Em i bin mekim yumi i kamap ol pris bilong lain bilong king, na yumi stap lain pris bilong God, em Papa bilong Jisas. Oltaim oltaim Jisas Krais i gat biknem tru na strong bilong bosim olgeta samting. I tru.” (KTH 1⁠:5c, 6)

I dai bilong Jisas i opim rot bambai ol manmeri olsem Jon, em ol Kristen God i makim, ol i ken kisim narapela kain blesing. Long blut bilong Jisas, God i kolim dispela liklik lain olsem ol stretpela man. Ol i no tingting moa long kisim laip long graun; ol i redi long lusim dispela olsem Jisas i bin mekim. Spirit bilong God i mekim ol i kamap pikinini bilong God na ol i save, taim ol i dai bai God i kirapim bek ol na bai ol inap kisim laip long heven na mekim wok king na wok pris wantaim Krais Jisas long Kingdom bilong em. (Luk 12⁠:32; Rom 8⁠:18; 1 Pita 2⁠:5; KTH 20⁠:⁠6) Bai ol i kisim gutpela wok tru! Dispela samting i kirapim Jon long litimapim nem bilong Jisas na tok, em i gat biknem na strong!