Ol Man​—Yupela i Save Daun Long Wok Bos Bilong Krais?

“Het bilong olgeta man em Krais.”​—1 KO. 11:3.

1. Wanem samting i soim olsem Jehova i save mekim stret olgeta wok bilong em?

KAMAPIM TOK HAIT 4:11 i tok: “Bikpela, yu God bilong mipela. Yu tasol yu stap antap tru na inap tru long olgeta man i ken amamas long yu na litimapim nem bilong yu na i stap aninit long strong bilong yu. Long wanem, yu bin wokim olgeta samting. Long laik bilong yu yet yu bin mekim olgeta samting i kamap, na nau dispela olgeta samting i stap.” God Jehova i bin wokim olgeta samting, olsem na em i Nambawan Bikpela King bilong heven na graun na em i bosim olgeta samting em i bin wokim. Jehova ‘i save mekim stret olgeta wok bilong en na i no save mekim ol samting i paul nabaut,’ dispela i kamap ples klia long pasin bilong em long stretim gut wok bilong ol ensel.”​—1 Ko. 14:33; Ai. 6:​1-3; Hi. 12:​22, 23.

2, 3. (a) Husat em i namba wan samting Jehova i bin wokim? (b) Yumi ken tok wanem long namba bilong God na bilong fesbon Pikinini bilong em?

² Taim God i no wokim yet wanpela samting, em wanpela tasol i stap inap longpela taim tru. Namba wan samting em i bin wokim em wanpela ensel ol i kolim “Tok,” long wanem, em i Mausman bilong Jehova. Long rot bilong dispela Tok, olgeta narapela samting i kamap. Bihain, em i kam long graun olsem man i gutpela olgeta na ol i kolim em olsem Jisas Krais.​—Ritim Jon 1:​1-3, 14.

³ Baibel i tok wanem long namba bilong God na bilong fesbon Pikinini bilong em? Holi spirit i kirapim aposel Pol long raitim tok olsem: “Mi laik bai yupela i save tu long narapela tok olsem. Het bilong olgeta man em Krais, na het bilong meri em man bilong en, na het bilong Krais em God.” (1 Ko. 11:3) Krais i stap aninit long wok bos bilong Papa bilong em. Wok bos na pasin bilong stap daun long en i bikpela samting na bai i gat bel isi, na ol samting i stap stret insait long lain i stap long heven na long graun. Dispela man em long rot bilong em ‘God i bin wokim olgeta arapela samting,’ em tu i mas daun long wok bos bilong God.​—Kl. 1:16.

4, 5. Jisas i gat wanem tingting long pasin bilong stap daun long wok bos bilong Jehova?

⁴ Jisas i gat wanem tingting long pasin bilong stap daun long wok bos bilong Jehova, na long em i kam daun long graun? Baibel i tok: “Maski [Krais Jisas] i stap olsem God, em i no tingting liklik long kisim namba, olsem em i mas i gat wankain namba olsem God. Nogat. Em i lusim olgeta samting em i bin holim na em i kamap olsem wanpela wokboi. Na em i kamap wankain olsem ol man. Na tu, taim em i lukim olsem em i kamap wankain olsem ol man, em i daunim em yet na i bihainim tok i go inap long em i dai, yes, inap long em i dai long diwai pos.”​—Fl. 2:​6-8, NW.

⁵ Long olgeta taim, Jisas i bin daun long laik bilong Papa bilong em. Em i tok: “Mi no inap mekim wanpela samting long tingting bilong mi yet. . . . Kot bilong mi em i stret, long wanem, mi no save bihainim laik bilong mi yet. Nogat. Mi bihainim laik bilong Papa, em i bin salim mi na mi kam.” (Jo. 5:30) Em i tok tu olsem: “Oltaim mi save mekim ol samting [Papa bilong mi] i laikim.” (Jo. 8:29) Klostu long pinis bilong laip bilong em long graun, Jisas i beten long Papa bilong em na i tok: “Mi bin soim biknem na strong bilong yu long ol manmeri bilong dispela graun. Mi pinisim pinis dispela wok yu bin givim mi long mekim.” (Jo. 17:4) Tru tumas, Jisas i save olsem God i het bilong em na em i no hatwok long daun long wok bos bilong God.

