bilip strong long husat?

⁶ Tru, Jisas i no kirapim ol man long lusim wok na wetim God i givim kaikai na klos samting long famili bilong ol, nogat. Ol pisin tu i mas painim kaikai bilong ol yet wantaim ol pikinini bilong ol. Olsem na ol Kristen i mas mekim wok sapos ol i laik kaikai. Ol i gat wok long lukautim famili bilong ol. Ol Kristen husat i mekim wok olsem ol wokman o wokboi nating, ol i mas mekim gut wok bilong bosman bilong ol. (2 Tesalonaika 3:10-12; 1 Timoti 5:8; 1 Pita 2:18) Planti taim aposel Pol i bin samapim ol haus sel bilong lukautim em yet. (Aposel 18:1-4; 1 Tesalonaika 2:9) Tasol ol dispela Kristen i no ting wok mani bai helpim ol long i stap gut. Ol i bilip long Jehova. Olsem na bel bilong ol i stap isi, em kain bel isi ol narapela i no save long en. Man bilong raitim song i tok: “Ol manmeri i save bilip long Bikpela, ol i olsem maunten Saion. Dispela maunten i no inap guria, na em i stap strong olgeta.”—Song 125:1.

7. Man i no bilip strong long Jehova em inap ting olsem wanem?

⁷ Man i no bilip strong long Jehova, ating em i gat narapela kain tingting. Planti man i ting bikpela mani em i namba wan samting bilong helpim ol long i stap gut. Olsem na sampela papamama i save kirapim ol pikinini long kisim bikpela skul taim ol i go bikpela na bai ol i ken kisim wok i gat bikpela pe. Sori tru, sampela famili Kristen i kisim pinis bikpela hevi long dispela, long wanem, ol pikinini i no tingim moa ol samting bilong spirit na ol i kirap painim ol samting bilong skin tasol.

8. Ol Kristen i holim wanem stretpela tingting?

⁸ Olsem na ol Kristen i gat gutpela tingting ol i save olsem tok bilong Jisas i stret long nau, wankain olsem long taim bilong ol aposel, na ol i wok strong long holim stretpela tingting. Maski ol i mas lusim planti aua long mekim wok mani bilong lukautim famili olsem Baibel i tok ol i mas mekim, ol i no larim dispela i mekim na ol i givim baksait long ol bikpela samting moa, em ol samting bilong spirit.—Saveman 7:12.

“Yupela i No Ken Tingting Planti”

9. Jisas i givim wanem gutpela tok long ol man i bilip tru long Jehova?

⁹ Taim Jisas i mekim Bikpela Tok Long Maunten, em i tokim ol man: “Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ Nogat. Ol haiden i save wari long painim olgeta dispela samting. Tasol Papa bilong yupela i stap long heven em i save pinis, yupela i mas kisim dispela olgeta kain samting.” (Matyu 6:31, 32) Em gutpela tok tru bilong strongim bel, a? Sapos yumi bilip tru long Jehova, oltaim em bai i stap bilong helpim yumi. Tasol tok bilong Jisas i kirapim yumi long tingting gut, olsem: Sapos yumi “wari” long painim ol samting bilong skin, tingting bilong yumi bai i wankain olsem bilong “ol haiden,” em ol i no Kristen tru.

10. Taim yangpela man i kam long Jisas bilong kisim sampela gutpela tok, olsem wanem Jisas i kamapim long ples klia samting yangpela man i laikim moa yet?

¹⁰ Wanpela taim, wanpela yangpela maniman i askim Jisas long em i mas mekim wanem bilong kisim laip i stap gut oltaim oltaim. Jisas i kirapim em long tingim ol tok bilong Lo i stap yet long dispela taim. Yangpela man i tokim Jisas: “Mi save bihainim tasol dispela olgeta lo. Tasol mi sot yet long wanem samting?” Ating long tingting bilong planti man, tok Jisas i mekim i no gutpela long bihainim. Em i tok: “Sapos yu laik kamap stretpela olgeta, orait yu go salim olgeta samting bilong yu na dispela mani yu kisim yu mas givim long ol rabisman. Yu mekim olsem, na bai yu gat ol gutpela samting tru long heven. Na yu kam bihainim mi.” (Matyu 19:16-21) Yangpela man i bel hevi na em i go, long wanem, em i no laik lusim planti mani samting bilong em. Maski em i laikim tru Jehova, em i laikim moa yet mani kago bilong em.

