“KISIM EM I GO NA BAI EM I NO KEN KARIM PEN LONG TAIM EM I DAI”

Wanem samting i painim Enok taim em i laik dai? Samting i kamap long em i narapela kain tru na yumi no inap kliagut long en. Buk Stat i tok: “God i kisim em [Enok] na ol man i no lukim em moa, long wanem, oltaim em i bin i stap pren tru bilong God.” (Stat 5:24) Olsem wanem God i kisim em i go? Aposel Pol i stori long dispela olsem: “Enok i bilip, olsem na God i kisim em i go na bai em i no ken karim pen long taim em i dai. Ol man i painim em, tasol ol i no lukim em, long wanem, God i bin kisim em i go. Tasol paslain long God i kisim em i go, God i tokaut olsem em i amamas long em.” (Hibru 11:5) Wanem insait bilong tok Pol i mekim olsem, God i “kisim em i go na bai em i no ken karim pen long taim em i dai”? Sampela Baibel ol i tanim i tok God i kisim Enok i go long heven. Tasol dispela tingting i no stret. Long wanem, Baibel i kamapim olsem Jisas Krais em fes man God i bin kirapim bek na em i go long heven.—Jon 3:13.

Olsem na yumi laik save, hau God “i kisim [Enok] i go” na bai em i no “karim pen long taim em i dai”? Ating Jehova i no larim Enok i pilim bikpela pen, em i mekim isi bel bilong em na em i slip isi tasol inap long em i dai. Tasol paslain long Enok i dai, “God i tokaut olsem em i amamas long em.” Em i mekim long wanem rot? Ating God i soim em wanpela visen long graun i kamap paradais. Long rot bilong dispela visen, Jehova i tokaut olsem em i amamas long Enok, na bihain Enok i dai. Aposel Pol i stori long Enok na ol arapela bilipman na meri olsem: “Ol dispela manmeri i holimpas bilip bilong ol i go inap long ol i dai.” (Hibru 11:13) Bihain, ating ol birua bilong Enok i traim long painim bodi bilong en, tasol “ol i no lukim em.” Ating Jehova i haitim bodi bilong Enok, na bai ol birua i no ken bagarapim o mekim sampela kain pasin bilong lotu long en.b

Tok bilong Baibel i helpim yumi long klia liklik long samting i painim Enok klostu long taim em i laik dai. Yumi ken piksaim long tingting ol samting i kamap. Yumi no save tru, tasol wanpela tingting i olsem, Enok i ranawe na ating em i sotwin na i taiet tru. Ol birua i bihainim em. Ol i belhat nogut tru long strongpela tok em i autim. Enok i kamap long wanpela hap na em i malolo liklik, tasol em i save olsem i no longtaim na ol birua bai kam painim em. Ol bai mekim nogut tru long em na kilim em i dai. Em i malolo i stap na i beten long God bilong em. Orait wantu tasol, em i pilim bikpela bel isi. Em i lukim visen bilong wanpela ples, na i kain olsem em i stap long dispela hap.

Piksaim olsem Enok i lukim visen bilong wanpela ples em i no bin lukim long laip olgeta bilong em. Dispela ples i wankain long gaden Iden, em i luk nais tru, tasol i no gat ol ensel serap i was i stap long gaden. Olgeta manmeri i yangpela na ol i gat strong na gutpela helt. Na ol i stap bel isi. Long dispela ples, i no gat pasin bilong heitim narapela na ol man i no birua long narapela long bilip bilong en, em samting i bin painim Enok. Dispela visen Enok i lukim i helpim em long save olsem Jehova i laikim em tru na em i amamas long em. Enok i bilip olsem dispela ples em i lukim long visen em ples bilong em long bihain. Isi isi, Enok i kisim wanpela kain bel isi. Na em i pulim win laspela taim na i pasim ai bilong em, i olsem em i slip indai.

Yes, maski Enok i dai inap planti tausen yia i go pinis, em i stap yet long tingting bilong God Jehova. Tingting na save bilong God i nambawan tru, olsem na em inap long tingim olgeta gutpela man husat i bin dai! Na olsem Jisas i tok promis, ol man i dai na i slip long matmat, ol bai harim nek bilong Krais na kam ausait. Taim ol i opim ai bilong ol, ol bai lukim wanpela naispela ples, long dispela taim olgeta man bai stap bel isi.—Jon 5:28, 29.