Pasin Bilong Daun Long Papa i Helpim Pikinini

6. Jisas i kamapim wanem ol gutpela pasin?

⁶ Taim Jisas i stap long graun, em i kamapim planti gutpela pasin. Wanpela bilong ol em pasin bilong em long laikim Papa. Em i tok: “Mi laikim tru Papa.” (Jo. 14:31) Em i kamapim tu pasin bilong laikim tru ol manmeri. (Ritim Matyu 22:​35-40.) Jisas i mekim gutpela pasin na i tingim gut ol man, em i no mekim hatpela pasin o bosim strong ol man. Em i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, . . . mi save mekim pasin isi long ol man na mi save daunim mi yet. . . . Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.” (Mt. 11:​28-30) Gutpela pasin na tok bilong Jisas i mekim gut bel bilong ol manmeri i olsem sipsip na i gat kain kain krismas, na moa yet ol man em ol narapela i daunim ol.

7, 8. Lo i tok meri i karim blut em i no ken mekim wanem? Jisas i mekim wanem kain pasin long em?

⁷ Tingim pasin Jisas i mekim long ol meri. Kirap long bipo yet na i kam inap long nau, planti man i mekim pasin nogut long ol meri. Ol bikman bilong lotu long Israel bilong bipo, ol tu i kain man olsem. Tasol Jisas i mekim pasin rispek long ol meri. Dispela i kamap ples klia long pasin em i bin mekim long wanpela meri i bin karim blut inap 12-pela yia. Dispela meri i bin lukim planti dokta na “ol i bin givim planti pen long em,” na em i bin tromoi olgeta mani bilong em bilong oraitim sik. Maski em i mekim ol dispela samting, “sik bilong en i no orait liklik.” Lo i tok, dispela meri i no klin. Na sapos wanpela i tatsim em, em tu i no klin.​—Wkp. 15:​19, 25.

⁸ Taim dispela meri i harim olsem Jisas i wok long oraitim ol sikman, em i go klostu long ol man i raunim Jisas, na i tok: “Sapos mi putim han tasol long klos bilong em, bai mi orait gen.” Em i tatsim Jisas na wantu sik bilong em i pinis. Jisas i save olsem i no stret long dispela meri i holim klos bilong em. Tasol Jisas i no krosim em. Nogat, em i mekim gutpela pasin long meri. Em i pilim hevi bilong meri i karim sik inap planti yia na em i luksave olsem em i gat bikpela laik long kisim helpim. Long pasin sori, Jisas i tokim em olsem: “Pikinini, yu bilip long mi, olsem na yu kamap orait gen. Yu go, na bel bilong yu i ken i stap isi. Sik bilong yu i ken pinis.”​—Mk. 5:​25-34.

9. Taim ol disaipel bilong Jisas i traim long pasim ol pikinini long i kam long em, em i mekim wanem?

⁹ Ol pikinini tu i no pret long Jisas. Wanpela taim, taim ol manmeri i bringim ol pikinini i kam long Jisas, ol disaipel bilong em i krosim ol. Ol i ting Jisas bai les long ol pikinini. Tasol Jisas i no gat dispela kain tingting, nogat. Baibel i tok: “Jisas i lukim dispela, na em i bel nogut. Em i tokim ol disaipel olsem, ‘Yupela larim ol pikinini i kam long mi. Yupela i no ken pasim ol. Nogat. Kingdom bilong God em i bilong kain man olsem ol dispela pikinini.’ ” Na tu, “em i holim ol pikinini long han bilong en, na i putim han antap long ol, na em i askim God long mekim gut long ol.” I no olsem Jisas i orait tasol long ol pikinini, nogat, em i amamas long ol i kam long em.​—Mk. 10:​13-16.

10. Olsem wanem Jisas i bin kisim ol gutpela pasin em i kamapim?

¹⁰ Olsem wanem Jisas i bin kisim ol gutpela pasin em i kamapim taim em i stap long graun? Taim em i no kam yet long graun, em i bin stap wantaim Papa bilong em inap planti bilion yia na lukim pasin bilong Em long mekim ol samting, na dispela i skulim em. (Ritim Sindaun 8:​22, 23, 30, 31.) Long heven, em i bin lukim gutpela pasin bilong Jehova long bosim ol samting Em i bin wokim, na Jisas i bihainim dispela pasin. Sapos Jisas i no bin daunim em yet, em i no inap mekim olsem. Em i amamas tru long daun long Papa bilong em, na Jehova i amamas tru long em i gat kain Pikinini olsem. Taim Jisas i stap long graun, em i kamapim stret ol gutpela pasin bilong Papa bilong em. Em i wanpela gutpela samting tru long yumi ken daun long Krais, em King God i bin makim bilong bosim Kingdom bilong em long heven!

