Tasol i no olsem Jop i mas amamas na daunim ol. Jehova i laik bai em i beten bilong helpim ol dispela lain i sutim tok long em. Jop i mekim olsem Jehova i tokim em long mekim, na long dispela Jehova i mekim gut long em. Pastaim, Jehova i pinisim sik nogut em i bin kisim. Na bihain ol brata, sista, na ol pren bilong Jop long bipo ol i kam na mekim gut long em, “na olgeta wan wan i givim wanpela mani silva na wanpela ring gol long em.”a Na Jop “i kisim 14,000 sipsip na 6,000 kamel na 2,000 bulmakau na 1,000 donki meri.”b Na meri bilong Jop i kamap wanbel gen wantaim em. Bihain Jehova i mekim gut long Jop na em i kamapim 7-pela pikinini man na 3-pela pikinini meri, na em i stap inap em i lukim ol tumbuna pikinini bilong em na ol tumbuna pikinini bilong ol.​—⁠Jop 42:​10-​17.