Yu Wanpela Bilong Ol Dispela?
‘MAN i stap olsem laion inap wanpela de i winim man i stap olsem sipsip inap wan handet yia.’ Benito Mussolini, bipo em bikman bilong Itali, i mekim dispela tok.
Olsem Mussolini, planti man i no laik bai narapela i tingim ol i kain olsem sipsip, nogat. Tasol Devit, em king bilong Israel bipo, i tok: “Bikpela em i wasman bilong mi. . . . Em i bringim mi i go long ol liklik wara na mi dring na mi malolo.” (Song 23:1, 2) God Jehova em i Bikpela Wasman na em i lukautim lain bilong em long gutpela pasin sori—em i tingim ol i kain olsem ol sipsip.
Song 95:7 i tok piksa long lain bilong God olsem: “[Jehova] yet i save lukautim yumi manmeri bilong en olsem ol sipsip, na em i save givim kaikai long yumi.” Dispela i makim ol manmeri bilong lain bilong Jehova ol i olsem ol sipsip bilong em. God i givim kaikai long ol na soim gutpela rot long ol, olsem na ol i stap gut.
Pikinini bilong Jehova, Krais Jisas, em i Gutpela Wasman. Planti taim em i kolim ol manmeri olsem ol sipsip. Olsem: Jisas i tok long wanpela “liklik lain sipsip” na “ol arapela sipsip.” (Luk 12:32; Jon 10:14-16) Ol disaipel bilong Jisas i gat pasin daun na pasin kain olsem sipsip, na Jisas i tok long ol olsem: “Ol sipsip bilong mi i save harim maus bilong mi, na mi save long ol, na ol i bihainim mi. Mi givim laip i stap gut oltaim oltaim long ol, na ol bai i no inap lus. Nogat tru. Na bai i no gat man inap rausim ol long han bilong mi.” (Jon 10:27, 28) Gutpela man i mekim wok bos em i save kamapim strong bilong em, bilong helpim ol man i stap aninit long em na em i soim gutpela rot long ol na lukautim gut ol.—KTH 1:16, 20; 2:1.
Ol man i gat pasin kain olsem sipsip, no gat wanpela man inap rausim ol long han bilong Jisas. Long nau Jisas i wok long tilim ol man long tupela lain: lain “meme” em Jisas i no orait long ol, na lain “sipsip” ol bai kisim laip oltaim aninit long Kingdom bilong God long heven. (Matyu 25:31-46) Olsem wanem? Ol samting yu mekim i makim olsem yu wanpela bilong ol dispela sipsip?
[Piksa Kredit Lain long pes 32]
Garo Nalbandian