Bihainim Pasin Bilong Krais

11. (a) Yumi mas wok strong long bihainim pasin bilong husat? (b) Bilong wanem ol man insait long kongrigesen i mas wok strong long bihainim Jisas?

¹¹ Olgeta insait long kongrigesen Kristen, na moa yet ol man, i mas wok strong oltaim long bihainim ol pasin bilong Krais. Olsem yumi stori pinis, Baibel i tok: “Het bilong olgeta man em Krais.” Krais i bihainim pasin bilong Man i olsem Het bilong em, em God tru, na olsem tasol ol man Kristen i mas bihainim pasin bilong Krais​—em het bilong ol. Taim aposel Pol i kamap Kristen, em i bin mekim olsem. Em i tokim ol wanbilip Kristen olsem: “Yupela i mas bihainim pasin bilong mi na wokabaut, olsem mi tu mi save bihainim pasin bilong Krais na wokabaut.” (1 Ko. 11:1) Na aposel Pita i tok: “God i singautim yupela pinis bilong bihainim dispela kain pasin, long wanem, Krais tu i bin karim pen bilong helpim yupela. Em i soim yupela pinis dispela pasin bilong em, bai yupela i ken bihainim.” (1 Pi. 2:21) I gat narapela as tu na ol man i mas tingim dispela tok bilong bihainim pasin bilong Krais. Dispela as em olsem: Ol man i save kamap elda na kongrigesen sevan. Jisas i amamas taim em i bihainim pasin bilong Jehova, na olsem tasol ol man Kristen i kisim amamas taim ol i bihainim Krais na ol pasin bilong em.

12, 13. Ol elda i mas mekim wanem kain pasin long ol sipsip i stap long han bilong ol?

¹² Ol elda insait long kongrigesen Kristen i gat wok long lain long bihainim pasin bilong Krais. Pita i mekim dispela tok long ol elda: ‘Yupela i mas lukautim gut ol manmeri bilong God. Na yupela i mas amamas long mekim dispela wok. Yupela i no ken mekim dispela wok bilong kisim pe tasol. Nogat. Yupela i mas i gat laik tru long mekim dispela wok. Yupela i no ken i stap olsem ol bikman na daunim ol manmeri God i bin putim long han bilong yupela. Nogat. Yupela i mas mekim gutpela pasin tasol, bai ol i ken lukim na bihainim.’ (1 Pi. 5:​1-3) Ol elda Kristen i no ken mekim hatpela pasin, bosim strong tumas ol narapela, na i no tingim gut ol man. Ol i bihainim pasin bilong Krais, na ol i wok strong long mekim gutpela pasin long ol sipsip em God i bin putim long han bilong ol, na ol i tingim gut ol, na mekim pasin daun.

¹³ Ol man i go pas long ol wok insait long kongrigesen, ol i no gutpela olgeta na oltaim ol i mas tingim dispela. (Ro. 3:23) Olsem na ol i gat laik long kisim save long Jisas na bihainim pasin laikim bilong em. Ol i mas tingim tingim long bel ol pasin em God na Krais i save mekim long ol manmeri, na wok strong long bihainim ol dispela pasin. Pita i tok: “Yupela olgeta i mas bihainim pasin bilong daunim yupela yet na i stap aninit long ol arapela manmeri bilong God. Yumi save, ‘God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.’ ”​—1 Pi. 5:5.

14. Olsem wanem ol elda inap litimapim nem bilong ol arapela?

¹⁴ Ol man i holim wok insait long kongrigesen, ol i mas mekim ol gutpela pasin long ol sipsip bilong God. Rom 12:10 i tok: “Yupela i mas givim bel bilong yupela long ol arapela manmeri bilong God, na laikim ol tru olsem ol brata bilong yupela stret. Yupela i mas strong long litimapim nem bilong ol arapela tasol.” Ol elda na kongrigesen sevan i save litimapim nem bilong ol narapela. Olsem ol Kristen i save mekim, ol dispela man i ‘no tingting long ol yet tasol, na wok long kamapim biknem bilong ol. Nogat. Ol i daunim ol yet na ting pasin bilong ol arapela i winim pasin bilong ol.’ (Fl. 2:3) Ol man i go pas long wok, ol i mas tingim olsem ol arapela i winim ol. Taim ol dispela man i mekim olsem, ol i bihainim tok bilong Pol: “Yumi man i gat strongpela bilip, yumi gat wok bilong helpim ol man i no gat strongpela bilip na karim hevi bilong ol. Yumi no ken ting long helpim yumi yet tasol. Yumi olgeta wan wan yumi mas wok long helpim ol brata, bai ol i ken kisim gutpela pasin na bilip bilong ol i ken kamap strong. Yumi save, Krais tu i no bin ting long helpim em yet tasol.”​—Ro. 15:​1-3.

