• Gutpela Bilas Tru Bilong Sia King Bilong Jehova
    Kamapim Tok Hait—Bikpela Samting Bilong En i Laik Kamap!

    • Bikpela Lait Bilong Jehova

      4. (a) Ol samting Jon i lukim olsem driman, bilong wanem i bikpela samting long liklik lain Kristen God i bin makim? (b) Bilong wanem i bikpela samting long ol man i wet long kisim laip oltaim long graun?

      4 Jon i lukim wanem samting? Harim, nau em i laik stori. Em i tok: “Na wantu tasol Holi Spirit i kamap strong long mi, na long heven mi lukim wanpela sia king i stap, na wanpela Man i sindaun i stap long dispela sia.” (KTH 4:⁠2) Wantu tasol strong bilong God i mekim na long tingting bilong Jon i olsem em i go kamap long sia king bilong Jehova yet. Gutpela samting tru i painim Jon! Em i lukim dispela ples long heven em yet wantaim ol narapela Kristen God i bin makim bai ol i go long en na kisim “dispela laip em i no inap bagarap.” Dispela kain laip “i klin olgeta long ai bilong God, na em bai i no inap pinis.” (1 Pita 1⁠:​3-5; Filipai 3⁠:20) Ol dispela samting Jon i lukim olsem driman i bikpela samting tu long ol man i wet long kisim laip oltaim long graun. Dispela i helpim ol long save long biknem bilong Jehova, na long dispela lain king bilong heven em Jehova i givim wok long ol bilong skelim ol lain man, na bilong bosim ol man long graun long bihain. God Jehova i save moa yet long pasin bilong stretim wok na bosim gut ol samting!

      5. Jon i lukim wanem samting tru em ai bilong Bokis Kontrak i makim?

      5 Planti samting Jon i lukim long heven i kain olsem ol samting i bin i stap long haus lotu sel bilong ol Israel long ples nating. Inap olsem 1,600 yia paslain long taim Jon i lukim dispela driman, ol i bin wokim dispela haus lotu sel olsem ples bilong lotuim Jehova. Bokis kontrak i stap long Rum Tambu Tru bilong dispela haus lotu sel, na antap long ai gol bilong en Jehova yet i save autim lo bilong em. (Kisim Bek 25⁠:​17-​22; Hibru 9⁠:⁠5) Olsem na ai bilong Bokis Kontrak i makim sia king bilong Jehova. Nau Jon i lukim samting tru ai bilong Bokis i makim: Em i lukim Nambawan Bikpela King Jehova yet i sindaun long gutpela naispela sia king bilong em i stap antap tru!