11, 12. (a) Jisas i mekim wanem tok long mani kago? (b) Olsem wanem mani kago inap pasim rot bilong man long mekim wok bilong Jehova?

¹¹ Dispela i kirapim Jisas long mekim wanpela tok, olsem: “Ol maniman bai i hatwok tru long i go insait long kingdom bilong heven. . . . Kamel i laik i go insait long hul bilong nil bilong samap, em i no gat hatwok olsem maniman i laik i go insait long kingdom bilong God.” (Matyu 19:23, 24) Yu ting Jisas i laik tok, i no gat wanpela maniman inap i go insait long Kingdom? Nogat, long wanem, em i tok moa olsem: “God em inap long mekim olgeta samting.” (Matyu 19:25, 26) Tru tumas, Jehova i bin helpim sampela maniman long dispela taim bipo long kamap Kristen God i bin makim ol long holi spirit. (1 Timoti 6:17) Tasol i gat as na Jisas i mekim dispela tok. Em i laik givim tok lukaut long ol Kristen.

¹² Sapos man i laikim tumas ol samting bilong em olsem dispela yangpela maniman i mekim, dispela inap pasim rot bilong em long givim bel olgeta long mekim wok bilong Jehova. Dispela inap painim maniman wantaim man “i laikim tumas long kisim planti mani samting.” (1 Timoti 6:9, 10) Sapos man i bilip tumas long mani kago, dispela inap mekim na em i no tingting moa olsem em i mas kisim ol samting bilong spirit. (Matyu 5:3) Olsem na ating em i no pilim moa olsem Jehova i mas helpim em. (Lo 6:10-12) Na ating em bai ting kongrigesen i mas mekim gut tru long em. (Jems 2:1-4) Na em inap lusim bikpela haptaim long kisim amamas long mani bilong em na em i no mekim wok bilong Jehova.

Kisim Stretpela Tingting

13. Ol Laodisia i gat wanem tingting kranki?

¹³ Wanpela lain i gat tingting kranki long mani kago, em kongrigesen Laodisia long taim bilong ol aposel. Jisas i tokim ol: “Yu save tok olsem, ‘Mi gat planti mani, na mi gat planti samting i stap. Mi no sot long wanpela samting.’ Tasol nogat. Yu stap nogut tru, inap long ol man i ken sori tru long yu. Yu stap rabis tru na yu aipas na yu stap as nating. Na yu yet yu no save long dispela.” I no bikpela mani bilong ol Laodisia i mekim na ol i stap nogut long ol samting bilong spirit, nogat. Ol i bilip long mani bilong ol na ol i no bilip strong long Jehova. Olsem na long ol samting bilong spirit ol i no hat na ol i no kol, na klostu Jisas i ‘trautim ol long maus bilong em.’—KTH 3:14-17.

14. Bilong wanem i stret Pol i givim tok amamas long ol Kristen Hibru?

¹⁴ Tasol Pol i givim tok amamas long ol Kristen Hibru long tingting ol i holim taim ol man i bin mekim nogut long ol. Em i tok: “Taim ol i putim sampela bilong yupela long kalabus, yupela i bin sori long ol dispela kalabusman na mekim gut long ol. Na taim ol man i bin pulim ol samting bilong yupela, yupela i amamas i stap na larim ol, long wanem, yupela i save olsem, samting tru bilong yupela i stap yet, na dispela bai i stap oltaim.” (Hibru 10:34) Bel bilong ol i no bagarap taim ol man i kisim ol samting bilong ol. Ol i stap amamas, long wanem, ol i holim strong nambawan gutpela samting bilong ol, em “samting tru . . . na dispela bai i stap oltaim.” Olsem tok piksa bilong Jisas long bisnisman i lusim olgeta samting bilong em bilong baim wanpela bis i gat bikpela pe tru, ol dispela Kristen tu i strong long holimpas bilip bilong ol long Kingdom, maski ol i mas lusim ol samting bilong ol. (Matyu 13:45, 46) Ol i gat gutpela tingting tru!