‘Givim Ona Long Meri’

15. Man marit i mas mekim wanem kain pasin long meri bilong em?

¹⁵ Tingim tok Pita i givim long ol man marit. Em i tok: “Yupela ol maritman, yupela i mas bihainim gutpela tingting na sindaun gut wantaim ol meri bilong yupela. Bodi bilong ol meri i no strong tumas, olsem na yupela i mas mekim gutpela pasin [“givim ona,” NW] long ol.” (1 Pi. 3:7) Pasin bilong givim ona long narapela i makim olsem yumi tingim em olsem gutpela samting tru. Olsem na yumi tingim ol samting em i nidim, laikim, na tingting long en, na yumi bihainim laik bilong em, sapos dispela i no brukim lo bilong Baibel. Ol man marit i mas mekim kain pasin olsem long meri bilong ol.

16. Baibel i mekim wanem tok lukaut long man marit i mas givim ona long meri bilong em?

¹⁶ Taim Pita i tokim ol man marit long givim ona long meri bilong ol, em i tokim ol: “Sapos yupela i bihainim dispela pasin, orait i no gat wanpela samting bai i pasim ol prea bilong yupela.” (1 Pi. 3:7) Dispela i kamapim klia olsem Jehova i tingim tru pasin em man marit i mekim long meri bilong em. Sapos man i no givim ona long meri bilong em, dispela inap mekim na God i no harim beten bilong man. Na tu, taim man i givim ona long meri, meri bai amamas long mekim gutpela pasin long man.

17. Man marit i mas laikim meri bilong em inap long wanem mak?

¹⁷ Long pasin bilong man marit long laikim meri bilong em, Baibel i givim dispela skultok: “Yupela man, yupela i mas laikim tru ol meri bilong yupela, olsem yupela i save laikim bodi bilong yupela yet. . . . Yumi save, i no gat wanpela man i save birua long bodi bilong em yet. Nogat. Em i save givim kaikai long en na lukautim gut, olsem Krais i save mekim long sios, . . . yupela i mas laikim tru meri bilong yupela, olsem yupela i save laikim yupela yet.” (Ef. 5:​28, 29, 33) Man i mas laikim meri bilong em inap long wanem mak? Pol i tok: “Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong em yet bilong helpim sios.” (Ef. 5:25) Yes, man marit i mas redi long i dai bilong helpim meri bilong em, wankain olsem Jisas i bin mekim bilong helpim ol narapela. Taim man Kristen i mekim gutpela pasin isi long meri bilong em, na tingim em tru, na daunim sampela laik bilong em yet, meri bai i no hatwok long daun long man bilong em.

18. Ol man marit i kisim wanem helpim bilong mekim wok bilong ol olsem man marit?

¹⁸ Yu ting i hatwok tumas long man marit i givim kain ona olsem long meri bilong em? Nogat, Jehova i no save askim ol man long mekim samting ol i no inap long mekim. Na tu, ol man i lotuim Jehova, ol inap kisim nambawan bikpela strong long heven na graun​—em holi spirit bilong God. Jisas i tok: “Yupela papa i save mekim planti pasin nogut, tasol yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.” (Lu. 11:13) Taim man marit i beten, em inap askim Jehova long helpim em long rot bilong holi spirit bambai em inap mekim gutpela pasin long ol narapela man, na long meri bilong em tu.​—Ritim Aposel 5:32.

19. Stadi i kamap bihain long dispela bai stori long wanem samting?

¹⁹ Tru tumas, ol man i gat bikpela wok long lain long pasin bilong i stap daun long Krais na bihainim pasin bilong em long mekim wok bos. Tasol olsem wanem long ol meri, na moa yet ol meri marit? Stadi i kamap bihain long dispela bai stori long ol meri i mas i gat wanem tingting long wok Jehova i bin givim long ol.

Ol Meri, Bilong Wanem Yupela i Mas Daun Long Wok Bos?

“Het bilong meri em man bilong en.”​—1 KO. 11:3.

1, 2. (a) Aposel Pol i tok wanem long rot Jehova i stretim bilong mekim wok bos na pasin bilong stap daun long en? (b) Bai yumi skelim wanem ol askim long dispela stadi?

