Ostris—Em Inap Ran Siksti, Em i No Inap Flai, na Em i Narapela Kain

Wanpela man long Kenya i raitim dispela stori bilong Kirap!

NAMEL long ol jiraf, na ol sibra, na ol kain kain antelop em ol i save raun long bikpela ples kunai bilong Afrika, i gat narapela kain animal em God bilong wokim olgeta samting em i bin wokim. Ol manmeri i save lukim dispela animal, ol i kirap nogut long lukim bikpela skin bilong en, na longpela bun, na strongpela lek, na naispela gras bilong en tu. Taim em i sanap, longpela bilong en i olsem 2.5 mita na hevi bilong en i olsem 155 kilo. Em i bikpela tru, winim olgeta narapela pisin i stap long nau. Long tok ples Swahili ol i kolim dispela pisin olsem muni, tasol ating yu save kolim dispela pisin long nem em planti man i save long en, em ostris.

Em i Wokabaut Olsem Kamel

Long bipo tru, ol i givim nem strutokamelus long pisin ostris. Dispela nem i kam long tok Latin na tok Grik, na i makim olsem sampela pasin bilong ostris i wankain liklik olsem pasin bilong kamel. Olsem kamel, ostris inap i stap long ples hat na em i stap gutpela long ples wesan nating. Na olsem kamel, gras bilong ai bilong en i longpela tru, na i lukautim bikpela ai bilong en na das bilong ples drai i no ken i go insait long ai. Lek bilong en i longpela na i gat strongpela masol, na lek bilong en daunbilo i strong na i gat mit, tasol lek i gat tupela pinga tasol. Taim ol man i lukim ostris i wokabaut raun long stretpela ples, ol i kirap nogut long lukim spit bilong en long ran, na strong bilong en, na sampela pasin moa bilong en i olsem bilong kamel.

Ostris i save kaikai namel long ol sibra na jiraf na antelop samting, na em i save kaikai klostu olgeta samting i save wokabaut, olsem ol binatang, snek, na rat samting. Na ostris i save kaikai rop bilong ol liklik diwai samting, na gras. Na tu, em i save daunim ol liklik pipia diwai, gam o kramsel samting, ol ston, na stik, na klostu olgeta samting i liklik na i gat gutpela kala long en.

Skin bilong en i bikpela na i hevi, olsem na em i no inap flai. Tasol strongpela masol bilong lek i mekim na em inap ran spit tru, olsem na wanwan animal tasol inap winim spit bilong ostris. Taim em i ran long ples wesan nating, em inap spit olsem 65 kilomita insait long wanpela aua! Baibel i tok, ostris “inap winim hos i gat man i sindaun long en.” (Jop 39:18) Tru tumas, spit bilong dispela pisin i gat tupela lek, na strong bilong en long ran inap longpela taim i mekim na em i no hatwok long winim planti birua bilong en i gat 4-pela lek na ol i save spit tru.

Pasin Bilong Kamapim Famili

Long taim bilong kamapim pikinini, ostris man i save mekim kain kain pasin bilong kisim poroman. Em i save brukim skru long ai bilong ostris meri, na em i apim bikpela gras bilong tupela wing bilong en, em kala bilong wing i blakpela na waitpela, na em i kirap seksekim wing. Tupela wing i go i kam olsem tupela traipela fen. Nau lek na nek bilong en i no gat gras i tanim i kamap retpela liklik, na bihain lek na nek i kamap ret olgeta. Dispela kala i luk naispela tru wantaim blakpela gras bilong skin. Na ostris man i tromoi longpela nek bilong en i go i kam long tupela sait, na em i paitim graun wantaim tupela lek bilong en.

Ating dispela pasin bilong ostris man long soim gutpela gras bilong en i bilong kirapim ostris meri, em gras bilong en i braunpela, long laikim ostris man. Tasol taim ostris man i wok long mekim ol samting olsem danis, planti taim ostris meri i wok long painim ol binatang samting long graun, na em i no lukluk long ol samting ostris man i mekim klostu long em.

Taim em i painim meri pinis, ostris man i save makim ples bilong kamapim famili. Long wanpela hap bilong ples kunai em bai digim hul long das na kisim sampela ostris meri i go long en. Bihain long 2-pela o 3-pela wik, bai i gat 25 kiau o sampela moa long hul em ol dispela ostris meri i bin putim long en.

