Baibel i tok “Senakerip, em king bilong Asiria, em i kam kirapim pait long olgeta strongpela taun long hap bilong Juda na em i kisim ol dispela taun.” King bilong Jerusalem, em Hesekaia, em i pret na em i salim tok long Senakerip long Lekis. Em i tok em i ken baim Senakerip bambai Senakerip i no ken pait wantaim em.−2 King 18:​13, 14, NW.

Tasol taim em i raitim ol stori bilong em em i haitim dispela hap stori olsem ol ami bilong em i kisim bagarap. Em i stori olsem: “Dispela Judaman, Hesekaia, em i no bin daun long mi. Mi bin pait wantaim 46 strongpela taun bilong em na planti ol liklik ples bilong em na mi winim ol . . . Mi kalabusim em insait long Jerusalem, em ples em i sindaun long en, na em i stap olsem pisin insait long banis.” Na em i tok, Hesekaia i pret long ol bilas na biknem bilong Senakerip. Tasol Senakerip i no tok em i kisim Hesekaia o winim Jerusalem. Bilong wanem? Olsem Baibel i tok, ol dispela nambawan lain ami em i bin salim ol long pait wantaim Hesekaia em Jehova i kilim ol i dai pinis!