Pasin Bikhet i Mekim na Man i Kisim Sem

“Ol man i save litimapim nem bilong ol yet bai i kisim bikpela sem. Ol man i gat gutpela tingting i save daunim ol yet.”​​—⁠SINDAUN 11:⁠2.

1, 2. Pasin bilong bikhet i wanem samting? Wanem sampela samting i bin kamap long dispela pasin?

WANPELA Livai i bel kaskas na em i kirapim sampela lain long bikhet long ol man Jehova i bin putim ol i stap bos. Wanpela pikinini bilong king, em i gat laik long kisim bikpela namba, em i painim rot bilong kisim wok king bilong papa bilong em. Wanpela king i les kwik na em i sakim tok em profet bilong God i givim long em. Dispela 3-pela Israel i gat wankain pasin: em pasin bilong bikhet.

² Pasin bilong bikhet em i samting bilong bel na em inap mekim samting nogut long yumi olgeta. (Song 19:13) Man i bikhet i save kirap nating na kisim wok ol i no bin makim em long mekim. Planti taim dispela samting i kamapim bagarap. Pasin bikhet i mekim na sampela i no stap moa olsem king, na sampela gavman i bin pundaun na bagarap. (Jeremaia 50:​29, 31, 32; Daniel 5:​20) Em i olsem umben na i bin holimpas tu sampela wokboi bilong Jehova na bringim ol i go long bagarap.

3. Olsem wanem yumi inap kisim save long ol samting nogut pasin bilong bikhet inap mekim?

³ I gat as na Baibel i tok: “Ol man i save litimapim nem bilong ol yet bai i kisim bikpela sem. Ol man i gat gutpela tingting i save daunim ol yet.” (Sindaun 11:⁠2) Baibel i stori long sampela man em pasin bilong ol i kamapim klia olsem dispela tok i stret. Sapos yumi skelim stori bilong sampela dispela bai helpim yumi long save, sapos yumi kirap na kisim wok ol i no bin makim yumi long mekim dispela inap pundaunim yumi. Orait nau yumi ken skelim olsem wanem pasin bilong bel kaskas, na laikim bikpela namba, na les kwik, i bin kirapim dispela 3-pela man long mekim pasin bilong bikhet na ol i kisim bikpela sem long dispela.

Kora​​—⁠Wanpela Bikhetman i Bel Kaskas

4. (a) Kora em i husat? Em i insait long wanem ol samting i bin kamap bipo? (b) Bihain em i kirapim ol man long mekim wanem samting i nogut tru?

⁴ Kora em i bilong lain Kohat long lain Livai, na em i kasen brata bilong Moses na Aron. Inap planti yia em i stap gut long Jehova. Em i wanpela bilong dispela lain God i kisim bek ol long solwara Retsi, na ating em i bin insait long wok bilong givim strafe bilong Jehova long ol Israel i lotu long bulmakau long maunten Sainai. (Kisim Bek 32:26) Tasol bihain em i kirapim sampela man long bikhet long Moses tupela Aron, em sampela bilong ol em Datan na Abiram na On, ol i bilong lain Ruben, wantaim 250 hetman bilong Israel.a Ol i tokim Moses na Aron: “Harim. Yumi olgeta i bilong Bikpela. I no yutupela tasol. Na Bikpela i stap wantaim yumi olgeta. Olsem na bilong wanem yutupela i litimapim yutupela yet na bosim mipela? Pasin bilong yutupela i no stret.”​​—⁠Namba 16:​1-3.

5, 6. (a) I gat wanem as na Kora i bikhet long Moses tupela Aron? (b) Bilong wanem yumi ken tok, Kora i no ting wok bilong God em i mekim em i wanpela gutpela samting tru?

⁵ Inap planti yia Kora i bin stap gut long Jehova, olsem na wanem samting i kirapim em long bikhet? Moses i no mekim hatpela pasin long ol Israel em i bosim​—⁠“em i man bilong daunim em yet, na i no gat wanpela man long dispela graun i save daunim em yet inap olsem Moses.” (Namba 12:⁠3) Tasol i luk olsem Kora i bel kaskas long Moses tupela Aaron na bel nogut long namba ol i holim, na dispela i bin kirapim em long mekim tok kranki olsem tupela i bin litimapim ol yet na bosim lain Israel.​​—⁠Song 106:⁠16.

⁶ Ating Kora i no pilim tru gutpela wok bilong God em i holim. Tru, ol Kohat long lain Livai ol i no pris, tasol ol i tisa bilong Lo bilong God. Na tu, ol i save karim tebol na ol dis na plet bilong haus lotu sel taim i gat wok long kisim ol i go long wanpela hap. Dispela wok em i no samting nating​—⁠em i wanpela bikpela wok, long wanem, ol man i stap klin long ol samting bilong lotu na spirit, ol tasol inap holim ol dispela dis na plet holi. (Aisaia 52:11) Olsem na taim Moses i toktok wantaim Kora, i olsem em i askim em: Yu tingim wok bilong yu em i samting nating tasol, olsem na yu mas kisim wok pris tu? (Namba 16:​9, 10) Kora i no tingim olsem pasin bilong stap gut long mekim wok bilong Jehova, dispela i nambawan gutpela wok em inap mekim​—⁠wok bilong kisim bikpela namba samting, nogat.​​—⁠Song 84:⁠10.