JEHOVA i stretim rot bilong mekim wok bos na aposel Pol i stori long dispela taim em i tok “het bilong olgeta man em Krais” na “het bilong Krais em God.” (1 Ko. 11:3) Stadi i kamap paslain long dispela i tok, Jisas i tingim wok bos olsem wanpela gutpela samting na em i amamas long i stap daun long Het bilong em, God Jehova, na stadi i kamapim tu olsem het bilong ol man Kristen em Krais. Krais i mekim gutpela pasin, pasin isi, pasin sori, na daunim laik bilong em yet taim em i stap wantaim ol narapela. Ol man insait long kongrigesen i mas mekim wankain pasin long ol narapela, na moa yet long meri bilong ol.

² Tasol olsem wanem long ol meri? Husat em i het bilong ol? Pol i tok: “Het bilong meri em man bilong en.” Ol meri i mas ting olsem wanem long dispela tok bilong Baibel? Meri i mas bihainim dispela stiatok sapos man bilong em i no wanbilip? Yu ting pasin bilong daun long man i makim olsem meri i no ken kamapim tingting bilong em taim ol i wokim ol disisen? Meri inap mekim wanem na bai man i litimapim nem bilong em?

“Mi Mas Mekim Kamap Wanpela Poroman Bilong Helpim Em”

3, 4. Bilong wanem pasin bilong man long stap het bilong famili i helpim gut marit?

³ God i stretim rot pinis long husat i mas i stap olsem het bilong husat. Taim em i wokim Adam pinis, God Jehova i tok: “Em i no gutpela long dispela man i stap wanpis. Mi mas mekim kamap wanpela poroman bilong helpim em.” Taim Jehova i wokim Iv, Adam i amamas tru long em i gat poroman bilong helpim em, olsem na em i tok: “Bun bilong em i kamap long bun bilong mi, na mit bilong em i kamap long mit bilong mi.” (Stt. 2:​18-24) Adam na Iv inap kamap papa na mama bilong ol lain manmeri i gutpela olgeta, em ol bai stap amamas oltaim long wanpela paradais bai kamap long olgeta hap bilong graun.

⁴ Namba wan papamama bilong yumi ol i bikhet, olsem na ol gutpela samting bilong Iden i lus. (Ritim Rom 5:12.) Tasol maski i olsem, God i tingim yet olsem man em i het bilong meri. Taim man i mekim gut wok bos bilong em na meri i daun long en, dispela bai helpim tru marit na ol inap i stap amamas. Ol marit bai kisim wankain tingting olsem Jisas i bin kisim long pasin bilong daun long Het bilong em, Jehova. Taim em i no kam yet long graun, Jisas i “bin amamas i stap oltaim long ai bilong Bikpela.” (Snd. 8:​30, 31) Sin i mekim na ol man i no inap mekim wok bos i gutpela olgeta, na ol meri i no inap daun long man long pasin i gutpela olgeta. Tasol taim man na meri marit i wok strong long mekim gut wok bilong ol, dispela bai mekim na tupela inap i stap belgut tru nau long dispela taim.

5. Bilong wanem ol marit i mas bihainim tok i stap long Rom 12:10?

⁵ Bilong marit i ken stap gut, em i bikpela samting long tupela wantaim i bihainim dispela tok em Baibel i mekim long olgeta Kristen: “Yupela i mas givim bel bilong yupela long ol arapela manmeri bilong God, na laikim ol tru olsem ol brata bilong yupela stret. Yupela i mas strong long litimapim nem bilong ol arapela tasol.” (Ro. 12:10) Na tu, man na meri wantaim i mas wok strong long ‘mekim gutpela pasin long narapela na givim bel bilong ol long narapela, na ol i mas lusim sin bilong narapela.’​—Ef. 4:32.

Taim Poroman Marit i No Wanbilip

6, 7. Wanem samting inap kamap sapos meri Kristen i daun long man i no wanbilip?

⁶ Olsem wanem sapos poroman marit bilong yu i no lotuim Jehova? Planti taim em man husat i no wanbilip. Sapos olsem, meri i mas mekim wanem kain pasin long em? Baibel i tok: “Yupela maritmeri, yupela i mas aninit long ol man bilong yupela. Na sapos sampela bilong ol dispela man i no save bihainim tok bilong God, orait ol i ken lukim gutpela pasin bilong yupela meri bilong ol. Na maski yupela i no mekim wanpela tok long ol, bai ol i inap tanim bel, long wanem, ol i lukim yupela meri i save wokabaut stret na aninit tru long ol.”​—1 Pi. 3:​1, 2.