15. Olsem wanem wanpela meri Kristen long Laibiria i putim ol samting bilong Kingdom i go pas?

¹⁵ Planti long nau i kisim wankain gutpela tingting. Olsem: Long Laibiria wanpela yangpela meri Kristen i gat rot bilong stadi long yunivesiti. Long dispela kantri ol man i ting dispela em i rot bilong kisim gutpela sindaun long bihain. Tasol dispela meri i save autim gutnius fultaim, olsem wanpela painia, na ol i bin singautim em long mekim wok painia salim inap liklik taim. Em i laik painim Kingdom pastaim na mekim yet wok bilong God fultaim. Em i go long ples ol i bin makim long em na em i kirapim 21 Baibel stadi insait long 3-pela mun. Dispela yangpela sista na planti tausen moa olsem em, ol i painim Kingdom pastaim, maski ol i lus long kisim sampela gutpela samting bilong skin. Olsem wanem ol inap holim kain gutpela tingting olsem long dispela taim we ol man i strong long painim mani kago? Ol i bin wok strong long kisim ol gutpela pasin. Orait nau yumi ken stori long sampela bilong ol dispela pasin.

16, 17. (a) Bilong wanem yumi mas i gat pasin daun bambai yumi ken bilip strong long Jehova? (b) Bilong wanem yumi mas kisim pasin bilong bilip long ol tok promis bilong God?

¹⁶ Pasin Daun: Baibel i tok: “Yu mas bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim. Nogut yu ting, save bilong yu yet em i samting tru.” (Sindaun 3:5-7) Taim yumi tingim wok bilong lukautim yumi yet long skin, sampela taim i luk olsem wanpela rot i gutpela moa long bihainim. (Jeremaia 17:9) Tasol Kristen tru i save wetim Jehova i soim rot long em. (Song 48:14) ‘Long olgeta samting em i mekim’—long ol samting bilong kongrigesen, ediukesen o wok mani, malolo, o ol narapela samting—em i mekim pasin daun na i laik kisim tok bilong Jehova long stiaim em.—Song 73:24.

¹⁷ Bilip long ol tok promis bilong Jehova: Pol i tok: “Man i laik i go klostu long God, em i mas bilip olsem God i stap, na em i mas bilip olsem God i save mekim gut tru long ol man i wok long painim em.” (Hibru 11:6) Sapos yumi no bilip tumas olsem Jehova bai truim ol tok promis bilong em, ating bai yumi ting i stret long givim bel tru long “mekim wok long samting bilong graun.” (1 Korin 7:31) Tasol sapos yumi gat strongpela bilip, bai yumi strong long painim Kingdom pastaim. Olsem wanem yumi ken kisim strongpela bilip? Yumi mas i go klostu long Jehova long rot bilong beten oltaim na stadi. (Song 1:1-3; Filipai 4:6, 7; Jems 4:8) Olsem King Devit, yumi ken beten olsem: “Bikpela, mi save bilip long yu. Mi tok olsem, yu God bilong mi. Yu save mekim gutpela wok tru bilong helpim ol man.”—Song 31:14, 19.

18, 19. (a) Olsem wanem pasin bilong wok strong i helpim yumi long bilip strong moa long Jehova? (b) Bilong wanem Kristen i mas amamas long lusim sampela samting bilong em yet?

¹⁸ Wok strong long mekim wok bilong Jehova: Pol i bungim pasin bilong bilip long ol tok promis bilong Jehova wantaim pasin bilong wok strong. Em i tok: “Mipela i laikim tumas bai yupela olgeta i mas wok strong olsem tasol, na holimpas bilip bilong yupela, na wetim dispela taim God i makim bilong mekim gut long yumi.” (Hibru 6:11) Sapos yumi wok strong long mekim wok bilong Jehova, em bai helpim yumi. Taim yumi lukim olsem em i helpim yumi, yumi bilip strong moa long em, na yumi ‘stap strong na i no surik liklik.’ (1 Korin 15:58) Bilip bilong yumi i kisim nupela strong, na yumi bilip strong moa long ol gutpela samting yumi wetim i kamap bihain.—Efesus 3:16-19.

¹⁹ Amamas long lusim sampela samting bilong yumi yet: Pol i lusim gutpela wok mani em inap kisim bambai em i ken bihainim Jisas. Samting em i mekim i stret tru, maski sampela taim em i karim hevi long em i sot long samting bilong skin. (1 Korin 4:11-13) Jehova i no bin promis long givim planti samting bilong skin long yumi, na sampela taim ol wokman bilong em i save painim taim nogut. Sapos yumi amamas long lusim sampela samting bilong skin, dispela i kamapim klia olsem yumi tingting strong tru long mekim wok bilong Jehova.—1 Timoti 6:6-8.