7. (a) Moses i tokim Kora na lain bilong em long mekim wanem? (b) Wanem samting i pinisim pasin bikhet bilong Kora?

⁷ Moses i singautim Kora na dispela lain i bihainim em long kam bung long moningtaim klostu long haus sel na bringim plet bilong putim paia, na paura bilong wokim smok i gat gutpela smel. Kora na dispela lain bilong em ol i no gat namba long mekim smok smel, long wanem, ol i no pris. Sapos ol i kam wantaim paura na ol plet bilong putim paia, dispela bai kamapim klia olsem ol i holim yet dispela tingting olsem i stret ol i ken mekim wok pris​—⁠maski planti aua i bin lus, olsem nait olgeta, long ol i ken tingim gen dispela samting ol i laik mekim. Taim ol i bung pinis long moningtaim, Jehova i givim strafe long ol, na i stret em i mekim olsem. Em i givim wanem strafe long ol lain Ruben? “Graun i op na . . . olgeta i pundaun insait long hul na graun i karamapim ol.” Ol narapela, na Kora tu, paia i kam daun long God na i kukim ol. (Lo 11:6; Namba 16:​16-​35; 26:10) Pasin bikhet bilong Kora i mekim na em i kisim bikpela sem tru​—⁠God i no orait moa long em!

Sakim Pasin Bilong Bel Kaskas

8. Wanem samting inap mekim na pasin bilong bel kaskas i kamap namel long ol Kristen?

⁸ Stori bilong Kora em inap givim tingting long yumi. Pasin bilong bel kaskas i stap long skin bilong yumi ol man bilong graun, olsem na dispela pasin inap kamap insait long kongrigesen Kristen tu. (Jems 4:​5, NW ) Olsem: Ating yumi tingim tumas nem na namba bilong man. Olsem Kora, ating yumi bel kaskas long ol man i holim wok yumi yet i laik holim. O yumi inap kamap olsem Diotrefes, em wanpela Kristen i stap long taim bilong ol aposel. Em i sutim tok long ol man i holim namba olsem aposel, long wanem, em yet i laik lukautim kongrigesen. Olsem na Jon i tok Diotrefes “i laik i stap namba wan.”​​—⁠3 Jon 9.

9. (a) Wanem tingting long ol wok insait long kongrigesen yumi mas klia long en? (b) Yumi mas holim wanem stretpela tingting long wok bilong yumi insait long lain bilong God?

⁹ Tru, i no gat rong long man Kristen i wok strong long kisim wok insait long kongrigesen. Pol i kirapim ol brata long ol i mas mekim olsem. (1 Timoti 3:⁠1) Tasol yumi no ken tingim ol gutpela wok yumi holim i olsem samting i givim bikpela namba long yumi. Jisas i tok: “Man i laik i stap bikman namel long yupela, em i mas i stap wokman bilong yupela. Na man i laik i stap namba wan bilong yupela, em i mas i stap olsem wokboi nating bilong yupela.” (Matyu 20:​26, 27) Tru tumas, i no stret sapos yumi bel kaskas long ol man i holim bikpela wok, na ting olsem “namba” yumi holim insait long oganaisesen bilong God bai makim olsem yumi stap gut long ai bilong em o nogat. Jisas i tok: “Yupela olgeta i stap brata brata.” (Matyu 23:⁠8) Em nau, maski yumi pablisa o painia, o yumi baptais nupela o longtaim yumi bin i stap gut long God, sapos yumi givim bel tru long mekim wok bilong Jehova, orait yumi gat ples insait long lain bilong em. (Luk 10:27; 12:​6, 7; Galesia 3:​28; Hibru 6:​10) Em i wanpela gutpela samting tru yumi inap wok wantaim planti milion brata sista ol i wok strong long bihainim dispela tok bilong Baibel: “Bihainim pasin bilong daunim yupela yet na i stap aninit long ol arapela manmeri bilong God.”​​—⁠1 Pita 5:⁠5.

Apsalom​​—⁠Em i Laik Kisim Bikpela Namba

10. Apsalom em i husat? Em i mekim wanem bilong grisim ol man ol i kam long king bilong stretim kot bilong ol?

¹⁰ Namba 3 pikinini bilong King Devit, Apsalom, em i gat laik long kisim bikpela namba. Em i wok long grisim ol man ol i kam long king bilong stretim kot bilong ol. Pastaim em i save tok olsem Devit i no tingim tru hevi bilong ol. Bihain em i tokaut stret: “Mi laik tumas bai mi yet mi stap jas bilong harim kot. Sapos mi stap olsem, orait mi inap skelim tok bilong ol man i gat hevi, na stretim gut tok bilong ol.” Na i no dispela tasol. Baibel i tok: “Sapos wanpela man i lukim Apsalom na i laik kam brukim skru long em, bilong givim biknem long em, orait Apsalom . . . i holim em na kis long em. Na Apsalom i save mekim olsem long olgeta Israel i kam long king bilong stretim hevi bilong ol.” Wanem samting i kamap long dispela? “Long dispela pasin, Apsalom i pulim tingting bilong ol man bilong Israel na ol i save laikim em.”​​—⁠2 Samuel 15:​1-6.