⁷ Baibel i tok meri i mas daun long man i no wanbilip. Gutpela pasin bilong meri inap kirapim man long tingim samting i kirapim meri long mekim kain gutpela pasin olsem. Dispela inap mekim na man bai kirap skelim bilip bilong meri Kristen bilong em, na bihain em yet i kisim tok i tru.

8, 9. Meri Kristen inap mekim wanem sapos man bilong em i no laik kisim save long tok i tru maski meri i mekim gutpela pasin?

⁸ Tasol olsem wanem sapos man i no wanbilip em i no laik kisim save long tok i tru? Baibel i strongim meri long kamapim ol pasin Kristen long olgeta taim, maski em i hatwok. Olsem, 1 Korin 13:4 i tok: “Man i save givim bel bilong en long ol arapela, em i no save kros kwik.” Olsem na gutpela sapos meri Kristen i wok yet long ‘aninit tru long [man] na mekim pasin isi, em i no ken belhat kwik long [man] taim em i rongim em,’ em i mas kamapim pasin laikim na karim hevi bilong dispela samting. (Ef. 4:2) Long rot bilong helpim yumi kisim long strong bilong God​—holi spirit bilong em​—yumi inap kamapim yet ol pasin Kristen maski i hatwok.

⁹ Pol i tok: “God i givim pawa long mi, na long dispela rot mi gat strong long mekim olgeta samting.” (Fl. 4:​13, NW) Spirit bilong God i helpim poroman marit Kristen long mekim planti samting em i no inap mekim long strong bilong em yet. Olsem, sapos poroman marit i mekim hatpela pasin, ating narapela i gat laik long bekim wankain pasin long em. Tasol Baibel i tokim olgeta Kristen olsem: “Yupela i no ken bekim pasin nogut long ol. . . . Buk bilong God i gat tok olsem, ‘Bekim rong, em i wok bilong mi. Mi yet bai mi bekim rong bilong ol.’ ” (Ro. 12:​17-19) Na tu, 1 Tesalonaika 5:15 i tok: “Sapos ol i mekim pasin nogut long yupela, orait yupela i no ken bekim pasin nogut long ol. Olgeta taim yupela i mas strong long mekim gutpela pasin long ol manmeri bilong God na long olgeta manmeri.” Long helpim yumi kisim long holi spirit bilong Jehova, yumi inap mekim ol samting yumi no inap mekim long strong bilong yumi yet. I stret tru long yumi beten askim God long givim spirit bilong em bilong inapim yumi long ol samting yumi sot long en!

10. Taim ol man i no mekim gutpela tok o gutpela pasin long Jisas, em i mekim wanem?

¹⁰ Jisas i stap gutpela piksa tru long pasin em i mekim long ol man i no mekim gutpela tok o gutpela pasin long em. Long 1 Pita 2:​23, Baibel i tok: “Ol i bin tok nogut long em, tasol em i no bekim tok nogut bilong ol. Em i karim pen, tasol em i no tok long bagarapim ol. Nogat. Em i putim em yet long han bilong God, em dispela Jas i save skelim stret olgeta samting.” Baibel i strongim yumi long bihainim gutpela pasin bilong em. No ken larim pasin nogut bilong ol narapela i kirapim yu long kros. Baibel i kirapim olgeta Kristen long “laikim tru ol arapela manmeri bilong God na marimari long ol, na lusim pasin bilong bikhet. Sapos ol man i mekim nogut long yupela, orait yupela i no ken bekim.”​—1 Pi. 3:​8, 9.

I Stret Meri i Kamapim Tingting Bilong Em?

11. Sampela meri bai kisim wanem gutpela wok tru?

¹¹ Olsem wanem? Pasin bilong daun long wok bos bilong man i makim olsem meri i no ken kamapim tingting bilong em long ol samting bilong famili o long ol narapela samting? Nogat, i no olsem. Jehova i givim planti gutpela wok long ol meri na ol man wantaim. Tingim gutpela wok tru lain 144,000 manmeri i kisim bilong mekim wok king na pris long heven aninit long Krais taim em i bosim dispela graun! Insait long dispela lain i gat ol meri tu. (Ga. 3:​26-29) Tru tumas, Jehova i givim bikpela wok long ol meri insait long ol wok bilong em.

12, 13. Kamapim wanpela eksampel i soim olsem ol meri i autim ol tok profet.