20. Man i putim ol wok bilong Kingdom i go pas, bilong wanem em i bikpela samting long em i mas i gat pasin bilong isi na i no ken les kwik?

²⁰ Pasin bilong isi na no ken les kwik: Disaipel Jems i tokim ol wanlain Kristen: “Ol brata, yupela i mas strongim bel bilong yupela na karim ol hevi, na wetim Bikpela i kam bek.” (Jems 5:7) Nau long dispela taim bilong ol man i hariap hariap long mekim ol samting, i hatwok long i stap isi na no ken les kwik. Yumi laik bai ol samting i mas kamap hariap. Tasol Pol i tokim yumi long bihainim pasin bilong ol man “i bilip tru na i no les kwik, na ol i kisim olgeta samting bipo God i tok long givim long ol pikinini bilong em.” (Hibru 6:12) Yumi mas amamas long wetim Jehova. Laip i stap gut oltaim oltaim long Paradais long graun—em wanpela gutpela samting tru bilong wetim!

21. (a) Taim yumi putim ol wok bilong Kingdom i go pas, yumi kamapim klia wanem samting? (b) Long stadi i kamap bihain long dispela, bai yumi toktok long wanem samting?

²¹ Tru tumas, tok bilong Jisas long yumi mas painim Kingdom pastaim em i gutpela tru long bihainim. Taim yumi mekim olsem, yumi kamapim klia olsem yumi bilip tru long Jehova, na makim dispela rot i gutpela long Kristen i ken bihainim na i stap gut. Tasol Jisas i tok tu olsem yumi mas “wok pastaim long painim . . . stretpela pasin bilong [God].” Long stadi i kamap bihain long dispela, bai yumi stori long as na long nau yumi mas kisim dispela gutpela tok bilong strongim yumi.

Stretpela Pasin Bai Lukautim Yumi

“Yupela i mas wok pastaim long painim . . . stretpela pasin bilong [God].”—MATYU 6:33, Nupela Testamen na Ol Sam.

1, 2. Wanpela yangpela Kristen i mekim wanem? Bilong wanem em i mekim olsem?

WANPELA yangpela meri long Esia i mekim wok seketeri long wanpela ofis bilong gavman. Em i save mekim gut wok bilong em, em i kam stret long taim na em i save wok strong. Tasol dispela wok i bilong liklik taim tasol, olsem na ol i skelim ol bai givim dispela wok long husat. Bos i tok em bai givim wok long yangpela meri hia bilong holim oltaim, na em inap givim wok i gat bikpela namba liklik, tasol meri i mas slip wantaim em. Meri i no orait liklik long mekim olsem, maski em bai lus long kisim dispela wok.

² Yu ting dispela yangpela meri Kristen i bihainim tingting kranki? Nogat. Em i bihainim gut tok bilong Jisas, olsem: “Yupela i mas wok pastaim long painim . . . stretpela pasin bilong [God].” (Matyu 6:33, Nupela Testamen na Ol Sam) Dispela meri i tingim olsem pasin bilong bihainim ol stretpela lo i bikpela samting moa, winim wanpela gutpela wok em inap kisim long rot bilong mekim pasin pamuk.—1 Korin 6:18.

Stretpela Pasin i Bikpela Samting

3. Stori long stretpela pasin.

³ “Stretpela pasin” i makim olsem man i mekim ol pasin i stret na i no gat rong long en. Long Baibel, dispela tok “stretpela pasin” long tok Grik na tok Hibru i makim samting i “stret.” I no olsem man yet i makim wanem pasin i stret na em i skelim em yet long dispela na tok em i stretpela man, nogat. (Luk 16:15) Yumi toktok long stretpela pasin i stret wantaim ol lo Jehova yet i makim. Em i stretpela pasin bilong God.—Rom 1:17; 3:21.

