God i save skelim pasin bilong ol manmeri long kot, na kot bilong en em i tru na i stret olgeta. Dispela bikpela pamukmeri em i bin bagarapim olgeta manmeri bilong graun long pasin pamuk bilong en. Olsem na God i bekim pe nogut long em. Dispela meri em i gat asua bilong kilim i dai ol wokman bilong God, na God i bekim pinis dispela asua bilong em.’

KTH 19⁠:​1-

3. Olsem wanem na dispela bikpela pamukmeri i mas kisim bikpela strafe olsem?

³ Olsem wanem na dispela pamukmeri i mas kisim bikpela strafe olsem? Long wanem, Jehova i bin givim lo long Noa, na dispela lo i go long olgeta man, olsem: Sapos man i kilim i dai narapela man, em i mas i dai. Na long rot bilong Moses God i givim dispela lo long ol Israel tu. (Stat 9⁠:6; Namba 35⁠:​20, 21) Dispela lo i tok, sapos man i mekim pasin pamuk bilong skin o bilong spirit, em i mas i dai. (Wok Pris 20⁠:10; Lo 13⁠:​1-5) Inap long planti tausen yia Bikpela Babilon i bin kilim ol man i dai na mekim pasin pamuk. Misin Katolik i tambuim ol pris long marit, na dispela i as na planti pris i mekim pasin pamuk, na planti i kisim sik AIDS. (1 Korin 6⁠:​9, 10; 1 Timoti 4⁠:​1-3) Tasol nambawan bikpela rong bilong ol lotu giaman, em ol i mekim pasin pamuk bilong spirit, na ‘ol i hipim ol sin bilong ol i kam antap inap long heven.’ Dispela pasin pamuk bilong spirit i olsem: Bikpela Babilon i bin lainim ol man long ol bilip giaman, na em i bin pren na wok wantaim ol man nogut bilong politik. (KTH 18⁠:⁠5)