¹² Long taim bilong ol man i bin raitim Baibel, ol meri i autim ol tok profet. Buk Joel 2:​28, 29 i tok: “Bai mi kapsaitim spirit bilong mi long olgeta manmeri. Na ol pikinini man na pikinini meri bilong yupela bai i autim tok bilong mi olsem ol profet. . . . Na long dispela taim bai mi kapsaitim spirit bilong mi tu long ol wokboi na ol wokmeri nating.”

¹³ Inap 120 disaipel bilong Jisas i bung long rum antap bilong wanpela haus long Jerusalem long de Pentikos bilong 33 C.E., na insait long dispela lain i gat ol meri na ol man. God i kapsaitim spirit bilong em antap long dispela lain olgeta. Olsem na Pita inap kolim tok bilong profet Joel na em i tok dispela tok profet i stret long ol man na ol meri tu. Pita i tok: “God i tok, ‘Klostu long las de bai mi kapsaitim Spirit bilong mi long olgeta manmeri. Na ol pikinini man na pikinini meri bilong yupela bai i autim tok bilong mi olsem ol profet. . . . Na long dispela taim bai mi kapsaitim Spirit bilong mi long ol wokboi na ol wokmeri bilong mi, na bai ol i autim tok bilong mi olsem ol profet.’ ”​—Ap. 2:​16-18.

14. Ol meri i bin mekim wanem bilong mekim lotu Kristen i kamap bikpela?

¹⁴ Long taim bilong ol aposel, ol meri i mekim bikpela wok bilong mekim lotu Kristen i kamap bikpela. Ol i autim tok bilong Kingdom Bilong God long ol narapela na mekim ol narapela wok i helpim wok autim tok. (Lu. 8:​1-3) Olsem: Aposel Pol i tok Fibi “i gat wok bilong helpim sios bilong taun Senkria.” Na taim Pol i salim tok gude long ol wanwok bilong em, em i kolim nem bilong sampela gutpela meri, olsem “Trifina wantaim Trifosa. Tupela i save hatwok long mekim wok bilong Bikpela.” Em i tingim tu “Persis, em i pren tru bilong mi. Em i bin hatwok long mekim wok bilong Bikpela.”​—Ro. 16:​1, 12.

15. Ol meri i mekim wanem wok bilong mekim lotu Kristen i kamap bikpela long taim bilong yumi?

¹⁵ Long taim bilong yumi, bikpela hap bilong 7 milion manmeri husat i autim gutnius bilong Kingdom Bilong God long olgeta hap, em ol meri i gat kain kain krismas. (Mt. 24:14) Planti bilong ol i insait long fultaim sevis, wok misineri, na insait long ol famili Betel. Man bilong raitim song, Devit, em i tok: “Bikpela i givim tok long ol manmeri bilong en, na planti meri i go autim dispela tok.” (Sng. 68:11) Dispela tok i tru olgeta! Jehova i tingim tru wok ol meri i mekim bilong autim gutnius na mekim ol samting bilong kamapim laik bilong em. Taim God i tok ol meri Kristen i mas daun long man, dispela i no makim olsem meri i no ken kamapim tingting bilong em, nogat.

Tupela Meri Husat i Bin Kamapim Tingting Bilong Ol

16, 17. Olsem wanem stori bilong Sara i soim olsem ol meri marit inap kamapim tingting bilong ol?

¹⁶ Sapos Jehova i givim planti gutpela wok long ol meri, ating i stret long ol man marit i mas kisim tingting bilong ol meri paslain long ol i wokim ol bikpela disisen. Ol i bihainim savetingting sapos ol i mekim olsem. Baibel i kamapim sampela stori we ol meri i bin toktok o mekim sampela samting, maski ol i no bin kisim tingting bilong man bilong ol pastaim. Tingim tupela stori olsem.

¹⁷ Sara, meri bilong Abraham, i wok long tokim Abraham long rausim namba tu meri na pikinini man bilong em, long wanem, ol i no gat pasin rispek. “Dispela tok i mekim Abraham i bel hevi,” tasol God i no bel hevi long en. Jehova i tokim Abraham: “Yu no ken bel hevi long wokmeri Hagar wantaim pikinini bilong en. Yu mas bihainim tok bilong Sara.” (Stt. 21:​8-12) Abraham i bihainim tok bilong Jehova, na em i harim tok Sara i mekim na i mekim olsem Sara i tok.