11. Apsalom i mekim wanem bilong stilim wok king bilong Devit?

¹¹ Apsalom i tingting strong long stilim wok king bilong papa bilong em. Faipela yia bipo, em i tokim ol wokman long kilim i dai namba wan pikinini man bilong Devit, em Amnon. Em i tok em i mekim olsem, long wanem, Amnon i bin mekim pasin nogut long Tamar, em susa bilong Apsalom. (2 Samuel 13:​28, 29) Ating long dispela taim tu Apsalom i laik kisim wok king na em i kilim Amnon i dai​—⁠nogut Amnon i kisim wok king.b Tasol maski i gat wanem as na em i kilim Amnon, taim i kamap na Apsalom i kisim wok king. Em i salim sampela man bilong bringim tok i go long olgeta hap bilong kantri na ol i tokim ol Israel olsem em i kamap king pinis.​​—⁠2 Samuel 15:⁠10.

12. Stori long olsem wanem pasin bikhet bilong Apsalom i mekim na em i kisim sem.

¹² Inap sampela taim, Apsalom i stap strong, long wanem, “namba bilong ol man i bihainim Apsalom i wok long kamap bikpela, na ol i kamap strongpela lain tru.” Dispela i mekim na King Devit i mas ranawe, nogut Apsalom i kilim em i dai. (2 Samuel 15:​12-​17) Tasol Apsalom i no stap king longpela taim​—⁠bihain liklik, Joap i kilim em i dai, na ol i tromoi bodi bilong em i go daun long wanpela bikpela hul na karamapim ol ston long em. Tingim​—⁠dispela man i strong long kisim wok king, taim em i dai, ol i no planim em gut!c Pasin bilong bikhet i mekim na Apsalom i kisim sem.​​—⁠2 Samuel 18:​9-​17.

No Ken Tingting Long Kisim Biknem

13. Bikpela laik long kisim biknem inap kamap olsem wanem long bel bilong Kristen?

¹³ Apsalom i bin kamap strong na bihain dispela strong i pinis, na dispela i mas givim tingting long yumi. Long nau, pasin bilong resis long winim narapela em i kamap strong, na planti man i save grisim bos bilong ol long ol switpela tok bilong kirapim em long laikim ol o givim sampela bikpela wok long ol. Na long wankain taim, ol i save litimapim ol yet long ai bilong man i stap nambatu bilong ol bilong kirapim em long helpim ol. Sapos yumi no was gut, dispela laik long kisim biknem inap kamap strong long bel bilong yumi. Sampela long taim bilong ol aposel ol i gat strongpela laik long kisim biknem, na ol aposel i mas givim strongpela tok long ol.​​—⁠Galesia 4:​17; 3 Jon 9, 10.

14. Bilong wanem yumi mas abrusim pasin bilong kisim biknem na litimapim yumi yet?

¹⁴ Man i laik stap nambawan na i “trai hat long mekim ol man i givim biknem long em,” Jehova i no laik bai em i stap long oganaisesen bilong Em. (Sindaun 25:27) Baibel i tok: “Bikpela, yu mas pasim maus bilong ol man i save mekim tok gris, na pasim maus bilong ol hambakman.” (Song 12:⁠3) Apsalom i bin mekim tok gris. Em i mekim switpela tok long ol man bilong mekim ol i helpim em​—⁠em i gat bikpela laik long kisim namba long bosim ol narapela. Tasol gutpela tru yumi stap namel long bikpela lain brata i bihainim tok bilong Pol olsem: “Yupela i no ken tingting long yupela yet tasol, na wok long kamapim biknem bilong yupela. Nogat. Yupela i mas daunim yupela yet na yupela i mas ting pasin bilong ol arapela i winim pasin bilong yupela.”​​—⁠Filipai 2:⁠3.

Sol​​—⁠Wanpela King i Save Les Kwik

15. Pastaim Sol i bihainim pasin daun olsem wanem?

¹⁵ Pastaim Sol​—⁠bihain em i kamap king bilong Israel​—⁠i bin bihainim pasin daun. Tingim samting i bin kamap taim em i yangpela. Taim profet bilong God, Samuel, i mekim gutpela tok long em, long pasin daun Sol i tok: “Mi bilong lain Benjamin, na em i liklik lain tasol insait long ol lain bilong yumi Israel. Na lain bilong papa bilong mi i no gat nem namel long ol lain Benjamin. Olsem na bilong wanem yu mekim dispela kain tok long mi?”​​—⁠1 Samuel 9:​21.

16. Samting Sol i mekim olsem wanem dispela i soim olsem em i save les kwik?

¹⁶ Tasol bihain pasin bilong Sol long daunim em yet em i pinis. Taim ol Israel i pait wantaim ol Filistia, em i go long Gilgal, em ples em i mas wetim Samuel i kam na mekim ol ofa long God. Taim Samuel i no kam long taim em i makim, Sol i bikhet na em yet i mekim ofa bilong paia i kukim olgeta. Taim em i mekim pinis, Samuel i kamap. Samuel i tokim em: “Yu bin mekim wanem?” Sol i tok: “Mi lukim ol manmeri i lusim mi na i go nabaut, na mi wetim yu olsem yu bin tok na yu no kamap. . . . Olsem na mi ting mi mas mekim ofa.”​​—⁠1 Samuel 13:​8-​12.

