God i Stretim Stretim Ol Samting na Kamapim Laik Bilong Em

“God i save bihainim laik na tingting bilong em yet na mekim olgeta samting i kamap.”​—EFESUS 1:11.

1. Long Epril 12, 2006, olgeta Witnes Bilong Jehova bai mekim wanem bung?

LONG Trinde apinun, Epril 12, 2006, inap olsem 16 milion manmeri bai bung bilong mekim Kaikai Bilong Bikpela. Long olgeta ples bung bilong ol bai i gat wanpela tebol, na antap long tebol bai i gat sampela bret i no gat yis long en, dispela i makim bodi bilong Krais. Na tu, bai i gat retpela wain, dispela i makim blut bilong Krais i bin kapsait. Bai i gat wanpela tok i stori gut long as bilong dispela bung bilong tingim dai bilong Jisas, na klostu long pinis bilong dispela tok, ol bai salim bret na wain i go long olgeta long odiens. Long wan wan kongrigesen tasol bilong ol Witnes Bilong Jehova, wanpela o sampela bilong ol manmeri i bung bai kisim bret na wain. Tasol long planti kongrigesen bai i no gat wanpela i kisim bret na wain. Bilong wanem na sampela Kristen tasol, em ol i bilip na wet long kisim laip long heven, ol i kisim bret na wain, na olgeta narapela em ol i wet long kisim laip oltaim long graun, ol i no kisim bret na wain?

2, 3. (a) Jehova i tingim samting em i bin tokaut long mekim, na em i wokim wanem ol samting? (b) Bilong wanem Jehova i wokim dispela graun na ol man?

² Jehova em i God bilong kamapim ol samting em i tingting pinis long mekim. Bilong mekim olsem, em i save “bihainim laik na tingting bilong em yet na mekim olgeta samting i kamap.” (Efesus 1:11) Pastaim em i wokim dispela wanpela Pikinini tasol bilong em. (Jon 1:​1, 14; KTH 3:14) Orait long rot bilong dispela Pikinini, Jehova i wokim ol pikinini spirit, na ol samting bilong ples antap olsem san na mun, na em i wokim tu dispela graun na ol man.​—Jop 38:​4, 7; Song 103:​19-21; Jon 1:​2, 3; Kolosi 1:​15, 16.

³ Taim Jehova i wokim dispela graun, em i no wokim olsem wanpela ples we ol man bai kisim ol traim tasol na bihain ol i go long heven na kamap ol pikinini spirit bilong em, olsem planti lotu i skulim ol man long en, nogat. Em i bin wokim graun na bai “olgeta samting i ken i stap long en.” (Aisaia 45:18) God i bin wokim ol man bambai ol i ken stap long graun. (Song 115:16) God i bin tokaut long dispela graun i mas kamap naispela ples paradais, na ol stretpela man bai stap na lukautim dispela ples. Em i no bin mekim wanpela tok long namba wan man na meri olsem ol bai i go long heven, nogat tru.​—Stat 1:​26-28; 2:​7, 8, 15.

Wanpela i Sutim Tok Long Jehova

4. Kirap long taim namba wan man na meri i stap long graun, olsem wanem Satan i sutim tok long pasin Jehova i bihainim bilong mekim wok bos?

⁴ Taim God i wokim ol pikinini spirit, em i givim wanpela presen long ol, olsem ol i stap fri long makim wanem samting ol i laik mekim. Tasol wanpela pikinini spirit i mekim wok nogut long dispela presen na em i kirap bikhet na i laik pasim samting em God i tingting pinis long mekim. Em i bagarapim bel isi ol man i save kisim taim ol i stap daun long wok bos bilong Jehova. Satan i pulim namba wan man na meri long bihainim rot bilong bosim wokabaut bilong ol yet, na i no larim God i bosim ol. (Stat 3:​1-6) Em i no sutim tok long strong bilong Jehova, nogat. Em i sutim tok long pasin Jehova i bihainim bilong mekim wok bos, na long rait bilong Jehova long stap nambawan bos. Olsem na kirap long taim namba wan man na meri i stap long graun, bikpela tok i kamap long wok bos bilong Jehova.

5. Satan i bin kamapim wanem narapela tok? Dispela tok i go long husat?

⁵ Satan i kamapim narapela bikpela tok long taim bilong Jop. Satan i sutim tok long astingting tru bilong ol man i daun long Jehova na mekim wok bilong Em. Satan i tok ol man i daun long God na mekim wok bilong Em, long wanem, ol i laik helpim ol yet tasol, na ol bai givim baksait long God sapos traim i painim ol. (Jop 1:​7-11; 2:​4, 5) Satan i bin kamapim dispela tok taim em i sutim tok long wanpela wokman bilong Jehova long graun, tasol dispela tok i go tu long ol pikinini spirit bilong God, na tu, long dispela wanpela Pikinini tasol bilong Jehova.