4. Bilong wanem stretpela pasin i bikpela samting long ol Kristen?

⁴ Bilong wanem stretpela pasin i bikpela samting? Long wanem, Jehova husat i save mekim “stretpela pasin tasol,” em i laikim lain bilong em taim ol i bihainim stretpela pasin. (Song 11:7; Sindaun 2:20-22; Habakuk 1:13) Man i mekim pasin i no stret, em i no inap pas gut wantaim God. (Sindaun 15:8) Long dispela as aposel Pol i tokim Timoti: “Oltaim yu mas givim baksait long olgeta kain laik nogut i save kamap long bel bilong ol yangpela man. Na yu mas wok long kisim stretpela pasin,” na ol narapela pasin i bikpela samting. (2 Timoti 2:22) Na tu, dispela i as na Pol i tok long “stretpela pasin olsem siot kapa” taim em i kolim ol wan wan hap bilong klos pait bilong spirit.—Efesus 6:14.

5. Olsem wanem ol sinman i ken wok long painim stretpela pasin?

⁵ Tru, i no gat wanpela man bilong graun i stretpela olgeta. Olgeta man i kisim sin long Adam, na kirap long taim mama i karim ol, olgeta i gat sin na ol i no stretpela man. Tasol Jisas i tok yumi mas wok long painim stretpela pasin. Olsem wanem yumi inap mekim olsem? Jisas i bin givim laip bilong em i nambawan olgeta olsem pe bilong baim bek yumi, na sapos yumi bilip long dispela ofa, Jehova i redi long lusim ol sin bilong yumi. (Matyu 20:28; Jon 3:16; Rom 5:8, 9, 12, 18) Long dispela as, taim yumi wok long kisim save long ol stretpela lo bilong Jehova na yumi wok strong long bihainim ol dispela lo—na yumi beten long em i ken helpim yumi long daunim ol pasin kranki bilong yumi—Jehova bai orait long lotu yumi mekim long em. (Song 1:6; Rom 7:19-25; KTH 7:9, 14) Dispela save i mekim gut tru bel bilong yumi, a?

Stretpela Pasin Namel Long Ol Lain i No Bihainim Stretpela Pasin

6. Bilong wanem dispela graun em i ples nogut na inap bagarapim bilip bilong ol Kristen bilong pastaim?

⁶ Taim Jisas i givim wok long ol disaipel long autim tok bilong em “long olgeta hap bilong graun,” ol bai i gat hatwok tru. (Aposel 1:8) Olgeta teritori bilong ol “i stap aninit long strong bilong Satan.” (1 Jon 5:19) Ol man bilong dispela graun i bin kisim ol tingting em Satan i wok strong long kamapim, na ol Kristen i stap namel long ol dispela man ol inap kisim kain tingting olsem. (Efesus 2:2) Dispela graun em i ples nogut na inap bagarapim bilip bilong ol. Sapos ol i wok long painim pastaim stretpela pasin bilong God, long dispela rot tasol ol inap sanap strong na stap gut long God. Planti ol i bin stap strong, tasol wan wan i lusim ‘rot bilong stretpela pasin.’—Sindaun 12:28; 2 Timoti 4:10.

7. Ol Kristen i gat wanem wok na dispela i mekim na ol i mas sakim ol pasin nogut bilong dispela graun?

⁷ Olsem wanem? Dispela graun nau yumi stap long en, em i gutpela ples long ol Kristen? Nogat tru! Em i nogut moa yet, winim taim bilong ol aposel. Na tu, ol i bin tromoi Satan i kam daun long graun na em i belhat na mekim pait long ol Kristen God i bin makim, em “ol arapela pikinini bilong [meri], em ol dispela manmeri i save bihainim ol lo bilong God, na ol i save autim tok bilong Jisas na bihainim em.” (KTH 12:12, 17) Na Satan i save mekim pait long olgeta man i helpim dispela “pikinini.” Tasol ol Kristen i no inap lusim dispela graun na hait long wanpela hap. Tru, ol i no bilong dispela graun, tasol ol i mas i stap long en. (Jon 17:15, 16) Na ol i mas i stap long graun na autim tok bambai ol i ken painim ol man i gat gutpela bel na skulim ol long kamap disaipel bilong Krais. (Matyu 24:14; 28:19, 20) Em nau, yumi save ol Kristen i no inap abrusim olgeta pasin nogut bilong dispela graun, olsem na ol i mas sakim ol dispela pasin. Orait nau yumi ken stori long 4-pela pasin olsem.