17. (a) Taim yumi tingim dispela samting long namba wan taim, bilong wanem i luk olsem i stret Sol i mekim dispela samting em i mekim? (b) Sol i les kwik na bilong wanem Jehova i krosim em long dispela samting em i mekim?

¹⁷ Ating pastaim yumi bai ting olsem i stret Sol i mekim dispela samting. Long wanem, ol manmeri bilong God ol i “pilim olsem ol i no inap winim pait” na ol i pret nogut tru. (1 Samuel 13:​6, 7) Tru, i no gat rong long mekim sampela wok long taim i stret long mekim.d Tasol tingim: Jehova inap lukim bel bilong ol man na em i save long tingting tru bilong yumi. (1 Samuel 16:⁠7) Olsem na ating Jehova i bin lukim sampela pasin bilong Sol em Baibel i no tokaut stret long en. Ating Jehova i lukim olsem Sol i gat pasin antap na dispela i bin kirapim em long les kwik. Sol em i king bilong olgeta Israel, olsem na taim em i mas wet long Samuel, long tingting bilong Sol, Samuel i olsem wanpela lapun profet i kam bihaintaim, ating dispela i mekim em i kros! Tasol maski wanem samting i mekim, Sol i pilim olsem Samuel i no kamap long taim stret, olsem na em yet i mas kirap long mekim ofa na sakim ol tok Samuel i bin givim long em. Wanem samting i kamap long dispela? Samuel i no mekim gutpela tok amamas long Sol olsem em i bin go pas na mekim dispela samting, nogat. Em i krosim Sol na tok: “Yu no inap i stap king longpela taim. Yu no bin bihainim tok bilong Bikpela.” (1 Samuel 13:​13, 14) Pasin bikhet i mekim na em tu i kisim sem.

No Ken Les Kwik

18, 19. (a) Stori long olsem wanem pasin bilong les kwik inap mekim na wanpela wokboi bilong God long nau inap mekim pasin bilong bikhet. (b) Wanem samting i helpim kongrigesen Kristen long wok gut?

¹⁸ Stori bilong dispela pasin bikhet bilong Sol i stap long Baibel bilong givim tingting long yumi. (1 Korin 10:11) Ating wantu yumi inap kros long ol pasin kranki bilong ol brata bilong yumi. Olsem Sol, yumi inap les kwik na ting olsem bilong mekim stret ol samting, yumi yet i mas kirap na mekim. Olsem: Sapos wanpela brata i gat save long stretim gut wok. Em i save kam stret long taim, na em i save gut long pasin bilong mekim ol wok insait long kongrigesen, na em i gat save long mekim gut tok na skulim ol man. Tasol olsem wanem sapos dispela brata i pilim olsem ol narapela i no inapim ol mak em yet i save bihainim, na ol i no save stretim gut ol wok? Yu ting dispela i givim rot long em long mekim tok i makim olsem em i les kwik long ol? Yu ting i orait long em i ken sutim tok long ol brata, olsem mekim tok i makim olsem sapos em yet i no stap na mekim wok, orait ol samting long kongrigesen bai i no inap wok gut? Man i mekim olsem em i mekim pasin bilong bikhet!

¹⁹ Long kongrigesen, wanem samting i save pasim gut ol Kristen wantaim? Pasin bilong stretim gut wok? mekim gut wok? bikpela save? Tru, ol dispela samting i save helpim kongrigesen long wok gut. (1 Korin 14:40; Filipai 3:​16; 2 Pita 3:​18) Tasol Jisas i tok wanpela bikpela mak bilong lain bilong em i olsem: Narapela i mas laikim tru narapela. (Jon 13:35) Olsem na tru ol elda i laik mekim stret ol samting, tasol ol i save kongrigesen i no olsem wanpela bisnis ol i mas bosim strong. Ol manmeri insait long kongrigesen ol i olsem sipsip ol elda i mas lukautim gut ol. (Aisaia 32:​1, 2; 40:11) Sapos ol elda i no daunim ol yet na bihainim ol dispela tok, dispela inap kamapim kros. Tasol pasin bilong mekim stret ol samting olsem God i save laikim, dispela i save kamapim bel isi.​​—⁠1 Korin 14:33; Galesia 6:​16.

20. Stori i kamap bihain long dispela bai toktok long wanem samting?

²⁰ Stori bilong Baibel long Kora, Apsalom, na Sol, i kamapim klia olsem pasin bilong bikhet i save mekim na man i kisim sem, olsem Sindaun 11:2 i tok. Tasol dispela ves bilong Baibel i tok moa: “Ol man i gat gutpela tingting [ol] i save daunim ol yet.” Pasin bilong daunim yu yet i wanem samting? Wanem sampela stori long Baibel inap helpim yu long kisim sampela save moa long dispela pasin? Na olsem wanem yumi inap kamapim dispela pasin long nau? Stori i kamap bihain long dispela bai toktok long ol dispela askim.