6. Olsem wanem Jehova i stap gut long samting em i tingting pinis long mekim na long nem bilong em?

⁶ Jehova i stap gut long samting em i tingting pinis long mekim na long nem bilong em, olsem na em i mekim em yet i kamap Profet na Man Bilong Kisim Bek ol man.a Em i tokim Satan: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [“pikinini,” NW] bilong meri. Bai ol i krungutim het bilong yu, na bai yu kaikaim lek bilong ol.” (Stat 3:15) Long rot bilong Pikinini bilong “meri,” olsem oganaisesen bilong Jehova long heven, Jehova bai bekim tok Satan i bin kamapim, na stretim rot bilong kisim bek ol tumbuna pikinini bilong Adam na bai ol inap kisim laip.​—Rom 5:21; Galesia 4:​26, 31.

‘Tingting Bilong God i Bin i Stap Hait’

7. Long rot bilong aposel Pol, Jehova i tokaut long em i laik mekim wanem samting?

⁷ Long pas aposel Pol i raitim long ol Kristen long Efesus, em i stori gut long olsem wanem Jehova i save stretim stretim ol samting bilong kamapim ol samting em i tingting pinis long mekim. Pol i tok: “Bipo God i tingting pinis long dispela samting em i laik mekim long wok bilong Krais. Tasol dispela tingting bilong en i bin i stap hait, na nau em i soim yumi pinis dispela tingting bilong en. Dispela samting em i laik mekim em i olsem. Em i laik stiaim olgeta samting i go i go, na long dispela taim em i makim pinis, em bai i bungim olgeta samting long Krais, ol samting bilong heven na bilong graun tu.” (Efesus 1:​9, 10) Dispela gutpela samting Jehova i tingting pinis long mekim i olsem: Em i laik bai olgeta ensel long heven na ol manmeri long graun i stap wanbel na amamas long daun long wok bos bilong em. (KTH 4:11) Dispela bai mekim nem bilong God i stap holi, na kamapim klia olsem Satan em i man bilong giaman, na laik bilong God bai kamap long graun olsem i kamap long heven.​—Matyu 6:10.

8. Tok ol i tanim olsem “stiaim olgeta samting i go i go” i makim wanem samting?

⁸ Jehova bai “stiaim olgeta samting i go i go” bilong kamapim ol samting em i tingting pinis long mekim. Long dispela ves Pol i mekim wok long wanpela tok Grik i makim pasin bilong bosim ol wok bilong helpim famili. Pol i no stori long wanpela gavman, olsem Kingdom Bilong Mesaia, nogat, em i stori long wanpela rot bilong stretim ol samting.b I gat wanpela ‘tingting hait’ i insait long dispela gutpela rot Jehova bai bihainim bilong kamapim ol samting em i tingting pinis long mekim, na isi isi Jehova bai wok long kamapim klia dispela tingting hait.​—Efesus 1:10; 3:9.

9. Olsem wanem Jehova i kamapim klia tingting hait bilong em?

⁹ Long rot bilong sampela kontrak, isi isi Jehova i kamapim klia olsem wanem dispela tok profet em i bin mekim long gaden Iden bai kamap tru​—em dispela tok profet long Pikinini bilong meri. Kontrak em i mekim wantaim Abraham i makim olsem dispela Pikinini bai kamap long lain tumbuna bilong Abraham, na long rot bilong en “olgeta lain bilong graun bai kisim blesing.” Dispela kontrak i makim tu olsem sampela arapela manmeri bai wok bung wantaim dispela pikinini. (Stat 22:​17, 18, NW) Kontrak bilong Lo em Jehova i mekim wantaim lain Israel bilong skin, dispela i kamapim tingting bilong em olsem wanpela lain bai mekim wok olsem “ol pris.” (Kisim Bek 19:​5, 6) Kontrak em i mekim wantaim Devit i soim olsem dispela Pikinini bai stap Het bilong wanpela Kingdom i go inap oltaim oltaim. (2 Samuel 7:​12, 13; Song 89:​3, 4) Taim kontrak bilong Lo i bringim pinis ol Juda i kam long Mesaia, nau Jehova i tokaut long sampela samting moa bai kamap bilong inapim ol samting em i tingting pinis long mekim. (Galesia 3:​19, 24) Ol manmeri em ol bai wok bung wantaim dispela pikinini, ol i bilong dispela lain pris em tok profet i makim, na ol bai insait long “nupela kontrak” olsem nupela lain “Israel,” em Israel bilong spirit.​—Jeremaia 31:​31-34; Hibru 8:​7-9.c

10, 11. (a) Olsem wanem Jehova i kamapim klia husat i dispela Pikinini em i bin tok profet long en? (b) Bilong wanem dispela wanpela Pikinini tasol bilong God i kam long graun?