Inap 6-pela wik i mas pinis pastaim na ol kiau bai bruk, olsem na ostris man bai sindaun antap long ol kiau long nait, na wanpela ostris meri bai mekim olsem long san. Insait long dispela hap taim ol kiau inap kisim bagarap, na ol laion, na hai-ina, na jakel, em ol i hangre, ol i laik kaikai ol dispela kain kiau, na wanpela kain tarangau bilong Isip i save tromoi ston long ol kiau bilong brukim bambai em i ken kaikai.

Traipela Kiau, Bikpela Pikinini

Ol waitpela kiau bilong ostris i traipela tru, winim ol narapela kiau, na hevi bilong wanpela kiau em inap olsem 1.5 kilo. Skin bilong kiau i strong na i lait. Olgeta wan wan kiau i olsem 25 kiau bilong kakaruk, na planti man i save laikim kiau bilong ostris, long wanem, em i gutpela bilong strongim skin na em i swit tru. Sampela taim ol Busman bilong Afrika i save mekim wok long sel bilong kiau bilong pulimapim wara long en.

Taim traipela kiau i bruk, bikpela pikinini ostris i save kamap long en! Ol nupela pikinini i no inap lukautim ol yet, tasol ol i save go bikpela hariap na ol inap ran siksti. Insait long wanpela mun, strongpela lek bilong ol i mekim na ol inap spit olsem 55 kilomita insait long wanpela aua!

Papamama bilong ol pikinini ostris i mas lukautim ol. Ol man i save tok, taim birua i laik bagarapim ostris, em i save haitim het bilong en insait long wesan. Dispela em wanpela tok nating. Papamama ostris bai pait strong bilong lukautim pikinini bilong ol, na ol bai kikim strong ol wel animal samting bilong rausim ol. Narapela samting ol i save mekim bambai ol wel animal i no ken bagarapim ol pikinini i olsem: Ol i save giaman na mekim olsem ol i bin kisim bagarap, olsem na ol i pulim ai bilong wel animal bambai em i lusim ol pikinini na i kam long papamama. Tasol sapos wel animal i kam klostu tumas long papamama, ol bai tanim na ran siksti, na lusim ol pikinini na ol pikinini i mas lukautim ol yet. Long kain taim olsem tok bilong Baibel i tru, em i tok ol ostris “i save lukim ol pikinini bilong ol yet olsem pikinini bilong arapela mama, na ol i no save mekim gutpela pasin long ol.”​—⁠Jop 39:⁠16.

Gutpela Gras

Inap planti tausen yia, ol manmeri i bin laikim ostris. Ol piksa ol i bin katim long ston i stori long ol king bilong Isip ol i bin raunim ol ostris long banara na spia. Sampela lain i ting ostris em i samting holi. Ol Saina i laikim tru ol naispela raunpela kiau bilong ostris, na ol i givim ol kiau olsem presen long ol king. Inap planti tausen yia, gutpela gras bilong ostris i bin bilasim hat bilong ol jeneral bilong ami, na bilong ol king, na bilong ol bikman long Afrika.

Inap olsem 600 yia i go pinis, ol man bilong Yurop em ol i laik bilas gut, ol i laikim tru gras bilong ostris. Tasol i hatwok long kilim ostris long spia na banara, long wanem, em inap lukluk gut na ranawe hariap long birua. Long dispela taim, ol man i no inap long pinisim lain ostris olgeta.

Bihain long yia 1800 samting, ol man i laik bilas gen long gras bilong ostris. Long dispela taim, ol man i gat gan samting na ol i kilim planti milion ostris. Ating ol man i save lukautim ol ostris insait long banis, dispela i helpim lain ostris na ol i no pinis olgeta. Nau ol man i save lukautim ol ostris bilong kisim gras bilong en bilong wokim ol bilas na brum bilong rausim das. Ol i wokim ol hanglav na hanbek long skin bilong en, na sampela haus kaikai i save wokim kaikai long mit bilong en.

Long nau, dispela gutpela ostris i raun yet long stretpela ples bilong Afrika. Maski hap em i save raun long en i go liklik na long sampela hap ostris i pinis olgeta, em i stap yet long ples em i save laikim, em ples kunai. Long dispela hap, ol man inap lukim em i ran siksti wantaim bikpela gras bilong en, na mekim ol danis bilong painim poroman, o ol inap lukim em i was long ol traipela kiau bilong en. Tru tumas, dispela pisin i save ran siksti, na em i no inap flai, em i wanpela gutpela pisin i narapela kain na em i save amamasim ol man i lukim em.

[Piksa long pes 22]

Ostris man

[Piksa long pes 22, 23]

Ol ostris i save ran siksti, winim planti animal

[Piksa long pes 22, 23]

Lek bilong ol i strong, ol inap kikim birua

[Piksa long pes 24]

Ostris meri