Pasin Pamuk

8. Bilong wanem ol Israel i kirap lotuim ol god bilong ol Moap?

⁸ Ol Israel i bin wokabaut klostu 40 yia pinis long ples drai nating na planti ol i lusim rot bilong stretpela pasin. Ol i lukim pinis planti strongpela wok Jehova i bin mekim bilong kisim bek ol, na liklik taim bai ol i go insait long Graun Bilong Promis. Tasol long dispela taim ol i kirap lotuim ol god bilong ol Moap. Bilong wanem ol i mekim olsem? Long wanem, ol i larim “pasin bilong bel kirap” i pulim ol. (1 Jon 2:16) Baibel i tok: “Ol man bilong Israel i stat long pamuk nabaut wantaim ol meri Moap.”—Namba 25:1.

9, 10. Wanem kain pasin i stap long nau em dispela i mekim na oltaim yumi mas tingim olsem ol laik nogut bilong skin i gat strong?

⁹ Dispela samting i bin kamap i soim olsem ol laik nogut bilong bel inap bagarapim ol man i no was gut. Yumi mas larim dispela i skulim yumi, long wanem, planti manmeri long nau i ting i orait long mekim pasin pamuk. (1 Korin 10:6, 8) Wanpela ripot i kam long Amerika i tok: “I kam inap long 1970 samting, long olgeta provins bilong Yunaitet Stets, i tambu long man na meri singel i stap nating wantaim. Tasol long nau planti ol i save mekim olsem. Winim 50 pesen bilong ol marit i save stap nating wantaim paslain long ol i marit.” Dispela kain pasin na ol narapela pasin nogut olsem i no stap long wanpela kantri tasol, nogat. Dispela kain pasin i kamap long olgeta hap bilong graun, na sori tru, sampela Kristen i bihainim dispela pasin bilong graun—na ol i no stap gut moa insait long kongrigesen Kristen.—1 Korin 5:11.

¹⁰ Na tu, long olgeta hap ol i kirapim ol man long mekim pasin pamuk. Ol stori i kamap long ol piksa wokabaut na TV i kamapim tingting olsem i orait long ol yangpela man na meri i slip wantaim na ol i no marit yet. Na ol i kamapim olsem pasin bilong man i slip wantaim man, em i orait tasol. Na planti piksa i soim ol man na meri i mekim maritpasin long ples klia tru. Na ol man inap lukim ol dispela kain pasin long Intenet tu. Wanpela man bilong raitim stori long niuspepa i tok, wanpela taim pikinini man bilong em i gat 7-pela krismas i lusim skul na kam bek long haus na i tokim em olsem wanpela poroman long skul i bin painim wanpela Intenet sait i soim ol meri i stap skin nating na mekim maritpasin. Tingting bilong papa i bagarap stret, tasol hamas pikinini i bin lukim ol dispela kain Intenet sait na ol i no toksave long papamama? Na tu, hamas papamama i save long ol samting i stap long ol vidio gem ol pikinini bilong ol i save pilai long en? Planti vidio gem ol pikinini i save laikim, ol i save kamapim pasin pamuk nogut tru, na ol pasin olsem marila posin samting, na pait na bagarapim man.

11. Olsem wanem famili inap abrusim ol pasin sem bilong dispela graun?

¹¹ Olsem wanem famili inap abrusim ol kain “amamas” nogut olsem? Ol i mas wok pastaim long painim stretpela pasin bilong God, na sakim olgeta samting i gat pasin pamuk na pasin sem long en. (2 Korin 6:14; Efesus 5:3) Ol papamama husat i save bosim gut ol samting ol pikinini i mekim, na i skulim ol pikinini long laikim tru Jehova na ol stretpela lo bilong em, ol i strongim ol pikinini long sakim ol piksa bilong pasin sem, ol vidio gem bilong pasin pamuk, ol piksa wokabaut na vidio i kamapim pasin pamuk, na ol narapela pasin nogut i laik pulim ol.—Lo 6:4-9.a