¹⁰ God i stretim stretim ol samting bilong kamapim samting em i tingting pinis long mekim, na nau taim i kamap bilong dispela Pikinini em God i bin tok profet long en, em bai kamap long graun. Jehova i salim ensel Gebriel i go tokim Maria olsem em bai karim wanpela pikinini man na ol i mas kolim nem bilong em Jisas. Ensel i tokim Maria: “Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit. Em bai i stap king bilong ol lain bilong Jekop oltaim. Na wok king bilong en bai i no inap pinis.” (Luk 1:​32, 33) Em nau, Jehova i kamapim klia husat i dispela Pikinini em i bin tok promis long salim i kam.​—Galesia 3:16; 4:4.

¹¹ Dispela wanpela Pikinini tasol bilong Jehova bai kam long graun na kisim ol bikpela traim. Wokabaut na pasin bilong Jisas bai kamapim olsem dispela tok Satan i bin sutim em i tru o nogat. Olsem wanem? Jisas bai stap gut long Papa bilong em? Dispela i insait long wanpela tingting o tok hait bilong God. Bihain aposel Pol i stori long wok bilong Jisas, na i tok: “As tok bilong pasin bilong God em i bikpela samting tru. Dispela tok God i bin soim yumi em i olsem, Em i kamap man tru, na ol manmeri i lukim em. Holi Spirit i soim olsem pasin bilong en em i stret olgeta, na ol ensel i lukim em. Ol man i go autim tok bilong en long olgeta lain man. Ol manmeri bilong graun i bilip long em. God i bringim em i go antap na em i kisim biknem tru.” (1 Timoti 3:16) Jisas i stap gut long God i go inap long taim em i dai, na long dispela rot em i kamapim bekim stret long tok Satan i bin sutim. Tasol i gat sampela samting moa bilong dispela tok hait em yumi no klia yet long en.

“Tok Hait Bilong Kingdom Bilong God”

12, 13. (a) Wanem wanpela samting i insait long dispela “tok hait bilong kingdom bilong God”? (b) Wanem samting i insait long wok bilong Jehova long makim sampela manmeri bilong i go long heven?

¹² Long wanpela raun bilong Jisas long autim tok long Galili, em i mekim tok i makim olsem Kingdom Bilong Mesaia i insait long dispela tok hait. Em i tokim ol disaipel: “God i larim yupela i save pinis long as bilong tok hait bilong kingdom bilong heven [“kingdom bilong God,” Mak 4:11].” (Matyu 13:11) Wanpela samting i insait long dispela tok hait em wok bilong Jehova long makim wanpela “liklik lain sipsip” inap olsem 144,000 manmeri. Ol dispela manmeri bai mekim wok king wantaim Jisas long heven, ol i namba tu pikinini bilong meri.​—Luk 12:32; KTH 14:​1, 4.

¹³ Jehova i bin wokim ol man na bai ol i stap long graun, olsem na taim em i stretim rot bilong sampela man i go long heven, i olsem em i wokim ol “nupela man.” (2 Korin 5:17) Aposel Pita em i wanpela bilong dispela lain em ol bai kisim laip long heven, na em i tok: “Yumi litimapim nem bilong God, em i God na Papa bilong Bikpela bilong yumi, Jisas Krais. Em i gat bikpela sori long yumi, na em i kirapim Jisas Krais long matmat, na long dispela rot God i givim yumi nupela laip. Na dispela nupela laip i strongim yumi long wetim em i inapim tru ol gutpela samting em i laik givim long yumi. Em i makim yumi pinis bilong kisim gutpela laip bilong heven. Dispela laip em i no inap bagarap. Em i klin olgeta long ai bilong God, na em bai i no inap pinis. God i redim dispela laip pinis, bilong yupela i kisim long taim yupela i stap wantaim em long heven.”​—1 Pita 1:​3, 4.

14. (a) Olsem wanem ol man em ol i no bilong lain Juda ol i insait long “tok hait bilong kingdom bilong God”? (b) Wanem samting i helpim yumi long kliagut long ol “tingting hait bilong God”?

¹⁴ Narapela samting bilong dispela tok hait bilong Kingdom em laik bilong God long kisim sampela man em ol i no bilong lain Juda, na bai ol i insait long dispela liklik lain i mekim wok king wantaim Krais long heven. Pol i stori long dispela rot Jehova i stretim bilong kamapim laik bilong em, na i tok: “Long olgeta taim bipo, God i no bin autim klia dispela tok hait. Tasol nau long Holi Spirit, God i autim klia long mipela ol aposel na profet bilong em. Dispela tok i olsem. Long gutnius yupela man bilong ol arapela lain yupela i kamap wanlain na wanpela bodi wantaim mipela. Na yumi olgeta i save kisim olgeta samting God i bin makim bilong yumi long Krais Jisas.” (Efesus 3:​5, 6) Ol aposel i kisim helpim na ol i kliagut long dispela hap bilong tok hait bilong God. Olsem tasol, long nau holi spirit i helpim yumi na yumi inap kliagut long ol dispela “tingting hait bilong God.”​—1 Korin 2:10; 4:1; Kolosi 1:​26, 27.