[Ol Futnot]

“Ol Man i Gat Gutpela Tingting i Save Daunim Ol Yet”

“Bikpela . . . i laik bai yumi mekim pasin olsem tasol. Yumi mas . . . daunim tingting bilong yumi yet na i stap wanbel wantaim God.”​​—⁠MAIKA 6:⁠8.

1, 2. Pasin bilong daunim yumi yet em i wanem samting? Na olsem wanem dispela pasin em i narapela kain long pasin bilong bikhet?

WANPELA aposel i gat bikpela nem em i no larim ol man i litimapim nem bilong em. Wanpela hetman bilong Israel i gat strongpela bel em i tok em i liklik long famili bilong papa bilong em. Nambawan man tru i winim olgeta narapela man em i tokaut olsem em i no gat namba long bosim olgeta samting. Dispela 3-pela man ol i mekim pasin bilong daunim ol yet.

² Pasin bilong daunim yumi yet em i narapela kain long pasin bilong bikhet. Man i daunim em yet em i no hambak long save bilong em na ting em i nambawan tru. Em i no mekim pasin antap, o hambak, o tingting strong long kisim namba. Man i daunim em yet em i save i gat sampela samting em i no inap mekim. Olsem na em i save harim tingting bilong ol narapela na tingim laik bilong ol.

3. Olsem wanem ol man i “daunim ol yet” ol i bihainim gutpela tingting?

³ I gat as na Baibel i tok: “Ol man i gat gutpela tingting i save daunim ol yet.” (Sindaun 11:⁠2) Man i daunim em yet em i gat gutpela tingting, long wanem, em i bihainim rot God i laikim, na em i givim baksait long pasin bilong bikhet, em dispela pasin i mekim na man i kisim sem. (Sindaun 8:​13; 1 Pita 5:⁠5) Wokabaut bilong planti wokboi bilong God i kamapim klia olsem pasin bilong daunim yumi yet em i savepasin. Orait nau yumi ken stori long dispela 3-pela man em paragraf wan i kolim.

Pol​​—⁠Wanpela “Wokman”

4. Wanem sampela gutpela wok Pol i mekim?

⁴ Pol i gat bikpela nem namel long ol Kristen bilong pastaim. Insait long ol yia em i autim tok, em i raun inap planti tausen kilomita long solwara na long rot, na em i kamapim planti kongrigesen. Na tu, Jehova i mekim gut long Pol na givim sampela driman long em na presen bilong mekim kain kain tok ples. (1 Korin 14:18; 2 Korin 12:​1-5) Na em i kirapim Pol long raitim 14-pela pas, nau ol i hap bilong Ol Skripsa Grik. Tru tumas, yumi ken tok em i wok strong tru, winim olgeta narapela aposel.​​—⁠1 Korin 15:⁠10.

5. Olsem wanem Pol i soim olsem em i no ting em i winim ol narapela?

⁵ Tru, Pol i go pas long mekim wok Kristen, tasol em i no amamas long ol man i litimapim nem bilong em na em i no hambak long namba bilong em. Pol i gat pasin bilong daunim em yet. Em i tok em i “liklik tumas namel long ol aposel,” na em i tok moa: “I no inap ol man i kolim mi aposel, long wanem, pastaim mi bin wok long bagarapim sios bilong God.” (1 Korin 15:⁠9) Bipo Pol i bin bagarapim ol Kristen, olsem na em i no lusim tingting olsem long marimari bilong God tasol em inap stap pren bilong God na holim ol bikpela wok. (Jon 6:​44; Efesus 2:⁠8) Olsem na ol bikpela wok Pol i mekim long autim tok, em i no ting dispela i mekim na em i winim ol narapela, nogat.​​—⁠1 Korin 9:​16.

6. Olsem wanem Pol i daunim em yet long ol wok em i mekim wantaim ol Korin?

⁶ Pol i daunim em yet na dispela i kamap klia moa yet long ol wok em i mekim wantaim ol Korin. Sampela Korin ol i mekim planti tok amamas long ol wasman ol i ting ol i gat bikpela nem, olsem Apolos, Pita, na Pol yet. (1 Korin 1:​11-​15) Tasol Pol i no kirapim ol Korin long litimapim nem bilong em, na em i no mekim wok long dispela tok amamas bilong helpim em yet. Taim em i go lukim ol, em i no “mekim ol kain kain bikpela toktok.” Pol i toktok long em yet na ol wanwok bilong em olsem: “Yupela i mas ting olsem mipela i wokman bilong Krais na mipela i gat wok bilong lukautim gut ol tok hait bilong God.”a​​—⁠1 Korin 2:​1-5; 4:⁠1.

7. Olsem wanem Pol i daunim em yet taim em i givim strongpela tok long ol brata Kristen?

⁷ Na tu, taim Pol i mas givim strongpela tok bilong stretim o stiaim ol narapela, em i save daunim em yet. Pol i gat namba olsem aposel, tasol em i no laik bai long dispela as ol i bihainim tok bilong em, nogat; em i laik bai “bikpela marimari bilong God” na “pasin bilong laikim tru ol arapela” i kirapim ol long bihainim tok bilong em. (Rom 12:​1, 2; Filemon 8, 9) Bilong wanem Pol i mekim olsem? Long wanem, em i tingim em yet olsem wanpela ‘wanwok’ bilong ol brata bilong em​—⁠em i no ting em i gat wok long ‘bosim bilip bilong ol.’ (2 Korin 1:​24) Pol i daunim em yet na dispela i mekim na ol kongrigesen Kristen long taim bilong ol aposel ol i laikim em tru.​​—⁠Aposel 20:​36-​38.