Ol Wanples i Laik Subim Yumi

12. Wanem hevi i kamap long taim bilong ol aposel?

¹² Taim Pol i stap long Listra long Esia Maina, em i wokim mirakel na oraitim sik bilong wanpela man. Baibel i stori olsem: “Planti manmeri i lukim dispela samting Pol i mekim, na ol i singaut long tok ples bilong Likonia olsem, ‘Ol god i kamap olsem man, na ol i kam daun long yumi.’ Na Barnabas ol i kolim god Sus. Na Pol em i man bilong mekim toktok, olsem na ol i kolim em god Hermes.” (Aposel 14:11, 12) Bihain ol dispela wankain man i laik kilim i dai Pol na Barnabas. (Aposel 14:19) Em i klia tru olsem ol dispela lain i larim ol wanples i subim ol long bihainim tingting bilong ol. I luk olsem taim sampela bilong dispela ples ol i kamap Kristen, ol i no lusim pasin bilong bilip nating long kain kain tok giaman. Long pas em i raitim long ol Kristen long Kolosi, Pol i givim tok lukaut long pasin bilong “lotu long ol ensel.”—Kolosi 2:18.

13. Wanem sampela kastam em Kristen i mas sakim? Olsem wanem em inap kisim strong bilong mekim olsem?

¹³ Long nau tu, ol Kristen tru i mas sakim ol kastam em ol wanples i save bihainim. Em ol kastam ol bilip giaman i as bilong en na i kalapim ol stiatok Kristen. Long sampela kantri, i gat planti kastam ol i save bihainim taim nupela bebi i kamap o wanpela man i dai, na as bilong ol dispela kastam em dispela tok giaman olsem yumi gat wanpela spirit i save stap yet taim yumi dai. (Saveman 9:5, 10) Na sampela ples i gat kastam bilong katim hap skin long sem bilong ol yangpela meri. Em i wanpela pasin nogut tru na i no gat wok bilong en, na em i no stret wantaim gutpela pasin ol papamama Kristen i mas mekim long ol pikinini bilong ol. (Lo 6:6, 7; Efesus 6:4) Olsem wanem ol Kristen inap sakim pasin bilong ol wanples long subim ol na lusim ol dispela kain pasin? Ol i mas bilip strong long Jehova. (Song 31:6) Stretpela God bai strongim na lukautim ol man i givim bel tru long em na ol i tok: “Yu save banisim mi na yu was gut long mi. Yu God bilong mi. Mi save bilip long yu.”—Song 91:2; Sindaun 29:25.

No Ken Lusim Tingting Long Jehova

14. Jehova i givim wanem tok lukaut long lain Israel klostu long taim ol i go insait long Graun Bilong Promis?

¹⁴ Klostu long taim ol Israel i go insait long Graun Bilong Promis, Jehova i givim tok lukaut long ol olsem ol i no ken lusim tingting long em. Em i tok: “Yupela i mas lukaut gut bai yupela i no lusim tingting long God, Bikpela bilong yumi. Nogut yupela i brukim ol lo bilong Bikpela nau mi givim long yupela. Taim yupela i gat ol planti kain kaikai bilong kaikai na yupela i wokim pinis ol gutpela haus, na taim ol bulmakau na sipsip na gol na silva na olgeta gutpela samting bilong yupela i kamap planti moa, orait yupela i no ken hambak na bikhet na lusim tingting long God, Bikpela bilong yumi.”—Lo 8:11-14.

15. Olsem wanem yumi ken save tru olsem yumi no lusim tingting long Jehova?

¹⁵ Yu ting kain samting olsem inap kamap long nau? Em inap kamap sapos yumi gat tingting kranki long wanem ol samting i bikpela samting. Tasol sapos yumi wok long painim stretpela pasin bilong God pastaim, lotu i tru bai stap olsem nambawan bikpela samting long laip bilong yumi. Bai yumi mekim olsem Pol i tokim yumi, olsem oltaim ‘yumi mas bihainim gutpela tingting’ na wok strong long autim tok. (Kolosi 4:5; 2 Timoti 4:2) Tasol sapos pasin bilong go long miting na autim tok i no bikpela samting long yumi olsem malolo o painim rot bilong kisim amamas, yumi inap lusim tingting long Jehova—olsem em bai stap nambatu long laip bilong yumi. Pol i tok, long taim bilong las de ol man bai “laikim tumas ol kain kain pasin bilong amamas . . . na ol bai i no laikim God.” (2 Timoti 3:4) Ol Kristen i gat gutpela bel ol i save skelim oltaim tingting bilong ol yet bambai ol i ken save olsem dispela kain tingting i no stiaim ol.—2 Korin 13:5.