15, 16. Bilong wanem Jehova i makim ol man bilong graun long mekim wok king wantaim Krais?

¹⁵ “Dispela 144,000 manmeri” em ol i sanap wantaim “Pikinini Sipsip” long maunten Saion bilong heven, “God i bin baim bek ol namel long olgeta manmeri bilong graun,” “ol i stap olsem namba wan lain God i kisim bek, bai ol i stap ol lain bilong em yet na bilong Pikinini Sipsip,” em Krais Jisas. (KTH 14:​1-4) Jehova i makim wanpela pikinini bilong em long heven long kamap namba wan pikinini bilong dispela meri em i bin tok long en long gaden Iden. Tasol bilong wanem em i makim ol man bilong graun long wok bung wantaim Krais? Aposel Pol i stori long dispela samting na i tok “God i tok pinis long kisim bek ol, na em i bin singautim ol,” na “long laik bilong em yet God i mekim olsem.”​—Rom 8:​17, 28-30; Efesus 1:​5, 11; 2 Timoti 1:9.

¹⁶ Jehova i laik mekim nem bilong em i stap holi, na kamapim klia olsem i stret em i stap nambawan bos. Olsem na Jehova i “stiaim olgeta samting i go i go,” o stretim rot long salim namba wan Pikinini bilong em i kam long graun, na long dispela hap em i kisim ol bikpela traim. Na tu, Jehova i bin tingting pinis olsem Kingdom Bilong Mesaia bai i gat ol man em ol tu i bin stap gut long wok bos bilong Em i go inap long taim ol i dai.​—Efesus 1:​8-12; KTH 2:​10, 11.

17. Bilong wanem yumi ken amamas olsem Krais na ol manmeri husat bai mekim wok king wantaim em, ol tu i bin stap olsem ol man long graun?

¹⁷ Jehova i laikim tru ol tumbuna pikinini bilong Adam, na em i kamapim klia dispela samting taim em i salim Pikinini bilong em i kam long graun, na taim em i makim sampela man bilong graun long mekim wok king wantaim Krais long Kingdom. Tasol olsem wanem bai dispela i helpim ol arapela husat i bin stap gut long Jehova, kirap long taim bilong Abel na i kam inap long nau? Taim mama i karim yumi, yumi stap wokboi bilong sin na dai, olsem na yumi mas kamap gutpela olgeta long ol samting bilong spirit na long ol samting bilong skin, dispela bai i stret wantaim laik bilong Jehova long pastaim tru. (Rom 5:12) Olgeta manmeri husat i wet long kisim laip oltaim long graun, ol i ken belgut tru olsem King bilong ol bai mekim pasin laikim na pilim gut hevi bilong ol wankain olsem em i bin mekim long ol disaipel taim em i stap long graun! (Matyu 11:​28, 29; Hibru 2:​17, 18; 4:15; 7:​25, 26) Na tu, yumi save olsem ol manmeri em ol bai mekim wok king na wok pris wantaim Krais long heven, em ol manmeri husat i bin strong long daunim ol pasin kranki na ol i bin karim ol hevi wankain olsem yumi, na dispela i strongim tru bel bilong yumi!​—Rom 7:​21-25.

Ol Samting Bai Kamap Olsem Jehova i Tok

18, 19. Olsem wanem yumi kliagut moa long tok bilong Pol long Efesus 1:​8-11? Yumi bai stori long wanem samting long stadi i kamap bihain long dispela?

¹⁸ Nau yumi inap kliagut long mining bilong ol tok Pol i mekim long ol Kristen God i bin makim, olsem i stap long Efesus 1:​8-11. Em i tok Jehova i bin tokaut klia long ol long “dispela tingting bilong en i bin i stap hait,” olsem ol i bilong “pas wantaim Krais,” na em i ‘bihainim laik na tingting bilong em yet na makim ol.’ Yumi save olsem ol dispela samting i insait long dispela rot em Jehova i stretim pinis bilong kamapim ol samting em i bin tokaut long mekim. Na tu, dispela i helpim yumi long kliagut long as na wan wan manmeri tasol i save kisim bret na wain long bung bilong Kaikai Bilong Bikpela.

¹⁹ Long stadi i kamap bihain long dispela, yumi bai stori long Memorial bilong tingim dai bilong Krais i mekim wanem long ol Kristen husat bai kisim laip long heven. Na tu, yumi bai stori long as na planti milion manmeri em ol i wet long kisim laip oltaim long graun, ol i mas i gat laik tru long save long as bilong bung bilong Memorial.

