Ol i Bin Save Long Nem Bilong God
NAMBA WAN buk ol i raitim na wokim long ol hap bilong Amerika em bipo Inglan i bosim, em buk Bay Psalm Book. Wanpela man, Stiven De (Stephen Daye) bilong Masasusets Be Koloni, em i prinim namba wan bilong dispela buk long yia 1640. Hap bilong Baibel ol i kolim Song i stap long dispela buk, em ol man i bin lukim long tok Hibru na tanim i go long tok Inglis, em tok Inglis ol man i save mekim na raitim long dispela taim bipo.
Wanpela bikpela samting bilong dispela buk Bay Psalm Book em i olsem: Nem bilong God i stap long sampela ves. Olsem na inap long 350 yia i go pinis, ol man i kaunim dispela buk ol inap kisim save long nem bilong Man bilong wokim yumi. Olsem: Buk i kamapim tok bilong Song 83:18 olsem: ‘God i laik bai ol man i ken save, nem bilong God antap tru, em JEHOVA (Iehovah).’
God antap tru i laik bai yumi ol man i ken save long nem bilong em Jehova (Iehovah), tasol i gat narapela samting tu ol i mas save long en. Long Song 1:1, 2, buk Bay Psalm Book i tok olsem: ‘Man God i blesim’ i no save bihainim tok bilong ol man nogut, ‘tasol em i laikim tumas lo bilong Jehova (Iehovah).’ Long yia 1648 ol i stretim sampela tok bilong buk New England Psalms, i kamapim nem bilong God, olsem Jehovah, long Song 1:2.
Long Song 1:1, 2, Buk Baibel i tok olsem: “Man i no save bihainim tok bilong ol man nogut, na i no save wokabaut long rot bilong ol man bilong mekim sin, na i no save sindaun wantaim ol man bilong tok bilas long God, dispela man i ken amamas tru. Dispela man i save laikim tumas lo bilong God, na em i save tingting long dispela lo long san na long nait.”
Olsem na sapos man i laik i stap amamas, em i mas sakim ol tok bilong ol man nogut. Em i no ken bihainim pasin bilong ol man bilong mekim sin, na em i no ken bung wantaim ol man bilong tok bilas long God. Na em i mas abrusim ol man em tok na pasin bilong ol inap grisim em long mekim ol samting i brukim lo bilong God, olsem pasin pamuk, na kisim ol drak. Tru tumas, sapos man i laik i stap amamas tru, orait em i mas kisim save long God tru, nem bilong em Jehova, na tu, em i mas bihainim ol lo bilong God i stap long Baibel.