Stretpela Tingting Long Ol Gutpela Wok Yumi Holim

8, 9. (a) I gat wanem as na yumi no ken ting yumi winim ol narapela? (b) Ol man i holim sampela wok, olsem wanem ol i ken daunim ol yet?

⁸ Pol i stap gutpela piksa tru bilong ol Kristen long nau i ken bihainim. Maski wanem wanem wok yumi holim, yumi no ken ting yumi winim ol narapela. Pol i tok: “Sapos wanpela man i ting em i gat nem, tasol em i no gat nem, orait dispela man i giamanim em yet.” (Galesia 6:⁠3) Bilong wanem i olsem? Long wanem, “yumi olgeta man yumi bin mekim sin.” (Rom 3:23; 5:12) Yumi no ken lusim tingting olsem yumi olgeta i bin kisim sin na dai long Adam. Ol bikpela wok yumi holim i no mekim na yumi winim ol narapela sinman, nogat. (Saveman 9:​2) Olsem Pol, long marimari bilong God tasol yumi inap kamap pren bilong God na holim sampela wok bilong em.​​—⁠Rom 3:​12, 24.

⁹ Olsem na man i gat pasin bilong daunim em yet, em i no hambak long ol gutpela wok em i holim o long ol wok samting em i bin mekim. (1 Korin 4:⁠7) Taim em i givim tok bilong stretim o stiaim ol narapela, em i stap olsem wanwok bilong ol​—⁠em i no stap bos bilong ol. Olsem na i no stret sapos wanpela man i save tru long mekim wanpela wok em i kirapim ol narapela long litimapim nem bilong em, o mekim wok long dispela tok amamas bilong helpim em yet. (Sindaun 25:27; Matyu 6:​2-4) Ol narapela i mas litimapim nem bilong yumi​—⁠yumi no ken kirapim ol long mekim. Tasol sapos narapela i litimapim nem bilong yumi, yumi no ken larim dispela i mekim na yumi ting save na pasin bilong yumi i winim ol narapela, nogat.​​—⁠Sindaun 27:2; Rom 12:⁠3.

10. Stori long olsem wanem sampela man, i olsem ol i no gat nem, ol i “stap gutpela tru long pasin bilong bilip.”

¹⁰ Taim ol i makim yumi long holim sampela wok, pasin bilong daunim yumi yet bai helpim yumi na bai yumi no apim yumi yet​—⁠yumi no laik bai ol narapela i tingim ol wok yumi mekim na ting long dispela as tasol kongrigesen i save wok gut, nogat. Olsem: Ating yumi save gut long pasin bilong mekim tok. (Efesus 4:​11, 12) Tasol sapos yumi gat pasin bilong daunim yumi yet, bai yumi save olsem, sampela bikpela samting ol brata i lain long en long ol miting bilong kongrigesen, ol i no kisim long ol brata i mekim tok long pletfom, nogat. Olsem: Taim yumi lukim wanpela papa o mama wanpis i kam oltaim long Haus Kingdom wantaim ol pikinini, o wanpela man i bel hevi i kam oltaim long ol miting maski planti taim em i pilim olsem em i samting nating tasol, o wanpela yangpela i wok long kamap strong long ol samting bilong spirit, maski long skul na long sampela narapela hap i gat planti pasin bilong paulim em, dispela i save strongim tru bel bilong yumi, a? (Song 84:10) Tru, ating ol dispela brata sista i stap olsem man i no gat nem. Ating ol narapela i no save long ol samting i kamap bilong traim bilip bilong ol. Tasol ol dispela brata sista i “stap gutpela tru long pasin bilong bilip”​—⁠ol narapela i gat bikpela nem ol i no winim ol long dispela samting. (Jems 2:⁠5) Pasin bilong i stap gut long Jehova, em dispela samting tasol i mekim na Jehova i orait long yumi.​​—⁠Matyu 10:22; 1 Korin 4:⁠2.

Gideon​​—⁠“Samting Nating” Long Famili Bilong Em

11. Olsem wanem Gideon i daunim em yet taim em i toktok wantaim ensel bilong God?

¹¹ Gideon em wanpela yangpela man bilong lain Manase, na em i bin stap long taim ol Israel i gat hevi. Inap 7-pela yia lain bilong God i bin kisim hevi long han bilong ol Midian. Tasol nau taim i kamap pinis bilong Jehova i kisim bek lain bilong em. Wanpela ensel i kamap long Gideon na i tok: “Strongpela man bilong pait, Bikpela i stap wantaim yu.” Gideon i gat pasin bilong daunim em yet, olsem na em i no hambak long dispela tok amamas. Long pasin daun em i tokim ensel: “Bikman, mi laik askim yu long wanpela samting. Sapos Bikpela i stap wantaim mipela, bilong wanem ol dispela samting i kamap long mipela?” Ensel i stretim tingting bilong Gideon na tokim em: “Yu go . . . na yu kisim bek ol Israel long han bilong ol Midian.” Gideon i mekim wanem? Em i no kirap wantu tasol na ting long dispela rot em inap kamap bikpela man, nogat. Gideon i bekim tok olsem: “Bikpela, bai mi kisim bek ol Israel olsem wanem? Lain bilong mi i no gat strong. Ol arapela lain bilong Manase i winim mipela. Na mi samting nating long famili bilong mi.” Man! Em i mekim pasin bilong daunim em yet!​​—⁠Hetman 6:​11-​15.