[Ol Futnot]

Bungim Ol Samting Bilong Heven na Bilong Graun

“Bipo God i tingting pinis long . . . em bai i bungim olgeta samting long Krais, ol samting bilong heven na bilong graun tu.”​—EFESUS 1:​9, 10.

1. Stori long samting Jehova bai mekim long heven na graun.

GUTAIM long heven na graun! Dispela em gutpela samting tru Jehova, em God “bilong bel isi,” em i tingting pinis long kamapim. (Hibru 13:20) Em i kirapim aposel Pol long tok olsem Em bai “bungim olgeta samting long Krais, ol samting bilong heven na bilong graun tu.” (Efesus 1:​9, 10) Wanem mining bilong dispela hap tok ol i tanim olsem “bungim olgeta samting”? Wanpela saveman bilong Baibel, em J. B. Lightfoot, i tok: “Dispela hap tok i makim olsem olgeta samting long heven na graun bai stap wanbel long rot bilong Krais, na bai i no gat wanpela samting nogut o samting i kamapim pasin bilong brukim lain. Sin na dai, wari na pen na hevi, olgeta dispela samting bai pinis olgeta.”

“Ol Samting Bilong Heven”

2. “Ol samting bilong heven” em God i mas bungim, dispela i makim husat?

² Aposel Pita i stori long dispela gutpela samting ol Kristen tru i wetim, na i tok: “God i promis pinis long em bai i wokim nupela skai [“heven,” NW] na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (2 Pita 3:13) Dispela “nupela heven” i makim nupela gavman, em Kingdom Bilong Mesaia. “Ol samting bilong heven” em Pol i tok long en long pas em i raitim long ol Kristen long Efesus, God bai “bungim olgeta [dispela] samting long Krais.” Em ol liklik lain manmeri God i bin makim bilong mekim wok king wantaim Krais long heven. (1 Pita 1:​3, 4) Ol dispela 144,000 manmeri em ol Kristen God i bin makim, na em i bin “baim bek ol namel long olgeta manmeri bilong graun” bilong mekim wok king wantaim Krais long Kingdom bilong em long heven.​—KTH 5:​9, 10; 14:​3, 4; 2 Korin 1:21; Efesus 1:11; 3:6.

3. Olsem wanem yumi inap tok ol Kristen God i bin makim ol i “sindaun pinis wantaim Krais long sia king bilong en long heven” maski ol i stap yet long graun?

³ Holi spirit i mekim na ol Kristen God i bin makim ol i kamap nupela olsem ol pikinini spirit bilong Jehova. (Jon 1:​12, 13; 3:​5-7) Jehova i kisim ol olsem “pikinini,” na ol i kamap brata bilong Jisas. (Rom 8:15; Efesus 1:5) Olsem na maski ol i stap yet long graun, Baibel i tok God i ‘kirapim ol wantaim Krais Jisas, na mekim ol i sindaun pinis wantaim Krais long sia king bilong en long heven.’ (Efesus 1:3; 2:6) Ol inap holim dispela bikpela wok, long wanem, ‘God i bihainim promis em i bin mekim bipo na em i givim Holi Spirit long ol, olsem mak bilong ol i stap lain manmeri bilong em stret. Olsem na ol i save, bihain ol bai kisim tu olgeta arapela gutpela samting God i bin promis long givim long ol’ na i stap long heven. (Efesus 1:​13, 14; Kolosi 1:4) Em nau, dispela lain i olsem “ol samting bilong heven,” em Jehova i bin makim pinis namba bilong ol na em i mas bungim ol.

Wok Bilong Bungim Lain i Kirap

4. Dispela wok bilong bungim “ol samting bilong heven” i kirap long wanem taim? Wanem samting i bin kamap?

⁴ Jehova bai “stiaim olgeta samting i go i go,” o stretim rot, na kirap bungim “ol samting bilong heven” long “dispela taim em i makim pinis.” (Efesus 1:10) Dispela taim i kamap long Pentikos bilong yia 33 C.E. Long dispela de, holi spirit i kam daun long ol aposel na sampela disaipel, em ol man na meri wantaim. (Aposel 1:​13-15; 2:​1-4) Dispela i makim olsem nupela kontrak i kirap long dispela taim, na dispela i kamapim kongrigesen Kristen na nupela lain Israel bilong spirit, em “lain Israel tru bilong God.”​—Galesia 6:16; Hibru 9:15; 12:​23, 24.