Lukaut Long Laik Bilong Bosim Yu Yet

16. Iv na sampela long taim bilong Pol i gat wanem tingting i no stret?

¹⁶ Long Iden Satan i mekim wok long laik bilong Iv long bosim wokabaut bilong em yet na em i giamanim Iv. Iv i laik bai em yet i skelim wanem pasin i stret na wanem pasin i no stret. (Stat 3:1-6) Long taim bilong ol aposel, sampela long kongrigesen Kristen tu i gat laik long bosim wokabaut bilong ol yet. Ol i ting save bilong ol i winim save bilong Pol, olsem na Pol i kolim ol olsem ol “namba wan aposel.”—2 Korin 11:3-5; 1 Timoti 6:3-5.

17. Olsem wanem yumi ken abrusim tingting olsem yumi laik bosim wokabaut bilong yumi yet?

¹⁷ Long nau, planti man bilong graun i save “bihainim kwik olgeta kranki tingting bilong ol yet” na “tingim ol yet i bikpela man tru,” na sampela Kristen i bin kisim dispela kain tingting. Na sampela i bin kamap birua bilong tok i tru. (2 Timoti 3:4; Filipai 3:18) Long ol samting bilong lotu i tru, yumi mas larim Jehova i soim rot long yumi na yumi mas wok gut wantaim “wokboi i gat gutpela tingting” na ol elda bilong kongrigesen. Em wanpela rot bilong painim stretpela pasin, na dispela bai lukautim yumi na yumi no ken kisim tingting olsem yumi laik bosim wokabaut bilong yumi yet. (Matyu 24:45-47; Song 25:9, 10; Aisaia 30:21) Dispela lain God i bin makim, em i “olsem strongpela pos i karim tok tru.” Jehova i bin givim dispela lain long yumi bilong lukautim na soim rot long yumi. (1 Timoti 3:15) Sapos yumi daun long bikpela wok dispela lain i holim, bai yumi ‘no wok long kamapim biknem bilong yumi yet’ taim yumi mekim pasin daun na stap aninit long stretpela laik bilong Jehova.—Filipai 2:2-4; Sindaun 3:4-6.

Bihainim Pasin Bilong Jisas

18. Baibel i kirapim yumi long bihainim wanem ol pasin bilong Jisas?

¹⁸ Baibel i mekim tok profet long Jisas olsem: “Yu save laikim stretpela pasin na yu no laikim tru pasin nogut.” (Song 45:7; Hibru 1:9) Em i gutpela pasin tru yumi ken bihainim! (1 Korin 11:1) Jisas i save long ol stretpela lo bilong Jehova, na tu, em i laikim tumas ol dispela lo. So taim Satan i traim Jisas long ples drai nating, em i no gat tupela tingting—wantu em i sakim Satan na em i no laik lusim rot bilong “stretpela pasin.”—Sindaun 8:20; Matyu 4:3-11.

19, 20. Wanem ol gutpela samting i save kamap taim yumi wok long painim stretpela pasin?

¹⁹ Tru, ol laik nogut bilong skin i strong tru. (Rom 7:19, 20) Tasol sapos yumi laikim tumas stretpela pasin, dispela bai strongim yumi long sakim ol pasin nogut. (Song 119:165) Pasin bilong laikim tru stretpela pasin bai banisim yumi taim ol pasin nogut i laik pulim yumi. (Sindaun 4:4-6) Tingim, taim yumi pundaun long wanpela traim, i olsem yumi larim Satan i win. Mobeta yumi sakim em na larim Jehova i win!—Sindaun 27:11; Jems 4:7, 8.

²⁰ Ol Kristen i wok long painim stretpela pasin, olsem na ‘ol stretpela pasin Jisas Krais i save kamapim, ol i pulap tru long ol. Na ol manmeri bai i lukim na ol bai i givim biknem long God na litimapim nem bilong en.’ (Filipai 1:10, 11) Ol i “kamap ol nupela manmeri, em ol manmeri God i mekim ol i kamap nupela na . . . pasin bilong ol i stretpela olgeta na i holi tru.” (Efesus 4:24) Ol i bilong Jehova na ol i stap bilong mekim wok bilong em, ol i no stap bilong mekim laik bilong ol yet. (Rom 14:8; 1 Pita 4:2) Dispela samting i save bosim tingting na pasin bilong ol. Ol i save amamasim tru bel bilong Papa bilong ol i stap long heven!—Sindaun 23:24.

[Futnot]