12. Olsem wanem Gideon i bihainim gutpela tingting long mekim dispela wok God i givim long em?

¹² Taim Jehova i no salim Gideon i go yet long pait, em i traim em. Em i mekim olsem wanem? Em i tokim em long brukim alta papa bilong em i bin wokim bilong lotu long god Bal, na katim pos holi i sanap klostu long alta. Bilong mekim olsem, Gideon i mas strongim bel, tasol em i daunim em yet na bihainim gutpela tingting tu. Em i no mekim long ai bilong ol man​—⁠em i mekim long taim bilong tudak, taim ol man i no inap lukim em. Na tu, Gideon i tingting gut. Em i kisim 10-pela wokboi i go wantaim em​—⁠ating sampela ol i bilong was i stap, na sampela ol i bilong helpim em long brukim dispela alta na pos holi.b Jehova i helpim em na Gideon i mekim tru dispela wok, na bihain God i mekim wok long em bilong kisim bek ol Israel long han bilong ol Midian.​​—⁠Hetman 6:​25-​27.

Ol i Daunim Ol Yet na Bihainim Gutpela Tingting

13, 14. (a) Taim ol i askim yumi long mekim wanpela wok, olsem wanem yumi ken mekim pasin bilong daunim yumi yet? (b) Olsem wanem Brata A. H. Macmillan i stap gutpela piksa long pasin bilong daunim em yet?

¹³ Pasin bilong Gideon long daunim em yet inap lainim yumi long planti samting. Olsem: Taim ol i askim yumi long mekim wanpela wok, yumi save mekim wanem? Yumi tingting pastaim long biknem na namba yumi bai kisim long dispela? O yumi daunim yumi yet na beten na tingim olsem yumi inap mekim tru dispela wok o nogat? Brata A. H. Macmillan, em i pinisim wok bilong em long graun long 1966, em i stap gutpela piksa long dispela samting. Wanpela taim, C. T. Russell, namba wan presiden bilong Sosaiti Was Taua, em i askim Brata Macmillan long kamapim tingting bilong em long husat inap mekim wok olsem presiden taim em i no stap. Tupela i toktok i go, tasol maski i no gat wanpela samting i pasim Brata Macmillan long mekim dispela wok, i no gat wanpela taim em i tok em yet inap mekim. Orait nau Brata Russell i askim Brata Macmillan long kisim dispela wok. Sampela yia bihain, Brata Macmillan i raitim tok olsem: “Mi kirap nogut tru. Mi wok long tingim dispela askim na inap longpela taim liklik mi beten long en. Bihain mi tokim em olsem mi bai amamas long mekim olgeta samting mi inap mekim bilong helpim em.”

¹⁴ I no longtaim bihain na Brata Russell i dai, na i no gat presiden bilong Sosaiti Was Taua. Taim Brata Russell i bin mekim laspela raun bilong em long autim tok, Brata Macmillan i lukautim wok, olsem na wanpela brata i tokim em: “Mac, ating yu inap kamap presiden. Taim Brata Russell i no stap, yu bin stap olsem mausman bilong em na em i bin tokim mipela olgeta long bihainim tok bilong yu. Em i go na em i no kam bek. I luk olsem yu yet i mas holim dispela wok.” Brata Macmillan i tok: “Brata, mi no gat dispela tingting. Dispela wok i bilong Bikpela, na ol wok yumi holim insait long oganaisesen bilong Bikpela, em ol wok Bikpela tasol i givim long yumi. Mi bilip olsem mi no dispela man bilong holim dispela wok.” Orait nau Brata Macmillan i kamapim nem bilong narapela bilong kamap presiden. Olsem Gideon, em tu i ting ol narapela i winim em long mekim wok​—⁠em wanpela pasin yumi tu i mas kisim.

15. Olsem wanem yumi ken bihainim gutpela tingting taim yumi autim tok?

¹⁵ Taim yumi mekim wok bilong yumi, yumi tu i mas bihainim pasin bilong daunim yumi yet. Gideon i bihainim gutpela tingting, na em i wok strong long em i no ken skrapim bel bilong ol birua bilong em sapos i no gat wok long mekim. Olsem tasol, taim yumi autim tok, yumi mas daunim yumi yet na bihainim gutpela tingting taim yumi toktok wantaim ol narapela. Tru, yumi insait long wanpela pait bilong spirit bilong daunim “olgeta kain tingting” i pas tru long bel bilong ol. (2 Korin 10:​4, 5) Tasol yumi no ken mekim ol tok i olsem daunim ol o i kirapim ol long bel nogut long ol tok yumi autim. Yumi mas harim tingting bilong ol, na kamapim ol tok yumi wanbel long en, na bihain stori long ol gutpela samting ol bai amamas long harim.​​—⁠Aposel 22:​1-3; 1 Korin 9:​22; KTH 21:⁠4.