5. Bilong wanem Jehova i kamapim wanpela nupela “lain manmeri” bilong kisim ples bilong lain Israel bilong skin?

⁵ Kontrak bilong Lo em God i bin mekim wantaim lain Israel bilong skin, dispela i no kamapim wanpela lain em ol bai ‘mekim wok olsem ol pris na stap ol manmeri tru bilong God’ inap oltaim oltaim long heven, nogat. (Kisim Bek 19:​5, 6) Jisas i tokim ol hetman bilong lotu Juda: “God bai i rausim kingdom bilong en long han bilong yupela, na givim long wanpela lain manmeri ol i save kamapim kaikai bilong dispela kingdom.” (Matyu 21:43) Dispela lain manmeri, em lain Israel bilong spirit, em ol Kristen God i bin makim na ol i insait long nupela kontrak. Aposel Pita i raitim tok i go long dispela lain olsem: “God i makim yupela pinis, na yupela i stap lain manmeri bilong em stret. Yupela i stap ol pris bilong lain bilong king. Yupela i stap lain manmeri i holi, em ol lain manmeri tru bilong God. Yupela i stap lain manmeri God i bin makim bilong em yet, bai yupela i ken tokaut long olgeta gutpela pasin em i bin mekim long yupela. Yupela i ken tokaut long em i bin singautim yupela long lusim tudak yupela i bin i stap long en, na em i bringim yupela i kam insait long lait bilong em, em lait i gutpela moa yet. Bipo yupela i stap ol manmeri nating. Tasol nau yupela i stap lain manmeri bilong God.” (1 Pita 2:​9, 10) Jehova i pinisim kontrak em i bin mekim wantaim lain Israel bilong skin. (Hibru 8:​7-13) Ol i bin i gat rot long mekim wok insait long Kingdom Bilong Mesaia, tasol olsem Jisas i bin tok profet, God i rausim dispela gutpela samting ol inap kisim na em i givim long 144,000 manmeri bilong lain Israel bilong spirit.​—KTH 7:​4-8.

Kontrak Bilong Kingdom

6, 7. Jisas i mekim wanem kontrak wantaim ol brata bilong em? Dispela i makim olsem ol bai mekim wanem?

⁶ Long dispela nait we Jisas i bin kamapim bung bilong Memorial bilong tingim indai bilong em, em i tokim ol aposel: “Taim ol samting i kamap bilong traim mi, yupela i bin i stap wantaim mi, na yupela i no lusim mi. Papa bilong mi em i givim kingdom long mi, olsem tasol mi givim kingdom long yupela. Na long kingdom bilong mi yupela bai i sindaun long tebol bilong mi na kaikai na dring. Na yupela bai i sindaun long ol gutpela sia na yupela bai i bosim ol 12-pela lain bilong Israel.” (Luk 22:​28-30) Jisas i toktok long kontrak em i bin mekim wantaim lain 144,000, em God i bin makim na ol i kamap brata bilong Krais. Dispela lain bai ‘holim bilip i go inap long taim ol i dai,’ na kamapim klia olsem ol i “winim pait.”​—KTH 2:10; 3:21.

⁷ Ol manmeri bilong dispela lain i orait long lusim laip bilong ol long graun olsem ol man. Ol bai mekim wok king wantaim Krais long heven, na sindaun long sia king na skelim ol man. (KTH 20:​4, 6) Orait nau yumi ken skelim sampela arapela skripsa i stret tasol long ol Kristen God i bin makim, na i kamapim klia as na ol “arapela sipsip” i no save kisim bret na wain long taim bilong Memorial.​—Jon 10:16.

8. Taim ol Kristen em God i bin makim ol i kisim bret, dispela i makim olsem ol i redi long mekim wanem? (Lukim blok long pes 23.)

⁸ Dispela lain Kristen em God i bin makim, ol bai karim ol pen na hevi olsem Krais i bin karim, na ol i redi long dai olsem em i bin i dai. Pol em i wanpela bilong ol na em i tok em i redi long lusim olgeta kain samting bambai em inap ‘holimpas Krais na save tru long em na long strong bilong kirap bek bilong em na poromanim em long pasin bilong karim pen.’ Yes, Pol i redi long dai olsem Krais i bin i dai. (Filipai 3:​8, 10) Planti Kristen em God i bin makim, ol i bin karim wankain pen na hevi olsem Krais i bin karim.

9. Bret bilong Memorial i makim wanem bodi?

⁹ Taim Jisas i kamapim bung bilong Kaikai Bilong Bikpela, em i tok: “Dispela em i bodi bilong mi.” (Mak 14:22) Em i tok long bodi tru bilong em we klostu nau ol bai paitim nogut tru na blut bilong em bai kapsait. Bret i no gat yis long en i makim stret dispela bodi. Bilong wanem yumi tok olsem? Long wanem, long Baibel, yis i makim sin o pasin nogut. (Matyu 16:​4, 11, 12; 1 Korin 5:​6-8) Jisas em i gutpela olgeta, na bodi bilong em i no gat sin. Em bai givim dispela bodi olsem ofa. (Hibru 7:​26; 1 Jon 2:2) Dispela samting em i mekim bai helpim olgeta Kristen, em ol Kristen husat bai kisim laip long heven na ol Kristen husat bai kisim laip oltaim long paradais long graun.​—Jon 6:51.