18. Abigel i go pas long mekim wanem?

¹⁸ Tingim tu Abigel, meri bilong Nabal. Taim Devit i ranawe long King Sol husat i jeles long em, Devit i wokim kem na stap inap sampela hap taim klostu long lain sipsip na meme bilong Nabal. Devit na ol wokman bilong em i no kisim wanpela samting bilong dispela maniman, nogat, ol i lukautim ol animal samting bilong em. Tasol Nabal “em i man bilong kros na pasin bilong en i no gutpela,” na em i “tok nogut” long ol wokman bilong Devit. “Pasin bilong en i nogut tru” na em i “krankiman.” Long gutpela pasin ol wokman bilong Devit i askim Nabal long givim kaikai samting long ol, tasol em i no laik givim. Abigel i mekim wanem taim em i harim dispela samting? Em i no tokim Nabal, na “kwiktaim em i bungim 200 bret na tupela skin meme ol i bin pulapim wain long en, na 5-pela sipsip i kuk pinis na 20 kilogram wit ol i bin kukim long paia na 100 mekpas pikinini wain ol i bin mekim drai na 200 mekpas pikinini fik ol i bin mekim drai,” na em i givim long Devit na ol wokman bilong em. Yu ting samting Abigel i mekim em i stret? Baibel i tok: “Bikpela i kilim Nabal i dai.” Bihain Devit i maritim Abigel.​—1 Sml. 25:​2, 3, 14-19, 23-25, 38-42.

“Litimapim Nem Bilong Meri”

19, 20. Wanem samting i mekim na yumi ken litimapim tru nem bilong meri?

¹⁹ Baibel i litimapim nem bilong meri marit husat i mekim ol samting long rot Jehova i makim. Buk Sindaun i litimapim nem bilong “meri i gat gutpela pasin tru,” na i tok: “Kain meri olsem i winim olkain ston i dia tumas. Bai man bilong dispela kain meri i save gut long meri i bihainim gutpela pasin oltaim. Na meri bai i helpim em na em i gat planti samting. Dispela meri i save mekim gutpela pasin tasol long man bilong en.” Na tu, “olgeta tok bilong en i kamapim gutpela tingting na save bilong en. Taim em i lukautim ol samting long haus bilong en, em i no save les. Nogat. Em i save wok strong na mekim gutpela wok tumas. ‘Ure, ure long mama bilong mipela.’ Ol pikinini bilong dispela meri i save tok olsem. Na man bilong en i litimapim nem bilong em moa yet.”​—Snd. 31:​10-12; 26-28.

²⁰ Wanem samting i mekim na yumi ken litimapim tru nem bilong meri? Sindaun 31:30 i tok: “Wanpela meri inap givim switpela tok long yumi, tasol pasin bilong en i narakain. Na maski meri i luk nais tru, em i no inap i stap olsem oltaim. Mobeta yumi litimapim nem bilong meri i save aninit long Bikpela.” Wanpela samting bilong dispela pasin bilong aninit long God i olsem: Meri i mas amamas long daun long wok bos God i bin makim. “Het bilong meri em man bilong en,” wankain olsem “het bilong olgeta man em Krais,” na “het bilong Krais em God.”​—1 Ko. 11:3.

Tenkyu Long Presen God i Givim

21, 22. (a) I gat wanem ol as na ol marit Kristen inap tenkyu long marit em God i givim olsem presen? (b) Bilong wanem yumi mas rispektim wok bos em Jehova i putim? (Lukim blok long pes 17.)

²¹ I gat planti as na ol marit Kristen i ken tenkyu tru long God! Ol inap mekim ol samting wantaim na stap amamas. Na moa yet ol i ken tenkyu long marit em God i givim olsem presen, long wanem, dispela i mekim na ol inap pas gut wantaim na wokabaut wantaim Jehova. (Rut 1:9; Mai. 6:8) Jehova​—As bilong marit​—i save gut long wanem samting i helpim ol marit long i stap amamas. Oltaim mekim ol samting long pasin em i laikim, na bai ‘yupela i amamas long Bikpela na em bai i strongim yupela,’ long dispela taim bilong planti hevi.​—Neh. 8:10.

²² Man marit Kristen husat i laikim tru meri bilong em olsem em i save laikim em yet, em bai mekim wok bos long gutpela pasin isi. Em bai laikim tru gutpela meri bilong em, long wanem, meri i sapotim na rispek tru long em. Na nambawan bikpela samting, em marit bilong ol i stap gut bai givim biknem long gutpela God bilong yumi, Jehova.