Jisas​​—⁠Em i Daunim Em Yet

16. Olsem wanem Jisas i soim olsem em i save i gat sampela samting em i no inap long mekim?

¹⁶ Jisas Krais i stap gutpela piksa tru long pasin bilong daunim em yet.c Maski Jisas i pas gut tru wantaim Papa bilong em, em i tokaut olsem i gat sampela samting em i no gat namba long mekim. (Jon 1:​14) Olsem: Taim mama bilong Jems na Jon i tokim Jisas long em i laik bai tupela pikinini bilong em i ken sindaun klostu long Jisas long kingdom bilong em, Jisas i tok: “Husat bai i sindaun long han sut na long han kais bilong mi, dispela em i no samting bilong mi long makim.” (Matyu 20:​20-​23) Long narapela taim, Jisas i tok: “Mi no inap mekim wanpela samting long tingting bilong mi yet. . . . Mi no save bihainim laik bilong mi yet. Nogat. Mi bihainim laik bilong Papa, em i bin salim mi na mi kam.”​​—⁠Jon 5:​30; 14:28; Filipai 2:​5, 6, NW.

17. Olsem wanem Jisas i daunim em yet long ol wok em i mekim wantaim ol narapela?

¹⁷ Jisas i winim ol man bilong graun long olgeta samting, na em i gat bikpela namba tru em i bin kisim long Papa bilong em, Jehova​—⁠i no gat narapela man i gat bikpela namba olsem. Tasol long ol wok em i mekim wantaim lain bilong em, em i daunim em yet. Em i no kamapim bikpela save bilong em na daunim ol. Em i tingim gut ol na ol samting ol i mas kisim. (Matyu 15:32; 26:​40, 41; Mak 6:​31) Olsem na maski Jisas i gutpela olgeta, em i no ting ol narapela i mas mekim wok i nambawan olgeta. Em i no askim ol disaipel long mekim wanpela samting ol i no inap long mekim, na em i no tokim ol long karim sampela hevi ol i no inap long karim. (Jon 16:12) Em nau, yumi ken save i gat as na planti man i harim tok bilong em ol i kisim nupela strong!​​—⁠Matyu 11:⁠29.

Bihainim Pasin Bilong Jisas ​—⁠Em i Daunim Em Yet

18, 19. Jisas i daunim em yet na olsem wanem yumi inap bihainim dispela pasin bilong em (a) long tingting bilong yumi long yumi yet, na (b) long pasin yumi mekim long ol narapela?

¹⁸ Nambawan man tru i winim olgeta narapela man em i save daunim em yet, olsem na yumi tu i mekim kain pasin olsem na daunim yumi yet. Ol man i gat sin planti ol i no laik tokaut olsem ol i no gat namba long bosim olgeta samting. Tasol ol Kristen i save wok strong long bihainim pasin bilong Jisas na daunim ol yet. Ol i no gat pasin antap​—⁠ol i redi long givim wok long ol man ol inapim mak bilong kisim, na tu, ol i redi long bihainim tok bilong man i gat namba long soim rot long ol. Narapela i wok gut wantaim narapela bambai ol samting long kongrigesen i ken “bihainim stret ol gutpela pasin bilong lotu.”​​—⁠1 Korin 14:⁠40.

¹⁹ Na pasin bilong daunim yumi yet bai kirapim yumi long isi long ol narapela​—⁠yumi no ken askim ol long mekim wanpela samting ol i no inap long mekim​—⁠na yumi mas tingim ol samting ol i mas kisim. (Filipai 4:⁠5) Ating yumi gat sampela save na pasin ol narapela i no gat. Tasol sapos yumi gat pasin bilong daunim yumi yet, bai yumi no ting ol narapela i mas mekim olgeta samting wankain stret olsem yumi gat laik long ol i mekim. Yumi save i gat sampela samting olgeta wan wan i no inap long mekim, olsem na yumi mas redi long karamapim ol liklik pasin kranki bilong ol. Pita i tok: “Yupela i mas holim strong pasin bilong laikim tru ol arapela manmeri bilong God, long wanem, pasin bilong laikim tru ol arapela, em i save karamapim planti sin na i winim olgeta arapela pasin.”​​—⁠1 Pita 4:⁠8.

20. Yumi ken mekim wanem sapos yumi lukim olsem sampela taim yumi no daunim yumi yet?

²⁰ Olsem yumi kisim save pinis, man i gat gutpela tingting em i save daunim em yet. Tasol olsem wanem sapos yu lukim olsem sampela taim yu no daunim yu yet o yu mekim pasin bilong bikhet? Orait no ken bel hevi. Bihainim pasin bilong Devit, em i beten: “Mi wokman bilong yu, na yu mas was gut long mi, bai mi no ken bikhet. Yu no ken larim pasin bilong bikhet i bosim mi.” (Song 19:13) Sapos yumi bihainim pasin bilong bilip bilong ol man olsem Pol, Gideon, na Jisas Krais, bai yumi pilim dispela tok i stret tru: “Ol man i gat gutpela tingting i save daunim ol yet.”​​—⁠Sindaun 11:⁠2.

[Ol Futnot]