10. Taim ol Kristen God i makim ol i kisim wain bilong Memorial, olsem wanem dispela i ‘bungim ol wantaim blut bilong Krais’?

¹⁰ Long taim bilong Memorial, ol Kristen God i bin makim ol i save kisim wain, na Pol i tok long dispela wain olsem: “Dispela kap i gat blesing bilong God, na yumi save tok tenkyu long God long en, taim yumi dring long en, em i save bungim yumi wantaim blut bilong Krais.” (1 Korin 10:16) Taim ol i kisim dispela wain, olsem wanem dispela i ‘bungim ol wantaim blut bilong Krais’? Dispela i no makim olsem ol i helpim Krais long givim ofa bilong baim bek ol man, long wanem, ol tu i mas i gat man bilong baim bek ol. Ol i bilip olsem blut bilong Krais inap kisim bek ol man, olsem na God i lusim sin bilong ol na kolim ol stretpela man na ol inap kisim laip long heven. (Rom 5:​8, 9; Taitus 3:​4-7) Blut bilong Krais i opim rot na lain 144,000 em ol bai mekim wok king wantaim Krais, ol i kamap lain ‘bilong God stret na stap holi,’ God i lusim sin bilong ol na ol i stap ‘ol manmeri bilong em.’ (Hibru 10:29; Daniel 7:​18, 27; Efesus 2:19) Yes, long rot bilong blut bilong Krais, God i “baim bek ol manmeri bilong olgeta lain man, na bilong olgeta tok ples, na bilong olgeta kain skin, na bilong olgeta kantri,” na “mekim ol i kamap ol pris bilong lain bilong king, na ol i stap lain pris bilong God bilong mipela. Na bai ol i stap king na bosim ol manmeri bilong graun.”​—KTH 5:​9, 10.

11. Taim ol Kristen God i bin makim ol i dring dispela wain bilong Memorial, dispela i makim wanem samting?

¹¹ Taim Jisas i kamapim bung bilong Memorial, em i givim kap wain long ol aposel na em i tok: “Yupela olgeta dring long dispela. Dispela em i blut bilong mi bilong mekim kontrak. Mi kapsaitim bilong lusim sin bilong planti manmeri.” (Matyu 26:​27, 28) Long bipo, blut bilong bulmakau na meme i bin strongim kontrak bilong Lo em God i mekim wantaim lain Israel. Olsem tasol, blut bilong Jisas i strongim nupela kontrak em Jehova i mekim wantaim lain Israel bilong spirit, na dispela kontrak i kirap long Pentikos bilong yia 33 C.E. (Kisim Bek 24:​5-8; Luk 22:20; Hibru 9:​14, 15) Taim ol Kristen God i bin makim ol i dring dispela wain i olsem piksa bilong “blut i strongim kontrak,” ol i kamapim olsem ol i insait long dispela nupela kontrak na ol i kisim ol gutpela samting em dispela kontrak i kamapim.

12. Olsem wanem ol Kristen God i makim ol i baptais wantaim Krais long dai bilong em?

¹² I gat narapela samting tu ol Kristen God i makim ol i save tingim. Jisas i tokim ol disaipel bilong em: “Dispela kap nau mi laik dring long en, em bai [yupela] tu i dring long en. Na dispela baptais nau mi laik kisim, em bai [yupela] tu i kisim.” (Mak 10:​38, 39) Bihain aposel Pol i tok long ol Kristen i ‘pas [“baptais,” NW] wantaim Krais Jisas long dai bilong em.’ (Rom 6:3) Ol Kristen God i makim ol i save bihainim pasin bilong daunim laik bilong ol yet. Dai bilong ol i olsem ofa, long wanem, ol i no inap kisim laip oltaim long graun. Wok bilong ol long baptais wantaim Krais long dai bilong em i pinis taim ol i stap gut long God i go inap long ol i dai na kirap bek long bodi spirit bilong ‘stap king wantaim Krais’ long heven.​—2 Timoti 2:​10-12; Rom 6:5; 1 Korin 15:​42-44, 50.

Kisim Bret na Wain

13. Ol manmeri em ol bai kisim laip long graun, bilong wanem ol i no save kisim bret na wain? Tasol bilong wanem ol i save go long bung bilong Memorial?

¹³ Ol samting yumi stori pinis long en i kamapim klia olsem ol manmeri em ol bai kisim laip long graun, i no stret long ol i kisim bret na wain long taim bilong Memorial. Ol i save olsem God i no bin makim ol bilong kamap hap bilong bodi bilong Krais, na tu, ol i no insait long nupela kontrak em Jehova i bin mekim wantaim ol manmeri em ol bai mekim wok king wantaim Jisas Krais. Yumi save olsem “dispela kap” i makim nupela kontrak, olsem na ol manmeri i insait long dispela nupela kontrak ol tasol bai kisim bret na wain. Ol manmeri em ol bai kisim laip oltaim long graun aninit long Kingdom, ol i no pas wantaim Krais long dai bilong em, na God i no makim ol bilong mekim wok king wantaim Krais long heven, nogat. Sapos ol i kisim bret na wain, dispela bai makim olsem ol i mekim samting i no stret long ol i mekim. Olsem na taim ol i go long bung bilong Memorial, ol i soim rispek na lukluk, tasol ol i no save kisim bret na wain. Ol i tenkyu tru long olgeta samting Jehova i bin mekim bilong helpim ol long rot bilong Pikinini bilong em, na wanpela bilong ol dispela samting em olsem blut bilong Krais i opim rot long God inap lusim sin bilong ol.

14. Taim ol Kristen God i bin makim ol i kisim bret na wain, olsem wanem dispela i save strongim ol long ol samting bilong spirit?

¹⁴ Klostu nau wok bilong bungim liklik lain Kristen bilong mekim wok king wantaim Krais bai i pinis. I go inap long taim ol i dai, ol dispela Kristen i save kisim strong long ol samting bilong spirit taim ol i kisim bret na wain. Ol i pilim olsem ol i stap wanbel wantaim ol arapela Kristen em God i bin makim na olgeta i stap olsem hap bilong bodi bilong Krais. Taim ol i kisim bret na wain, dispela i helpim ol long tingim olsem ol i mas stap gut long God i go inap long taim ol i dai.​—2 Pita 1:​10, 11.

‘Bungim Ol Samting Bilong Graun’

15. Wanem lain i kam bung wantaim ol Kristen God i bin makim?

¹⁵ Kirap long 1935 samting, planti manmeri bilong lain “arapela sipsip,” em ol i no bilong “liklik lain sipsip” na ol i wet long kisim laip oltaim long graun, ol i kam bung wantaim ol Kristen em God i bin makim. (Jon 10:16; Luk 12:32; Sekaraia 8:23) Ol i kamap gutpela poroman bilong ol dispela brata bilong Krais, na ol i helpim ol long autim “gutnius bilong kingdom” long olgeta hap bilong graun. (Matyu 24:14; 25:40) Dispela samting ol i mekim i opim rot long Krais inap kolim ol olsem “ol sipsip” na putim ol long “han sut bilong en” taim em i kam bilong skelim olgeta lain manmeri. (Matyu 25:​33-36, 46) Long rot bilong bilip long blut bilong Krais, ol bai kamap lain “planti manmeri tru,” em ol bai abrusim bagarap long taim bilong “bikpela hevi tru.”​—KTH 7:​9-14, NW.

16. Dispela hap tok ‘ol samting bilong graun’ i makim wanem ol lain? Olsem wanem ol inap kamap olsem ol “pikinini bilong God”?

¹⁶ Taim God i putim mak pinis long olgeta manmeri bilong lain 144,000, em bai lusim ol “win” bilong pinisim olgeta pasin nogut bilong dispela graun Satan i bosim. (KTH 7:​1-4) Insait long Wan Tausen Yia taim Krais wantaim ol wanwok bilong em ol i stap king na pris, planti manmeri moa yet bai kirap bek long matmat na bung wantaim ol manmeri i stap long graun. (KTH 20:​12, 13) Ol dispela lain i kirap bek ol bai i gat rot long stap laip oltaim aninit long King Mesaia, em Krais Jisas. Long pinis bilong Wan Tausen Yia, ol dispela ‘samting bilong graun’ bai i gat laspela traim. Ol manmeri i stap gut long God, ol bai kamap olsem ol “pikinini bilong God” long graun.​—Efesus 1:10; Rom 8:21; KTH 20:​7, 8.

17. Jehova bai mekim wanem bilong kamapim ol samting em i tingting pinis long mekim?

¹⁷ Jehova i “stiaim olgeta samting i go i go,” o stretim rot, na dispela bai helpim em long mekim ol samting em i tingting pinis long mekim, olsem “bungim olgeta samting long Krais, ol samting bilong heven na bilong graun tu.” Olgeta ensel long heven na ol manmeri long graun bai stap wanbel, na amamas long daun long stretpela wok bos bilong Jehova, em Man Bilong Kamapim ol samting em i tingting pinis long mekim.

18. Taim ol Kristen God i makim na ol arapela sipsip i kam long Memorial, dispela i helpim ol olsem wanem?

¹⁸ Em nau, taim ol Kristen God i makim ol i bung wantaim planti milion manmeri bilong lain arapela sipsip long Epril 12, 2006, dispela bai strongim tru bilip bilong olgeta wantaim! Ol bai mekim bung bilong tingim indai bilong Krais, olsem Jisas yet i bin tok: “Yupela i mas mekim olsem bilong tingim mi.” (Luk 22:19) Olgeta manmeri i bung i mas tingim samting em Jehova i bin mekim bilong helpim ol long rot bilong gutpela Pikinini bilong em, Krais Jisas.